Funda ELizwini LakaZimu

Yini EzoKwenzeka NgeLanga LokwaHlulela?

Isihlokwesi siphakamisa imibuzo okungenzeka ukhe wazibuza yona bese sitjengisa lapho ungafumana khona iimpendulo eBhayibhilinakho. AboFakazi bakaJehova bazokuthabela ukucoca nawe ngeempendulwezi.

1. Liyini iLanga lokwaHlulela?

Njengombana kutjengiswe esithombeni esingakwesokudla, abantu abanengi bacabanga bona ngeLanga lokwaHlulela iingidi zabantu zizokulethwa phambi kwakaZimu zahlulelwe ngezinto ezazenza ngaphimbilini—abanye bazokutlonyeliswa ngokuphila ezulwini, abanye bazokuhlunguphazwa esirhogweni. Nokho, iBhayibhili itjengisa bona, umnqopho weLanga lokwaHlulela kusindisa abantu ekutlhogekeni kobulungiswa. (IRhalani 96:13) UZimu wabeka uJesu bona abe ngumaHluleli ozokubuyisela ubulungiswa esintwini.—Funda u-Isaya 11:1-5; IzEnzo 17:31.

2. ILanga lokwaHlulela lizobubuyisela njani ubulungiswa?

Umuntu wokuthoma u-Adamu, ngamabomu wahlubuka kuZimu, wadlulisela isono kiyo yoke inzalo yakhe, ukutlhaga nokufa. (Roma 5:12) Ekulungiseni ukungabi nabulungisokho, uJesu uzokuvusa iingidi zabantu abafileko. Incwadi yesAmbulo itjengisa bona lokhu kuzokwenzeka hlangana neminyaka eyikulungwana yokubusa kwakaJesu Krestu.—Funda IsAmbulo 20:4, 11, 12.

Abavusiweko bazokwaHlulelwa, ingasi ngokwalokho abakwenza ngaphambi kokufa, kodwana ngokwalokho abakwenza nekuphuthululwa “imisongo” okukhulunywe ngayo kusAmbulo isahluko 20. (Roma 6:7) Hlangana nalabo abazokuvuswa begodu babe nethuba lokufunda ngoZimu kuzokuba ‘ngabalungileko nabangakalungi.’—Funda IzEnzo 24:15.

 3. Khuyini ezokufezwa liLanga lokwaHlulela?

Labo abafe bangakamazi uJehova uZimu begodu bamkhonze bazokuba nethuba lokutjhuguluka bona benze okuhle. Nengabe benza okuhle, “bazavuka baphile.” Nokho, abanye abavusiweko angekhe bafune ukufunda iindlela zakaJehova. Ivuko labo lizokuba ‘livuko lokulahlwa.’—Funda uJwanisi 5:28, 29; Isaya 26:10; 65:20.

Ekupheleni kweminyaka eyikulungwana emide yeLanga lokwaHlulela, uJehova uzokubuyisela isintu esilalelako ekupheleleni ebesinakho ekuthomeni. (1 Korinte 15:24-28) Qala bona leli lithemba elihle kangangani kibo boke abalalelako! Ekulingweni kwamaswaphela, uZimu uzokukhupha uSathana uDeveli ngesikhungweni ebekabotjhwe kiso iminyaka eyikulungwana. USathana uzokulinga ukuphambukisa abantu kuJehova godu, kodwana labo abambhalelako bazokuthabela ukuphila okungapheliko ephasini.—Funda u-Isaya 25:8; IsAmbulo 20:7-9.

4. Ngiliphi elinye ilanga lokwahlulela elizokuzuzisa isintu?

IBhayibhili godu isebenzisa ibizo ‘isuku lokwahlulela’ ukuqalisa esehlakalweni esizokuqeda iphasi lakaSathana lanje. Ilanga lokwahluleleli lizokufika msinyana njengeKukhulamungu yesikhathi sakaNuwa, eyatjhabalalisa soke isizukulwana esimbi. Ngokuthabisako, ukutjhatjalaliswa okutjhidelako kwabantu “abangamesabiko uZimu” kuzokuvula indlela yomphakathi omutjha “lapho kuyokubusa khona ukulunga.”—Funda u-2 Pitrosi 3:6, 7, 13.

Bona ufumane imininingwana engeziweko, qala amakhasi 213-215 wencwadi le Khuyini Kwamambala Okufundiswa YiBhayibhili?, egadangiswa boFakazi bakaJehova.

[Isithombe ekhasini 16]

“UkwaHlulela KokuGcina,” Ngu-Gustave Doré, ngo-1832-1883

[Umthombo]

Iinthombe ngoDoré