UPaul uthi: “Umzawami nakathoma ukulwa nami ngambamba ngomphimbo, ngamtlinya. Bengifuna ukumbulala.”

UMarco uthi: “Nangisekhaya bengisilingeka msinyana khulu. Kangangobana bengiphadlha bengiphule yoke into ebeyiphambi kwami, izinto zokudlala, ifenitjhara nananyana yini ehlanukwami.”

Kungenzeka singasilingeki njengabantwaba. Nanyana kunjalo, ngezinye iinkhathi siqalana nobudisi bokuzibamba. Lokhu kungebanga lesono esasifumana ngomuntu wokuthoma u-Adamu. (Rom. 5:12) Abanye njengoPaul noMarco baqalene nobudisi bokulawula ilaka, kanti abanye kubudisi ukulawula izinto abazicabangako. Ngokwesibonelo, abanye bacabanga khulu ngezinto abazisabako nezinto ezibadanisako. Abanye kubudisi ukubalekela ukuziphatha kumbi ngokomseme, ukusela khulu nokusebenzisa kumbi iindakamizwa.

Labo ababhalelwa kulawula indlela abacabanga ngayo, iimfiso zabo nezenzo zabo bangalimaza ukuphila kwabo. Singakghona ukukubalekela lokho. Njani? Ngokulwa budisi sizifundise ukuzibamba. Nasizakukghona ukukwenza ngokuphumelelako lokho, akhesicoce ngemibuzo emithathu: (1) Khuyini ukuzibamba? (2) Kubayini kuqakathekile? (3) Singakulwela njani ukuba nobuntobo obuyingcenye ‘yeenthelo zommoya’? (Gal. 5:22, 23) Sizokucoca ngokuthi khuyini umuntu angayenza nange abhalelwa kuzibamba ngezinye iinkhathi.

Umuntu okghona ukuzibamba akenzi namkha akhulume nanyana yini ngebanga lokusilingeka. Kunalokho, uyazibamba angenzi into namkha akhulume ngendlela etjengisa ukuthi akamhloniphi uZimu.

UJesu wasitjengisa ukuthi kutjho ukuthini ukuzibamba. IBhayibheli lithi: “Nakathukwako, akhenge abuyisele ngehlamba. Nakatlhagako, akhenge athusele, kodwana wazibeka kiloyo owahlulela ngokulunga.” (1 Pit. 2:23) UJesu wazibamba lokha abaphikisi bakhe nabahlekisa ngaye begodu bamphanyeke esigodweni sokuhlunguphazwa. (Mat. 27:39-44) Wazibamba lokha abadosiphambili bekolo nabalinga ukumenza akhulume izinto ezingakalungi, ngokuthi bamhlome ngemibuzo eminengi. (Mat. 22:15-22) Wenza kuhle khulu ngokusibekela isibonelo, lokha amaJuda ebewasilingeke khulu nawamphosa ngamatje. Kunokobana naye abaphathe kumbi abaphendule ngendlela engakafaneli, “UJesu wabhaca, waphuma ethempelini.”—Jwa. 8:57-59.

Kghani singakghona ukumlingisa uJesu? Iye ngokwezinga elithileko singakghona ukumlingisa. Umpostoli uPitrosi watlola wathi: “NoKrestu watlhaga ngebanga lenu, anitjhiyela isibonelo sokobana nilandele umtlhalakhe eduze.” (1 Pit. 2:21) Nanyana sinesono, singakghona ukulandela umtlhala kaJesu eduze endabeni yokuzibamba. Kubayini kuqakathekile ukwenza njalo?

UJehova nakazasamukela kuqakatheke khulu ukuzibamba. Kungakhathaliseki bona sesinesikhathi esingangani simlotjha, nasibhalelwa kulawula esikwenzako namkha esikukhulumako sizokulahlekelwa buhlobo bethu naye.

Cabanga ngoMosi “bekazithobe ukudlula boke abantu abaphila ngaphasi komthunzi welanga” ngesikhathi sakhe. (Num. 12:3) UMosi bekabalalela abantu lokha nabazokulila kuye, lokho wakwenza iminyaka eminengi. Kodwana ngelinye ilanga wabhalelwa kuzibamba, lokha ama-Israyeli nawanghonghoyila ngokutlhayela kwamanzi godu, wasilingeka khulu. Wawakgarameja wathi: “Nje-ke lalelani nina mahlubuka ndina! Siniphundlusele amanzi edwaleneli na?”—Num. 20:2-11.

UMosi wabhalelwa kuzibamba. Wabhalelwa kunikela idumo kuJehova njengombana kunguye umthombo omangalisako wamanzi. (Rhu. 106:32, 33) Umphumela walokho, uJehova akhenge amvumele bona angene eNarheni yesiThembiso. (Num. 20:12) Kungenzeka uMosi wazisola ngebanga lokubhalelwa kuzibamba bekwaba lilanga ahlongakala ngalo.—Dut. 3:23-27.

Sifundani kilokhu? Ngitjho sekuthiwa sekuphele iminyaka eminengi khulu ulotjha uJehova, nakwenzeka abantu bakusilinge akukafuzi ukhulume nabo ngamezwi anganahlonipho. (Efe. 4:32; Kol. 3:12) Khona kuliqiniso ukuthi nasikhulako kungenzeka ukubekezela kube mraro, kodwana khumbula uMosi, asifuni ukulahlekelwa mlando omude wokuthembeka ekulotjheni uZimu ngebanga lokubhalelwa kuzibamba. Khuyini esingayenza bona sikghone ukuzibamba?

Thandazela ummoya ocwengileko. Ukuzibamba kusithelo sommoya ocwengileko. Yeke siyawutlhoga bona sikghone ukuzibamba begodu uJehova uwunikela abantu abawubawako. (Luk. 11:13) UJehova angasebenzisa ummoyakhe bona asinikele amandla esiwatlhogako. (Flp. 4:13) UJehova angasisiza bona sibe nezinye iinthelo zommoya ezifana nethando elingasisiza sikghone ukuzibamba.—1 Kor. 13:5.

Balekela izinto ezingenza kube budisi ukuzibamba. Ngokwesibonelo, khambela kude namazinzolwazi namkha zokuzithabisa ezinokuziphatha okumbi. (Efe. 5:3, 4) Kufuze ukhambele kude nazo zoke izinto ezingakwenza wone. (IzA. 22:3; 1 Kor. 6:12) Ngokwesibonelo, umuntu onomraro wokuziphatha kumbi ngokomseme kungatlhogeka bona abalekele ukufunda iincwadi zabantu  abathandanako, namkha ukubukela amafilimu anjalo.

Kungaba budisi ukulalela isiyelelisweso. Kodwana nasilingako uJehova angasipha amandla esiwatlhogako bona sikghone ukuzibamba. (2 Pit. 1:5-8) Uzosisiza sikghone ukulawula indlela esicabanga ngayo, esikhuluma ngayo nesenza ngayo izinto. Ubufakazi balokho ngebakaPaul noMarco esikhulume ngabo phambilini. Bafunda ukuzibamba bona bangabi babantu abanenturhu. Okwanjesi, akhesicoce ngesibonelo somfowethu obekaphela ihliziyo nakatjhayelako kangangobana bekalwa nabanye abantu. Wenzani ngobujamo bakhe? Uthi: “Qobe lilanga bengithandaza ngendaba le. Ngafunda iinhloko ezikhuluma ngokuzibamba, ngayibamba ngehloko imitlolo ezongisiza. Ngitjho nanyana sekudlule iminyaka, ngisebenzela ukuzibamba. Kuyangisiza ukuthoma ilanga nginomgomo wokuba nommoya ophasi. Okhunye engikwenzako kukuthi ngisuke kusesenesikhathi nakunalapha kufuze ngiye khona ukwenzela bona ngibalekele ukurhaba.”

Ngezinye iinkhathi sizokubhalelwa kuzibamba. Lokho kungasenza sibhalelwe kuthandaza sikhulume noJehova. Lokho nakwenzekako kufuze sazi ukuthi sikhathi sokuthi sithandaze sikhulume noJehova. Yeke khuluma noJehova ngomthandazo ungariyadi. Mbawe bona akulibalele, akusize begodu uzimisele ukubalekela ukwenza umtjhapho ofanako. (Rhu. 51:11-13) Ungathomi ucabange ukuthi uJehova angekhe akulalela. (Rhu. 102:18) Umpostoli uJwanisi wathi iingazi zeNdodana kaZimu “zisihlanza kizo zoke izono.” (1 Jwa. 1:7; 2:1; Rhu. 86:5) Khumbula godu ukuthi uJehova uthi iinceku zakhe kufuze zilibalele ngokubuyelelweko. Yeke nathi singaqiniseka ngokuthi uJehova uzokwenza okufanako nakithi.—Mat. 18:21, 22; Kol. 3:13.

Kwamdanisa khulu uJehova ukubona uMosi abhalelwa kuzibamba lokha nabasemmangweni. Nanyana kunjalo, uJehova wamlibalela. IliZwi lakaJehova nalikhuluma ngoMosi lithi bekasibonelo esihle ekufuze sisilingise. (Dut. 34:10; Heb. 11:24-28) UJehova akhenge amvumele uMosi bona angene eNarheni yesiThembiso, kodwana uzomamukela ePharadesi ephasina begodu amnikele ithemba lokuphila isiphelani. Nathi sizokuthabela ukuphila ephasina isiphelani, kwaphela nasilinga ngawo woke amandla bona sizibambe.—1 Kor. 9:25.