Ubufakazi butjengisa ukuthi uJesu waba Mphristi Ophakemeko nakabhajadiswako ngo-29, ngesikhathi asephasina. UJesu nakabhajadiswako, watjengisa ukuthi uzimisele ukuba mhlatjelo e-aldareni elijamele ‘intando’ kaZimu. (Gal. 1:4; Heb. 10:5-10) Njengombana i-aldari liyingcenye eqakathekileko yethempeli, ukulotjha kweqiniso kungenzeka kwathoma uJesu nakabhajadiswako, ubuhlobo obuhle noJehova bujamele yoke into eyenza kukghonakale bona simlotjhe ngendlela efaneleko sisebenzisa umhlatjelo kaJesu.—Mat. 3:16, 17; Heb. 5:4-6.

Njengombana besele likhona ithempeli elingokomfanekiso, bekutlhogeka umPhristi ozokuraga ethempelinelo, yeke, uJehova wazesa uJesu bona kube nguye uMphristi Ophakemeko “ngommoya ocwengileko namandla.” (IzE. 10:37, 38; Mar. 1:9-11) Nanyana kunjalo, singaqiniseka njani ukuthi uJesu wazeswa bona abeMphristi Ophakemeko ngaphambi kokufa nokuvuswa kwakhe? Isibonelo saka-Aroni nesabaPhristi abeza ngemva kwakhe ngiso esizosisiza siphendule umbuzo lo?

UmThetho uJehova awunikela uMosi bewuthi Mphristi Ophakemeko kwaphela obekanelungelo lokungena endaweni ecwengekileko yethaberinakeli, ngemva kwalokho angene godu endaweni ecwengeke khulu yethempeli. I-Rharideni ngilo ebelihlukanisa indawo le nendawo ecwengekileko. UMphristi Ophakemeko bekadlula irharideni kwaphela ngeLanga lesiHlawulelo. (Heb. 9:1-3, 6, 7) Njengombana u-Aroni nabaphristi bebazesiwe ngaphambi kokungena “erharidenini” lethaberinakeli, yeke, kunengqondo ukuphetha ngokuthi uJesu wakhethwa bona abeMphristi Ophakemeko wokulotjha kweqiniso kwakaJehova ethempelini ngaphambi kokufa begodu ‘wadlula erharidenini eliyinyamakhe’ ngokuya ezulwini. (Heb. 10:20) Ibangeli ngilo elenza umpostoli uPowula athi uJesu ‘uMphristi Ophakemeko’ owadlula ‘etendeni eliqakatheke khulu neliphelele khulu, elingakenziwa ngezandla,’ wangena ‘ezulwini ngokwalo.’—Heb. 9:11, 24.

Awukho umehluko okhona hlangana nesikhathi sokwenziwa kwesivumelwano esitjha kunye nesikhathi sokusebenza kwaso. Kubayini sitjho njalo? Ngesikhathi uJesu akhuphukela ezulwini adela ukuphila kwakhe kwasephasina ngebanga lethu, lokho kwatjengisa ukuthoma kokusebenza kwesivumelwano esitjha. Isenzweso saqinisekisa ukusebenza kwesivumelwano esitjha. Ngiziphi izinto ebezibandakanyekileko?

Kokuthoma, uJesu wavela phambi kwakaJehova, okwalandela, wanikela umhlatjelwakhe kuJehova, kokugcina, uJehova wamukela umhlabelo kaJesu weengazi. Isivumelwano esitjha akhenge sithome ukusebenza bekwaba kula kuthathwa khona amagadango la.

IBhayibheli alisitjeli ngokunqophileko ukuthi uJehova wawamukela nini umhlabelo kaJesu. Lokho kwenza bona singakghoni ukutjho ngokunqophileko ukuthi wabekwa nini umthetho wesivumelwano esitjha begodu wathoma nini ukusebenza. Nanyana kunjalo, siyazi ukuthi uJesu wakhuphukela ezulwini ngemva kwamalanga alitjhumi ngaphambi kokuthoma kwePentekoste. (IzE. 1:3) Wanikela umhlatjelwakhe kuJehova esikhathini esithileko, uJehova wawamukela umhlabelo loyo. (Heb. 9:12) Ubufakazi beqinisweli babonakala ngokupheleleko ngePentekoste. (IzE. 2:1-4, 32, 33) Ngesikhatheso, isivumelwano esitjha besele sikhona begodu sisebenza.

Nasele sirhunyeza singathi, isivumelwano esitjha senziwa begodu sathoma ukusebenza ngemva kokobana uJehova amukele umhlatjelo kaJesu weengazi begodu wenza abazesiweko baba yingcenye yesivumelwaneso. Isivumelwano esitjha sathoma ukusebenza ngoMphristi Ophakemeko uJesu njengombana aMlamuli esivumelwanesi.—Heb. 7:25; 8:1-3, 6; 9:13-15.