1. Ngibuphi ubujamo obugandelelako iinceku zakaJehova ezithembekileko eziqalene nabo?

EPHASINI mazombe iinceku zakaJehova ezinengi ziqalana nokugandeleleka nobuhlungu. Kuyenzeka na lokho ebandleni okilo? Amanye amaKrestu ayagula, kanti amanye ezwa ubuhlungu ngebanga lokuhlongakalelwa. Amanye ezwa ubuhlungu khulu ngebanga lokuthi umuntu abatjhidelene naye ulise ukulotjha uJehova. Kuthi kusesenjalo, amanye aqalene nemiphumela ebuhlungu ebangelwe ziinhlekelele zemvelo. Boke abafowethu nabodadwethwaba batlhoga ukududuzwa. Singabasiza njani?

2. Khuyini ebeyenza umpostoli uPowula atlhoge ukududuzwa?

² Umpostoli uPowula waqalana nobudisi iinkhathi ezinengi. (2 Kor. 11:23-28) Kwafuze akghodlhelele “iliva enyameni” okungenzeka ukuthi bekagula. (2 Kor. 12:7) Wadana lokha uDemasi obekasebenza naye nakamtjhiyako “ngebanga lokuthanda [kwakaDemasi] iphaseli.” (2 Thim. 4:10) UPowula bekamKrestu ozeswe ngommoya anesibindi nomusa, kodwana ngezinye iinkhathi bekaphelelwa mamandla.—Rom. 9:1, 2.

3. Bobani abaduduza bebasekela uPowula?

³ UPowula waduduzwa bewasekelwa ngendlela ebekayitlhoga. UJehova wasebenzisa ummoyakhe ocwengileko bona amqinise. (2 Kor. 4:7; Flp. 4:13) Wabuye wasebenzisa amaKrestu akunye nawo bona amduduze.  UPowula nakakhuluma ngabanye abantu ebebasebenza naye uthi, ‘bebamthombo wenduduzo ekulu.’ (Kol. 4:11) Abanye babo ababiza ngamabizo bekungu-Aristakusi, uThikhikhusi noMarkosi. Bamqinisa bamsiza bona akghodlhelele. Yini eyasiza amaKrestu amathathu la bona akghone ukududuza uPowula? Singasilandela njani isibonelo sawo nasiduduzanako?

4. U-Aristakusi wabamngani othembekileko kuPowula ngayiphi indlela?

⁴ U-Aristakusi weMasedoniya ebeyiseThesalonika bekamngani othembekileko kaPowula. Sithoma ukufunda ngo-Aristakusi ekhambweni lesithathu lakaPowula nakavakatjhela e-Efesu asithunywa sevangeli. Wathi asaphekelela uPowula wabanjwa siqubuthu sabantu abasilingekileko. (IzE. 19:29) Nakatjhatjhululwako akhenge abaleke, kunalokho wathembeka wahlala noPowula. Kwadlula iinyanga baseGirisi, u-Aristakusi bekasese noPowula basebenza ndawonye ngitjho nanyana ukuphila kwakaPowula bekusengozini. (IzE. 20:2-4) Ngo-58, ngeenkhathi zabapostoli uPowula wathunyelwa ejele leRoma, u-Aristakusi wamphekelela. Bakghodlhelela ukuphukelwa mkhumbi bobabili. (IzE. 27:1, 2, 41) Kungenzeka ukuthi nabaseRoma bebasejele bobabili. (Kol. 4:10) Akusirari-ke ukuthi uPowula wazizwa akhuthazekile begodu aduduzekile ngebanga lomnganakhe othembekileko.

5. Ngokomtlolo wezAga 17:17, singaba bangani abathembekileko ngayiphi indlela?

⁵ Singalingisa isibonelo saka-Aristakusi ngokuthi sibe bangani abathembekileko. Sinamathele kubafowethu nabodadwethu ingasi ngeenkhathi ezimnandi kwaphela, kodwana ngitjho ‘nangeenkhathi ezibudisi.’ (Funda izAga 17:17.) Ngitjho nanyana ubuhlungu babafowethu nabodadwethu sebudlulile, kungenzeka basatlhoga ukududuzwa. UFrances, * wahlongakalelwa babelethi bakhe bobabili kungakapheli iinyanga ezintathu. Bebaphethwe yikankere uthi: “Ngicabanga bona iinkhathi ezibudisi zisizwisa  ubuhlungu isikhathi eside. Ngiyabathanda abangani abathembekileko abakhumbulako ukuthi ngisezwa ubuhlungu ngitjho nanyana sekudlule isikhathi ababelethi bami bahlongakala.”

6. Ukuthembeka kuzosikhuthaza bona senzeni?

⁶ Abangani abathembekileko banikela ngamandlabo nangesikhathi sabo bona basize abafowabo nabodadwabo. Ngokwesibonelo, udorhodera watjela uPeter ukuthi unokugula okumbi khulu begodu uzokuhlongakala. Umkakhe uKathryn uthi: “Abatjhadikazi abathileko ebandleni bakhamba nathi kudorhodere nasizakufumana ngokugula kwakaPeter. Baqunta khonokho bona bazosisiza sikghodlhelele ubudisi ebesiqalene nabo begodu kusukela mhlokho bebasolo banathi.” Kuyaduduza ukuba nabangani beqiniso abasisiza sikghodlhelele nasiqalene nemiraro!

7-8. Ngokomtlolo webeKolose 4:7-9, uThikhikhusi waba mngani othembekileko ngayiphi indlela?

⁷ UThikhikhusi mKrestu weRoma esifundeni se-Asiya bekamngani othembekileko kaPowula. (IzE. 20:4) Ngomnyaka ka-55, weenkhathi zabapostoli, umpostoli uPowula wahlela bona kuhlanganiswe iminikelo kusizwe amaKrestu weJudiya, kungenzeka ukuthi wavumela uThikhikhusi bona enze umsebenzi loyo. (2 Kor. 8:18-20) Ngokukhamba kwesikhathi uPowula nakasibotjhwa kokuthoma eRoma, uThikhikhusi wabasithunywa sakhe, bekathumela imilayezo esikhuthazo emabandleni we-Asiya.—Kol. 4:7-9.

⁸ UThikhikhusi wahlala amngani othembekileko kaPowula. (Tit. 3:12) Ngeenkhathezo akusiwo woke amaKrestu ebekathembeke njengoThikhikhusi. Ngomnyaka ka-65, ngeenkhathi zabapostoli ngesikhathi uPowula abotjhwe kwesibili, watlolela amadoda amaKrestu we-Asiya amjikelako ngebanga lokuthi kungenzeka bekasaba abatjhutjhisi bakhe. (2 Thim. 1:15) UThikhikhusi yena bekahlukile ngombana uPowula bekakghona ukuthembela kuye, yeke wamnikela isabelo esitjha. (2 Thim. 4:12) Siyaqiniseka ngokuthi bekumthabisa uPowula ukuba nomngani othembekileko.

9. Singasilingisa njani isibonelo sakaThikhikhusi?

 ⁹ Singalingisa isibonelo sakaThikhikhusi ngokuthi sibe bangani abathembekileko. Ngokwesibonelo, asimane sithembise abafowethu nabodadwethu bona sizobasiza, kunalokho sibasiza ngezinto abazitlhogako. (Mat. 5:37; Luk. 16:10) Abantu nabaziko bona sizimisele ukubasiza, bazizwa baduduzekile. Udadwethu uyahlathulula bona kubayini, uthi, “Awusolo utshwenyeka ngokuthi umuntu othembise ukukusiza uzokufika ngesikhathi enze ngokwesithembiso sakhe.”

10. Ngokomtlolo wezAga 18:24, abantu abadanileko namkha abaqalene neentjhijilo bangaduduzwa ngubani?

¹⁰ Abantu abadanileko namkha abaqalene neentjhijilo bayaduduzeka nabakhuluma nomngani abamthembako. (Funda izAga 18:24.) UBijay uthi kwamdanisa khulu indodanakhe nayisuswako, uthi, “Bengitlhoga ukuveza indlela engizizwa ngayo emuntwini engimthembako.” UCarlos walahlekelwa malungelo ebandleni ngebanga lomtjhapho awenzako. Uthi, “Bengitlhoga abantu ebebangekhe bangahlulele nangibatjela indlela engizizwa ngayo.” Abadala bamlalela begodu bamsiza ngomraro ebekaqalene nawo. Okhunye okwamduduzako kukuthi abadala bamqinisekisa ngokuthi angeze batjela muntu ngalokho abatjele khona.

11. Singaba njani bangani abathembekileko?

¹¹ Nasizakuba bangani abathembekileko, sitlhoga ukubekezela. Ngesikhathi uZhanna atjhiywa yindodakwakhe, waduduzeka nakakhuluma nabangani bakhe, abatjela indlela azizwa ngayo. Uthi, “Bangibekezelela, bangilalela ngitjho nanyana bengiphinda phinda into eyodwa.” Nawe ungaba mngani olungileko ngokulalelisisa abantu nabakhulumako.

12. Ngubani uMarkosi begodu watjengisa njani bona uzimisele ukusiza abanye?

¹² UMarkosi bekamKrestu omJuda, obuya eJerusalema. Umzawakhe uBharinabhasi bekasithunywa sevangeli esaziwako. (Kol. 4:10) Kubonakala ngasuthi umndenekhabo Markosi bewunjingile. Nanyana kunjalo, imali nezinto zakanokutjho bezingakaqakatheki ukudlula ithando lakhe ngoZimu. UMarkosi bekahlala azimisele ukusiza abanye, lokho wakwenza ipilwakhe yoke. Ngokwesibonelo, umpostoli uPowula nompostoli uPitrosi nabenza umsebenzabo, kungenzeka ukuthi uMarkosi nguye obekabatlhogomela ngezinto abazitlhogako. (IzE. 13:2-5; 1 Pit. 5:13) UPowula wabiza uMarkosi ngokuthi ‘sisebenzi akunye naso somBuso kaZimu’ kunye ‘nomthombo wenduduzo’ ekulu kuye.—Kol. 4:10, 11.

13. Incwadi yesi-2 kaThimothi 4:11 itjengisa njani ukuthi uPowula wakuthanda ukuthembeka kwakaMarkosi?

¹³ UMarkosi banoPowula bababangani abakhulu. Ngokwesibonelo, ngo-65, ngeenkhathi zabapostoli ngesikhathi uPowula abotjhwe kwamaswaphela eRoma, watlola incwadakhe yesibili eya kuThimothi. Encwadini leyo, wabawa uThimothi bona eze noMarkosi eRoma. (2 Thim. 4:11) Siyaqiniseka ukuthi uPowula wakuthanda ukuthembeka kwakaMarkosi, kungebangelo bekafuna ukuba noMarkosi esikhathini esibudiseso. UMarkosi wamsiza khulu uPowula, kungenzeka ukuthi bekamthengela ukudla namkha izinto azitlhogako nakatlolako. Kungenzeka nokuthi ukusekelwa nokukhuthazwa uPowula akufumanako ngikho okwamsiza wakghodlhelela bekwafika la abulawa khona.

14-15. UMatewu 7:12, usisiza njani bona sisize abanye ngezinto abazitlhogako?

¹⁴ Funda uMatewu 7:12. Nasiqalene neenkhathi  ezibudisi, kuyasithabisa ukubona abantu basisekela ngezinto zabo! URyan wahlongakalelwa nguyise angakalindeli engozini, uthi, “Zinengi izinto okufuze uzenze qobe lilanga, okuba budisi ukuzenza nawusebuhlungwini. Abantu nabakusiza ngezinto ozitlhogako, lokho kukwenza uzizwe ngcono, ngitjho nanyana izintwezo zingabonakala zizincani.”

¹⁵ Nasilalelisisako begodu siqalisisa, sizokufumana iindlela esingasiza ngazo. Ngokwesibonelo, omunye udade wasiza uPeter noKathryn esikhulume ngabo ekuthomeni, ngokubaphekelela kwadorhodera nakezinye iindawo abafuna ukuya kizo. Bobabili bebangasakghoni ukutjhayela, yeke udade lo wenza ihlelo labantu bebandleni abazokudlhegana ngokubatjhayelela. Kwabasiza na lokho? UKathryn uthi, “Kwaba ngasuthi umthwalo ususiwe emahlombethu.” Ungakuthatheli phasi ukusiza abanye ngezinto abazitlhogako ngitjho nanyana zingabonakala zizincani ngombana lokho kuyaduduza.

16. Sifundani ngokududuza abanye esibonelweni sakaMarkosi?

¹⁶ Kuyakhanya ukuthi uMarkosi owaphila ngeenkhathi zakaJesu bekamKrestu omajadu. Bekanesabelo esiqakathekileko, okufaka hlangana nokutlola iVangeli elithiywe ngebizo lakhe. Nanyana kunjalo, wenza isikhathi sokududuza uPowula begodu noPowula wazizwa atjhaphulukile ukubawa isizo kuye. Kwathi ngesikhathi ilunga lomndeni ka-Angela libulewe kabuhlungu, u-Angela waduduzwa bangani bakhe. Uthi, “Abangani nabafuna ukukusiza uzizwa utjhaphulukile ukuya kibo. Abadosi iinyawo nakufuze bakusize begodu bayakuthabela lokho.” Naku umbuzo ekufuze uzibuze wona, ‘Kghani abantu bangazi ngizimisela ngokusiza nokududuza amaKrestu esikunye nawo?’

17. Ukucabangisisa ngomtlolo we-2 kwebeKorinte 1:3, 4 kungasikhuthaza njani bona siduduze abanye?

¹⁷ Akukafuzi sibafune kude abafowethu nabodade abatlhoga isizo. Singabasiza godu nangendlela nathi esasizwa ngayo ngabanye abafowethu. UNino, udade owahlongakalelwa ngugogwakhe, uthi, “UJehova angasisebenzisa ekududuzeni abanye nangabe siyamvumela  bona asisebenzise.” (Funda yesi-2 kwebeKorinte 1:3, 4.) UFrances ekhesakhuluma ngaye ekuthomeni, uthi: “Umtlolo wesi-2 kwebeKorinte 1:4. Uliqiniso nawuthi singaduduza abanye ngendlela nathi esiduduzwe ngayo.”

18. (a) Kubayini abanye bangasaba ukududuza abanye? (b) Singabaduduza njani abanye ngendlela ezobathinta iinhliziyo? Nikela isibonelo.

¹⁸ Kufuze sithathe igadango lokududuza abanye nanyana kubudisi ukwenza njalo. Ngokwesibonelo, kungenzeka sisabe ukukhuluma nomuntu osesizini ngebanga lokuthi singazi ukuthi sizokuthini. Umdala, ibizo lakhe elinguPaul, ukhumbula indlela abantu abalinga ngayo ukumduduza ngesikhathi kuhlongakele ubabakhe. Uthi, “Bengibona ukuthi akusilula bona abantu beze bazongiduduza, bebangazi bona bathini, kodwana kwangithabisa ukubona bona bayafisa ukungiduduza nokungisekela.” Ngokufanako, omunye umfowethu ibizo lakhe elinguTajon waqalana nehlekelele yemvelo, uthi, “Angisayikhumbuli yoke imilayezo engayifumanako ngemva kwehlekelele le, kodwana ngisakhumbula ukuthi abafowethu nabodadwethu bebanendaba nami ngombana bebangihlola bafuna ukwazi bona nginjani.” Nasitjengisako bona sinendaba nabantu, bazokuthinteka nasibaduduza.

19. Kubayini uzimisele ‘ukududuza’ abanye?

¹⁹ Ngebanga lokobana siphila emalangeni wokuphela, sizokusolo siqalana nobudisi. (2 Thim. 3:13) Imiraro esizibangela yona ngebanga lesono itjengisa ukuthi sitlhoga ukududuzwa. Umpostoli uPowula wakghodlhelela athembekile bekwaba sekufeni, okhunye okwamenza wakghodlhelela kusekelwa akufumana emaKrestwini akunye nawo. Kwanga singathembeka njengo-Aristakusi, sithembeke njengoThikhikhusi begodu sizimisele ukusiza abanye njengo Markosi. Ngokwenza njalo, sizokusiza abafowethu badzimelele ekukholweni kwabo.—1 Thes. 3:2, 3.