Bobani Abatjhumayela Iindaba Ezimnandi?

“ . . . zizatjhunyayelwa ephasini loke.”—MATEWU 24:14.

IINDABA ezimnandi zitjhunyayelwa boFakazi BakaJehova ephasini mazombe. Bakwenza lokhu ngeendlela ezihlukahlukeneko. Enye indlela abakwenza ngayo kusebenzisa . . .

Ilizwi Elikhulunywako. NjengoJesu nabafundi bakhe, aboFakazi BakaJehova baya ebantwini ngeendaba ezimnandi. (Luka 8:1; 10:1) Abalindeli bona abantu beze kibo. Ukufakaza ebantwini ngoMbuso kaZimu yinto eyenziwa ngibo boke aboFakazi—abangaphezu kweengidi ezilikhomba. Batjhumayela endlini ngendlu, endleleni, ngomtato nangezinye iindlela. Ngomnyaka odlulileko, aboFakazi baberege ama-awara angaphezu kwebhiliyoni nesiquntu emberegweni lo.

Abafundisi abanye ngoMbuso kaZimu kwaphela kodwana ‘nangakho koke [uJesu] abalaye ngakho.’ (Matewu 28:20) Qobe baraga iimfundo zeBhayibhili zekhaya ezingaphezu kweengidi ezibunane.

AboFakazi batjhumayela ephasini mazombe—eenarheni ezi-236. Batjhumayela kubantu bazo zoke iinzinda. Batjhumayela emakhaya nemadorobheni, emahlathini we-Amazon neweSiberia, ebhudwini le-Afrika neeNtabeni zeHimalaya. Ababhadalwa emberegweni lo; baberegisa imalabo nesikhathi sabo, batjhukunyiswa kuthanda uZimu nabomakhelwana. Godu benza iindaba ezimnandi zaziwe . . .

Ngeencwadi. Umagazini lo, isihloko sawo esizeleko esithi ISithalasokulinda Esazisa NgoMbuso KaJehova, kwanjesi igadangiswa ngeenlimi ezi-185 begodu kurhatjhwa amakhophi wayo angaphezu kweengidi ezi-42 zegadangiso ngalinye. Umagazini okhambisana naso, i-Phaphama!, igadangiswa ngeenlimi ezi-83 begodu kurhatjhwa amakhophi angaba ziingidi ezi-40 zegadangiso ngalinye.

Iincwadi, iincwajana, amaphetjhana, ama-CD/MP3, namaDVD ahlathulula iimfundiso zeBhayibhili ayafumaneka ngeenlimi ezingaba ma-540. Eemnyakeni elitjhumi edlulileko aboFakazi bagadangisa godu barhatjha amakhophi wazo angaphezu kwamabhiliyoni ama-20, ngokwesilinganiso, umuntu ngamunye ohlala ephasini ufumane amathathu!

AboFakazi BakaJehova bagadangisa namtjhana bagunyaza ezinye iinkampani bona zigadangise iintjhugululo ezihlukahlukene zeBhayibhili. I-New World Translation of the Holy Scriptures—itjhugululwe, yagadangiswa, begodu yarhatjhwa boFakazi BakaJehova—kwanjesi ifumaneka iphelele namtjhana iyingcenye ngeenlimi ezi-96. Sele kurhatjhwe amakhophi angaphezu kweengidi ezi-166. Godu aboFakazi bahlanganyela iindaba ezimnandi zoMbuso . . .

Emihlanganweni YobuKrestu. Iimhlangano  yaqobe veke ebanjelwa emaWolweni WoMbuso wendawo ayisiyikonzo yekolo kwaphela; yenzelwe ukufundisa. Kubekwa iinkulumo ezimalungana neBhayibhili, begodu liyataditjhwa ngerhelebho lakamagazini ISithalasokulinda nezinye iincwadi. Eemhlanganweni le, aboFakazi godu bafunda ukuba barhuweleli abaphumeleleko beendaba ezimnandi.

AboFakazi bafunda iincwadi ezifanako emabandleni angaphezu kwa-107,000 ephasini lokana, okunomthelela ebunyeni babo. Iimhlangano le ivulekele woke umuntu. Akuthathwa igulego. Kuliqiniso, koke lokhu bengeze kutjho litho ngathana aboFakazi abakwenzi lokho abakutjhumayelako. Ngalokho, baphakamisa iindaba ezimnandi . . .

Ngokuba Ziimbonelo. Balwela ukuba ziimbonelo ekuziphatheni kobuKrestu, benza koke abangakwenza ukuphatha abanye ngendlela nabo abangathanda ukuphathwa ngayo. (Matewu 7:12) Nanyana bangakapheleli begodu ngezinye iinkhathi bazenza iimphoso, balinga kwamambala ukuphatha boke abantu ngethando, ingasi ngokubatjhumayeza iindaba ezihle kwaphela, kodwana nangokubarhelebha ngezinye iindlela nekukghonekako.

AboFakazi BakaJehova abalingi ukutjhentjha iphasi ngokutjhumayela kwabo. Kunalokho, nasele umberego loyo wenziwe ngendlela eyanelisa uJehova, ukuphela kuzokufika, njengombana uJesu abikezela. Lokho kuzokutjho ukuthini ngephasi nangabantu abakilo?

[Isithombe ekhasini 7]

Iindaba ezimnandi zitjhunyayelwa ephasini mazombe boFakazi BakaJehova