Lingisa Isibonelo SakaJesu Sokuphaphama
Lingisa Isibonelo SakaJesu Sokuphaphama
“Tjhejani nithandaze.”—MAT. 26:41.
UNGAPHENDULA NJANI?
Iimthandazo yethu ingatjengisa njani bona siphapheme?
Ngiziphi iindlela esingatjengisa ngazo bona siphapheme ekonzwenethu?
Kubayini kuqakathekile bona sihlale siphapheme nesilingwako, begodu singakwenza njani lokho?
1, 2. (a) Ngimiphi iimbuzo engaphakama malungana nesibonelo sakaJesu sokuphaphama? (b) Isibonelo sakaJesu esipheleleko silisizo na ebantwini abanesono? Fanekisa.
KUNGENZEKA uyazibuza: ‘Kungakghoneka na ukulingisa isibonelo sakaJesu sokuphaphama? Phela uJesu bekaphelele! Ngaphezu kwalokho, ngezinye iinkhathi uJesu bekakghona ukubona ingomuso—ngitjho iinkulungwana zeemnyaka ngemva kwesikhathi sakhe! Bekutlhogeka na bona aphaphame?’ (Mat. 24:37-39; Heb. 4:15) Asiphendule iimbuzo leyo qangi khona sizokubona bonyana irhabe begodu ifaneleka kangangani indaba le.
2 Isibonelo esipheleleko silisizo na ebantwini abanesono? Iye, ngombana kungakghoneka ukufunda emfundisini omuhle nesibonelweni sakhe. Ngokwesibonelo, cabanga ngendoda ethatha isifundo sayo sokuthoma sokudumuza ngomswibela nesungulo. Ayikwazi ukudumuza ngokunembileko, kodwana ithatha iimfundo ezingeziweko iragele phambili ilinga. Bona ithuthuke, ngokutjheja ifunda esibonelweni somfundisi wayo osikghwari sokudumuza ngomswibela. Umfundi utjheja indlela umfundisi wakhe ajama ngayo, indlela ajamisa ngayo iimkhono yakhe, nendlela asebenzisa ngayo imino yakhe emswibelweni. Kancani kancani, umafundana ozimiseleko lo ufunda bona kufuze ayidose kangangani intambo; acabangele umoya, begodu akalisi ukulinga. Ngokulingisa lokho abona umfundisi wakhe akwenza ugcina sele akwazi ukunqophisa iinsungulo zakhe bona zilokhu zitjhidela ngokungeziweko kilokhu afuna zibethe kikho. Ngokufanako, silwela ukulokhu sithuthuka njengamaKrestu ngokulandela iinqophiso zakaJesu nokulingisa isibonelo sakhe esipheleleko.
3. (a) UJesu watjengisa njani bona bekayitlhoga ifanelo yokuphaphama? (b) Sizokufunda ngani esihlokwenesi?
3 Nokho, kuthiwani ngokuphaphama? Eqinisweni uJesu bekayitlhoga na ifanelo le? Kwamambala bekayitlhoga. Ngokwesibonelo, ngobusuku bamaswaphela bokuphila kwakhe kwephasini, uJesu wakhuthaza abapostoli bakhe abathembekileko: “Hlalani lapha nilinde kanye nami.” Wangezelela: “Tjhejani nithandaze bona ningangeni ekulingweni.” (Mat. 26:38, 41) Ngitjho nanyana bekatjengise ukuphaphama soke isikhathesi, ngokukhethekileko ngama-iri abudisi layo uJesu bekafuna ukuphaphama begodu abe seduze noYise wezulwini ngendlela angakghona ngayo. Bekazi bona abalandeli bakhe bebatlhoga ukuphaphama okufanako—ingasi ngesikhatheso kwaphela kodwana nangesikhathi esizako. Ngalokho asicabangele bona kubayini uJesu afuna sihlale siphapheme. Ngemva kwalokho, sizokuhlahluba iindlela eentathu esingalingisa ngazo ukuphaphama kwakaJesu kwaqobe langa.
OKWENZA UJESU AFUNE SIPHAPHAME
4. Ngikuphi ukuhlobana okukhona hlangana kokungazi ngengomuso netlhogeko yethu yokuhlala siphapheme?
4 Ngokurhunyeziweko, uJesu ufuna sihlale siphapheme ngebanga lalokho esikwaziko nalokho esingakwaziko. UJesu nekamumuntu ephasini, bekazi koke na okuzokwenzeka esikhathini esizako? Awa, ngombana wavuma ngokuthobekileko: “Akakho noyedwa, owaziko bona isukwelo nesikhatheso kuzafika nini, ngitjho neengilozi ezisezulwini azazi, nayo iNdodana ayazi; nguBaba kwaphela owaziko.” (Mat. 24:36) Ngesikhatheso uJesu, “iNdodana,” bekangazi ngokunqophileko bona iphasi elimbeli lizokuphela nini. Kuthiwani ngathi namhlanjesi? Kghani kukhona esingakwaziko? Akubuzwa! Asazi bona uJehova uzoyithumela nini iNdodanakhe bona iqede iphasi elimbeli. Ngathana besazi, bekuzokutlhogeka na bona sihlale siphapheme? Njengombana uJesu ahlathulula, ukuphela kuzokufika kungakalindelwa; ngalokho kutlhogeka bona sihlale siphapheme.—Funda uMatewu 24:43.
5, 6. (a) Ilwazi lethu ngengomuso nangeemnqopho kaZimu linamuphi umthelela etlhogekweni yokuhlala siphapheme? (b) Kubayini ilwazi lethu ngoSathana kufuze lisenze sizimisele ngokungeziweko ukuhlala siphapheme?
5 Ngakelinye ihlangothi, uJesu bekazi izinto ezinengi ezikarisako ngengomuso—amaqiniso abantu abanengi abambhodileko egade bangazi litho ngawo. Ilwazi lethu lincani khulu nelimadaniswa nelakaJesu, kodwana ngebanga lakhe, sazi okunengi ngoMbuso kaZimu nalokho ozokwenza esikhathini esizako esiseduze. Njengombana siphosa amehlo endaweni esibhodileko, kungaba sesikolweni, emsebenzini, namtjhana esimini esitjhumayela kiyo, asiboni na bonyana abantu abanengi basebumnyameni obukhulu malungana namaqiniso aphazimulako la? Kilokhu sifumana elinye ibanga lokuphaphama. NjengoJesu, kutlhogeka sihlale siphapheme, siphaphamele amathuba wokuhlanganyela esikwaziko ngoMbuso kaZimu. Elinye nelinye ithuba elinjalo liligugu, begodu asifuni ukudlala ngalo. Amaphilo asengozini!—1 Thi. 4:16.
6 Kunokhunye uJesu ebekakwazi okwamenza wahlala aphapheme. Bekazi bona uSathana uzimisele ukumlinga, ukumtjhutjhisa, nokuqeda ukuthembeka kwakhe. Inaba elinelunya lelo belihlala liphaphamele “esinye isikhathi esilungileko” sokuvivinya uJesu. (Luka 4:13, NW) UJesu wahlala aphapheme. Bekafuna ukulungela nanyana ngiliphi ivivinyo, kungaba silingo, kuphikiswa, namtjhana ukutjhutjhiswa. Kghani ngeze kwatjhiwo okufanako nangathi? Siyazi bona uSathana ‘usesenjengengonyama ebhodlako, efuna ezomudla.’ Kungebangelo iLizwi lakaZimu likhuthaza amaKrestu: “Tjhejani, nilinde.” (1 Pit. 5:8) Nokho, singakwenza njani lokho?
INDLELA YOKUPHAPHAMELA UMTHANDAZO
7, 8. UJesu wanikela siphi isiluleko ngomthandazo, begodu wabeka isibonelo esinjani?
7 IBhayibhili itjengisa bona kunokuhlobana okukhulu hlangana kokuphaphama ngokomoya, nokuthandaza. (Khol. 4:2; 1 Pit. 4:7) Msinyana ngemva kokubawa abalandeli bakhe bona bahlale balindile naye, uJesu wathi: “Tjhejani nithandaze bona ningangeni ekulingweni.” (Mat. 26:41) Kghani bekatjho bona amezwi la asebenza ebujamweni obubudisi egade baqalene nabo ngesikhatheso kwaphela? Awa, isiluleko sakhe siyikambisolawulo ekufuze siphile ngayo qobe langa.
8 UJesu wabeka isibonelo esihle khulu sokuthandaza. Ungakhumbula bona uJesu khewathandaza kuYise ubusuku boke. Khesilinge ukukubona ngelihlo lomkhumbulo lokhu. (Funda uLuka 6:12, 13.) Kusetwasahlobo, pheze eduze nedorobho ekuthiywa iimfesi kilo eKapernomi, indawo uJesu ahlala kiyo esifundenesi. Njengombana kurhwaqela, uJesu ukhuphukela kenye yeentaba eziseduze neLwandle leGaleliya. Njengombana kuba sebusuku, mhlamunye ubona nokukhanya kwamalampa enzasi eKapernomi nemzini eminye etjhidelene nayo. Nokho, nekakhuluma noJehova, uJesu udzimelela ngokudephileko emthandazwenakhe. Kudlula iimzuzu—ngemva kwalokho kuba ma-iri. Akakuthatheli ehloko bona eemzini amalampa ayacima kancani kancani namtjhana inyanga ithoma ukubonakala esibhakabhakeni namtjhana kuthoma ukuzwakala itjhada leembandana zebusuku zifuna ukudla. Pheze umthandazwakhe udzimelela esiquntweni esikhulu ekufuze asenze—ukukhetha abapostoli aba-12. Singamcabanga uJesu adzimelele ekutjeleni uYise yoke iimcabango yakhe nanakho koke okumtshwenyako ngomfundi ngamunye njengombana arabhela ngokusuka ehliziyweni bona amnikele isinqophiso nokuhlakanipha.
9. Singafundani esibonelweni sakaJesu sokuthandaza ubusuku boke?
9 Singafundani esibonelweni sakaJesu? Bona kufuze sithandaze ama-iri amanengi? Awa, ngombana wathi ngabalandeli bakhe: “Umoya uzimisele, kodwana inyama ibuthakathaka.” (Mat. 26:41) Nanyana kunjalo, singamlingisa uJesu. Ngokwesibonelo, siyakhuluma na noBabethu wezulwini ngaphambi kokwenza nanyana ngisiphi isiqunto esingaba nomthelela engokomoyeni lethu, lomndenethu, nofana labakhulekeli esikunye nabo? Iimthandazo yethu iyazibandakanya na iintlhogo zabanakwethu nabodadwethu esikholwa kunye nabo? Sithandaza ngokusuka ehliziyweni kunokubuyelela ihlelo elithileko lamabizo? Godu, tjheja bona uJesu bekakuqala njengokuqakathekileko, ukukhuluma ngokutjhideleneko nokuvulela uYise isifuba. Ephasini lanamhlanjesi elinokuphila okurhabako, kubulula khulu ukutinazela ngezinto zokuphila kangangobana sikhohlwe izinto eziqakatheke khulu. Nesizinikela isikhathi esaneleko sokwenza umthandazo womuntu mathupha, odephileko sizokuphaphama khudlwana ngokomoya. (Mat. 6:6, 7) Sizokutjhidela kuJehova, sikutjhisakalele ukuqinisa ubuhlobo bethu naye begodu sigegede ukwenza nanyana yini engabubogabogisa.—Rha. 25:14.
SINGAPHAPHAMA NJANI EMSEBENZINI WOKUTJHUMAYELA?
10. Ngisiphi isibonelo esisitjengisa indlela uJesu ahlala awaphaphamele ngayo amathuba wokunikela ubufakazi?
10 UJesu bekawuphaphamele umsebenzi uJehova amabele wona. Kungaba neemsebenzi evumela ingqondo yesisebenzi bona izule kodwana kungabi nemiphumela engako. Nokho, iimsebenzi eminengi itlhoga bona umuntu adzimelelise ingqondwakhe kiyo begodu aphaphame, ngokuqinisekileko ikonzo yobuKrestu injalo. UJesu bekahlala atjhejile emsebenzinakhe, aphaphamele amathuba wokuhlanganyela iindaba ezimnandi nabanye. Ngokwesibonelo, yena nabafundi bakhe nebafika emzini weSikhari ngemva kokukhamba isikhathi eside ekuseni, abafundi bayokuthenga ukudla. UJesu wahlala eduze nomthombo womuzi loyo, kodwana wahlala aphaphame, wabona nethuba lokufakaza. Kwatjhidela umfazi womSamariya azokukha amanzi. UJesu bekangaqunta ukuthatha isithongwana. Bekangacabanga ngamabanga wokugegeda ukukhuluma naye. Nokho, wakhuluma wabandakanya umfazi lo engcocweni, wanikela ubufakazi obunamandla obathinta amaphilo wabanengi emzini loyo. (Jwa. 4:4-26, 39-42) Kghani singasilingisa ngokungeziweko isibonelo sakaJesu sokuphaphama, mhlamunye ngokulwela ukuphaphamela amathuba wokuhlanganyela iindaba ezimnandi nabantu esihlangana nabo ekuphileni kwaqobe langa?
11, 12. (a) UJesu wasabela njani kilabo ebebafuna ukumthikazisa emsebenzinakhe? (b) Ngikuphi ukulinganisela uJesu akutjengisa malungana nomsebenzakhe?
11 Ngezinye iinkhathi, abantu abangakahlosi okumbi bafuna ukuphazamisa uJesu emsebenzinakhe. EKapernomi, iinqubuthu zatjhukunyiswa khulu ziimmangaliso zakaJesu zokulapha kangangobana bezifuna ahlale nazo unomphela. Kuyazwisiseka lokho. Nokho, uJesu bekathunywe bona ayokutjhumayela kizo zoke ‘izimvu ezilahlekileko zakwa-Israyeli,’ ingasi kilezo ezisemzini munye kwaphela. (Mat. 15:24) Ngalokho watjela abantwabo: “Kufanele bona ngitjhumayele iindaba ezimnandi ngombuso kaZimu nakwezinye iindawo, ngombana ngilokho uZimu angithume bona ngikwenze.” (Luka 4:40-44) Ngokukhanyako ukuphila kwakaJesu bekudzimelele ekonzwenakhe. Zange avumele litho limthikazise.
12 Kghani uJesu bekadzimelele khulu ekonzwenakhe kangangobana bekeqisa nanyana azidima ithabo? Kghani bekatjhiseka khulu ekonzweni kangangobana angabi nandaba neentlhogo ezifanelekako zeemndeni? Awa, uJesu wabeka isibonelo esipheleleko sokulinganisela. Wathabela ukuphila, athabela neenkhathi eziimnandi nabangani bakhe. Bekayiqala njengeqakathekileko iimndeni, atjengisa isirhawu esidephileko eentlhogweni neemrarweni yayo, begodu bekatjengisa ithando lakhe ngokutjhaphulukileko ebantwaneni.—Funda uMarkosi 10:13-16.
13. Singasilingisa njani isibonelo sakaJesu sokuphaphama nokulinganisela emsebenzinethu wokutjhumayela ngoMbuso?
13 Njengombana silingisa isibonelo sakaJesu sokuphaphama, singakulwela njani ukutjengisa ukulinganisela okufanako? Asivumeli iphaseli lisithikazise emsebenzinethu. Ngitjho abangani neenhlobo abangakahlosi okumbi bangasikhuthaza bona sinciphise itjiseko ekonzwenethu namtjhana siphile lokho abakuqala njengepilo ejayelekileko. Nokho, nesilingisa uJesu, siqala ikonzwethu njengokudla. (Jwa. 4:34) Umsebenzethu uyasondla ngokomoya begodu uyasithabisa. Nokho, asifuni ukutjhiseka ngokweqileko, sitjengise umoya wokuzitjhaya abalunge khulu namtjhana wokuzidima. NjengoJesu, sifuna ukuba ziinceku ezithabileko nezilinganiselako ‘zakaZimu othabileko.’—1 Thi. 1:11.
SINGAPHAPHAMA NJANI NGEENKHATHI ZOKULINGWA?
14. Ngeenkhathi zokulingwa, ngimuphi umukghwa okufuze siwubalekele, begodu kubayini?
14 Njengombana sibonile, ezinye zeenkhuthazo zakaJesu ezirhabileko zokuhlala siphapheme wazitjho nekaqalene nokulingwa okukhulu. (Funda uMarkosi 14:37.) Nesiqalene nobudisi, sitlhoga isibonelo sakhe khulu kunanini ngaphambili. Nebalingwako, abanengi bajayele ukulibala iqiniso eliqakathekileko, eliqakatheke kangangobana incwadi yeZiyema ikhuluma ngalo kabili: “Kunendlela ebonakala ngasuthi ilungile phambi komuntu, kodwana ukuphela kwayo kuziindlela zokufa.” (Iziy. 14:12; 16:25) Nesithembela ekucabangeni kwethu, khulukhulu nesiqalene neemraro emabhombo, siba semathubeni wokuzilimaza thina nalabo esibathandako.
15. Ngisiphi isilingo ihloko yomndeni engaqalana naso ngeenkhathi ezibudisi ngokomnotho?
15 Ngokwesibonelo, ihloko yomndeni ingaqalana negandelelo elinamandla lokondla ‘umndenayo’ ngokwenyama. (1 Thi. 5:8) Ingalingeka ukuthatha umsebenzi ozoyenza ingabi khona kanengi emhlanganweni yobuKrestu, ingakghoni ukudosa phambili ekukhulekeleni komndeni nofana ukuhlanganyela ekonzweni. Neyithembela kwaphela ekucabangeni kwabantu, ikambo enjalo ingabonakala ifanele begodu ilungile. Nokho, ingabangela ukugula namtjhana ukufa okungokomoya. Qala bona kungcono kangangani ukulandela isiluleko seZiyema 3:5, 6! USolomoni wathi: “Thembela kuJehova ngayo yoke ihliziyo yakho, ungasami ngelwazi lakho. Mtjheje kizo zoke iindlela zakho, begodu yena uzakunqophisa iindlela zakho.”
16. (a) UJesu wabeka siphi isibonelo sokuthembela ekuhlakanipheni kwakaJehova kunokuthembela ekuhlakanipheni kwakhe? (b) Iinhloko zeemndeni ezinengi zisilingisa njani isibonelo sakaJesu sokuthembela kuJehova hlangana neenkhathi ezibudisi?
16 Nekalingwako, uJesu wala waphetha ukuthembela elwazini lakhe. Cabanga ngalokho! Umuntu ohlakaniphe kinabo boke abakhe baphila ephasini wakhetha ukungafuni iimpendulo ekuhlakanipheni kwakhe. Ngokwesibonelo, uSathana nekamlingako, ngokubuyelelweko uJesu waphendula ngamezwi athi: “Imitlolo ecwengileko ithi.” (Mat. 4:4, 7, 10) Wathembela ekuhlakanipheni kwakaYise bona ahlule iinlingo, atjengisa ukuthobeka uSathana akudelelako begodu akutlhoga ngendlela erarako. Siyakwenza okufanako? Ihloko yomndeni elingisa ukuphaphama kwakaJesu ivumela iLizwi lakaZimu liyinqophise, khulukhulu ngeenkhathi ezibudisi. Ngilokho kanye okwenziwa ziinhloko zeemndeni ephasini zombelele. Zibeka uMbuso kaZimu nokukhulekela okuhlwengileko qangi ekuphileni kwazo, ngitjho naphambi kokutshwenyeka ngezinto ezingokwenyama. Ngokwenza njalo, ziyitlhogomela ngendlela engcono khulu iimndenazo. UJehova usabela ngokubusisa iimzamo yazo yokutlhogomela iintlhogo ezingokwenyama, njengombana iLizwi lakhe lithembisa.—Mat. 6:33.
17. Yini ekutjhukumisela bona ulingise ukuphaphama kwakaJesu?
17 Akunakuzaza bona uJesu ubeka isibonelo esizidlula zoke sokuphaphama. Isibonelo sakhe silisizo, siyazuzisa, begodu siphulusa ukuphila. Khumbula, uSathana uzimisele ukukudunduzela bona ulale ngokomoya—okutjho ukuba nekholo elibogabogako, ukukhulekela ngokuzikhuja, nokunyefisa ukuthembeka. (1 Tes. 5:6) Ungamvumeli aphumelele! Hlala uphapheme njengoJesu—uphapheme emthandazwenakho, ekonzwenakho, nendleleni oqalana ngayo neenlingo. Ngokulandela ikambo leyo, uzokuba nokuphila okunothileko, okuthabisako, nokwanelisako ngitjho nanje emaphelweni wephasi elifakweli. Ikambo yokuphaphama izokuqinisekisa nokobana iKosakho neyibuyako izokuqeda iphaseli, izokufumana uphapheme begodu umajadujadu, wenza intando kaYise. Qala bona uJehova uzokuthaba kangangani ukukunikela umvuzo wekambo yakho yokuthembeka!—ISam. 16:15.
[Iimbuzo Yesifundo]
[Isithombe ekhasini 6]
UJesu watjhumayela emfazini emthonjeni. Ngimaphi amathuba owenzako wokutjhumayela qobe langa?
[Isithombe ekhasini 7]
Ukutlhogomela ihlalakuhle engokomoya yomndenakho kutjengisa bona uphapheme
