Yokuthoma YamaKhosi 19:1-21
19 Nje-ke u-Arhabi+ watjela uJezebheli+ koke okwenziwe ngu-Eliya nendlela abulele ngayo boke abaphorofidi ngesabula.+
2 Khonokho uJezebheli wathumela isithunywa ku-Eliya wathi: “Kwanga abozimu bangangijezisa khulu nange kungafika isikhathesi kusasa ngingakakwenzi njengomunye wabo!”
3 U-Eliya nakezwa lokho wathukwa, wasikima wabaleka.+ Wafika eBheritjheba,+ ekungeyakwaJuda,+ watjhiya umsizakhe lapho.
4 Wathatha ikhambo lelanga linye ukuya emmangweni, wafika wahlala ngaphasi kwesithukghwana somuthi, wabawa ukufa. Wathi: “Kwanele! Nje-ke Jehova ngibawa uthathe ipilwami,+ ngombana angibadluli ngalitho abokhokho bami.”
5 Ngemva kwalokho, walala ngaphasi kwesithukghwana somutheso. Kodwana kungakalindeleki ingilozi yamthinta+ yathi kuye: “Vuka udle.”+
6 Wathi nakavusa amehlo, hlanu kwehlokwakhe wabona kunoburotho obuyindulungu ematjeni atjhisako nomjeka wamanzi. Wadla bewasela, walala godu.
7 Ngokukhamba kwesikhathi ingilozi kaJehova yabuya kwesibili yamthinta yathi: “Vuka udle ngombana ikhambo ozolithatha lingaphezu kwamandlakho.”
8 Nje-ke wavuka, wadla bewasela begodu aqiniswe kukudlokho, wakhamba amalanga ama-40 nobusuku obuma-40 bewayokufika eRhorebe, intaba kaZimu weqiniso.+
9 Nakafika lapho wangena ngerholweni+ walala khona; kwafika ilizwi lakaJehova kuye, lathi: “Wenzani lapha Eliya?”
10 Waphendula wathi: “Ngimthande khulu uJehova uZimu wamabutho+ ngombana abantu bakwa-Israyeli balahle isivumelwano sakho,+ bagirize ama-aldarakho, babulala nabaphorofidi bakho ngesabula,+ kusele mina ngedwa. Nje-ke bafuna ukungibulala.”+
11 Kodwana wathi: “Phuma ujame entabeni phambi kwakaJehova.” Qala! UJehova bekadlula+ ngaku-Eliya, umoya omkhulu onamandla bewuhlukanisa iintaba, uqeqebula namadwala phambi kwakaJehova,+ kodwana uJehova bekangekho emoyeni loyo. Ngemva komoya, kwaba nokusikinyeka kwephasi+ kodwana uJehova bekangekho ekusikinyekeni kwephasokho.
12 Ngemva kokusikinyeka kwephasi kwaba nomlilo+ kodwana uJehova bekangekho emlilweni loyo. Ngemva komlilo, kwaba nelizwi elipholileko, elikhulumela phasi.+
13 Msinyana u-Eliya nakalizwako, wavala ubuso ngesambatho sakhe sobuphorofidi+ waphuma wayokujama emnyango werholo. Ilizwi lambuza lathi: “Wenzani lapha Eliya?”
14 Waphendula wathi: “Ngimthande khulu uJehova uZimu wamabutho ngombana abantu bakwa-Israyeli balahle isivumelwano sakho,+ bagirize ama-aldarakho, babulala nabaphorofidi bakho ngesabula, kusele mina ngedwa. Nje-ke bafuna ukungibulala.”+
15 UJehova wathi kuye: “Khamba ubuyele emmangweni weDamaseku. Nawufika lapho, uzese uRhazayeli+ bona abe yikosi yeSiriya,
16 uzese uJehu+ umzukulwana kaNimtjhi bona abe yikosi yakwa-Israyeli, uzese no-Elitjha* indodana kaTjhafathi ovela e-Abela-Merhola bona abe mphorofidi esikhundleni sakho.+
17 Nanyana ngubani ophunyurha esabuleni+ kaRhazayeli, uJehu uzombulala;+ nanyana ngubani ophunyurha esabuleni kaJehu, u-Elitjha uzombulala.+
18 Ngisese nabanye abazii-7 000 kwa-Israyeli,+ boke labo akhenge bakhothamele uBhali+ nemilomabo akhenge immange.”+
19 Nje-ke wasuka lapho wafumana u-Elitjha indodana kaTjhafathi alima neempani zeenkunzi ezili-12 phambi kwakhe, yena bekalima ngesipani se-12. U-Eliya waya kuye waphosela isambatho sakhe sobuphorofidi+ kuye.
20 Khonokho u-Elitjha watjhiya iinkunzi wagijima ngemva kwaka-Eliya wathi: “Ngibawa ungivumele ngiyokulayelisa* ubaba nomma. Ngemva kwalokho, ngizokulandela.” Wathi kuye: “Khamba, angikwaleli.”
21 Wabuyela emva wathatha isipani seenkunzi wenza ngaso umhlatjelo, wathatha iintlabagelo ebekalima ngazo wapheka inyama yeenkunzi, wayinikela abantu badla. Ngemva kwalokho, wasikima walandela u-Eliya, wathoma ukuba msizakhe.+
