1-2. Singasilalela njani isiyeleliso esisifumana emtlolweni wezAga 4:25? Nikela isibonelo.

CABANGA ngananzi iimbonelo ezilandelako. Udade olupheleko ucabanga ngeenkhathi ebezithabisa ezadlulako. Nanyana sele aluphele nje kodwana usaragela phambili enzela uJehova okusemandlenakhe. (1 Kor. 15:58) Ngaso soke isikhathi uhlala azicabanga yena nabathandekako bakhe basephasini elitjha. Omunye udadwethu ukhumbula ngendlela omunye umKrestu amlimaza ngayo, kodwana ukhetha ukungadzimeleli khulu esenzweneso, ngalokho ubalekela ukuba namavunda. (Kol. 3:13) Umfowethu, nanyana akhewenza umtjhapho ngaphambilini, kodwana ukhetha ukuhlala athembekile.​—Rhu. 51:11.

² Khuyini amaKrestu amathathu la afana ngayo? Woke acabanga ngezinto ekhezawehlela kodwana akhetha ukungadzimeleli kilokho okwenzekako. Kunalokho, ‘aqale phambili’ engomusweni.​—Funda izAga 4:25.

3. Kubayini kufuze ‘siqale phambili’ engomusweni?

³ Kubayini kuqakathekile ‘ukuqala phambili’ engomusweni? Umuntu angeze akghona ukukhamba anqophe nakasolo aqala emuva. Kuyafana nangathi, angeze sakghona ukulotjha uJehova ngokuphumelelako nasisolo siqale emuva.​—Luk. 9:62.

4. Sizokucoca ngani esihlokwenesi?

⁴ Esihlokwenesi sizokucoca ngeenqabo ezintathu ezingasenza siphile esikhathini esidlulileko. * Ziyalandela: (1) ukurhalela izinto  ezihle ezenzeke esikhathi esidlulileko, (2) ukubamba amavunda, (3) nokudliwa ngunembeza ngendlela engakafaneli. Ebujamweni ngabunye sizokubona iinkambisolawulo zeBhayibheli ezizosisiza bona singadzimeleli ‘ezintweni ezingemva’ kodwana kunalokho, siqale “phambili.”​—Flp. 3:13.

5. UMtjhumayeli 7:10 usikhalima ngani?

⁵ Funda uMtjhumayeli 7:10. Tjheja ukuthi iveseli alithi kumbi ukubuza uthi: “Kubayini amalanga wakade bekamnandi?” Ukukhumbula izinto ezihle kusibusiso esivela kuJehova. Kunalokho iveseli lithi: “Ungabuzi uthi, ‘Kubayini amalanga wangaphambilini angcono kunawanjesi?’” Umraro uba nawumadanisa amalanga wakade nawanamhlanjesi, bese uphetha ngokuthi amalanga wakade angcono kunawanamhlanjesi. Enye itjhugululo yeBhayibheli ibeka iveseli ngendlela le: “Ungabuzi uthi, ‘Maye mara kubayini amalanga wakade bekangcono kunamalanga wanamhlanjesi?’ Loyo akusimbuzo womuntu ohlakaniphileko.”

6. Kubayini kungasikuhlakanipha ukusolo sicabanga ukuthi ipilo beyingcono esikhathini sakade? Nikela isibonelo.

⁶ Kubayini kungasikuhlakanipha ukucabanga ukuthi ipilwethu beyingcono ekadeni kunanje? Ukurhalela izinto ezimnandi ezadlulako kungasenza bona sikhumbule izinto ezihle kwaphela ezenzeka esikhathini esidlulileko. Namkha kusenze singasabukhumbuli ubuhlungu esabuzwako. Ngokwesibonelo, cabanga ngama-Israyeli wekadeni. Ngemva kokuthi akhambile eGibhide, kungasikade akhohlwa ubuhlungu ebekaqalene nabo. Kunalokho acabanga ngezinto ezihle kwaphela ebezenzeka. Athi: “Sikhumbula neenhlambi ebegade sizidlela zona eGibhide singazithengi, iinkomukomu, amakhabe, imihlobohlobo yama-eyi namakonofula.” (Num. 11:5) Inga-kghani vele ‘bebangazithengi’ izinto ebebazithabela lapho? Awa. Izintwezo ama-Israyeli azithenga ngenani elikhulu khulu ngombana bekaziingqila ezigandelelwe kabuhlungu eGibhide. (Eks. 1:13, 14; 3:6-9) Nanyana kunjalo, ngokukhamba kwesikhathi abulibala ubuhlungu abuzwako  ngombana besele afuna ukubuyela esikhathini esidlulileko. Akhetha ukudzimelela ezintweni ‘ezimnandi zakade’ kunokucabanga ngezinto ezihle uJehova ebekabenzela zona. Indlela ebebenza ngayo, akhenge imthabise uJehova.​—Num. 11:10.

7. Khuyini eyasiza omunye udade walisa ukucabanga ngezinto ezihle kwaphela zesikhathi esidlulileko?

⁷ Singakubalekela njani ukuhlala sicabanga ngokuthi iinkhathi zakade bezingcono? Cabanga ngodadwethu owathoma ukusebenza eBethel yeBrooklyn ngo-1945. Ngokukhamba kweminyaka watjhada nomfowethu obekaseBethel begodu basebenza ndawonye iminyaka eminengi. Kodwana kwathi hlangana nabo-1970, ubabakwakhe wathoma ukugula. Kwathi nasele azokuhlongakala, ubabakwakhe wamnikela isiyeleliso esamsiza waqalana nokuhlongakalelwa. Wathi kuye: “Sibe nomtjhado ophumelelako. Abantu abanengi kuyababhalela lokho.” Kodwana wabuye wathi kuye: “Ungaphili esikhathini esidlulileko, ngitjho nanyana uzozikhumbula izinto ezihle ezenzekako. Isikhathi nasisolo sikhamba uzozizwa ngcono. Ungazizwa kabuhlungu, uzitlhuwele. Thaba ngokuthi sibe neembusiswezi. . . . Ukukhumbula izinto ezihle kusisipho esivela kuZimu.” Uyavuma na bona lesi bekusiyeleliso esihle?

8. Udadwethu wazuza njani ngokuthi angaphili esikhathini esidlulileko?

⁸ Udadwethu wacabangisisa ngalokho atjelwe khona. Walotjha uJehova begodu wahlala athembekile bekwaba kulapho ahlongakala khona aneminyaka ema-92. Eminyakeni eyadlulako wathi: “Nangiqala emva eminyakeni ema-63 ngilotjha uJehova isikhathi esizeleko, ngingatjho ukuthi ipilwami beyanelisa tle!” Kubayini udadwethu lo atjho njalo? Nakahlathululako uthi: “Okwenza ipilo ithabise bafowethu nabodadwethu esilotjha nabo uJehova njengombana soke sikuqale ngabovu ukuyokuphila epharadesi ephasini. Silotjha uMbumbethu oMkhulu, okukuphela kukaZimu weqiniso, uJehova bekube phakade.” *  Kwamambala, udadwethu lo usibonelo esihle somuntu oqale phambili esikhathini esizako!

9. Njengombana kuvezwe kuLevitikusi 19:18, kunini la kungaba budisi khulu khona ukulisa amavunda?

⁹ Funda uLevitikusi 19:18. Kanengi kuba budisi ukulibalela umuntu osiphethe kumbi, khulukhulu nakumumuntu esilotjha naye uZimu, umngani namkha isihlobo sethu. Ngokwesibonelo, omunye udadwethu wasolwa mumuntu akholwa naye ngokuthi webe imali. Ngokukhamba kwesikhathi udadwethu wabawa ukulitjalelwa kodwana udadwethu owasolwako bekasolo abambelele kilokho okwenzekileko. Wakhe wazizwa ngendlela le? Ngitjho nanyana singakhenge siqalane nobujamo obufanako, inengi lethu likhe lazwiswa ubuhlungu khulu, labe lakholwa ukuthi angeze lakghona ulibalela umuntu olonileko.

10. Khuyini engasisiza nasizizwa ngasuthi sibambe amavunda?

¹⁰ Khuyini engasisiza nasizizwa ngasuthi sibambe amavunda? Khumbula ukuthi uJehova ubona koke. Uyakubona koke okwenzekako kunye nokungabi nobulungiswa esiqalana nabo. (Heb. 4:13) Uyasizwela nasizwa ubuhlungu. (Isa. 63:9) Uthembisa ukuthi ngokukhamba kwesikhathi uzobususa boke ubuhlungu obubangelwe kungabi nobulungiswa.​—IsAm. 21:3, 4.

11. Sizuza njani nasikhetha ukulisa amavunda?

¹¹ Sifuna ukukhumbula ukuthi nasilisa amavunda, sizizuzisa thina. Ngilokho udadwethu owonwako loya akukhumbulako. Ngokukhamba kwesikhathi wakghona ukulisa amavunda. Kwamkhanyela ukuthi nasilibalela abanye noJehova uyasilibalela. (Mat. 6:14) Akhenge anciphise ubumbi udadwethu abenzako, kunalokho wakhetha ukulisa amavunda, wamlibalela. Umphumela waba kukuthi udadwethu wathaba khudlwana begodu wadzimelela ekulotjheni uJehova.

12. Yoku-1 kaJwanisi 3:19, 20 isisiza bona sitjheje ini?

¹² Funda yoku-1 kaJwanisi 3:19, 20. Ukudliwa ngunembeza yinto ejayelekileko. Ngokwesibonelo, abanye badliwa ngunembeza ngebanga lokucabanga ngezinto abazenzako ngaphambi kobana bazi iqiniso. Abanye badliwa ngunembeza ngebanga lezinto abazenze ngemva kokubhajadiswa. Kujayelekile ukuthi umuntu azizwe njalo. (Rom. 3:23) Iqiniso kukuthi sifuna ukwenza okulungileko kodwana “soke siyatjhapha iinkhathi ezinengi.” (Jak. 3:2; Rom. 7:21-23) Ngitjho nanyana singakuthabeli ukudliwa ngunembeza, kodwana kulitshwayo elihle. Kungasisiza senze izinto ngendlela elungileko begodu kusisize sizimisele ukungayibuyeleli imitjhapho efanako.​—Heb. 12:12, 13.

13. Kubayini kufuze sitjheje, singadliwa ngunembeza ngendlela edluleleko?

¹³ Ngakelinye ihlangothi, kuyakghonakala bona sidliwe ngunembeza ngendlela engakafaneli, lokho kutjho ukuthi siragela phambili sizizwa kabuhlungu ngitjho nanyana sesiphendukile begodu uJehova sekasitjengisile bona usilibalele. Ukuzizwa njalo kungasilimaza. (Rhu. 31:11; 38:4, 5) Kungenzeka ngayiphi indlela lokho? Akhucabange ngesibonelo somunye udadwethu owazizwa kabuhlungu ngesono asenzako, wathi: “Ngizizwa ngasuthi ngingalisa ukusebenzela uJehova ngamandla ngombana angisafaneleki.” Inengi lethu lakhe lazizwa njengodadwethu lo. Kuqakathekile bona sitjheje singadliwa ngunembeza ngokudluleleko. Ngaphezu kwakho koke, cabanga bona kungamthabisa kangangani uSathana nabesingalahla itewu ngitjho nanyana uJehova angakalilahli itewu ngathi.​—Madanisa neye-2 kwebeKorinte 2:5-7, 11.

14. Singaqiniseka njani bona uJehova akakasilahleli itewu?

¹⁴ Mhlamunye ungazibuza: ‘Ngingazi njani bona uJehova akakangilahleli itewu?’  Singatjho ukuthi ngokuzibuza umbuzo lo, siyaziphendula ngesikhathi esifanako. Eminyakeni eyadlulako isiThala sakhe sathi: “Kungenzeka khesakhubeka sawa kanengi ngebanga lemikghwa emimbi edzimelele ukudlula indlela esitjheja ngayo. Ungalahli itewu. Ungaphethi ngokuthi wenze isono uJehova angekhe asilibalela. USathana ufuna bona ucabange ngendlela leyo. Ukucabanga njalo kwakho kutjengisa ukuthi uzizwa kabuhlungu nokuthi awukafiki ezingeni lokuthi ungasalibaleleki. Ungalisi ukuzithoba, ukhulume noZimu umbawe bona akulibalele, akuhlanze begodu akusize. Tjhinga kuye njengomntwana nakaya kubabakhe nakasekingeni, yeke nawe kungakhathaliseki bona ubuyelele isono sinye kanengi kangangani, uJehova uzokusiza begodu uzokutjengisa umusa.” *

15-16. Abanye bazizwa njani nababona ukuthi uJehova akabalahleli itewu?

¹⁵ Inengi labantu bakaJehova liduduzekile ngokubona ukuthi uJehova akakalilahleli itewu. Ngokwesibonelo, umfowethu wathinteka ihliziyo nakabona okuhlangabezenwe nakho Kwakadadwethu esiThaleni, esihlokweni esithi “IBhayibheli Litjhugulula Ukuphila.” Esihlokwenesi udadwethu uthi, ngebanga lendlela ebekaphila ngayo, bekubudisi ukucabanga ukuthi uJehova angamthanda. Bekazizwa ngendlela leyo ngitjho nanyana besele kuphele iminyaka abhajadisiwe. Wathi nakazindla ngesihlengo, wathoma ukucabanga ngenye indlela. *

¹⁶ Okuhlangabezanwe nakho kwakadadwethu lo kwamsiza njani umfowethu? Watlola wathi: “Nangisakhulako, bengilwisana nomukghwa wokubukela iinthombe ezisilapheleko. Muva nje, ngizifumene sele ngibuyele godu emukghweni lo. Ngabawa abadala bebandla bona bangisize ngihlule umukghwa lo begodu ngikghonile ukuwuhlula. Abadala bangiqinisekisa ngokuthi uJehova uyangithanda nokuthi ufuna ukungisiza. Nanyana kunjalo, ngezinye iinkhathi ngizizwa ngingafaneleki begodu ngizizwa ngasuthi uJehova akangithandi. Ukufunda indaba kadadwethu loya kungisize khulu. Nje sekuyangikhanyela ukuthi nangicabanga ukuthi uZimu angeze angilibalela, kuhlekuhle ngisuke  ngithi umhlatjelo weNdodanakhe awukaneli bona ungasula imitjhaphwami. Ngithethe ingcenye ekhuluma ngodadwethu le, ngayibeka kuhle bona ngizikhumbuze nangizizwa ngasuthi uJehova akangithandi.”

17. Umpostoli uPowula wakubalekela njani ukubetjhwa ngunembeza ngendlela edluleleko?

¹⁷ Iimbonelo ezinjengalezi zisikhumbuza umpostoli uPowula. Ngaphambi kobana abemKrestu, wenza izono ezinengi ezikulu. UPowula bekakukhumbula ubumbi abenzako kodwana akhenge adzimelele kibo. (1 Thim. 1:12-15) Wabona isihlengo njengesipho esivela kuJehova. (Gal. 2:20) UPowula wakubalekela ukubetjhwa ngunembeza ngendlela edluleleko, wadzimelela ekusebenzeleni uJehova ngamandlakhe woke, ukutjhinga phambili.

18. Sifundeni esihlokwenesi?

¹⁸ Sifundeni ngokuhlolisisa iinqabo esicoce ngazo esihlokwenesi? (1) Ikghono lokukhumbula lisibusiso esivela kuJehova; kodwana nanyana bekumnandi kangangani ukuphila esikhathini esidlulileko, ukuphila ephasini elitjha esikhathini esizako kuzokuba ngcono khulu. (2) Abanye bangasizwisa ubuhlungu, kodwana nasikhetha ukubalibalela, sizokukghona ukuqala phambili engomusweni. (3) Ukudliwa ngunembeza ngendlela edluleleko kungasenza singathabi nasilotjha uJehova. Yeke, kufuze silingise uPowula sikholwe bona uJehova usilibalele.

19. Sazi njani ukuthi ephasini elitjha angekhe sitshwenywe kuzisola ngezinto ezenzeka esikhathini esidlulileko?

¹⁹ Siqale phambili ekuphileni okungapheliko. Angekhe sisezwa ubuhlungu obubangelwa kuzisola ngezinto esazenza esikhathini sangaphambili ngombana sizabe sisephasini elitjha lakaZimu. Malungana nesikhatheso, iBhayibheli lithi: “Izinto zaphambilini azisazokukhunjulwa.” (Isa. 65:17) Akhucabange ngalokhu: Inengi lethu sele liluphele lilotjha uJehova, kodwana ephasini elitjha, lizokubalitjha godu. (Job. 33:25) Yeke, akhesizimisele ukungaphili esikhathini esidlulileko. Kunalokho, akhesiqale engomusweni siphilele isikhathi esizako.