1-2. (a) UJesu wenzani ngobusuku bangaphambi kokufa kwakhe? (b) Ngimiphi imibuzo esizoyiphendula esihlokwenesi?

 BEKUNGELESINE ebusuku ngoNisani 14, 33 C.E., uJesu bekazi ukuthi uzokuthengiswa, ahlulelwe, ahlunguphazwe bekabulawe. Bekaqeda ukudla isidlo esikhethekileko ekumbeni ephezulu nabapostoli bakhe abathembekileko. Ngemva kwesidlweso, uJesu wakhuthaza abapostoli bakhe. Msinyana ngaphambi kobana boke baphume ngekumbeni, uJesu wathandaza umthandazo oqakatheke khulu. Umthandazo loyo ukuJwanisi isahluko 17.

² Umthandazo kaJesu utjengisa ukuthi bekatshwenyeke ngani ngaphambi kobana abulawe? Umthandazo lo utjengisa ukuthi, khuyini ebeyiqakatheke khulu kuye nakasephasini? Akhesicoce ngeempendulo zemibuzo le.

“NGIBAZISILE IGAMA LAKHO”

3. UJesu wathini ngegama lakaJehova begodu bekutjho ukuthini lokho? (Jwanisi 17:​6, 26)

³ Nakathandazako uJesu wathi: “Ngibazisile igama lakho.” Wakhuluma amahlandla amabili wathi wazisa abafundi bakhe igama lakaJehova. (Funda uJwanisi 17:​6, 26.) Bekatjho ukuthini ngalokho? Kghani bekufuze ahlathululele abafundi bakhe ngegama lakaJehova? Abafundi bakaJesu bebamaJuda, besele balazi igama lakaZimu elithi, Jehova. Igamelo belivela iinkhathi ezizinkulungwana emitlolweni yesiHebheru. Nje-ke uJesu akhenge abafundise ukuthi igama lakaJehova ngubani, kunalokho wabafundisa lokho okujanyelwe ligamelo.  UJesu wabafundisa ngobuntu bakaJehova, iminqophwakhe, imisebenzakhe ukudlula nanyana ngimuphi umuntu.

4-5. (a) Singakufanisa nani ukwazi igama lomuntu? (b) Abafundi bakaJesu balazi ngayiphi indlela igama lakaJehova?

⁴ Ngokwesibonelo, akhesithi kunomdala webandleni igama lakhe ngu-David begodu ungudorhodere. Sewumazi isikhathi eside, kuthi ngelinye ilanga ukuphila kwakho kube sengozini, utlhoge udorhodere bona akusize. Nawuya esibhedlela umdala loyo ongudorhodere, uyakulapha, asindise ukuphila kwakho. Kghani lokho kutjho ukuthi igama lomdala loyo lizokuqakatheka khulu kuwe? Iye, kunjalo. Kuwe angekhe asaba ngu-David kwaphela, kunalokho uzokuba ngudorhodere owasindisa ukuphila kwakho.

⁵ Ngokufanako, abafundi bakaJesu besele balazi igama lakaJehova. Kodwana ngemva komsebenzi kaJesu wokutjhumayela, igamelo laqakatheka khulu kibo. Kubayini sitjho njalo? Kungombana uJesu watjengisa ubuntu bakaYise kikho koke ebekakwenza nebekakukhuluma. Abapostoli ‘bamazi’ ngcono uJehova ngebanga lokulalela indlela uJesu ebekafundisa ngayo nangokuqala indlela ebekaphatha ngayo abantu.—Jwa. 14:9; 17:3.

“NGEBANGA LEGAMA LAKHO, ONGINIKELE LONA”

6. UJehova wanikela uJesu igama lakhe ngayiphi indlela? (Jwanisi 17:​11, 12)

⁶ UJesu wathandazela abafundi bakhe wathi: “Bavikele ngebanga legama lakho, onginikele lona.” (Funda uJwanisi 17:​11, 12.) Kghani lokho bekutjho bona uJesu bekazokubizwa ngokuthi nguJehova? Awa. Tjheja ukuthi emthandazwenakhe, uJesu nakakhuluma ngegama lakaJehova wathi ngebanga “legama lakho.” Igama lakaJehova akhenge kube ligama lakaJesu. Bekatjho ukuthini-ke uJesu nakathi unikelwe igama lakaZimu? Kokuthoma, uJesu bekamjameli namkha umkhulumeli kaJehova. Weza ngegama lakaYise begodu wenza nemisebenzi eminengi egamenelo. (Jwa. 5:43; 10:25) Ukungezelela kilokho, igama elithi Jesu litjho ukuthi “UJehova Uyisindiso.” Nje-ke ihlathululo yegama lakaJesu ihlanganisa igama lakaJehova.

7. Nikela isibonelo sokuthi uJesu wamkhulumela njani uJehova.

⁷ Ngokwesibonelo, umbusi angathumela umkhulumeli bona amkhulumele. Amezwi womkhulumeli azokuba namandla njengamezwi wombusi. Ngokufanako, uJesu bekamkhulumeli kaJehova, nje-ke watjela abantu ngegama lakhe.—Mat. 21:9; Luk. 13:35.

8. Kubayini uJehova athi igama lakhe ‘belikuJesu’ ngaphambi kobana eze ephasini? (Eksodusi 23:​20, 21)

⁸ Umsebenzi kaJesu njengoLizwi, bekamkhulumeli kaJehova adlulisela ilwazi neenqophiso kwezinye iingilozi zakaZimu nebantwini. (Jwa. 1:​1-3) Kungenzeka uJesu bekayingilozi uJehova ayithumela bona iyokutlhogomela ama-Israyeli nawasemmangweni. Nakatjela ama-Israyeli bona alalele ingilozi leyo, uJehova wathi: “Ngebanga lokuthi iza ngegama lami.” a (Funda u-Eksodusi 23:​20, 21.) UJehova watjho lokho ngebanga lokuthi uJesu bekamkhulumelakhe, watjengisa ukuthi uJehova wenza izinto kuhle begodu ucwengile.

 “BABA, PHAZIMULISA IGAMA LAKHO”

9. Igama lakaJehova beliqakatheke kangangani kuJesu? Hlathulula.

⁹ Njengombana sibonile, ngitjho nangaphambi kokuthi uJesu eze ephasini igama lakaJehova beliqakatheke khulu kuye. Kungebangelo nakasephasini, uJesu watjengisa ngakho koke akwenzako ukuthi igama lakaJehova liqakatheke kangangani kuye. Nasele kuzokuphela umsebenzakhe wokutjhumayela, uJesu wabawa uJehova wathi: “Baba, phazimulisa igama lakho.” Khonokho uYise waphendula ngelizwi elikhulu asezulwini wathi: “Ngiliphazimulisile begodu ngizoliphazimulisa godu.”—Jwa. 12:28.

10-11. (a) UJesu waliphazimulisa njani igama lakaJehova? (Qala nesithombe.) (b) Kubayini igama lakaJehova bekufuze licwengiswe?

¹⁰ UJesu naye waliphazimulisa igama lakaYise. Wakwenza njani lokho? Watjela abanye ngobuntu obuhle bakaJehova nangezinto ezihle azenzako. Kodwana wenza okungaphezu kokuphazimulisa igamelo. Igama lakaJehova bekufuze licwengiswe begodu livikelwe. UJesu bekufuze atjengise ukuthi uJehova wenze zoke izinto kuhle begodu igama lakhe licwengile. UJesu watjengisa ukuthi lokho kuqakatheke kangangani ngokufundisa abalandeli bakhe ukuthandaza. Wathi: “Babethu osezulwini, igama lakho alicwengiswe.”—Mat. 6:9.

¹¹ Kubayini igama lakaJehova bekufuze licwengiswe? Kungebanga lokuthi esimini ye-Edeni uSathana wakhuluma amala ngoJehova uZimu. USathana wathi uJehova ukhuluma amala begodu kukhona akufihlela u-Adamu no-Eva. (Gen. 3:​1-5) Ngokutjho njalo, uSathana bekathi indlela kaJehova  yokubusa ayikalungi. Amala kaSathana lawo asahlela ngokunqophileko igama lakaJehova. Kamuva ngesikhathi sakaJobho, uSathana wathi labo abalotjha uJehova, bamlotjha kwaphela ngebanga lezinto abazifumana kuye. Amala lawo godu bewathi akunamuntu othanda uJehova bona angamlotjha ngitjho nanyana aqalene nobudisi. (Job. 1:​9-11; 2:4) Bekutlhoga isikhathi ukutjengisa ukuthi uSathana bekakhuluma amala ngoJehova.

“NGIDELA UKUPHILA KWAMI”

12. Khuyini uJesu ebekazimisele ukuyenza ngebanga lokuthanda igama lakaJehova?

¹² Ngebanga lokuthi bekathanda uJehova, uJesu bekafuna ukwenza koke ebekangakghona ukukwenza bona acwengise igama lakaJehova. Wathi: “Ngidela ukuphila kwami.” (Jwa. 10:​17, 18) Bekazimisele ngitjho nokufa ngebanga legama lakaJehova. b Abantu ababili bokuthoma ebebanganasono, u-Adamu no-Eva bakhetha ukungahloniphi uJehova, bakhetha ukulandela uSathana. Ngokuhlukileko, uJesu bekazimisele ukuza ephasini azokutjengisa ukuthi umthanda kangangani uJehova. UJesu wakwenza lokho ngokulalela uJehova kikho koke, ngokukhuluma nangezenzo. (Heb. 4:15; 5:​7-10) Wahlala athembekile ukuphila kwakhe koke, bekwaba sekufeni esigodweni sokuhlunguphazwa. (Heb. 12:2) Ngendlela leyo, watjengisa indlela athanda ngayo uJehova negama lakhe.

13. Kubayini uJesu bekakufanelekela ukutjengisa ukuthi uSathana umleyimala? (Qala nesithombe.)

¹³ Ngendlela ebekaphila ngayo, uJesu watjengisa ukuthi uSathana umleyimala, ingasi uJehova. (Jwa. 8:44) UJesu bekamazi kuhle uJehova ukudlula omunye umuntu owakhe waphila. Ngathana izinto ezakhulunywa nguSathana ngoJehova beziliqiniso, uJesu bekazozazi. Kodwana uJesu wadzimelela ekuvikeleni igama lakaJehova. Nalokha nakubonakala ngasuthi uJehova akasamvikeli, uJesu wahlala azimisele ukufa kunokuthi angahloniphi uYise.—Mat. 27:46. c

‘NGIWUQEDILE UMSEBENZI ONGINIKELE WONA’

14. UJehova wambusisa njani uJesu ngebanga lokuthembeka?

¹⁴ Emthandazweni wangaphambi kokufa kwakhe, uJesu bekangatjho athi: ‘Ngiwuqedile umsebenzi onginikele wona bona ngiwenze.’ Bekamthemba uJehova ukuthi  uzombusisa ngebanga lokuthembeka kwakhe. (Jwa. 17:​4, 5) UJesu wenza kuhle ngokuthemba uYise. UJehova akhenge amtjhiye ethuneni. (IzE. 2:​23, 24) Wamvusa begodu wamnikela isikhundla esiphezulu ezulwini. (Flp. 2:​8, 9) Ekugcineni, uJesu wathoma ukuba yiKosi yomBuso kaZimu ebusako. Khuyini ezokufezwa mBuso loyo? Ingcenye yesibili yomthandazo osibonelo iyasitjela ithi: “UmBuswakho awuze. Intandwakho [Jehova] ayenzeke nephasini njengombana yenzeka ezulwini.”—Mat. 6:10.

15. Khuyini okhunye okuzokwenziwa nguJesu?

¹⁵ Esikhathini esizako, uJesu uzokulwa namanaba kaZimu, atjhabalalise nabakhohlakeleko e-Arimagedoni. (IsAm. 16:​14, 16; 19:​11-16) Msinyana ngemva kwalokho, uzokuphosela uSathana ‘emgodini onganamkhawulo’ lapho azokuvalelwa khona angakghoni ukwenza litho. (IsAm. 20:​1-3) UJesu uzokubuyisela ukuthula ephasini begodu asuse nesono ebantwini phakathi nokuBusa kwakhe kwemiNyaka eyiKulungwana. Uzokuvusa nabahlongakeleko. Uzokwenza loke iphasi libe yipharadesi. Intando kaJehova izokufezeka.—IsAm. 21:​1-4.

16. Ukuphila kuzokuba njani nakuphela imiNyaka eyiKulungwana yokuBusa?

¹⁶ Khuyini esingayilindela bona yenzeke nakuphela imiNyaka eyiKulungwana yokuBusa? Abantu angekhe basaba nesono. Abantu angekhe kusatlhogeka bona babawe ukulitjalelwa kwezono zabo ngesisekelo somhlatjelo wesihlengo. Abantu angekhe basatlhoga abayi-144 000 bona babe baphristi babo namkha batlhoge uJesu bona abeMphristabo oPhakemeko nabazakuba nobuhlobo noJehova. “Isitha sokugcina esizokuqedwa kukufa.” Amathuna angekhe asaba nabantu. Abahlongakeleko bazokuvuswa, baphile. Woke umuntu ephasini angekhe asaba nesono.—1 Kor. 15:​25, 26.

17-18. (a) Kuzokwenzekani nakuphela imiNyaka eyiKulungwana yokuBusa? (b) UJesu uzokwenzani nakuphela isikhathi sakhe sokubusa? (1 Korinte 15:​24, 28) (Qala nesithombe.)

 ¹⁷ Khuyini ezokwenzeka nakuphela ukuBusa kwemiNyaka eyiKulungwana? Kuzokwenzeka into ekhethekileko. Angekhe kusaba nomuntu ozaza ukuthi uJehova nguZimu ocwengileko nonobulungiswa. Njani? Esimini ye-Edeni, uSathana wathi uJehova mleyimala begodu akabusi abantu ngethando. Kusukela ngesikhatheso, igama lakhe licwengiswa kanengi babantu abamhloniphako. Nakuphela imiNyaka eyiKulungwana yokuBusa, igama lakaJehova lizabe licwengiswe ngokupheleleko. Ngesikhatheso, ngaphandle ngokuzaza uJehova uzabe atjengisile ukuthi unguBaba wezulwini onethando.

¹⁸ Nakuphela ukuBusa kwemiNyaka eyiKulungwana, woke umuntu uzokwazi ukuthi uSathana bekakhuluma amala ngoJehova. UJesu uzokwenzani nasele aqede ukubusa? Kghani uzokulingisa uSathana avukele uJehova? Awa. (Funda yoku-1 kwebeKorinte 15:​24, 28.) UJesu uzokubuyisela umBuso kuYise. Uzokuthobela ukubusa kwakaJehova. Ngokungafani noSathana, uJesu uzimisele ukulahlekelwa ngikho koke ngebanga lokuthanda uJehova.

19. Liqakatheke kangangani igama lakaJehova kuJesu?

¹⁹ Akusirari ukuthi kubayini uJehova azimisela ukunikela uJesu igama lakhe. UJesu watjengisa ukuthi mjameli ofanelekako kaYise. Beliqakatheke kangangani igama lakaJehova kuJesu? Beliqakatheke khulu ukudlula nanyana yini. Bekazimisele nokufa ngebanga legamelo begodu uzimisele nokubuyisela koke kuJehova nakuphela imiNyaka eyiKulungwana yokuBusa. Singasilingisa njani isibonelo sakaJesu? Sizokucoca ngependulo yombuzo loyo esihlokweni esilandelako.