1. Nasithoma ukuluphala ngimuphi umnqopho esingazibekela wona?

NASITHOMA ukuluphala singaba nevalo lokuthi kuncani khulu esingakwenzela uJehova ukudlula lokha nasisesebatjha. Nanyana singasesenamandla, singakghona ukusebenzisa ukuhlakanipha kwethu namakghono esinawo ukusiza abantu abatjha basebenziseke ehlanganweni kaJehova bebamukele namalungelo angeziweko. Omunye umdala onelemuko wathi: “Ngebanga lokuluphala bengingasakghoni ukwenza eminye imisebenzi, nanyana kunjalo bekungithabisa ukuthi kunabafowethu abatjha abafanelekako nabakghona ukwenza umsebenzi lo.”

2. Khuyini esizokucoca ngayo esihlokwenesi?

² Esihlokweni esidlulileko sicoce ngokuthi abantu abatjha bangazuza njani lokha nababa bangani nabantu abakhulileko. Esihlokwenesi sizokubona ukuthi ukungazikhakhazisi, ukuzithoba, ukuthokoza nokupha kungabasiza njani abantu abakhulileko bona basebenzisane nabantu abatjha ekusizeni ibandla.

3. Ngokomtlolo webeFilipi 2:3, 4, kutjho ukuthini ukuzikhakhazisa begodu khuyini engasiza umKrestu angazikhakhazisi?

³ Abantu abakhulileko kufuze bangazikhakhazisi nabafuna ukusiza abantu abatjha. Umuntu ongazikhakhazisiko akacabangi ukuthi ungcono kunabanye. (Funda kwebeFilipi 2:3, 4.) Abantu abalupheleko bayalemuka ukuthi ebujamweni obuhlukahlukeneko kunemiTlolo neendlela ezinengana zokwenza isabelo. Nje-ke abalindeli abantu benze izinto ngendlela ebezenziwa ngayo esikhathini esidlulileko. (UMtj. 7:10) Ngitjho nanyana banelwazi elinengi abangalabelana ngalo nabantu abatjha, bayalemuka ukuthi “ubujamo bephaseli buyatjhuguluka” kungebangelo kutlhogeka  bafunde iindlela ezitjha zokwenza izinto.—1 Kor. 7:31.

4. Abajikelezi namhlanjesi bawalingisa njani amaLevi wekadeni?

⁴ Abantu abalupheleko abangazikhakhazisiko bayalemuka ukuthi abasakghoni ukwenza izinto ezinengi njengaphambilini. Ngokwesibonelo, cabanga ngabajikelezi. Lokha nabahlanganisa iminyaka ema-70, bafumana isabelo esitjha. Lokho kungaba budisi ngombana bebakuthabela khulu ukusiza abafowabo. Bebawuthanda khulu umsebenzabo begodu basesenesifiso sokuragela phambili bawenza. Nanyana kunjalo, bayazwisisa ukuthi kutlhogeka abafowethu abasesebatjha bona barage nomsebenzi lo. Balingisa amaLevi wakwa-Israyeli ebekufuze alise ukusebenza ethaberinakeli lokha nawahlanganisa iminyaka ema-50. AmaLevi lawo bekawuthanda khulu umsebenzawo kungayi ngokuthi bewenza umsebenzi onjani. Bewamajadu ekwenzeni koke ebewangakghona ukukwenza emsebenzini ebewanikelwe wona nekusizeni abantu abatjha. (Num. 8:25, 26) Namhlanjesi, abajikelezi nabahlanganisa iminyaka ema-70 bayalisa ukuvakatjhela amabandla amanengi kodwana baragela phambili basiza ibandla ababelwe kilo.

5. Ufundani esibonelweni saka-Dan no-Katie?

⁵ Cabanga ngesibonelo saka-Dan obekamjikelezi iminyaka ema-23. Nakahlanganisa iminyaka ema-70, yena nomkakhe  u-Katie bafumana isabelo sokuba maphayona akhethekileko. Bazivumelanisa njani nesabelo sabo esitjha? U-Dan uthi nje umajadu khulu ukudlula phambilini. Utlhogomela izabelo zakhe zebandleni, usiza abafowethu bafanelekele ukuba ziinceku ezisizako begodu ubandula abanye bona batjhumayele emadorobheni nemajele. Bantu abalupheleko, kunengi eningakwenza ukusiza abanye kungayi ngokuthi nisebenzela uJehova isikhathi esizeleko namkha awa. Lokho ningakwenza ngokuthi nithabele isabelo senu esitjha, nizibekele iminqopho emitjha benidzimelele kilokho enikghona ukukwenza kunokuthi niqale izinto engekhe nakghona ukuzenza.

6. Kubayini kukuhle ukuthobeka? Fanekisa.

⁶ Umuntu othobekileko uyazi ukuthi amandlakhe aphelela kuphi. (IzA. 11:2) Ngebanga lokuthobeka akazikateleli ukwenza izinto ezingaphezu kwamandlakhe. Umphumela uba kukuthi uzokuhlala athabile bekaragele phambili asebenza budisi. Umuntu othobekileko singamumadanisa nomuntu otjhayela endaweni ekhuphukelako. Umtjhayeli kungatlhogeka ehlise amagere ukwenzela ukuthi akghone ukuragela phambili atjhayela kuhle emkhuphukelweni. Iye khona, kungenzeka uzokukhamba kabuthaka kodwana uzokuragela phambili akhuphuka umkhuphukelo. Ngendlela efanako, umuntu othobekileko uyazi ukuthi kunini la ekufuze “ehlise khona amagere” ukwenzela bona aragele phambili asebenza begodu aphumelele emsebenzini kaJehova.—Flp. 4:5.

7. UBharzilayi watjengisa njani ukuthi uthobekile?

⁷ Tjheja isibonelo sakaBharzilayi, obekaneminyaka ema-80 lokha iKosi uDavida nayimbawa ukuthi akhambe nayo eJerusalema. UBharzilayi watjengisa ukuthobeka ngokuthi angasamukeli isibawo sekosi. Ngebanga lokuthi besele aluphele, uBharzilayi wakhetha indoda eseseyitjha uKimhamu bona ikhambe esikhundleni sakhe. (2 Sam. 19:35-37) NjengoBharzilayi amadoda amadala namhlanjesi ayakuthabela ukudlulisela izabelo emadodeni asesematjha.

8. IKosi uDavida yakutjengisa njani ukuthobeka malungana nomsebenzi wokwakha ithempeli?

⁸ IKosi uDavida yabeka isibonelo esihle sokuthobeka. Bekafuna ngehliziywakhe yoke, ukwakhela uJehova indlu. Lokha uJehova nakamtjela ukuthi ilungelwelo lizokufunyanwa yindodanakhe uSolomoni, uDavida wasamukela isiqunto sakaJehova bewasekela umsebenzi loyo ngehliziywakhe yoke. (1 Kron. 17:4; 22:5) UDavida akhenge acabange ukuthi yena isabelwesi angasenza ngcono ngebanga lokuthi uSolomoni ‘usakhula begodu bekangakabi nelizwi.’ (1 Kron. 29:1) UDavida walemuka ukuthi ukuphumelela komsebenzi lo bekuyame ekutheni kubusiswe nguJehova, ingasi ngobudala namkha ilemuko lalabo abadosaphambili. NjengoDavida, abantu abalupheleko namhlanjesi basasebenzela uJehova budisi ngitjho nanyana izabelo zabo zitjhugulukile. Bayalemuka ukuthi uJehova uzobabusisa abantu abatjha abenza umsebenzi ebewenziwa ngibo.

9. Ilunga leKomiti yeGatja likutjengise njani ukuthobeka?

⁹ Isibonelo sanamhlanjesi somuntu othobekileko ngesakamfowethu u-Shigeo. Ngo-1976 nakaneminyaka ema-30 wakhethwa ukuthi abe lilunga leKomiti  yeGatja. Ngo-2004 waba mthintanisi weKomiti yeGatja. Ngokukhamba kwesikhathi walemuka ukuthi sekayaluphala begodu akasakghoni ukwenza umsebenzi kuhle njengaphambilini. Wathandaza ngendaba le begodu wacabangisa ngokuthi kubayini kungaba kuhle bona umfowethu osesemutjha abe mthintanisi. U-Shigeo akasesemthintanisi wegatja kodwana usaragela phambili asebenza namanye amalunga weKomiti. Isibonelo sakaBharzilayi, iKosi uDavida nesaka-Shigeo sitjengisa ukuthi umuntu ongazikhakhazisiko nothobekileko udzimelela kilokho abantu abatjha abakghona ukukwenza kunokuthi adzimelele elwazini elincani abanalo. Uzobaqala njengabantu asebenza kunye nabo, kunokubaqala njengabantu aphalisana nabo.—IzA. 20:29.

10. Abantu abakhulileko kufuze bazizwe njani ngabantu abatjha abasebandleni?

¹⁰ Abantu abakhulileko baqala abantu abatjha njengesipho esivela kuJehova begodu bayakuthokozela lokho abakwenzako. Abantu abakhulileko bayakuthabela ukubona abantu abatjha abanamandla bazimisele ukusebenza ebandleni.

11. URute 4:13-16 uhlathulula ukuthi abakhulileko bangazuza njani lokha nabamukela isizo labantu abatjha?

¹¹ UNawomi sibonelo esihle esiseBhayibhelini somuntu okhulileko obekathabela ukusizwa mumuntu omutjha. Ekuthomeni uNawomi wabawa umakotakhe, obekamhlolokazi uRute ukuthi abuyele ebantwini bekhabo. Nanyana kunjalo, uRute akhenge avume ukutjhiya uNawomi. Yeke bobabili babuyela eBhetlehema, uNawomi  wathaba khulu ukuthi uRute akhenge amtjhiye begodu wathabela isizo lakhe. (Rut. 1:7, 8, 18) Qala bona kwaba sibusiso esihle kangangani ebafazini ababilaba! (Funda uRute. 4:13-16.) Ukungazikhakhazisi kuzokwenza abantu abakhulileko balandele isibonelo esihle sakaNawomi.

12. Umpostoli uPowula wakutjengisa njani ukuthokoza?

¹² Umpostoli uPowula wathokoza khulu ngesizo alifumana kubafowabo. Ngokwesibonelo, wathokoza amaKrestu weFilipi ngokumthumelela izinto azitlhogako. (Flp. 4:16) Wathokoza khulu nangesizo alifumana kuThimothi. (Flp. 2:19-22) UPowula wathokoza khulu lokha abafowabo beza bazomkhuthaza lokha nakasiwa ejele leRoma. (IzE. 28:15) UPowula bekayindoda ekhutheleko eyakhamba amabanga amade itjhumayela beyiqinisa namabandla. Nanyana kunjalo, bekangasimumuntu ozikhakhazisako, bekalamukela isizo labafowabo nabodadwabo.

13. Abantu abakhulileko bangatjengisa njani ukuthi bayabathokoza abantu abatjha?

¹³ Abantu abakhulileko bangatjengisa ngeendlela ezinengi ezihlukahlukeneko ukuthi bayabathokoza abantu abatjha abasebandleni. Lokha abantu abatjha nabafuna ukukusiza ngokukuyela eentolo, ukukulayitjha namkha ukukusiza ngezinye izinto ozitlhogako, lamukele isizo labo. Qala isizo elinjalo njengethando elivela kuJehova. Ningaba bangani abatjhideleneko nabantu abakusizako. Siza abantu abatjha batjhidelane noJehova bewubatjele ukuthi kukuthabisa kangangani ukubabona benza koke okusemandlenabo ukusekela ibandla. Ziphe isikhathi sokuthi ukhulumisane nabo ngakho koke okwenzeke ekuphileni kwakho. Nawenza njalo, uzokutjengisa ukuthi ‘uhlala uthokoza’ uJehova ngabantu abatjha abadosele ebandleni.—Kol. 3:15; Jwa. 6:44; 1 Thes. 5:18.

14. IKosi uDavida yatjengisa njani ukuthi iyaphana?

¹⁴ Esibonelweni seKosi uDavida sifumana nesinye isibonelo esihle sobuntu abantu abalupheleko abangaba nabo, ukuphana. Wanikela ngemali enengi nangezinye izinto ukusekela umsebenzi wokwakhiwa kwethempeli. (1 Kron. 22:11-16; 29:3, 4) Wakwenza lokhu ngitjho nanyana abantu bebazokuthi lithempeli lakaSolomoni. Nasele singasanamandla wokwakha, singasekela umsebenzi wokwakha ngokuthi sinikele ngendlela esingakghona ngayo. Singasiza nabantu abatjha ngelwazi esilifumene eminyakeni eminengi edlulileko yokuphila kwethu.

15. UPowula wamsiza njani uThimothi?

¹⁵ Cabanga ngesibonelo esabekwa ngumpostoli uPowula. Wabawa uThimothi ukuthi akhambe naye emsebenzini weenthunywa zevangeli bewamfundisa iindlela ezitjha zokutjhumayela nezokufundisa. (IzE. 16:1-3) Indlela uPowula abandula ngayo uThimothi yamsiza waba mtjhumayeli ophumelelako weendaba ezimnandi. (1 Kor. 4:17) UThimothi wasebenzisa indlela kaPowula yokubandula ukuthi abandule abanye.

16. Kubayini u-Shigeo abandula abanye?

¹⁶ Abantu abalupheleko abasabi ukuthi angekhe basaba nomsebenzi nabangabandula abantu abatjha ngomsebenzi ebewenziwa ngibo ebandleni. Ngokwesibonelo, eminyakeni eyalandelako, u-Shigeo, ekukhulunywe ngaye ekuthomeni, wabandula amalunga amatjha weKomiti yeGatja.  Wakwenza lokhu ukuthi asize umsebenzi womBuso enarheni abelwe kiyo. Ngebanga lalokho, lokha nasele angasakghoni ukuba mthintanisi, umfowethu obandulwe kuhle besele akulungele ukuba mthintanisi. U-Shigeo usaragela phambili nokwabelana nabafowethu abatjha ngelwazi abenalo iminyaka engaba ngaphezu kwema-45 lokuba lilunga leKomiti yeGatja. Qala bona ukuba nabantu abafana no-Shigeo kusibusiso esihle kangangani ebantwini bakaZimu!

17. Ngokukhambelana nomtlolo kaLukasi 6:38, khuyini abantu abakhulileko abangaphana ngayo?

¹⁷ Abafowethu nabodadwethu abakhulileko basibonelo esihle sokuthi ukulotjha uJehova ngokuthembeka ukuphila kwabo koke, kukuphila okuphuma phambili. Ngesibonelo sabo batjengisa ukuthi kuhle kangangani ukufunda iinkambisolawulo zeBhayibheli nokuzisebenzisa ekuphileni. Bayazi ukuthi izinto bezenziwa njani ngaphambilini nanyana kunjalo, bahlala bazimisele ukuzivumelanisa nokutjhuguluka kobujamo. Abantu abakhulileko abaqeda ukubhabhadiswa kunengi abangakwenza, bangacoca ngethabo abalifumeneko ngokuthi bazi uJehova sele baluphele. Abantu abatjha bazokuthabela ukwazi ngelemuko eninalo neemfundo enizifundileko ehlanganweni kaJehova. ‘Nanikwenza umukghwa ukuphana’ ngelemuko eninalo uJehova uzonibusiza khulu.—Funda uLukasi 6:38.

18. Abantu abatjha nabakhulileko bangasizana njani?

¹⁸ Njengombana abantu abakhulileko batjhidelana nabantu abatjha, bazokukghona ukusekelana. (Rom. 1:12) Omunye nomunye unendlela angasiza ngayo omunye. Abantu abakhulileko linengi ilwazi abanalo nokuhlakanipha abakufumeneko ekuphileni kwabo koke. Abantu abatjha banamandla begodu zinengi izinto abakghona ukuzenza. Lokha abantu abatjha basebenzisana nabantu abakhulileko njengabangani, baletha idumo kuBabethu wezulwini onethando begodu baba sibusiso ebandleni.