Funda ‘Esisekelweni Seqiniso’
Funda ‘Esisekelweni Seqiniso’
“Sinesisekelo selwazi neseqiniso eMthethweni.”—ROM. 2:20, NW.
QALA IIMPENDULO ZEEMBUZO LE:
Iimhlatjelo evezwe eMthethweni kaMosisi beyifanekiselani?
Ngikuphi ukufana okukhona emhlatjelweni ebeyenziwa ma-Israyeli neyenziwa maKrestu namhlanjesi?
Ngiziphi izinto eziqunta bona umhlatjelo uzokwamukelela namtjhana ngeze wamukeleke kuJehova?
1. Kubayini kufuze sibe nekareko yokuzwisisa ukuqakatheka koMthetho kaMosisi?
NGATHANA besinganayo iimtlolo ephefumulelweko yompostoli uPowula, bekuzoba budisi ngathi ukuzwisisa ukuqakatheka kweengcenye ezinengi zoMthetho kaMosisi. Ngokwesibonelo, encwadinakhe eya kwebeHebheru, ukhanyisa indlela uJesu ‘njengompristi omkhulu’ ebekanganikela kubekanye ‘umhlatjelo okhambelanako’ enze kukghonakale ngabo boke abatjengisa ikholo bona bafumane “ukuhlengwa okungapheliko.” (Heb. 2:17; 9:11, 12) UPowula wahlathulula bona itabarnakele ‘belisithunzi salokho okusezulwini’ nokobana uJesu waba Mlamuleli ‘wesivumelwano esingcono’ kunaleso uMosisi agade amlamuleli waso. (Heb. 7:22; 8:1-5) Ngesikhathi sakaPowula, ihlathululo enjalo yoMthetho beyiqakathekile kumaKrestu, begodu nanje isaqakathekile. Isisiza sizwisise ngokuzeleko ukuqakatheka kwamalungiselelo uZimu asenzele wona.
2. AmaKrestu amaJuda gade angcono njani nekamadaniswa nabantu beentjhaba?
2 Nekatlolela amaKrestu weRoma, uPowula wanqophisa amanye wamezwakhe emalungwini webandla egade amaJuda wemvelo begodu afundiswe uMthetho kaMosisi. Wavuma bona abanjalo beba ngcono ngokuba “nesisekelo selwazi neseqiniso eMthethweni” ngoJehova neenkambisolawulo zakhe zokulunga. Ukuzwisisa ‘isisekelo seqinisweso’ nokulihlonipha ngokusuka ehliziyweni kwenza amaKrestu amaJuda, njengamaJuda athembekileko wangaphambi kwawo, bona anqophise, afundise, begodu akhanyisele labo egade bangawazi uMthetho uJehova awunikele abantu bakhe.—Funda KwebeRoma 2:17-20.
IINTHUNZI ZOMHLATJELO KAJESU
3. Sizuza njani ngokutaditjha iimhlatjelo yamaJuda wekadeni?
3 Isisekelo seqiniso uPowula akhuluma ngaso sisaqakathekile kithi bona sizwisise iinhloso zakaJehova. Iinkambisolawulo ezisisekelo zoMthetho kaMosisi sizaqakathekile. Sinalokho engqondweni, asicabangele ingcenye yinye tere yoMthetho loyo—indlela iimhlatjelo neemnikelo ehlukahlukeneko eyarholela ngayo amaJuda athembekileko kuKrestu yawasiza nokobana azwisise lokho uZimu akufunako kiwo. Godu njengombana iimfuneko zakaJehova ezisisekelo zingatjhuguluki, sizokubona nokobana iiMthetho uZimu ayinikela ama-Israyeli malungana nemihlatjelo neemnikelo ingasisiza sihlahlube izinga lekonzo yethu ecwengileko.—Mal. 3:6.
4, 5. (a) UMthetho kaMosisi wabakhumbuzani abantu bakaZimu? (b) Iimthetho kaZimu emalungana nemihlatjelo beyiyikomba yani?
4 Bekungeze kwaba yinto engatjho litho kumaJuda wekadeni ukobana iingcenye ezinengi zoMthetho kaMosisi bezigandelela ukuba nesono kwawo. Ngokwesibonelo, nanyana ngubani othinta isidumbu bekufuze ahlanzwe. Ukwenza lokho, ikomo ebomvu ephilileko bekufuze ihlatjwe begodu itjhiswe. Umlotha wayo bewubekelwa ukwenza “amanzi wokuhlanza,” ebekafefezwa eemntwini ogade ahlanzwa ngelanga lesithathu nelekhomba ngemva kokusilaphala. (Num. 19:1-13) Godu njengesikhumbuzo sokobana ukuzalana kwabantu kudlulisa ukungapheleli nesono, umfazi osanda ukubeletha bekutlhogeka atjheje isikhathi sokungahlanzeki, ngemva kwaso bekufuze afumane ukulitjalelwa ngokwenza umhlatjelo.—Lef. 12:1-8.
5 Imihlatjelo yeenlwana beyitlhogeka nakobunye ubujamo obunengi baqobe langa bona kuhlawulelwe izono. Kungakhathaliseki bona umkhulekeli uyalemuka namtjhana awa, iimhlatjelo leyo—naleyo ebeyinikelwa ngokukhamba kwesikhathi etempelini lakaJehova—‘beyisithunzi’ somhlatjelo kaJesu opheleleko.—Heb. 10:1-10.
UMOYA UMHLATJELO EGADE WENZIWA NGAWO
6, 7. (a) Ngiziphi izinto ebezinqophisa ama-Israyeli ekukhetheni iimnikelo yawo emhlatjelo, begodu lokho bekufaniselani? (b) Ngimiphi iimbuzo esingazibuza yona?
6 Ifuneko esisekelo malungana nananyana ngisiphi isilwana ebesizokwenziwa umhlatjelo kuJehova kukobana kufuze kube “ngesiphilileko” ngazo zoke iindlela—singabi siphofu, ngesilimeleko, esirholopheleko, namtjhana esigulako. (Lef. 22:20-22) Ama-Israyeli nekanikela iinthelo namtjhana iinthoro kuJehova, bekutlhogeka kube “ziinthelo zokuthoma,” “okungcono khulu” kwesivuno sawo. (Num. 18:12, 29) Umnikelo osezingeni eliphasi bewungamukeleki kuJehova. Ifuneko eqakathekileko le malungana nemihlatjelo yeenlwana beyifanekisela bona umhlatjelo kaJesu bewungeze ube nebala nokonakala begodu uJehova bekazokunikela ngokusezingeni eliphakemeko nokuthandeka khulu kuye bona ahlenge isintu.—1 Pit. 1:18, 19.
7 Nengabe umuntu owenza umhlatjelo bekamthokoza kwamambala uJehova ngabo boke ubuhle Bakhe, bekangeze akuthabele na ukukhetha okungcono khulu anakho? Bona unikela ngomhlatjelo osezingeni elinjani bekutjhiyelwa kuloyo onikelako. Nokho, bekazi bona uZimu bekangeze awuthabele umnikelo onokungapheleli ngombana lokho bekuzokutjengisa bona umuntu loyo unikela ngokuzikhuja uwuqala nanjengomthwalo. (Funda uMalaki 1:6-8, 13.) Lokhu kufuze kusenze sicabange ngekonzwethu kuZimu: ‘Ngimkhonza ngomoya onjani uJehova? Kungafaneleka na ngami bona ngihlolisise izinga lekonzwami neenhloso zami zokumkhonza?’
8, 9. Kubayini kufuze sicabangele umoya ama-Israyeli ebekenza ngawo umhlatjelo yawo?
8 Nengabe umIsrayeli bekenza umhlatjelo ngokuzithandela atjengisa ukuthokoza uJehova ngokuvela ehliziyweni, njengalapho kwenziwa umnikelo otjhiswako, isibawo sokwamukelwa nguye, pheze bekungeze kube budisi ukukhetha isilwana esifaneleko. Umkhulekeli loyo bekazokuthabela ukunikela uJehova okungcono khulu anakho. AmaKrestu namhlanjesi awenzi iimhlatjelo yamambala njengombana beyifunwa Mthetho kaMosisi, kodwana ayayenza iimhlatjelo ngomqondo wokobana asebenzisa isikhathi, amandla, nezinto zawo ukukhonza uJehova. Umpostoli uPowula waqalisela ‘ngokwazisa tjhatjhalazi’ ithemba lobuKrestu ‘nokwenza okuhle kwabanye nokwabelana’ njengemihlatjelo ethabisa uZimu. (Heb. 13:15, 16) Umoya abantu bakaJehova abenza ngawo izenzo ezinjalo utjengisa bona bamthokoza begodu bambuka kangangani uZimu ngalokho abaphe khona. Ngalokho kunokufana hlangana kwemikghwa neenhloso zalabo abahlanganyela ekonzweni yobuKrestu namhlanjesi nalabo egade banikela iimnikelo yokuzithandela ekadeni.
9 Nokho, kungathiwani ngobujamo lapho uMthetho kaMosisi bewufuna umnikelo wesono emntwini ngebanga lomtjhapho othileko awenzileko? Ucabanga bona ukobana umuntu ukatelelekile bona awenze bekuzokwenza umehluko ekuzimiseleni nemoyeni awenza ngawo? Kungenzeka na bona iimhlatjelo enjalo beyinikelwa ngokuzikhuja? (Lef. 4:27, 28) Bengeze kube njalo nengabe umuntu onikelako bekafuna kwamambala ukubulunga ubuhlobo obuhle noJehova.
10. Ngimiphi “iimhlatjelo” umKrestu okungafuze ayenze ukulungisa ubuhlobo obulimeleko?
10 Ngokufanako namhlanjesi, ungalemuka bona ngokungacabangi, ungazi, namtjhana ungakatjheji, kungenzeka ukhube umzalwana. Isazela sakho singakutjela bona utjhaphile ekuziphatheni kwakho. Nanyana ngubani oncamileko ngokukhonza uJehova uzokwenza koke okusemandlenakhe ukulungisa ukutjhiyeka kwakhe, akusinjalo? Lokho kungatjho ukubawa ngeqiniso ukulitjalelwa mumuntu owoniweko, namtjhana endabeni yokuziphatha okumbi okukhulu, ukufuna isizo elingokomoya lababonisi abamaKrestu abanethando. (Mat. 5:23, 24; Jak. 5:14, 15) Ngalokho silahlekelwa ngokuthileko bona silungise ukona esikwenze komunye umuntu namtjhana kuZimu. Nanyana kunjalo, nesenza “iimhlatjelo” enjalo, sibuyisela ubuhlobo bethu noJehova nomnakwethu begodu sifumana isazela esihlwengileko. Godu, lokhu, kusiqinisekisa bona indlela kaJehova yindlela engcono khulu yokwenza izinto.
11, 12. (a) Ngiliphi ilungiselelo ebelivezwa mihlatjelo yehlanganyelo? (b) Iimhlatjelo yehlanganyelo inakuphi ukuqakatheka ekukhulekeleni okuhlwengileko namhlanjesi?
11 Eminye iimhlatjelo evezwe eMthethweni kaMosisi beyiqalwa njengemnikelo yehlanganyelo. Beyifanekisela ukuba nokuthula noJehova. Umuntu owenza umnikelo onjalo nomndenakhe bebadla inyama yesilwana esenziwe umhlatjelo, mhlamunye kwelinye lamakamero wokudlela letempeli. Umpristi owenze umnikelo loyo bekafumana ingcenye yenyama, njengombana bekwenza nabanye abapristi ebebakhonza etempelini. (Lef. 3:1; 7:31-33) Umkhulekeli bekenza umhlatjelo loyo kwaphela ngombana anesifiso sokuba nobuhlobo obuhle noZimu. Bekuba ngasuthi umkhulekeli lo, umndenakhe, abapristi, noJehova ngokwakhe bathabela isidlo ndawonye, ngokuthula.
12 Ngokomfanekiso, ngiliphi ilungelo elikhulu ebelingaba khona, kunokumemela uJehova esidlweni esinjalo begodu asamukele isimemo? Akubuzwa bona omemileko bekangafuna ukunikela isimenywa esihloniphekilesi okungcono khulu anakho. Ilungiselelo leminikelo yehlanganyelo, ingcenye yesisekelo seqiniso loMthetho, latjengisa bona ngomhlatjelo kaJesu omkhulu, boke esintwini abafisa ukuba nobuhlobo obutjhideleneko nobunokuthula noMbumbi wabo, bangakghona ukwenza njalo. Namhlanjesi, singaba nobungani noJehova njengombana sinikela ngokuzithandela ngezinto namandlethu ekonzwenakhe.
IINYELELISO MALUNGANA NEEMHLATJELO
13, 14. Kubayini umhlatjelo iKosi uSawulu ebeyifuna ukuwenzela uJehova ungakhenge wamukeleke?
13 Bona yamukelwe nguJehova, iimhlatjelo evezwe eMthethweni kaMosisi bekufuze inikelwe ngomoya ofaneleko nangehliziyo evumako. Nokho, iBhayibhili, ineembonelo ezisiyeleliso zemihlatjelo engazange yamukeleke kuZimu. Khuyini eyamenza wayala? Asicabangele ubujamo obubili.
14 Umporofidi uSamuweli watjela iKosi uSawulu bona bekusele kusikhathi sakaJehova sokukhupha isahlulelo kuma-Amaleki. Ngalokho uSawulu bekufuze atjhabalalise isitjhaba esilinabesi nayo yoke ifuyo yaso. Nokho, ngemva kokuthumba kwakhe, uSawulu wavumela amasotjakhe bona angambulali u-Agagi, ikosi yama-Amaleki. Godu uSawulu wabulunga okungcono khulu efuyweni yawo njengokuthileko ebekunganikelwa kuJehova. (1 Sam. 15:2, 3, 21) Wasabela njani uJehova? Wamala uSawulu ngokungalaleli kwakhe. (Funda 1 Samuweli 15:22, 23.) Sifundani kilokhu? Bonyana wamukeleke kuZimu, umhlatjelo kufuze ukhambisane nokulalela iimthetho yakhe.
15. Ukuziphatha okumbi kwama-Israyeli athileko ngelanga laka-Isaya bekutjengisani?
15 Isibonelo esifanako sifumaneka encwadini ka-Isaya. Ngesikhathi saka-Isaya, ama-Israyeli bekanikela kuJehova iimhlatjelo ngokuzikhuja. Nokho, ukuziphatha kwawo okumbi, bekwenza iimhlatjelo yawo ingamukeleki. UJehova wabuza, “ingizuzisa ngani imihlatjelo yenu eminengi? Ngidiniwe mihlatjelo etjhiswako yamaramu namafutha weenlwana ezinonileko; neengazi zeenkunzi ezincani namalamjana aduna neembuzi eziduna angikazithabeli. . . . Lisani ukuletha iimnikelo yeenthoro engeziweko engatjho litho. Ipepho—iyinto enyenyisako kimi.” Gade uyini umraro? UZimu wawatjela: “Ngitjho nanyana nenza iimthandazo eemnengi, angikalaleli; zona kanye izandla zenu zizele ukuphalaza iingazi. Zihlambeni; nizenze nihlwengeke; susani ubumbi bezenzo zenu phambi kwamehlwami; nilise ukwenza okumbi.”—Isaya 1:11-16.
16. Khuyini equnta bona umhlatjelo uyamukelela kuZimu namtjhana awa?
16 UJehova bekangayithabeli iimhlatjelo ebeyinikelwa zizoni ezingatjhugulukiko. Nokho, iimthandazo neemnikelo yalabo abalinga ngeqiniso ukuphila ngokuvumelana neemthetho kaZimu beyamukelela kuye. Isisekelo soMthetho safundisa abanjalo bona banesono begodu batlhoga ukulitjalelwa. (Gal. 3:19) Ukulemuka lokho kwabenza bazisola ngokusuka ehliziyweni. Ngokufanako namhlanjesi, kutlhogeka silemuke ukutlhoga kwethu umhlatjelo kaKrestu ongakghona kwamambala ukuhlawulela izono. Nesikuzwisisa begodu sikuthokozela lokhu, uJehova ‘uzokuthabela’ koke esikunikela kuye ekonzweni yethu yokuzinikela.—Funda iRhalani 51:17, 19.
YIBA NEKHOLO EMHLATJELWENI KAJESU
17-19. (a) Singamtjengisa njani ngokufaneleko uJehova ukuthokoza kwethu ngomhlatjelo kaJesu osihlengo? (b) Sizokufunda ngani esihlokweni esilandelako?
17 Singcono kunalabo ebebaphila ngaphambi kweenkhathi zobuKrestu ngombana akusatlhogeki saneliswe kubona ‘isithunzi’ kwaphela seenhloso zakaZimu. (Heb. 10:1) Iimthetho emalungana neemhlatjelo yakhuthaza amaJuda bona ahlawulele iimfanelo ebezizowasiza afumane ubuhlobo obuhle noZimu—ukuthokoza kwamambala, isifiso sokumnikela okungcono khulu, nokulemuka itlhogeko yokuhlengwa. Ngebanga lehlathululo eseMitlolweni YamaKrestu YesiGirigi, singazwisisa bona ngesihlengo, uJehova uzoyisusa unomphela iimphumela yesono nokobana ngitjho nanje usivumela bona sibe nesazela esihle phambi kwakhe. Umhlatjelo kaJesu osihlengo ulilungiselelo elihle khulu!—Gal. 3:13; Heb. 9:9, 14.
18 Liqiniso, kutlhogeka okungaphezu kokuzwisisa okulula ngomhlatjelo wesihlengo bona sizuze ngokuzeleko kiwo. Umpostoli uPowula watlola,“Yeke umthetho ngiwo obe umnqophisi bekwafika uKrestu, ze samukeleke kuZimu bona silungile ngekholo.” (Gal. 3:24) Godu ikholo elinjalo kufuze likhambisane neemsebenzi. (Jak. 2:26) Ngalokho uPowula wakhuthaza amaKrestu wekhulu lokuthoma ebekanesisekelo selwazi elifunyenwe eMthethweni kaMosisi bona alisebenzise ilwazelo. Ngokwenza lokho, ukuziphatha kwawo bekuzokuvumelana neenkambisolawulo zakaZimu ogade uzifundisa.—Funda KwebeRoma 2:21-23.
19 Ngitjho nanyana amaKrestu namhlanjesi kungatlhogeki abulunge uMthetho kaMosisi, kusafanele anikele iimhlatjelo eyamukelekako kuJehova. Ukobana singakwenza njani lokho kuzokudenjwa ngakho esihlokweni esilandelako.
[Iimbuzo Yesifundo]
[Umkhangiso osekhasini 17]
Iimfuneko zakaJehova ezisisekelo eencekwini zakhe azitjhuguluki
[Isithombe ekhasini 18]
Ngisiphi isilwana ebewungasinikela kuJehova?
[Isithombe ekhasini 19]
Labo abanikela iimhlatjelo eyamukelekako kuJehova bathabela ukwamukelwa nguye
