Ngubani OLalela ImiThandazo?
Ngubani OLalela ImiThandazo?
NENGABE ukhona oLalela imithandazo, ngokunengqondo kufuze kube mBumbi. Ngubani omunye ongafunda imicabango yomuntu ngaphandle kwaLoyo obumbe ingqondo? Ngubani omunye ongaphendula imithandazo aphe nesintu isizo esilitlhogako? Kodwana ungazibuza, ‘Kunengqondo na ukukholelwa kumBumbi?’
Abantu abanengi bacabanga bona ukukholelwa kumBumbi, kufuze uphikisane neqiniso lesayensi yanamhlanje. Kodwana umbono wokobana ukukholelwa kuZimu kuphikisana nesayensi awusilo iqiniso. Cabangela okulandelako.
▪ Ukwaziswa kwamvanje okwafunyanwa bophrofesa besayensi abasi-1 646 emayunivesithi ama-21 aphambili e-United States kwatjengisa bona ngoyedwa ebantwini abathathu owakhetha indaba ethi, “Angikholelwa kuZimu” ukuhlathulula umbonwabo.
Iphuzu kukobana abososayensi abanengi bayakholelwa ekubeni khona kwakaZimu.
UbuFakazi Bokuba Khona KomBumbi
Kufuze sikholelwe bona uMuzwi wemithandazo ukhona na ngaphandle kobufakazi? Awa, akusinjalo. Umbono wokobana ukukholwa kutjho ukukholwa into ngaphandle kobufakazi umamala. IBhayibhili ihlathulula ikholo ‘njengeqiniso ngalokho okuqalwe ngethemba, kukuba neqiniso ngalokho esingakuboni ngamehlo.’ (KumaHebheru 11:1) Enye ihlathululo ithi ikholo “lisiqinisekisa ngamaqiniso esingawaboniko.” (The New English Bible) Isibonelo, angekhe uwubone umoya kodwana ungabona izinto umoya ozenzako ngokusikinya amakari newubetha amagatja womuthi. Ngalokho uyakholwa bona kunomoya. Ngokufanako, nanyana singekhe simbone uMuzwi wemikhuleko, singaqala ubufakazi obukhona obungasibonisa bona ukhona.
Singabufumanaphi ubufakazi bokobana uZimu ukhona? Kufuze siqale izinto ezisibhodileko. IBhayibhili ikubeka bunje: “Ngileyo naleyo indlu yakhiwe mumakhi wayo, kodwana uZimu umumakhi wakho koke okukhona.” (KumaHebheru 3:4). Uyavumelana nombono loyo na? Mhlamunye newucabangela ukuhlophiseka kwezulu nephasi, imvelaphi yokuphila namtjhana ukubunjwa kwento erarene khulu ephasini, ubuchopho bomuntu, uyacabanga bona kukhona okuthileko okuphakemeko kunomuntu. *
Kodwana kunomkhawulo walokho indalo engasifundisa khona ngoZimu. Ukuqala ubufakazi bakaZimu endalweni kufana nokuzwa iinsindi zomuntu oza emnyango ovaliweko. Uyazi bona kunomuntu emnyango, kodwana ngubani? Ukufumana bona ngubani, kufuze uvule umnyango. Kufuze senze into efanako bona sazi uMuntu owabumba koke.
IBhayibhili mnyango wokwazi ngoZimu. Newuvula umnyango loyo begodu ucabangele eminye imininingwana ezwakalako yokuzaliseka kweemporofido, uzokufumana ubufakazi bokobana uZimu ukhona. * Kodwana ngaphezu kwalokho, umlando wokusebenzelana kwakaZimu nabantu utjengisa ubuntu boMuzwi wemithandazo.
Unjani UMuzwi WemiThandazo?
IBhayibhili iveza uMuzwi wemithandazo amumuntu ongakwazi ukumazi. Ngokuqinisekileko mumuntu kwaphela ongalalela ezwisise. Kuyasiqinisekisa ukufunda: “Muzwi womthandazo, abantu bayo yoke inyama bazokuza kuwe.” (IRhalani 65:2) Uzwa labo abathandaza kuye ngekholo. Begodu unebizo. IBhayibhili ithi: “UJehova ukude khulu nabambi, kodwana uzwa umthandazo wolungileko.”—Iziyema 15:29.
UJehova unamazizo. ‘NguZimu wethando’ begodu ubizwa ngokobana ‘nguZimu othabileko.’ (2 KwebeKorinte 13:11; 1 KuThimothi 1:11, NW) Malungana nendlela asabela ngayo lokha ubumbi neburhageleko, iBhayibhili ithi: “Wezwa ubuhlungu ehliziyweni.” (Genesisi 6:5, 6) Indaba yokobana uZimu ubangela ukutlhaga bonyana alinge abantu imamala. IBhayibhili ithi: “Akubekude noZimu wamambala ukwenza ngokukhohlakala.” (Jobhi 34:10) Nanyana kunjalo, ungazibuza, ‘Nengabe uZimu mBumbi umninimandla woke, kubayini avumela ukutlhaga bona kuragele phambili?’
UJehova wapha isintu ikululeko yokuzikhethela, begodu lokho kusitjela bona uZimu umumuntu onjani. Asiyithabeli na ikululeko yokuzikhethela bona sifuna ukukuphila njani ukuphila kwethu? Kodwana ngokudanisako, abantu abanengi bayisebenzisa kumbi ikululekwabo begodu bazibangela bona nabanye umtlhago. Manje naku umbuzo okufuze sicabangisise ngawo: UZimu angakuqeda njani ukutlhaga ngaphandle kokususa ikululekwabo? Sizokucoca ngombuzo lo esihlokweni esilandelako.
[Imitlolo yaphasi]
^ isig. 8 Bona ufumane ukwaziswa kobufakazi obungeziweko bokuba khona kwakaZimu, qala incwajana ethi, The Origin of Life—Five Questions Worth Asking nethi, Is There a Creator Who Cares About You? zombili ezigadangiswa boFakazi bakaJehova.
^ isig. 10 Incwajana ethi, A Book for All People nencwadi ethi, IBhayibhili-Izwi LikaNkulunkulu Noma Elomuntu? zigadangiswa boFakazi bakaJehova ukukusiza ukubona ubufakazi bokobana iBhayibhili iphefumulelwe nguZimu.
[Ibhoksi elisekhasini 5]
Izinto Ezimbi Ezenziwa Yikolo Zikwenza UngaKholwa Bona UZimu Ukhona?
Ngokudanisako, yikolo eyenza abanengi bazaze bona kunoMuzwi wemithandazo onomusa. Ukuzibandakanya kwekolo epini, enturhwini nokukghodlhelelela ukutlhoriswa kwabantwana kubangele ngitjho nabantu abathandazako bona bathi, “Angikholelwa kuZimu.”
Kubayini kanengi ikolo inomthelela eentweni ezimbi? Ukuyibeka bulula: Abantu abambi benza izinto ezimbi ngegama lekolo. IBhayibhili yabikezela bona kunamandla azokulawula ubuKrestu ukwenza ngendlela ephikisana nentando kaZimu. Umpostoli uPowula watjela ababonisi bamaKrestu: “Khonapha esiqubuthwini senu bazakhuluma amanga, khona bazakwenza amakholwa abalandele.”—IZenzo 20:29, 30.
UZimu uyayinyenya ikolo yamanga. Eqinisweni iLizwi lakaZimu, iBhayibhili, isola ikolo yamanga ‘ngeengazi zabaporofidi . . . nezabo boke ababulawako ephasinapha.’ (ISambulo 18:24) Ngombana ikolo yamanga ibhalelwe ukufundisa abantu ngoZimu weqiniso onethando, iinkolwezi zinomlandu weengazi emehlweni kaZimu.—1 KaJwanisi 4:8.
UMuzwi wemithandazo uyabarhawukela abongazimbi bokugandelelwa yikolo. Msinyana, ithando lakaZimu ngesintu lizomenza ahlulele boke abazenzisi beenkolo ngoJesu. UJesu wathi: “Mhlana kufika ilanga lokwahlulelwa, abanengi bazakuthi kimi: ‘Kosi, Kosi! Ebizweni lakho sakhuluma umlayezo kaZimu. . . . ’ Yeke ngizakuthi kibo: ‘Azange khenginazi. Sukani kimapha, nkhohlakali-ndina!’”—Matewu 7:22, 23.
