Yokuthoma YamaKhosi 15:1-34
15 Ngomnyaka we-18 wokubusa kweKosi uJerobhowamu+ indodana kaNebathi, u-Abiyamu waba yikosi yakwaJuda.+
2 Wabusa eJerusalema iminyaka emithathu. Igama lakanina bekunguMaka+ umzukulu ka-Abitjhalomu.
3 Waragela phambili enza zoke izono ezenziwa nguyise phambi kwakhe, ihliziywakhe beyingakapheleli kuJehova uZimakhe njengehliziyo kakhokhwakhe uDavida.
4 Kodwana ngebanga lakaDavida,+ uJehova uZimakhe wamnikela isibani eJerusalema+ ngokubeka indodanakhe bona ibe yikosi ngemva kwakhe, nangokwenza iJerusalema lihlale likhona.
5 Ngombana uDavida wenza okulungileko emehlweni kaJehova, akhenge aphambuke kinanyana yini uZimu amyala bona ayenze yoke imihla yokuphila kwakhe, ngaphandle kwendaba ka-Uriya umRhiti.+
6 Bekunepi phakathi kwakaRerhobhowamu noJerobhowamu yoke imihla yokuphila kwakhe.+
7 Malungana nawo woke omunye umlando ka-Abiyamu, koke akwenzileko, akukatlolwa na encwadini yomlando weenkhathi zamakhosi wakwaJuda?+ Godu kwaba nepi phakathi kwaka-Abiyamu noJerobhowamu.+
8 Ngemva kwalokho, u-Abiyamu walaliswa nabokhokho bakhe begodu bambulunga eDorobheni lakaDavida; indodanakhe u-Asa+ yaba yikosi esikhundleni sakhe.+
9 Ngomnyaka wama-20 wokubusa kweKosi uJerobhowamu wakwa-Israyeli, u-Asa wathoma ukubusa kwaJuda.
10 Wabusa eJerusalema iminyaka ema-41. Igama lakagogwakhe bekunguMaka+ umzukulu ka-Abitjhalomu.
11 U-Asa wenza okulungileko emehlweni kaJehova,+ njengokhokhwakhe uDavida.
12 Waqotha enarheni iingwadla zamadoda zethempelini+ bewasusa zoke iinthombe ezinyenyisako* ebezenziwe bokhokho bakhe.+
13 Wasusa ngitjho noMaka+ ugogwakhe esikhundleni sokuba yindlovukazi ngombana wenza isithombe esinyenyisako bona kulotjhwe isigodo esicwengileko.* U-Asa waqunta isithombeso+ wasitjhisela ngemRhobeni iKidroni.+
14 Kodwana iindawo eziphakemeko akhenge zisuswe.+ Nanyana kunjalo, ihliziyo ka-Asa beyiphelele kuJehova ukuphila kwakhe koke.
15 Waletha ngendlini kaJehova izinto yena noyise abazenza zacwengeka, isiliva, igolide nezitja ezihlukahlukeneko.+
16 Bekuhlala kunepi phakathi kwaka-Asa noBhatjha+ ikosi yakwa-Israyeli.
17 Nje-ke uBhatjha iKosi yakwa-Israyeli weza azokulwa noJuda bese wathoma ukwakha* iRama+ bonyana akhandele nanyana ngubani bona aphume namkha angene enarheni ka-Asa iKosi yakwaJuda.+
18 Khonokho u-Asa wathatha loke isiliva negolide ebelisele ngemabulungelweni wamagugu wendlu kaJehova nangemabulungelweni wamagugu wendlu yekosi* walinikela iinsebenzi zakhe. IKosi u-Asa yalithumela kuBhen-Hadadi indodana kaThabrimoni indodana kaRheziyoni, ikosi yeSiriya,+ obekahlala eDamaseku, yathi:
19 “Kunesivumelwano phakathi kwami nawe, naphakathi kwakababa noyihlo. Ngikuthumela isipho sesiliva negolide. Ngibawa uphule isivumelwano sakho noBhatjha iKosi yakwa-Israyeli, ukwenzela bonyana asuke kimi.”
20 UBhen-Hadadi wayilalela iKosi u-Asa, wathumela iinduna zamabuthwakhe bona ziyokusahlela amadorobho wakwa-Israyeli, zahlula i-Iyoni,+ iDani,+ i-Abeli-Bhethe-Makha, iKinerethi yoke nayo yoke inarha yakwaNafitali.
21 Kuthe uBhatjha nakezwa ngalokhu, msinyana walisa ukwakha iRama waragela phambili nokuhlala eTiritsa.+
22 Nje-ke iKosi u-Asa yabiza boke abantu bakwaJuda, azange itjhiye namunye, bathwala amatje neengodo zeRama uBhatjha ebekakha* ngazo, iKosi u-Asa yakha ngazo iGeba+ kwaBhenjamini neMitsipha.+
23 Malungana nawo woke omunye umlando ka-Asa, woke amandlakhe nakho koke akwenzileko namadorobho awakhako,* akukatlolwa na encwadini yomlando weenkhathi zamakhosi wakwaJuda? Kodwana nasele aluphele waphathwa bulwele beenyawo.+
24 Nje-ke u-Asa walaliswa nabokhokho bakhe, wabulungwa nabo eDorobheni lakaDavida ukhokhwakhe; indodanakhe uJehotjhafathi+ yaba yikosi esikhundleni sakhe.
25 UNadabi+ indodana kaJerobhowamu waba yiKosi kwa-Israyeli ngomnyaka wesibili wokubusa kwaka-Asa ikosi yakwaJuda, wabusa kwa-Israyeli iminyaka emibili.
26 Waragela phambili nokwenza okumbi emehlweni kaJehova, wakhamba ngendlela kayise+ nesonweni sakhe abangela u-Israyeli bona asenze.+
27 UBhatjha indodana ka-Arhiya wendlu ka-Isakari waluka amano wokulwa naye, uBhatjha wamsahlela eGibhethoni,+ okungeyamaFilista, ngesikhathi uNadabi no-Israyeli woke bavimbezele iGibhethoni.
28 Nje-ke ngomnyaka wesithathu wokubusa kwaka-Asa iKosi yakwaJuda, uBhatjha wabulala uNadabi bewaba yikosi esikhundleni sakhe.
29 Msinyana ngemva kokobana abe yikosi, wasahlela yoke indlu kaJerobhowamu. Akhenge avumele namunye ongewakaJerobhowamu bona asale aphila; wabarhayila ngokuvumelana nelizwi lakaJehova alikhuluma ngencekwakhe u-Arhiya weTjhilo.+
30 Lokhu kwenzeka ngebanga lezono ezenziwa nguJerobhowamu, wabangela no-Israyeli bona azenze nangebanga lokuthi wamsilinga khulu uJehova uZimu ka-Israyeli.
31 Malungana nawo woke omunye umlando kaNadabi, koke akwenzileko, akukatlolwa na encwadini yomlando weenkhathi zamakhosi wakwa-Israyeli?
32 Bekuhlala kunepi phakathi kwaka-Asa noBhatjha iKosi yakwa-Israyeli.+
33 Ngomnyaka wesithathu wokubusa kwaka-Asa iKosi yakwaJuda, uBhatjha indodana ka-Arhiya waba yikosi yakwa-Israyeli woke eTiritsa bewabusa iminyaka ema-24.+
34 Waragela phambili nokwenza okumbi emehlweni kaJehova,+ wakhamba ngendlela kaJerobhowamu nesonweni sakhe abangela u-Israyeli bona asenze.+
Imitlolo Ephasi
^ Ibizo lesiHebheru elisetjenziswe la lingahlobana nebizo elithi “ubulongwe” begodu lisetjenziselwe ukuveza ukunyenya.
^ Qala Ihlathululo.
^ Namkha “ukuqinisa; ukuvuselela.”
^ Namkha “wesigodlo.”
^ Namkha “ebekaqinisa; ebekavuselela.”
^ Namkha “awaqinisako; awavuselelako.”
