1. Kubayini uJehova angasimadanisi nabanye abantu?

UJEHOVA uthanda imihlobohlobo yezinto nabantu. Lokho kubonakala ngendalwakhe ehle kuhlanganise nabantu. Ngamunye wethu uhlukile. Yeke, uJehova angeze akumadanisa nabanye abantu. Uhlola ihliziywakho, umuntu onguye ngaphakathi. (1 Sam. 16:7) Uyazi ukuthi khuyini okghona ukuyenza, ubhalelwaphi kuhlanganise nendlela okhuliswe ngayo. Akakubawi ukuthi wenze izinto ezingaphezu kwamandlakho. Nathi kufuze silingise uJehova ngokuziqala ngendlela asiqala ngayo. Nasenza njalo, sizokuba ‘nengcondo evuthiweko,’ yokungazikhakhazisi namkha yokungazinyazi.—Rom. 12:3.

2. Kubayini kungasikuhle ukuzimadanisa nabanye?

² Iye khona, soke singazuza ngokuqala iimbonelo ezihle zabafowethu namkha abodadwethu abaphumelelako emsebenzini wokutjhumayela. (Heb. 13:7) Singafunda kibo ukuthi singayithuthukisa njani indlela esitjhumayela ngayo esimini. (Flp. 3:17) Nanyana kunjalo, kunomehluko hlangana kokulingisa isibonelo esihle nokusebenzisa isibonelweso ukubona ukuthi siqakatheke kangangani. Ukuzimadanisa okunjalo kungasibangela umona, kusidanise bekusenze sizizwe singasililitho. Ukuphalisana nabanye ebandleni kungalimaza itjhebiswano lethu noZimu, njengombana sibonile esihlokweni esigadungileko. UJehova usikhuthaza kuhle nakathi: “Omunye nomunye akahlole lokho yena akwenzako, begodu uzokuba nebanga lokuthaba malungana naye ayedwa, ingasi ngokuzimadanisa nomunye umuntu.”—Gal. 6:4.

3. Ebuhlotjeni bakho noZimu, wenze yiphi ituthuko ekulethela ithabo?

³ UJehova ufuna uyithabele ituthuko oyenzileko etjhebiswaneni lakho naye. Ngokwesibonelo, nangabe ubhajadisiwe,  kufuze uthabe ngombana uwufikelele umnqophwakho! Wazithathela wena isiquntweso. Wasisekela ethandweni lakho ngoZimu. Cabanga ngetuthuko oyenzileko bekube nje. Ngokwesibonelo, kghani sele ukuthanda khudlwana ukuba nesifundo somuntu mathupha nokufunda iBhayibheli? Kghani imithandazwakho seyithoma ukunemba nokusuka ehliziyweni? (Rhu. 141:2) Kghani sewuthoma ukukhuluma nabantu khudlwana esimini begodu sewusebenzisa amathulusi wokutjhumayela ngendlela ephumelelako? Nangabe unomndeni, kghani uJehova ukusizile ukuthi ube yindoda, mfazi namkha mbelethi ongcono? Thaba khulu bewaneliseke ngamatjhuguluko owenzileko la.

4. Sizokucoca ngani esihlokwenesi?

⁴ Singasiza abanye ukuthi bathabele ituthuko abayenzako ebuhlotjeni babo noZimu. Singabasiza nokuthi balise ukuzimadanisa nabanye abantu. Esihlokwenesi, sizokubona ukuthi ababelethi bangabasiza njani abantwababo, abatjhadileko bangasizana njani nokuthi abadala nabanye bangabasiza njani abafowethu nabodadwethu. Sizokuswaphelisa ngokuthi sihlole iinkambisolawulo zeBhayibheli ezingasisiza sizibekele umnqopho esingawufikelela ngokuya ngokwamakghono nobujamo bethu.

5. Umtlolo webe-Efesu 6:4, ukhuthaza ababelethi ukuthi babalekele ukwenzani?

⁵ Ababelethi kufuze batjheje ukuthi bangamadanisi abantwana namkha balindele ukuthi umntwana enze okungaphezu kwamandlakhe. Nangabe ababelethi benza njalo, lokho kungamdanisa umntwana. (Funda yebe-Efesu 6:4.) Udade igama lakhe elingu-Sachiko * uthi: “Abotitjhere bami bebalindele ukuthi ngenze ngcono khulu ukudlula abantwana engifunda nabo. Ekungezeleleni kilokho, umma bekufuna ngenze kuhle esikolweni ukwenzela ukuthi utitjherami nobabami ongakholwako, babone ukuthi abofakazi babantu abenza kuhle. Kokwakho, bekafuna ngenze into engakghonekiko ngokuthi ngifumane amaphesenthi ali-100 eemfundweni zami zoke. Nanyana kukade ngaqeda isikolo, nginokuzibuza ukuthi, engikwenzela uJehova kwanele na?”

6. Ababelethi bangafundani emtlolweni weRhubo 131:1, 2?

 ⁶ Isifundo esiqakathekileko ababelethi abangasifunda sifumaneka emtlolweni wamaRhubo 131:1, 2. (Ufunde.) IKosi uDavida akhange ifune “izinto ezikulu nezimangalisako” namkha izinto ebezingaphezu kwamandlayo. Ukuthobeka kwakhe kwamenza ‘wazehlisa, wathulisa umphefumulwakhe.’ Ababelethi bangafundani emezwini kaDavida? Ababelethi bangazithoba ngokuthi bangalindeli abantwababo benze okungaphezu kwamandlabo. Bangasiza abantwababo babone ukuthi khuyini abakghona ukuyenza nokuthi kukuphi la babhalelwa khona bese babasize bazibekele iminqopho abazoyifikelela. Udade igama lakhe elingu-Marina uthi: “Umma akhange nangelanga lomhlolo, angimadanise nabantwana bakwethu abathathu namkha nabanye abantwana. Wangifundisa ukuthi ngamunye wethu unesipho esihlukileko nokuthi soke siligugu kuJehova. Ngimthokoza khulu ngombana akusikanengi ngizimadanisa nabanye abantu.”

7-8. Amadoda angabatjengisa njani abafazi babo idumo?

⁷ Indoda emKrestu kufuze itjengise umkayo idumo. (1 Pit. 3:7) Idumo litjho ukutjheja ngokukhethekileko nokuhlonipha abanye. Ngokwesibonelo, indoda inikela umkayo idumo ngokuthi imenze ahlonipheke. Ayimbawi into engaphezu kwamandlakhe. Ayithomi amumadanise nabanye abafazi. Ukumadanisa okunjalo kungaba namuphi umphumela omumbi? Indoda engasinguFakazi kadade u-Rosa ihlala imumadanisa nabanye abafazi. Amezwakhe ahlabako enze umonakalo omkhulu ekuzithembeni kwaka-Rosa. Uthi, “Ngitlhoga isiqinisekiso ngaso soke isikhathi sokuthi ngiligugu kuJehova.” Ngokuhlukileko, indoda emKrestu inikela umkayo idumo. Iyazi ukuthi ukwenza njalo kuzokudlala indima ehle khulu ebuhlotjeni bakhe nomkakhe kunye noJehova. *

⁸ Indoda inikela umkayo idumo ngokuthi imbuke, imqinisekise ukuthi iyamthanda nokuthi uligugu kuye. (IzA. 31:28) Ngilokho indoda ka-Katerina, esikhulume ngaye esihlokweni esidlulileko, eyakwenzako ekumsizeni ahlule imizwa yokuzizwa angasililitho. Nakasakhulako, ummakhe bekahlala amhlazisa ngokumumadanisa nabanye abantazana abalingana naye nabangani bakhe. Umphumela waba kukuthi u-Katarina wathoma ukuzimadanisa nabanye, lokho wakwenza ngitjho nanyana sele afumene iqiniso! Indodakhe ikghonile ukumsiza walwisana nomukghwa loyo bewaba nombono ofaneleko. Uthi: “Uyangithanda, uyangithokoza ngezinto ezihle engizenzako bekangithandazele. Uhlala angikhumbuza ngobuntu bakaJehova obuhle bekangisize ngilungise indlela embi engicabanga ngayo.”

9-10. Abadala bamsiza njani udade wahlula umukghwa wokuzimadanisa nabanye?

⁹ Abadala bangabasiza njani labo abonomukghwa wokuzimadanisa nabanye? Akhe ucabange ngesibonelo sakadade u-Hanuni, obekangakajayeli ukubukwa nakasakhulako. Uthi: “Bengineenhloni begodu ngicabanga ukuthi abanye abantwana bangcono khulu kunami. Ngathoma ukuzomadanisa nabanye ngisesemncani khulu.” Ngitjho nalokha sele aseqinisweni, u-Hanuni waragela phambili nokuzimadanisa nabanye. Umphumela waba kukuthi bekazibona angasililitho ebandleni. Njenganje, uliphayona  elithabileko. Wasizwa yini ukulungisa indlela acabanga ngayo?

¹⁰ Uthi wasizwa badala abanethando. Bebambuka bebamthokoze ngesibonelo sakhe sokuthembeka. Uthi: “Kwaba neenkhathi ezinengana abadala bangibawa ukuthi ngikhuthaze abodadwethu abatlhoga isizo. Izabelwezi bezingenza ngizizwe ngiqakathekile. Abadala bangithokoza ngesikhuthazo ebengisinikela abodade abasesebatjha. Bangifundela yoku-1 yebeThesalonika 1:2, 3. Kwangithabisa kwamambala lokho! Ngibathokoza khulu abelusi abalungilekwaba begodu nje, ngiyakuthabela ukuba sehlanganweni kaJehova.”

11. Singabasiza njani labo ‘abanommoya ophukileko’ njengombana kuvezwe ku-Isaya 57:15?

¹¹ Funda u-Isaya 57:15. UJehova unendaba khulu nalabo ‘abanommoya ophukileko nothobekileko.’ Soke singasiza ekukhuthazeni abafowethu nabodadwethu, akusimsebenzi wabadala kwaphela. Enye indlela yokubakhuthaza kubatjengisa ngezenzo ukuthi sinendaba nabo. UJehova usebenzisa thina ukubatjengisa ukuthi ubathanda kangangani. (IzA. 19:17) Singabasiza abafowethu nabodadwethu nangokuthi sithobeke. Asifuni ukuzidosela amehlo, okungenza abanye basirhalele. Kunalokho, sisebenzisa amakghonwethu nelwazi lethu ukukhuthaza abanye.—1 Pit. 4:10, 11.

12. Kubayini abantu abaqalelwa phasi bebamthanda uJesu? (Qala isithombe esingaphandle.)

¹² Indlela uJesu ebekabaphatha ngayo abalandeli bakhe isifundisa okunengi khulu ukuthi singabaphatha njani abanye. Akekho umuntu omkhulu owakhe waphila ephasini ukudlula yena. Nanyana kunjalo, ‘bekanommoya ophasi nehliziyo ethobekileko.’ (Mat. 11:28-30) Akhange abukise ngokuhlakanipha nelemuko ebekanalo. Bekafundisa ngendlela elula bekenze nemifanekiso eyathinta iinhliziyo zabantu abathobekileko. (Luk. 10:21) UJesu bekangafani nabadosi phambili bekolo abazikhakhazisako kunalokho bekenza abantu balemuke ukuthi baligugu kuJehova. (Jwa. 6:37) Bekabahlonipha abantu abaqalelwa phasi.

13. UJesu watjengisa njani umusa nethando lokha nakasebenzelana nabafundi bakhe?

¹³ Umusa nethando lakaJesu kubonakala endleleni asebenzelana ngayo nabalandeli bakhe. Bekalemuka ukuthi amakghono nobujamo babo abufani. Yeke, bengekhe boke babe nomsebenzi ofanako namkha baphumelele ngokufanako naziza ekutjhumayeleni. Nanyana kunjalo, bekakuthabela khulu ukuzimisela kwabo. Indlela uJesu ebekazwisisa ngayo ibonakala emfanekisweni wamatalende. Emfanekisweni lo, ikosi yanikela isisebenzi ngasinye umsebenzi ‘ngokwekghono laso.’ Esinye isisebenzi esikhutheleko safumana inzuzo enengana kunesinye. Nanyana kunjalo, ikosi yababuka bobabili ngamezwi afanako nayithi: “Wenze kuhle, sisebenzi esilungileko nesithembekileko!”—Mat. 25:14-23.

14. Singayilingisa njani indlela kaJesu yokuphatha abanye?

¹⁴ UJesu usebenzelana nathi ngendlela etjengisa umusa nothando. Uyazi ukuthi khuyini esikghona ukuyenza nokuthi ubujamo bethu abufani begodu uyathaba nasenze okusemandlenethu ukumthabisa. Senza kuhle ngokulingisa uJesu endleleni esiphatha ngayo abanye. Asifuni nangelanga lomhlolo ukwenza abafowethu bazizwe bangakaqakatheki namkha babe neenhloni ngebanga lokuthi abakghoni ukwenza ngendlela abanye abakghona ngayo. Kunalokho, sifuna ukusebenzisa amathuba amanengi sibabuka abafowethu nabodadwethu ngombana benza koke okusemandlenabo ukusebenzela uJehova.

15-16. Udadwethu uzuze njani ngokuzibekela iminqopho angakghona ukuyifikelela?

¹⁵ Ukufisa ukusebenzela uJehova kwenza ipilwethu ibenomnqopho. Intatha kukuthi sizibekele iminqopho ngokukhambisana namakghonwethu nobujamo bethu, ingasi ukukopela abanye. Asifuni ukuzibekela iminqopho ezosidanisa naleyo engekhe sakghona ukuyifikelela. (Luk. 14:28) Cabanga ngesibonelo sakadade oliphayona, u-Midori.

¹⁶ Ubaba ka-Midori, ongasi nguFakazi, bekamhlazisa nakasakhulako ngokuthi amamudanise nabantwana bakwabo nalabo afunda nabo. Uthi, “Ngazizwa ngingasililitho.” Njengombana akhula, u-Midori wathoma ukuzithemba godu. Uthi, “Ngifunda iBhayibheli qobe ukuthi ngibe nokuthula bengilemuke nokuthi uJehova uyangithanda.” Ukungezelela kilokho, uzibekela iminqopho bese athandaze ngayo ukuthi ayifikelele. Lokhu kwenza u-Midori wathaba ngetuthuko ayenzako etjhebiswaneni lakhe noZimu.

17. ‘Singaragela njani phambili senziwa batjha emandleni alawula imikhumbulwethu’ begodu kuzokuba namuphi umphumela?

¹⁷ Imizwa nemicabango engakhiko angeze yakhamba ngelanga linye. UJehova uthi: ‘Ragelani phambili nenziwa batjha emandleni alawula imikhumbulwenu.’ (Efe. 4:23, 24) Ukwenza njalo, kutlhoga ukuthi sithandaze, sifunde iliZwi lakaZimu besizindle ngalokho esikufundako. Asikusebenzise esikufundako bese siqalelele kuJehova ukuthi asiphe amandla. Ummoyakhe ocwengileko uzokusiza uhlule nanyana ngimuphi umukghwa wokuzimadanisa nabanye. UJehova uzokusiza ulemuke bewuruthule umona nokuzikhakhazisa msinyana  nangabe imikghwa le sele ithoma ukuhluma ehliziywenakho.

18. Singaduduzeka njani emezwini afumaneka kweye-2 yeenKronike 6:29, 30?

¹⁸ Funda ye-2 yeenKronike 6:29, 30. UJehova uyazazi iinhliziyo zethu. Uyazi nalapha sibogaboga khona, kuhlanganise nokulwisana nommoya wephasi nokuba nesono. Njengombana uJehova asibona silwisana nemikghwa emimbi, ithando lakhe ngathi liyakhula.

19. UJehova uyifanekisa njani indlela azizwa ngayo ngathi?

¹⁹ UJehova uhlathulula indlela azizwa ngayo ngathi ngokusebenzisa ukutjhidelana kwakamma nesana lakhe. (Isa. 49:15) Cabanga ngesibonelo sakamma u-Rachel. Uthi: “Indodakazami u-Stephanie, yabelethwa ngaphambi kwesikhathi. Mhlazana ngimbona kokuthoma, bekamncani khulu begodu atlhoga isizo. Esibhedlela bebangivumela ukuthi ngimsingathe enyangeni yokuthoma lokha bamfake ngaphakathi kwe-incubator. Isikhatheso senza mina nendodakazami satjhidelana eduze khulu. Sele aneminyaka esithandathu nje begodu umzimbakhe mncani kunabantwana abalingana naye ngemnyaka. Nanyana kunjalo, ngimthanda khulu ngombana ulwe budisi ukuthi aphile begodu ungilethele ithabo elikhulu epilwenami!” Qala ukuthi kuthabisa kangangani ukwazi ukuthi uJehova unethando elinjalo ngathi lokha nakasibona silwela ukumlotjha ngomphefumulwethu woke!

20. Njengesisebenzi sakaJehova esizinikeleko, ngiliphi ibanga onalo lokuthaba?

²⁰ Njengesisebenzi sakaJehova, uhlukile bewuligugu emndininakhe onabantu abangafaniko. UJehova akhenge akudosele kuye ngombana ungcono kunabomakhelwana bakho. Wakudosa ngombana nakahlola ihliziywakho, wafumana umuntu othobekileko nongakghona ukufundiseka ukuthi ambumbe. (Rhu. 25:9) Qiniseka ukuthi uthaba kwamambala ngemizamo oyenzako yokumlotjha. Ukukghodlhelela nokuthembeka kwakho kubufakazi ‘behliziyo ehle.’ (Luk 8:15) Yeke-ke, ragela phambili unikela uJehova okusemandlenakho. Uzokuba ‘nebanga lokuthaba malungana nawe wedwa.’