Iqiniso Nge-Amagedoni

‘Imimoya yamadimoni . . . yaya emakhosini wephasi mazombe . . . , yawahlanganisela endaweni ngesiHebheru ebizwa bona yi-Amagedoni.’—ISAMBULO 16:14, 16, New Revised Standard Version.

I-AMAGEDONI, Yigama lendawo. Nokho, indawo leyo akubonakali ikunanyana ngiyiphi indawo yamambala ephasini.

Manje-ke eqinisweni litjho ukuthini igama elithi “Amagedoni”? Kubayini kanengi lihlanganiswa nesenzakalo esifana nepi?

Yawahlanganisela Endaweni Ebizwa Bona Yi-Amagedoni

Igama lokuthoma lesiHebheru elithi Amagedoni eqinisweni litjho “iNtaba yeMegido.” Nanyana ingekho intaba yamambala enjalo, ikhona indawo ebizwa bona yiMegido. Beyisendaweni eqakathekileko lapho kuhlangana khona iindlela eembili ezikulu etlhagwini tjhingalanga yendawo egade kuhlala kiyo isitjhaba sama-Israyeli wekadeni. Izipi ezinengi ezikulu gade zilwelwa hlanu kwendawo leyo. Ngalokho-ke, ibizo elithi Megido labandakanywa nepi. *

Nokho, ihlathululo yamambala yeMegido akusikho ukobana izipi bezilwelwa lapho, kodwana kukobana kubayini beziliwa. IMegido beyiyingcenye yeNarha Yesithembiso uJehova uZimu ayinikela ama-Israyeli. (Eksodosi 33:1; Joshuwa 12:7, 21) Wafunga ebantwinabo bona  uzobavikela ebasahlelini, begodu wenza njalo. (Duteronomi 6:18, 19) Isibonelo, bekuseMegido lapho uJehova ngokusimangaliso avikela khona ama-Israyeli emabuthweni weKanana asahlelako iKosi uJabini nesikhulu sayo sebutho uSisera.—AbaHluleli 4:14-16.

Ngalokho, ibizo elithi “Amagedoni,” linehlathululo ekulu engokomfanekiso. Libandakanywa nepi lapho amabutho amabili anamandla abambene ngeenhluthu.

Isiporofido esikuSambulo sikhuluma ngesikhathi esizako esiseduze lapho uSathana namadimonakhe bazokwenza aborhulumende babantu bahlanganise amabuthwabo, ngokudelela basabise abantu bakaZimu nomsebenzabo. Ukusahlelokhu kuzokuphumela ekufeni kweengidi zabantu lokha uZimu nekahlula abasahleli.—ISambulo 19:11-18.

Kubayini uZimu, loyo iBhayibhili emhlathulula ‘njengonomusa, ongasilingeki msinyana nozele umusa wethando,’ abangela ukubulawa kwabantu abanengi kangaka? (Nehemiya 9:17) Bona sizwisise izenzo zakaZimu, kufuze siphendule iimbuzo eemthathu nasi: (1) Ngubani othoma ipi? (2) Kubayini uZimu abandakanyeka? (3) Ngimuphi umphumela ongapheliko ipi le ezokuba nawo ephasini nebantwini?

1. NGUBANI OTHOMA IPI?

Ipi ye-Amagedoni akusiso isenzo senturhu esenziwa nguZimu. Kunalokho, uZimu uzokuvikela abantu bakhe kilabo abafuna ukubapatlaza. Abasahleli epini le ngiwo “woke amakhosi wephasi,” abadosiphambili bephasi. Kubayini basahlela? Ngombana njengomrholi wawo, uSathana ngobugirikitjhani uzokwenza kokubili aborhulumende namabutho wezepi bona baphume ngonina ukuyokusahlela labo abakhulekela uJehova uZimu.—ISambulo 16:13, 14; 19:17, 18.

Njengombana abantu bagandelela indaba yekululeko yokukhuluma neyekolo namhlanje, umbono wokobana aborhulumende bazokulinga ukuphungula namtjhana ukuqeda nanyana ngiziphi iinkolo ubonakala uyinto engekhe yenzeke. Nokho, ukusahlela okunjalo kwenzeka emakhulwini wama-20 weemnyaka begodu kusenzeka nanamhlanjesi. * Nanyana kunjalo, kunokuhluka okukhulu okubili hlangana nokusahlela okudlulileko nalokho okuhlangene ne-Amagedoni. Kokuthoma,  ukusahlelokhu kuzokwenzeka ephasini mazombe. Kwesibili, ukusabela kwakaJehova uZimu kuzokuba kukhulu ngendlela erarako kunanyana ngikuphi akhe akwenza esikhathini esidlulileko. (Jeremiya 25:32, 33) IBhayibhili ihlathulula ipi le ‘njengepi eyodwa mhlana wesuku elikhulu lakaZimu’ uMninimandla woke.

2. KUBAYINI UZIMU ABANDAKANYEKA?

UJehova ululeka labo abamkhulekelako bona babe nokuthula begodu bathande amanababo. (Mika 4:1-3; Matewu 5:43, 44; 26:52) Ngalokho angekhe bathathe iinkhali zokulwa bona bazivikele ekusahleleni okunelunyokhu nekwenzekako. Nengabe uZimu angekhe angenele ukuphulusa abantu bakhe, bebangatjhatjalaliswa. Ngalokho, ibizo lakaJehova uZimu namtjhana idumo lakhe belizokuba sengozini. Nengabe amanaba wabantu bakaZimu akwazi ukubaqeda, bekuzokwenza uJehova abonakale anganathando, angakalungi namtjhana anganamandla. Into enjalo angekhe yenzeke!—IRhalani 37:28, 29.

UZimu akafuni ukutjhabalalisa noyedwa, ngalokho unikela isiyeleliso esikhanyako salokho azokwenza. (2 KaPitrosi 3:9) Ngemilando ebulungwe eBhayibhilini, ukhumbuza boke bona esikhathini esidlulileko wabuyiselela abantu bakhe nebasahlelwako. (2 AmaKhosi 19:35) IBhayibhili godu iyelelisa ngokobana esikhathini esizako lokha uSathana nabantu abasebenzisako basahlela abantu bakaZimu, uJehova uzokungenela asebenzise amandla kilabo abathusela abantu bakhe. Eqinisweni, iLizwi lakaZimu labikezela kade bona uJehova uzokuqeda abantu abambi. (Iziyema 2:21, 22; 2 KwebeTesalonika 1:6-9) Ngesikhatheso, angekhe kube nokuzaza emkhumbulweni wabasahleli bona balwa noZimu oPhezukoke ngokwakhe.—Ezekiyeli 38:21-23.

3. NGIWUPHI UMPHUMELA ONGAPHELIKO IPI LE EZOKUBA NAWO?

Ipi ye-Amagedoni izokuphumela ekuphulusweni kweengidi zabantu. Eqinisweni, iyisindlhalelo sesikhathi sokuthula ephasini.—ISambulo 21:3, 4.

Incwadi yeSambulo ikhuluma ‘ngesiqubuthu esikhulu’ esinganakubalwa esizokuphuluka epini le. (ISambulo 7:9, 14) Ngaphasi kwesinqophiso sakaZimu, lokhu kuzokusiza ekubuyiseleni iphasi libe yiParadeyisi uJehova ebekalinqophileko kwasekuthome.

Siyazi na bona ukusahlelwa kwabantu bakaZimokhu kuzokufika nini?

[Imitlolo yaphasi]

[Isithombe ekhasini 6]

UJehova uZimu wavikela abantu bakhe esikhathini esidlulileko

[Isithombe ekhasini 7]

UJehova uzokuvikela abantu bakhe godu phakathi nepi ye-Amagedoni