1. Bewuthini umlayezo womphorofidi u-Isaya oya kuma-Israyeli?

 UMPHOROFIDI u-Isaya uhlathulula uJehova ngokuthi “nguZimu weqiniso.” Ibizo elitjhugululwe ngokuthi ‘iqiniso’ ngesiHebheru litjho ukuthi “amen.” (Isa. 65:16) ‘U-Amen’ utjho ukuthi “akube njalo.” Lokha ibizo elithi, “amen” lisetjenziswa eBhayibhelini malungana noJehova namkha uJesu, kusiqinisekiso sento ethileko eliqiniso. Nje-ke naku umlayezo ka-Isaya okhanyako ebewuya kuma-Israyeli: Nanyana yini uJehova ayibikezelako ihlala yenzeka. Kuhlekuhle uJehova uhlala akwenza akuthembisako.

2. Kubayini singazithemba iinthembiso zakaJehova ezimalungana nengomuso lethu begodu ngimiphi imibuzo esizokucoca ngayo?

² Kghani singaba nethemba na lokuthi iinthembiso uJehova asithembise zona ezimalungana nengomuso lethu zizokwenzeka? Eminyakeni epheze ibe ma-800 ngemva kwesikhathi saka-Isaya, umpostoli uPowula wahlathulula ukuthi kubayini singahlala sizithemba iinthembiso zakaZimu. UPowula wathi: ‘Angekhe kwenzeka bona uZimu aleye amala.’ (Heb. 6:18) Njengombana umthombo ungekhe waveza amanzi amnandi namanzi anetswayi, nje-ke uJehova, Mthombo weqiniso, angekhe aleya amala. Kungebangelo singayithemba ngokupheleleko yoke into uJehova ayitjhoko, kuhlanganise zoke iinthembiso asithembise zona ezimalungana nengomuso lethu. Esihlokwenesi sizokucoca ngemibuzo le:  Khuyini uJehova athembise ukusinikela yona esikhathini esizako? UJehova usiqinisekise njani ukuthi isithembiso sakhe sizokuzaliseka?

3. (a) Ngisiphi isithembiso esiligugu khulu ebantwini bakaZimu? (IsAmbulo 21:​3, 4) (b) Abanye basabela njani nasicoca nabo ngesithembiswesi?

³ Isithembiso esizokucoca ngaso siligugu kibo boke abantu bakaZimu ephasini loke. (Funda isAmbulo 21:​3, 4.) UJehova uthembisa isikhathi lapho ‘ukufa kungekhe kusaba khona namkha isizi namkha ukulila namkha ubuhlungu kungekhe kusaba khona.’ Inengi lethu sifunda amavesi la bona siduduze abantu nasitjhumayelako begodu sibatjengise ukuthi ukuphila kuzokuba njani ePharadesi. Abanye abantu basabela njani nasicoca nabo ngesithembiswesi? Bangathi, “Izintwezi zihle khulu kodwana angikholelwa bona zizokwenzeka.”

4. (a) UJehova nakenza isithembiso sakhe sePharadesi, khuyini ebekayazi ukuthi izokwenzeka esikhathini sethu? (b) Ngaphezu kokwenza isithembiso, khuyini enye uJehova ayenzako?

⁴ UJehova nakaphefumulela uJwanisi bona atlole isithembiso esimalungana nePharadesi, bekazi ukuthi thina namhlanjesi sizokucoca nabanye ngethembeli, nasitjhumayela umlayezo womBuso. UJehova bekazi ukuthi kuzokuba budisi ngabantu ukukholelwa ukuthi amatjhuguluko la azokwenzeka esikhathini esizako. (Isa. 42:9; 60:2; 2 Kor. 4:​3, 4) Singabaqinisekisa njani abanye—besiziqinisekise nathi—ukuthi iimbusiso okukhulunywa ngazo kusAmbulo 21:​3, 4 zizokwenzeka? UJehova unikele amabanga azwakalako wokobana kubayini singaba nethemba lokuthi uzosizalisa isithembiso sakhe. Ngimaphi amabanga lawo?

5. Ngimaphi amabanga esinawo wokuthemba isithembiso sakaJehova sePharadesi begodu siwafumanaphi?

⁵ Sifumana amabanga wokuthemba isithembiso sakaJehova sePharadesi emavesini alandelako. Afundeka bunjesi: “Loyo ohlezi esihlalweni sobukhosi wathi: ‘Qala! Ngenza zoke izinto zibe zitjha.’ Godu wathi: ‘Tlola ngombana amezwi la athembekile begodu aliqiniso.’ Wathi kimi: ‘Sewenzekile! Ngingu-Alfa no-Omega.’”—IsAm. 21:​5, 6a.

6. Kubayini isiqinisekiso esitlolwe kusAmbulo 21:​5, 6 siqinisa ukuthemba kwethu isithembiso sakaZimu?

⁶ Kubayini indinyana yeBhayibheli le iqinisa ukuthemba kwethu isithembiso sakaZimu? Incwadi IsAmbulo Umvuthwandaba itjho okulandelako ngamavesi la: “Kusengathi uJehova ngokwakhe usayinela isintu esithembekile isiqinisekiso, noma itayitela, lalezi zithembiso zesikhathi esizayo.” b Isithembiso sakaZimu sitlolwe kusAmbulo 21:​3, 4. Kodwana evesini 5 no-6, uyatlikitla, ukuqinisekisa ukuthi akuthembisileko kuzokuzaliseka kwamambala. Asiqalisiseni indlela uJehova asiqinisekisa ngayo ukuthi singamthemba.

7. Ngubani othoma ukukhuluma evesini 5 begodu kubayini lokhu kuqakathekile?

⁷ Ivesi 5 ithoma nganasi indlela: “Loyo ohlezi esihlalweni sobukhosi wathi.” (IsAm. 21:5a) Amezwi la aqakathekile ngombana lesi ngesinye isenzakalo kezintathu ezisencwadini yesAmbulo lapho uJehova azikhulumela ngokwakhe. Isiqinisekiswesi asiveli engilozini enamandla, ngitjho nakuJesu ovusiweko kodwana sivela kuJehova ngokwakhe! Iqinisweli litjengisa ukuthi singakghona ukukuthemba kwamambala akutjho ngokulandelako. Kubayini kunjalo? Ngombana uJehova  ‘angeze aleya amala.’ (Tit. 1:2) Nje-ke amezwi esiwafunda kusAmbulo 21:​5, 6 azokwenzeka kwamambala.

8. Khuyini uJehova ayitjhoko ukugandelela ukuthi isithembiso sakhe sizokuzaliseka? (Isaya 46:10)

⁸ Ngokulandelako akhesiqale ibizo elithi “Qala!” (IsAm. 21:5) Ibizo lesiGirigi elitjhugululwe ngokuthi “qala!” lisetjenziswe ngokubuyelelweko encwadini yesAmbulo. Enye incwadi ithi isibabazo sisetjenziswe “ngendlela yokutjengisa ofundako atjhejisise okulandelako.” Khuyini elandela isibabazo? Mamezwi kaZimu athi: “Ngenza zoke izinto zibe zitjha.” UJehova uzokwenza amatjhuguluko la esikhathini esizako kodwana ngebanga lokuthi uyaqiniseka ukuthi uzosizalisa isithembiso sakhe uthi sekathomile ukwenza amatjhuguluko la.—Funda u-Isaya 46:10.

9. (a) Amezwi athi, “ngenza zoke izinto zibe zitjha” aqalisele kiziphi izenzakalo ezimbili zakaJehova? (b) Kuzokwenzekani ‘ngezulu nephasi’ ezikhona nje?

⁹ UJehova wathi: “Ngenza zoke izinto zibe zitjha.” Kutjho ukuthini lokho? Esahlukwenesi seBhayibheli, amezwi lawo aqalisela ezintweni ezimbili uJehova azenzako. Kokuthoma uJehova uzokutjhabalalisa iphaseli. Kwesibili uzokuletha iphasi elitjha. IsAmbulo 21:1 sithi: “Izulu laphambilini nephasi laphambilini kudlulile.” Amezwi athi, “Izulu laphambilini” aqalisela kiborhulumende abalawulwa nguSathana namadimonakhe. (Mat. 4:​8, 9; 1 Jwa. 5:19) Ibizo elithi, “iphasi” njengombana lisetjenziswe eBhayibhelini lingaqalisela ebantwini abasephasini. (Gen. 11:1; Rhu. 96:1) Nje-ke, amezwi athi, ‘iphasi laphambilini’ aqalisela emphakathini wabantu abakhohlakeleko banamhlanjesi. UJehova angekhe alungise “izulu nephasi” kodwana uzozitjhabalalisa ngokupheleleko. Uzozijamiselela ‘ngezulu elitjha nephasi elitjha’—okutjho ukuthi urhulumende omutjha uzokubusa abantu abalungileko.

10. Khuyini uJehova azoyenza ibe yitjha?

¹⁰ KusAmbulo 21:​5, sifunda ngalokho uJehova azokwenza malungana nezinto azozenza zibe zitjha. Tjheja ukuthi uJehova akhenge athi, “Ngenza zoke izinto ezitjha.” Kunalokho wathi: “Ngenza zoke izinto zibe zitjha.” Yeke uJehova uzokwenza iphasi nabantu babe batjha bangasabi nesono. U-Isaya wabikezela ukuthi uJehova uzokwenza iphasi loke libe yindawo ehle efana nesimu ye-Edeni. Uzosenza sibe batjha ngokusilapha soke ngokupheleleko. Abarholopheleko, iimphofu neemumu bazokulatjhwa begodu abahlongakeleko bazokuvuswa.—Isa. 25:8; 35:​1-7.

11. Khuyini uJehova atjela uJwanisi bona ayenze begodu kubayini?

¹¹ Khuyini enye uZimu ayitjhwileko ukusiqinisekisa ukuthi singamthemba? UJehova wathi kuJwanisi: “Tlola ngombana amezwi la athembekile begodu aliqiniso.” (IsAm. 21:5) UJehova wanikela okungaphezu kokuyala ukuthi ‘atlole.’ Wanikela nebanga. Wathi: “Ngombana amezwi la athembekile begodu aliqiniso”—okutjho ukuthi amezwi kaZimu athembekile begodu anembile. Siyathokoza ukuthi uJwanisi wawulalela umyalo wokuthi ‘atlole.’ Ngebanga lalokho sikghona ukufunda ngesithembiso sakaZimu sePharadesi begodu sikghona ukucabangisisa ngeembusiso ezihle esizilindileko.

12. Kubayini uJehova athi: “Sewenzekile!”?

¹² Uthini uZimu ngokulandelako? “Sewenzekile!” (IsAm. 21:6) Kubayini uJehova athi iinthembiswezi sezenzekile? Ngombana ayikho into engamvimba bona azalise umnqophwakhe. UJehova utjho okhunye  ukusiqinisekisa ukuthi isithembiso sakhe sizokuzaliseka. Uthini?

13. Kubayini uJehova athi: “Ngingu-Alfa no-Omega”?

¹³ Njengombana khekwatjhiwo phambilini, embonweni owabonwa nguJwanisi, uJehova wakhuluma amahlandla amathathu. (IsAm. 1:8; 21:​5, 6; 22:13) Kesinye nesinye sezenzakalwezi, uJehova watjho amezwi afanako: “Ngingu-Alfa no-Omega.” U-alfa liledere lokuthoma ema-alfabhethini wesiGirigi begodu u-omega liledere lamaswaphela. Ngokusebenzisa amezwi athi ‘u-Alfa no-Omega,’ uJehova bekatjengisa ukuthi nakenza into uyayenza bekayiqede.

14. (a) Nikela isibonelo sokuthi kunini la uJehova athi khona “Ngingu-Alfa” begodu kunini la azokuthi khona ‘ngingu-Omega.’ (b) Ngisiphi isiqinisekiso esikuGenesisi 2:​1-3?

¹⁴ Ngemva kobana uJehova abumbe u-Adamu no-Eva, waveza umnqophwakhe wekuthomeni ngabantu nangephasi. IBhayibheli lithi: “UZimu wababusisa wathi: ‘Belethani nande, nizalise iphasi benilibuse.’” (Gen. 1:28) UJehova nakenza njalo kuhlekuhle bekathi “Alfa.” Wawutjho ngokukhanyako umnqophwakhe: Bekuzokufika isikhathi lapho iinzukulwana zaka-Adamu no-Eva ezilalelako ezinganasono zizokuzalisa iphasi zilenze libe yipharadesi. Umnqophwakhe nasele uzalisekile kuzokuba ngasuthi uthi, “Omega.” Ngemva kokuqedwa kokudalwa “kwezulu nephasi nakho koke okukilo,” uJehova wanikela isiqinisekiso. Sifumaneka kuGenesisi 2:​1-3. (Funda.) UJehova wathi ilanga lekhomba licwengile. Kutjho ukuthini lokho? UJehova waqinisekisa ukuthi angeze abhalelwe kuzalisa umnqophwakhe ngabantu nangephasi. Umnqophwakhe ukuzokuzaliseka ngokupheleleko ngelanga lekhomba.

15. Kubayini bekungabonakala ngasuthi uSathana uthikazise umnqopho kaZimu ngabantu?

 ¹⁵ Ngemva kobana u-Adamu no-Eva bahlubukile, baba zizoni begodu badlulisela isonweso nokufa ebantwaneni babo. (Rom. 5:12) Ngebanga lalokho, bekungabonakala ngasuthi uSathana uthikazise umnqopho kaZimu wokuthi iphasi lizale abantu abanganasono nabalalelako. Inga-kghani uSathana wakghona ukujamisa uJehova ekuzaliseni isithembiso sakhe? USathana kungenzeka bekacabanga ukuthi uJehova angekhe asizalise isithembiso sakhe. Kungenzeka bekacabanga ukuthi uZimu uzokubulala u-Adamu no-Eva begodu adale abanye abatjhadikazi abanganasono bona azalise umnqophwakhe ngabantu. Ngathana uZimu wenza njalo, uDeveli bekazommangalela ngokuthi uleya amala. Kubayini? Ngombana, njengombana kutlolwe kuGenesisi 1:​28, uJehova besele atjele u-Adamu no-Eva ukuthi iinzukulwana zabo zizokuzalisa iphasi.

16. Kubayini uSathana bekangamangalela uJehova ngokuthi ubhalelwe?

¹⁶ Ngisiphi esinye isiqunto okungenzeka uSathana bekacabanga ukuthi uZimu uzosithatha? Kungenzeka uSathana bekacabanga ukuthi uJehova uzokuvumela u-Adamu no-Eva babe nabantwana kodwana abantwanabo bebazokuhlala banesono. (UMtj. 7:20; Rom. 3:23) Akunakuzaza ukuthi uDeveli bekazokumangalela uJehova ngokuthi ubhalelwe. Kubayini? Ngathana uZimu wavumela lokho, umnqophwakhe wokuthi iphasi eliyiPharadesi lizale iinzukulwana zaka-Adamu no-Eva ezinganasono nezilalelako, bengeze wazaliseka.

17. UJehova ukusombulule njani ukuvukela kwakaSathana begodu kwaba namuphi umphumela? (Qala nesithombe)

¹⁷ UJehova wasombulula indaba yokuvukela kwakaSathana nabantu bokuthoma ngendlela uSathana ebekangakayilindeli. (Rhu. 92:5) UJehova wavumela u-Adamu no-Eva bona babe nabantwana, ngendlela le watjengisa ukuthi akaleyi amala. UJehova watjengisa nokuthi nakathi into uzoyenza, ayikho into ezomvimba bona angayenzi. Watjengisa ukuthi umnqophwakhe uzokuzaliseka ngokunikela ‘ngesizukulwana’ esizokusindisa iinzukulwana zaka-Adamu no-Eva. (Gen. 3:15; 22:18) Isizukulwanesi besizokunikela ngokuphila kwaso kube sihlengo sokusindisa abantu. USathana bekangakakulindeli lokhu! Kubayini? Ngombana isihlengo sisekelwe ethandweni  elingazicabangeli lona kwaphela. (Mat. 20:28; Jwa. 3:16) USathana akanabo ubuntobu. Uzicabangela yena kwaphela. Alo khuyini ezokwenzeka ngebanga lesihlengo? Ekupheleni kweminyaka eyi-1 000 yokubusa kwakaKrestu, iinzukulwana zaka-Adamu no-Eva ezinganasono nezilalelako zizokuhlala ephasini eliyipharadesi—njengombana uJehova bakahlose njalo ekuthomeni. Ngesikhatheso, kuzokufana nokuthi uJehova uzabe athi, “Omega.”

18. Ngiziphi iinqinisekiso ezintathu uJehova asinikela zona? (Qala nebhoksi elithi, “ Amabanga Amathathu Wokuthemba Isithembiso SakaJehova.”)

¹⁸ Esihlokwenesi sicoce ngamabanga wokobana kubayini singaqiniseka ukuthi iphasi lizokuba yiPharadesi. Yini esingayitjela abanye ukubaqinisekisa ukuthi lokhu kuzokwenzeka kwamambala? Kokuthoma, nguJehova owenze isithembiswesi. Incwadi yesAmbulo ithi: “Loyo ohlezi esihlalweni sobukhosi wathi: ‘Qala! Ngenza zoke izinto zibe zitjha.’” Unokuhlakanipha, amandla, nesifiso sokwenza iinthembiso zakhe zizaliseke. Kwesibili, ukuzaliseka kwesithembiso sakhe kuzokukwenzeka kangangobana ngombono kaJehova sesenzekile. Kungebangelo athi: “Amezwi la athembekile begodu aliqiniso. . . . Sewenzekile!” Godu ayikho into engavimba uJehova bona aqede into ayithomileko. Kungebangelo athi: “Ngingu-Alfa no-Omega.” UJehova uzokuveza ukuthi uSathana umleyimala begodu angeze amvimba bona azalise umnqophwakhe.

19. Abantu nabakufumana kubudisi ukukholelwa isithembiso sakaZimu sePharadesi, khuyini ongayenza?

¹⁹ Khumbula ukuthi qobe nawutjela abanye ngalokho uJehova akutjhoko ukusiqinisekisa ukuthi iinthembiso zakhe zizokuzaliseka, uqinisa ukumthemba kwakho. Nje-ke nawufunda isithembiso esikhuthazako esimalungana nePharadesi elizako njengombana sihlathululwe kusAmbulo 21:​4, bese omunye umuntu athi, “Lokhu angeze kwenzeka,” khuyini ongayenza? Kubayini ungamfundeli ivesi 5 no-6 begodu umhlathululele lona? Mtjengise indlela uJehova asiqinisekise ngayo isithembiso sakhe ngokusitlikitla.—Isa. 65:16.