Indlela Isihlengo Esisiphulusa Ngayo
Indlela Isihlengo Esisiphulusa Ngayo
“Loyo okholwako eNdodaneni unokuphila okungapheliko; kodwana loyo ongakholwako eNdodaneni ngekhe akubona ukuphila, kodwana uzahlala ngaphasi kobukhali bakaZimu.”—JWANISI 3:36.
1, 2. Ngiliphi ibanga elisesikhathini lokugadangiswa kwe-Zion’s Watch Tower kokuthoma?
“WOKE umuntu ofundisisa iBhayibhili uzokubona ukuqakatheka kokufa kwakaKrestu,” kwatjho igadangiso lesine lakamagazini lo emva le ngo-Oktoba 1879. Umagazini loyo waphetha ngomkhumbulo oqakathekileko lo: “Asitjhejeni yoke into enyaza namtjhana ebekela eqadi ukufa kwakaKrestu, njengomhlatjelo osihlawulelo sezono.”—Funda u-1 KaJwanisi 2:1, 2.
2 Elinye ibanga lokugadangiswa kwe-Zion’s Watch Tower kokuthoma ngo-Julayi 1879 bekukuvikela ifundiso yeBhayibhili yesihlengo. Kiyo sifumana ‘ukudla ngesikhathi esifaneleko,’ ngombana ekupheleni kwabo-1800, inani elikhulako lalabo abathi maKrestu bathoma ukuzaza bona ukufa kwakaJesu kungaba sihlengo sezono zethu. (Mat 24:45) Ngesikhatheso abanengi bathoma ukukholelwa efundisweni yokuziphendukela kwemvelo, okuyifundiso ephikisana neqiniso lokobana umuntu walahlekelwa kuphelela. Abakholelwa ekuziphendukeleni kwemvelo bakholelwa bona umuntu uyazithuthukela begodu isihlengo asitlhogeki. Ngalokho-ke isiyeleliso sakaPowula kuThimothi besifaneleka: “Ukulonde kuhle koke onikelwe khona bona ukulonde. Hloya ukukhuluma okulilize okuphambene nokukholwa, uhloye nokuphikisana okuvela kulokho okuthiwa kulilwazi, ibe kungasilo. Ngombana abanye benza sengathi banelwazi, ngokwenza njalo bakgeluka ekukholweni.”—1 Thi. 6:20, 21.
3. Ngimiphi iimbuzo esizoyicabangela nje?
3 Akunakuzaza bona uzimisele ‘ukungakgeluki ekukholweni.’ Bona ubulunge ikholo lakho liqinile, kuhle ukucabangela iimbuzo nasi: Kubayini ngitlhoga isihlengo? Ukuzidela kwakaJehova noJesu kwababangela ubuhlungu obungangani? Ngingazuza njani elungiselelweni eliyigugweli elingangiphulusa ebukhalini bakaZimu?
Singaphuluka Ebukhalini BakaZimu
4, 5. Khuyini etjengisa bona ubukhali bakaZimu buphezu kwephasi elimbi lanamhlanjesi?
4 IBhayibhili nomlando kutjengisa bona solo u-Adamu enza isono, isintu ‘besingaphasi kobukhali bakaZimu’. (Jwanisi 3:36) Lokhu kubonakala ngokobana akekho umuntu ongabalekela ukufa. Ukubusa kwakaSathana okuyimbangi kubhalelwe ukuvikela isintu eentlayisekweni eziragela phambili, begodu awukho umbuso wabantu ongakwazi ukuzalisa iintlhogo ezisisekelo zezakhamuzi zawo. (1 KaJwanisi 5:19) Ngalokho isintu siragela phambili sitshwenywa yipi, bulelesi, nomtlhago.
5 Kuyakhanya-ke, bona isibusiso sakaJehova asikho ephasini lakaSathana lanamhlanjesi. UPowula wathi: “Ubukhali bakaZimu bubonakala buvela ezulwini, behlela phezu kwesono nokukhohlakala kwabantu.” (Rom 1:18-20) Ngalokho, labo ngokungatjhugulukiko abaphila ngokungamthabisiko uZimu abazokuphuluka emiphumeleni yokuziphatha kwabo. Namhlanje, ubukhali bakaZimu benziwe baziwa ngomlayezo wesahlulelo othululwe njengeembetho ephasini lakaSathana, begodu ukwaziswa okunjalo kuvela kwezinengi zeencwadi zethu ezisekelwe eBhayibhilini.—ISam. 16:1.
6, 7. Ngimuphi umsebenzi odoswa phambili maKrestu azesiweko, begodu ngiliphi ithuba elivulekele woke umuntu oyingcenye yephasi lakaSathana?
6 Lokhu kutjho bona kulada ngomuntu bona atjhaphuluke ekugandelelweni nguSathana begodu abuyisane noZimu? Awa, ngombana lisesekhona ithuba lokubuyisana noJehova. AmaKrestu azesiweko, ‘abazenda bakaKrestu’, adosa phambili ekonzweni yomphakathi leyo zoke iintjhaba ezimenywa ngayo bona: ‘Zibuyisane noZimu.’—2 Kor. 5:20, 21.
7 Umpostoli uPowula wathi uJesu ‘usiphulusa ebukhalini obuzako.’ (1 Tes. 1:10) Ukubonakaliswa kokugcina kobukhali bakaJehova kuzophumela ekutjhatjalalisweni unomphela kwezoni ezingatjhugulukiko. (2 Tes. 1:6-9) Ngubani-ke, ozokuphuluka? IBhayibhili ithi: “Loyo okholwako eNdodaneni unokuphila okungapheliko; kodwana loyo ongakholwako eNdodaneni ngekhe akubona ukuphila, kodwana uzahlala ngaphasi kobukhali bakaZimu.” (Jwanisi 3:36) Kwamambala, iphaseli nelifika ekupheleni kwalo, boke abaphilako nabanekholo kuJesu nesihlengweni bazokuphuluka emiphumeleni yobukhali bakaZimu bokugcina.
Indlela Isihlengo Esisebenza Ngayo
8. (a) Ngiliphi ingomuso elikarisako ebeliphambi kwaka-Adamu no-Efa? (b) UJehova wazibonakalisa njani anguZimu wokulunga okupheleleko?
8 U-Adamu no-Efa babunjwa banganasono. Nengabe bahlala bathembekile kuZimu, iphasi nga lizele inzalwabo ethabileko ehlala nabo eParadeyisini. Nokho, ngokudanisako, ababelethi bethu bokuthoma bawuphula ngamabomu umthetho kaZimu. Ngikho bagwetjelwa ukufa unomphela begodu baqothwa eParadeyisini lokuthoma. Lokha u-Adamu no-Efa nebaba nabantwana isono besele singenile ebantwini, begodu ekugcineni, indoda nomfazi bokuthoma baluphala bebafa. Lokhu kutjengisa bona uJehova ujama elizwini lakhe. Ngaphezu kwalokho, nguZimu wokulunga okupheleleko. UJehova wayelelisa u-Adamu bona ukudla emthini athe bangadli kiwo kuzokuphumela ekufeni—kwamambala kwaba njalo.
9, 10. (a) Kubayini iinzukulwana zaka-Adamu zifa? (b) Singakubalekela njani ukufa unomphela?
9 Njengeenzukulwana zaka-Adamu, sizuze umzimba ongakapheleli otjhigamele esonweni ogcina ngokufa. U-Adamu nekonako, nathi saba zizoni. Njengombana bekufuze sivele kuye njengeenzukulwana zakhe. Ngalokho isigwebo sokufa sabandakanya nathi. Nengabe uJehova wasisusa isigwebo sokuluphala nokufa ngaphandle kwesihlengo, gade kuzokutjengisa bona akanalo iqiniso kilokho akutjhwileko. Eqinisweni, uPowulu wasikhulumela soke nekasithi: “Siyazi bona umthetho ungokamoya kaZimu, kodwana mina ngingowenyama, ngithengiswe njengesigqili bona ngenze isono. Maye mina osembandelezweni! Ngubani ozongikhulula kilomzimba ongidosela ekufeni na?”—Rom. 7:14, 24.
10 NguJehova uZimu kwaphela onganikela isisekelo esingokomthetho angasilibalela ngaso izono zethu nokusitjhaphulula ekufeni unomphela. Lokhu wakwenza ngokuthumela iNdodanakhe ethandekako isuka ezulwini bona izokubelethwa njengomuntu onganasono, onganikela ngokuphila kwakhe bona kube sihlengo sethu. Ngokungafani no-Adamu, uJesu wahlala aphelele. Kwamambala, “akazange akhe enze isono.” (1 Pit. 2:22) Ngalokho uJesu bekangakwazi ukuba ngubaba wesintu esipheleleko. Kunalokho, wavumela amanaba kaZimu bona ambulale khona azokumukela iinzukulwana zaka-Adamu ezinesono nokwenza bona kukghoneke ngalabo abanekholo kuye bonyana bafumane ukuphila okungapheliko. IMitlolo iyahlathulula: “Ngombana munye uZimu, begodu munye umlamuleli hlangana koZimu nabantu, umuntu loyo nguKrestu Jesu. Wadela ukuphila kwakhe, ze ahlenge boke abantu.”—1 Thi. 2:5, 6.
11. (a) Iinzuzo zomhlatjelo zingafaniswa njani? (b) Bobani abazuzako emhlatjelweni?
11 Indlela isihlengo esisebenza ngayo ingafaniswa nobujamo babantu abadlelezelwe iimali zabo yibhanga ekhohlakeleko. Ngokufaneleko, abaphathi bebhanga leyo bavalelwa ejele iimnyaka eemnengi. Kodwana kuthiwani ngabantwaba abanganamlandu abadlelezelwe iimali zabo? Njengombana sele badla imbuya ngelithi, ngeze bakghona ukuzikhupha ebujamweni esele bakibo, ngaphandle kobana umndeni othileko onomusa nonjingileko uthathe ibhanga leyo bese unikele abongazimbabo iimali zabo. Ngendlela efanako, uJehova uZimu neNdodanakhe ethandekako bathenga inzalo ka-Adamu begodu basula isikolodo sayo sesono ngesisekelo seengazi zakaJesu ezaphalakako. Kungalokho uJwanisi uMbhabhadisi bekangathi malungana noJesu: “Nasiya iMvana kaZimu, esusa isono sephasi!” (Jwanisi 1:29) Iphasi lesintu okususwe kilo isono alibandakanyi abaphilako kwaphela, kodwana nabafileko.
Inani Lesihlengo
12, 13. Singafundani ekuzimiseleni kwaka-Abrahama ukunikela ngo-Isaka?
12 Akukghoneki ukuzwisisa ngokunqophileko bona uBabethu wezulwini neNdodanakhe ethandekako bezwa ubuhlungu obungangani ngebanga lesihlengo. Kodwana iBhayibhili ineendaba ezingasirhelebha bona sizindle ngendaba le. Isibonelo, cabanga bona u-Abrahama wazizwa njani njengombana athatha ikhambo lamalanga amathathu aya eMoriya ngombana alalela umlayo kaZimu othi: “Ngibawa uthathe indodanakho okukuphela kwayo begodu oyithanda khulu, u-Isaka, uye enarheni yeMoriya wenze ngayo umhlatjelo otjhiswako kwenye yeentaba engizokutjengisa yona.”—Gen. 22:2-4.
13 Ekugcineni u-Abrahama wafika endaweni ekhethiweko. Cabanga bona kwamzwisa ubuhlungu obungangani ukubopha izandla neenyawo zaka-Isaka begodu amlalise e-aldare yena u-Abrahama alakhe ngokwakhe. Qala bona bekubuhlungu kangangani ku-Abrahama ukuphakamisa umukhwa ebekazokubulala ngawo indodanakhe! Cabanga namazizo ka-Isaka njengombana alele e-aldarini, alindele ukuhlatjwa kabuhlungu ngomukhwa abe afe. Ingilozi kaJehova yamvimba ngesikhathi esifaneleko u-Abrahama. Lokho okwenziwa ngu-Abrahama no-Isaka esehlakalweneso kusirhelebha bona sizwisise ubuhlungu uJehova abuzwako ngokuvumela iinsetjenziswa zakaSathana bona zibulale iNdodanakhe. Ukuzimisela kwaka-Isaka ukubambisana no-Abrahama kukutjengisa kuhle ukuzimisela kwakaJesu ukutlhaga nokufa ngebanga lethu.—Heb. 11:17-19.
14. Kwenzekani ekuphileni kwakaJakobho engasirhelebha bona sithokoze ngenani lesihlengo?
14 Inani lesihlengo godu lingafaniswa nokwenzeka ekuphileni kwakaJakobho. UJosefa yindodanakhe ebekayithanda ukuwadlula woke. Ngokudanisako, abafowabo bakaJosefa bammonakela begodu bamhloya. Nofana kunjalo, uJosefa wavuma ukuthunywa nguyise bona ayokuhlola bonyana abafowabo banjani. Ngesikhatheso, gade baluse iimhlambi kaJakobho endaweni engaba makhilomitha ayi-100 etlhagwini yeHebroni lapho egade bahlala khona. Cabanga bona uJakobho wazizwa njani lokha amadodanakhe abuyisa isambatho sakaJosefa sizele iingazi! UJakobho wababaza, “Sisambatho eside sendodanami! Isibandana semangweni kwamambala simdlile! Ngokuqinisekileko uJosefa urathulwe waba ziinquntu!” Koke lokhu kwamphatha kumbi khulu uJakobho owalilela uJosefa amalanga amanengi. (Gen. 37:33, 34) UJehova akasabeli ebujamweni ngendlela efana patsi neyabantu abangakapheleli. Nokho, ukuzindla ngokwehlakalela uJakobho kungasirhelebha bona ngezinga elithileko, sizwisise bona uZimu kungenzeka wazizwa njani iNdodanakhe ethandekako neyitlhoriswako begodu ibulawa ngelunya lokha imumuntu ephasini.
Indlela Esizuza Ngayo Esihlengweni
15, 16. (a) UJehova watjengisa njani bona uyasamukela isihlengo? (b) Uzuze njani esihlengweni?
15 UJehova uZimu wavusa iNdodanakhe ethembekileko wayinikela umzimba womoya ophazimulako. (1 Pit. 3:18) Emalangeni ama-40, uJesu wabonakala kubafundi bakhe, aqinisa ikholo labo begodu ababhincela umsebenzi omkhulukazi wokutjhumayela obegade ubalindele. Ngemva kwalokho wanyukela ezulwini, lapho anikela khona uZimu inani leengazi zakhe ezaphalakako, bona lisetjenziselwe ukurhelebha abalandeli bakhe beqiniso, abatjengisa ikholo enanini lomhlatjelo wakhe osihlengo. UJehova uZimu watjengisa bona uyasamukela isihlengo sakaKrestu ngokwabela uJesu bona anikele abafundi bakhe egade bahlangene eJerusalema umoya ocwengileko ngelanga lePhentekoste laka-33 C.E.—IZenzo 2:33.
16 Abalandeli bakaKrestu abazesiwekwabo bathoma khonokho ukukhuthaza abanye abantu bona baphuluke ebukhalini bakaZimu ngokubhabhadiswa ebizweni lakaJesu Krestu bona balitjalelwe izono zabo. (Funda IZenzo 2:38-40.) Kusukela ngelanga eliqakathekilekwelo bekube nje, iingidi zabantu abavela kizo zoke iintjhaba zidoseleke ebuhlotjeni noZimu ngesisekelo sekholo emhlatjelweni kaJesu osihlengo. (Jwanisi 6:44) Njengombana sesicoce safika la ngendaba le, kusafuze sidembe neminye iimbuzo eembili: Kukhona kithi abanikelwe ithemba lokuphila okungapheliko ngebanga lemisebenzi yabo emihle? Njengombana sinethemba elikarisakweli, lingasilahlekela?
17. Kufuze usiqale njani isibusiso esikarisako sokuba mngani kaZimu?
17 Isihlengo asikasifaneli nakancani. Kodwana ngokuba nekholo kiso, iingidi zabantu namhlanjesi zibe bangani bakaZimu, zinethemba lokuphila okungapheliko ephasini eliyiparadeyisi. Nokho, ukuba mngani kaJehova, akusisiqinisekiso sokobana uzokuhlala unguye. Bona siphuluke elangeni lobukhali bakaZimu elizako, kufuze sithokoze khulu ‘ngesihlengo sakaKrestu Jesu.’—Funda KwebeFilipi 2:12.
Hlala Unekholo Esihlengweni
18. Kuhlanganisani ukuba nekholo esihlengweni?
18 Umtlolo osisekelo wesihlokwesi, uJwanisi 3:36, utjengisa bona ukuba nekholo eKosini uJesu Krestu kubandakanya nokumlalela. Ukuthokoza isihlengo kufuze kusenze bona siphile ngokuvumelana neemfundiso zakaJesu, kuhlanganise nalokho akufundisako ngokuziphatha. (Markosi 7:21-23) ‘Ubukhali bakaZimu buzokwehlela’ phezu kwabo boke ngokungatjhugulukiko abenza izenzo ezinjengobufebe, amahlaya asilapheleko, “nakho koke ukusilaphala,” okuhlanganisa nokubukela ngokubuyelelweko iinthombe ezisilapheleko zomseme.—Efe. 5:3-6.
19. Ngiziphi iindlela esingatjengisa ngazo bona sinekholo esihlengweni?
19 Ukuthokoza kwethu isihlengo kufuze kusenze sihlale simajadujadu ‘ekuzinikeleni ngokupheleleko kuZimu.’ (2 Pit. 3:11) Asibekele eqadi isikhathi sokuthandaza qobe ngokusuka ehliziyweni, sokuba nesifundo seBhayibhili sobuqu, sokuba khona emihlanganweni, nesokutjhumayela ngoMbuso ngetjiseko. Begodu ‘singalibali ukwenza okuhle kwabanye sabelane, ngombana iminikelo enjalo uZimu uyayithabela.’—Heb. 13:15, 16.
20. Ngiziphi iimbusiso zesikhathi esizako ezingalindelwa ngilabo abaragela phambili baba nekholo esihlengweni?
20 UJehova nekatjhabalalisa iphasi elimbeli, qala bona sizokuthaba kangangani ngokobana saba nekholo esihlengweni begodu sahlala sitjengisa ukusithokozela! Ephasini elitjha elithenjiswe nguZimu, sizomthokoza bekube nini nanini ngokusenzela ilungiselelo elikarisa kwamambala lokusiphulusa ebukhalini Bakhe.—Funda uJwanisi 3:16; ISambulo 7:9, 10, 13, 14.
Ungaphendula Njani?
• Kubayini sitlhoga isihlengo?
• Ukwenza isihlengo kwabathinta njani uJehova noJesu?
• Ngiziphi iinzuzo esizifumana ngebanga lesihlengo?
• Sitjengisa njani bona sinekholo emhlatjelweni kaJesu osihlengo?
[Iimbuzo Yesifundo]
[Isithombe ekhasini 19]
Lisesekhona ithuba lokubuyisana noJehova
[Iinthombe ekhasini 21]
Ukuzindla ngezehlakalo ezibandakanya u-Abrahama, u-Isaka, noJakobho kungasirhelebha bona sizwisise inani elikhulu lesihlengo