Yokuthoma YamaKhosi 11:1-43
11 Ngaphandle kwendodakazi kaFaro,+ iKosi uSolomoni yabuye yathanda abanye abafazi abanengi abavela kwezinye iinarha:+ abafazi bakwaMowabi,+ bakwa-Amoni,+ bakwa-Edomu, abamaTsidoni,+ nabamaRhiti.+
2 Bebavela eentjhabeni uJehova athi ngazo kuma-Israyeli: “Ningangeni kizo* begodu zingangeni kini ngombana zizokudosa iinhliziyo zenu bona zilandele abozimu bazo.”+ Kodwana uSolomoni wanamathela kibo* wabathanda.
3 Waba nabafazi abama-700 egade bamakhosazana namakhohlo ama-300, kancanikancani abafazi bakhe badosa ihliziywakhe.
4 Kwathi uSolomoni nasele aluphele,+ abafazi bakhe badosela ihliziywakhe ekulandeleni* abanye abozimu,+ ihliziywakhe beyingakapheleli kuJehova uZimakhe njengehliziyo kaDavida uyise.
5 Yeke uSolomoni walandela u-Atjhitarothi+ uzimukazi wamaTsidoni, noMilikomu+ uzimu onyenyisako wama-Amoni.
6 USolomoni wenza okungakalungi phambi kwamehlo kaJehova, akhenge alandele uJehova ngokupheleleko njengombana kwenza uyise uDavida.+
7 Kungesikhatheso uSolomoni akhela uKemotjhi, uzimu onyenyisako wakwaMowabi indawo ephakemeko,+ entabeni ephambi kweJerusalema, wakhela noMoleki,+ uzimu onyenyisako wama-Amoni.+
8 Ngilokho akwenzela boke abafazi bakhe abatjhili ebebathunyisa intuthu yomhlatjelo benza nemihlatjelo kibozimu babo.
9 UJehova kwamsilinga okwenziwe nguSolomoni, ngombana ihliziywakhe besele itjhidile kuJehova uZimu ka-Israyeli,+ owabonakala kuye kabili+
10 wamyelelisa ngayo into ayenzako le bona angalandeli abanye abozimu.+ Kodwana azange alalele lokho uJehova amyala ngakho.
11 Nje-ke uJehova wathi kuSolomoni: “Ngebanga lokuthi wenze lokhu begodu azange usiphethe isivumelwano sami nemiyalo engakuyala ngayo, nakanjani ngizowuhluthula umbuso kuwe, ngiwunikele esinye seensebenzi zakho.+
12 Nanyana kunjalo ngebanga lakayihlo uDavida, angekhe ngikwenze lokhu wena usaphila. Ngizowuhluthula esandleni sendodanakho+
13 kodwana angekhe ngiwuhluthule woke umbuso.+ Indodanakho ngizoyipha ikoro yinye,+ ngebanga lakaDavida incekwami nangebanga leJerusalema, idorobho engilikhethileko.”+
14 Yeke uJehova wavusela uSolomoni umphikisi,+ uRhadadi umEdomu, womndeni webukhosini bakwa-Edomu.+
15 Ngesikhathi uDavida ahlula u-Edomu,+ uJowabi isikhulu sebutho wakhamba wayokubulunga abarhayiliweko bewalinga ukubulala woke amadoda kwa-Edomu.
16 (Ngombana uJowabi no-Israyeli woke bahlala lapho iinyanga ezisithandathu bekwaba kulapho sebabulele woke amadoda wakwa-Edomu.)
17 Kodwana uRhadadi wabaleka nezinye iinsebenzi zakayise ezima-Edomu batjhinga eGibhide; uRhadadi bekasesemsanyana ngesikhatheso.
18 Basuka kwaMidiyani baya eParana. Bathatha amadoda eParana+ bakhamba nawo baya eGibhide kuFaro ikosi yeGibhide, yona yamnikela indlu, yamabela isibonelelo sokudla beyamnikela inarha.
19 UFaro wamthanda khulu uRhadadi kangangobana wabe wamtjhadisa nodadwabo kamkakhe, uThaphenesi indlovukazi.
20 Ngokukhamba kwesikhathi, udadwabo kaThaphenesi wambelethela indodana, uGenubathi begodu uThaphenesi wamkhulisela kwaFaro, yeke uGenubathi wahlala kwaFaro hlangana namadodana kaFaro.
21 URhadadi wezwa aseGibhide ukuthi uDavida ulaliswe nabokhokho bakhe+ nokuthi uJowabi isikhulu sebutho uhlongakele.+ Yeke uRhadadi wathi kuFaro: “Ngibawa ungivumele ngibuyele enarhenekhethu.”
22 Kodwana uFaro wathi kuye: “Utlhogeni engaka sewufuna ukubuyela enarhenekhenu nje?” Wamphendula wathi: “Angikatlhogi litho kodwana ngibawa isiphande.”
23 UZimu wavusela uSolomoni omunye umphikisi,+ uRezoni indodana ka-Eliyada, owabaleka ekosinakhe, uHadadi-Ezeri+ ikosi yeTsoba.
24 Wazibuthelela amadoda bewaba sikhulu sebutho lababadlelezeli ngesikhathi uDavida ahlula* abantu beTsoba.+ Yeke waya eDamaseku, wahlala lapho begodu wathoma ukubusa eDamaseku.+
25 Waba mphikisi ka-Israyeli yoke imihla kaSolomoni, angezelela ebuhlungwini obenziwe nguRhadadi, bekamnyenya u-Israyeli ngesikhathi abusa eSiriya.
26 Godu bekunoJerobhowamu+ indodana kaNebathi, umEfrayimu weTsereda. Bekasisebenzi sakaSolomoni,+ igama lakanina kunguTseruwa, omhlolokazi. UJerobhowamu naye wathoma ukuhlubuka ekosini.+
27 Nanti ibanga elenza wahlubuka ekosini: uSolomoni bekakhe iNdunduma*+ bese wavala nesikhala seboda leDorobho lakaDavida uyise.+
28 UJerobhowamu bekayindoda emadodeni. USolomoni nakabona ukuthi isokaneli likhuthele kangangani, walenza umphathi+ wabo boke bendlu kaJosefa abakatelelwe ukusebenzela ikosi.
29 Hlangana nesikhatheso, uJerobhowamu waphuma eJerusalema, umphorofidi u-Arhiya+ weTjhilo wamfumana endleleni. Bebabodwa emmangweni begodu u-Arhiya bekambethe isambatho esitjha.
30 U-Arhiya wathatha isambatho esitjha asimbetheko wasidabula saba ziingcenye ezili-12.
31 Ngemva kwalokho, wathi kuJerobhowamu:
“Thatha iingcenye ezilitjhumi ngombana uJehova uZimu ka-Israyeli uthi: ‘Ngihluthula umbuso esandleni sakaSolomoni begodu wena ngizokunikela iintjhaba ezilitjhumi.+
32 Kodwana isitjhaba sinye sizokuhlala singesakhe+ ngebanga lencekwami uDavida,+ nangebanga leJerusalema, idorobho engalikhetha hlangana nazo zoke iintjhaba zakwa-Israyeli.+
33 Ngizokwenza lokhu ngombana bangitjhiyile+ begodu bakhothamela u-Atjhitarothi uzimukazi wamaTsidoni, uKemotjhi uzimu wakwaMowabi noMilikomu uzimu wama-Amoni, akhenge bakhambe eendleleni zami ngokwenza okulungileko emehlwenami nangokulalela imithethwami nezahlulelo zami njengombana kwenza uDavida uyise.
34 Kodwana angekhe ngiwuthathe woke umbuso esandleni sakhe, uzokuhlala ayikosi kiyo yoke imihla yokuphila kwakhe, ngebanga lencekwami uDavida engiyikhethileko,+ ngombana walalela imiyalwami nemithethwami.
35 Ngizokususa ubukhosi esandleni sendodanakhe, ngibunikele wena, okuziintjhaba ezilitjhumi.+
36 Indodanakhe ngizoyinikela isitjhaba sinye, ukwenzela bona incekwami uDavida ihlale inesibani phambi kwami eJerusalema,+ idorobho engazikhethela lona bona libe yindawo engibeka kiyo igama lami.
37 Ngizokuthatha begodu uzokubusa phezu kwakho koke okufisako, uzokuba yikosi phezu kwaka-Israyeli.
38 Nawulalela koke engikuyale ngakho, ukhambe eendleleni zami, wenza nokulungileko emehlwenami ngokulalela imithethwami nemiyalwami njengombana kwenza incekwami uDavida,+ nami ngizokuba nawe. Ngizokwakhela indlu ehlala ngokungapheliko njengombana ngakhela uDavida+ bese ngizokunikela u-Israyeli.
39 Ngizozihlazisa iinzukulwana zakaDavida ngebanga lalokhu+ kodwana angekhe ngikwenze qobe lokho.’”+
40 Yeke uSolomoni walinga ukubulala uJerobhowamu kodwana uJerobhowamu wabalekela eGibhide kuTjhitjhakhi+ ikosi yeGibhide,+ wahlala eGibhide bekwahlongakala uSolomoni.
41 Nawo woke omunye umlando kaSolomoni, koke akwenzileko nokuhlakanipha kwakhe, akukatlolwa na encwadini yomlando kaSolomoni?+
42 USolomoni wabusa u-Israyeli woke eJerusalema iminyaka ema-40.
43 Ngemva kwalokho, uSolomoni walaliswa nabokhokho bakhe begodu wabulungwa eDorobheni lakaDavida uyise; indodanakhe uRerhobhowamu+ yaba yikosi esikhundleni sakhe.
Imitlolo Ephasi
^ Namkha “Ningatjhadiselani nazo.”
^ Lokhu kungaqalisela nakibozimu.
^ Namkha “baphambukisa ihliziywakhe yalandela.”
^ NgesiHebheru, “bulala.”
^ Namkha “iMilo.” Libizo lesiHebheru elitjho “ukugcwala.”
