ISIHLOKO SE-10
Kubayini Kufuze Ubhajadiswe?
“Ngamunye wenu abhajadiswe.”—IZE. 2:38.
INGOMA 34 Ngizokuhlala Ngithembekile KuZimu
OKUZOKUCOCWA NGAKHO a
1-2. Khuyini kanengi eyenzekako abantu nababhajadiswako begodu khuyini okufuze ucabange ngayo?
KGHANI khewasibona isiqubuthu sabantu abazilungiselele ukuzokubhajadiswa? Uzwa ukuthi bayaqiniseka ngendlela abaphendula ngayo imibuzo emibili ngaphambi kobana babhajadiswe. Ubona amalunga wemindenabo nabangani bazikhakhazisa khulu ngabo. Nabaphuma ngemanzini, uzwa kuwahlwa izandla begodu ubona nethabo emehlwenabo. Ngokwesilinganiso, qobe veke, iinkulungwana zabantu zithatha igadangwelo, zinikela ukuphila kwazo kuJehova uZimu begodu zibhajadiswe njengaboFakazi bakhe.
2 Kuthiwani-ke ngawe? Nange ucabangela ukubhajadiswa, umumuntu oqakatheke khulu ephasini elimbeli ngombana ‘ufuna uJehova.’ (Rhu. 14:1, 2) Isihlokwesi sitlolelwe wena, akunandaba bona umncani namkha umkhulu. Nathi esele sibhajadisiwe sifuna ukuqinisa ukuzimisela kwethu ukulotjha uJehova ngokungapheliko. Nje-ke akhesicoceni ngamabanga amathathu kwamanengi asenza bona sifune ukulotjha uJehova.
UTHANDA IQINISO NOKULUNGA
USathana ulikhulume kumbi igama lakaJehova iinkulungwana zeminyaka begodu usaragela phambili nokwenza njalo (Funda iingaba 3-4)
3. Kubayini iinceku zakaJehova zithanda iqiniso nokulunga? (IRhubo 119:128, 163)
3 UJehova wayala abantu bakhe bona ‘bathande iqiniso.’ (Zak. 8:19) UJesu wakhuthaza abalandeli bakhe bona bafune ukulunga. (Mat. 5:6) Lokhu kutjho ukuthi umuntu kufuze abe nesifiso esinamandla sokwenza okulungileko, okuhle nokuhlwengileko emehlweni kaZimu. Inga-kghani uyalithanda iqiniso nokulunga? Siyaqiniseka bona uyalithanda. Ukuhloyile ukuleya amala nazo zoke izinto ezingakalungi nezikhohlakeleko. (Funda iRhubo 119:128, 163.) Umuntu oleya amala ulingisa uSathana, umbusi wephaseli. (Jwa. 8:44; 12:31) Omunye weminqopho kaSathana, kukhuluma kumbi igama elicwengileko lakaJehova uZimu. USathana bekasolo aleya amala ngoZimethu solo kwahlubuka ababelethi bethu bokuthoma e-Edeni. Waveza uJehova njengomuntu omarhamaru noMbusi ongakathembeki odima abantu izinto ezihle. (Gen. 3:1, 4, 5) Amala kaSathana aragela phambili nokwenza abantu bacabange okumbi ngoJehova. Lokha abantu nabakhetha ‘ukungalithandi iqiniso,’ uSathana angabadosela kiyo yoke imihlobo yokungalungi namkha ekuziphatheni okumbi.—Rom. 1:25-31.
4. UJehova utjengise njani bona ‘unguZimu weqiniso’? (Qala nesithombe.)
4 UJehova ‘unguZimu weqiniso’ begodu ngomusa ubafundisa iqiniso labo abamthandako. (Rhu. 31:5) Ngokwenza njalo uyabasiza bona bangasakhohliswa mamala kaSathana. UJehova godu ufundisa iinceku zakhe bona zithembeke begodu zibe babantu abalungileko. Lokho kwenza iinceku zakhe zihlonipheke begodu zibe nokuthula kwangaphakathi. (IzA. 13:5, 6) Inga-kghani nawe ngilokho akwenzele khona nawufunda iBhayibheli? Ufumene ukuthi iindlela zakaZimu ziphuma phambili begodu ubafunela okuhle abantu nawe ngokwakho. (Rhu. 77:13) Nje-ke ufuna ukwenza lokho uZimu athi kulungile. (Mat. 6:33) Ufuna ukwenza iqiniso laziwe, utjengise nokuthi lokho uSathana akutjhoko ngoJehova uZimethu kumamala. Ungakwenza njani lokho?
5. Ungalisekela njani iqiniso nokulunga?
5 Ungaphila ukuphila kwakho ngendlela etjengisa ngokukhanyako kibo boke ukuthi uyawala amala kaSathana, usekela iqiniso. Ungatjengisa bona ufuna uJehova abe Mbusakho begodu ufuna ukwenza okulungileko. Ungakwenza njani lokho? Ungakwenza ngokutjhidela kuJehova ngomthandazo, uzinikele kuye ngemva kwalokho wenze ukuzinikelokho kube tjhatjhalazi ngokuthi ubhajadiswe. Ukuthanda iqiniso nokulunga kunamandla khulu kungakwenza ukhethe ukubhajadiswa.
UYAMTHANDA UJESU KRESTU
6. Ngimaphi amabanga wokuthanda uJesu Krestu afumaneka kuRhubo 45:4?
6 Kubayini uthanda uJesu Krestu? Tjheja amabanga amahle afumaneka kuRhubo 45:4. (Ifunde.) UJesu uthanda iqiniso, ukuthobeka nokulunga. Nange uthanda iqiniso nokulunga, kuyazwisiseka bona uyamthanda noJesu Krestu. Cabanga ngendlela uJesu atjengisa ngayo isibindi nakavikela iqiniso nokulunga. (Jwa. 18:37) Alo uJesu utjengisa njani bona uyakuthanda ukuthobeka?
7. Khuyini oyithandako ngobuntu bakaJesu?
7 UJesu utjengisa ngezenzo zakhe bona uyakuthanda ukuthobeka. Ngokwesibonelo, loke idumo ulisa kuYise ingasi kuye. (Mar. 10:17, 18; Jwa. 5:19) Ukuthobeka kwakaJesu kukwenza uzizwe njani? Kghani akukwenzi uyithande iNdodana kaZimu bewuyilandele? Kwamambala kunjalo. Kubayini uJesu athobekile? Kungombana uthanda bekalingise uYise othobekileko. (Rhu. 18:35; Heb. 1:3) Kghani awudoseleki kuJesu obulingisa ngokupheleleko ubuntu bakaJehova?
8. Kubayini sithanda uJesu njengeKosethu?
8 Siyamthanda uJesu njengeKosethu ngombana uMbusi ophuma phambili. UJehova wabandula iNdodanakhe bona ibuse. (Isa. 50:4, 5) Cabanga godu ngokuzidela nangethando uJesu alitjengisileko. (Jwa. 13:1) Njengombana uJesu ayiKosethu, ufaneleka khulu bona simthande. Wahlathulula ukuthi labo abamthandako, labo ababizwa ngokuthi bangani bakhe, batjengisa ukuthi bayamthanda ngokulalela imiyalwakhe. (Jwa. 14:15; 15:14, 15) Kulilungelo elikhulu ukuba mngani weNdodana kaJehova!
9. Ukubhajadiswa kwamaKrestu kufana njani nokubhajadiswa kwakaKrestu?
9 Omunye wemiyalo kaJesu kukobana abalandeli bakhe babhajadiswe. (Mat. 28:19, 20) Wasibekela isibonelo. Ukubhajadiswa kwakhe kuhlukile kunokwabalandeli bakhe. (Qala ibhoksi elithi, “Indlela Ukubhajadiswa KwakaJesu Nokubhajadiswa Kwabalandeli Bakhe Okuhluke Ngayo.”) Kodwana kuyafana ngezinye iindlela. Lokha uJesu nakabhajadiswako, wazinikela bona uzokwenza intando kaYise. (Heb. 10:7) Ngendlela efanako, abalandeli bakaKrestu nababhajadiswako batjengisa ukuthi bazinikela kuJehova uZimu. Into eqakathekileko ekuphileni kwabo nje, kukwenza intando kaZimu ingasi yabo. Balandela isibonelo seKosabo.
10. Kubayini ukuthanda uJesu kufuze kukwenze ufune ukubhajadiswa?
10 Uyakholelwa bona uJesu uyiNdodana kaJehova ayithandako begodu kuyakuthabisa ukuthi umkhethile bona abe yiKosethu. Uyazi ukuthi uJesu uthobekile begodu umlingisa ngokupheleleko uYise. Ufundile ukuthi wakhe wasuthisa abalambileko, waduduza abadanileko, walapha ngitjho nabagulako. (Mat. 14:14-21) Uyibonile indlela anqophisa ngayo ibandla lakhe namhlanjesi. (Mat. 23:10) Uyazi nokuthi uzokwenza okungaphezu kwalokho esikhathini esizako nakabusa njengeKosi yomBuso kaZimu. Ungatjengisa njani ukuthi uyamthanda? Ngokulandela isibonelo sakhe. (Jwa. 14:21) Enye yezinto zokuthoma ongazenza, kulandela isibonelo sakhe, unikele ukuphila kwakho kuJehova bewubhajadiswe.
UYAMTHANDA UJEHOVA UZIMU
11. Ngiliphi ibanga eliqakatheke khulu lokobana ubhajadiswe begodu kubayini kunjalo?
11 Ngiliphi ibanga eliqakatheke khulu elenza bona ubhajadiswe? UJesu waveza ukuthi ngimuphi umyalo kaZimu omkhulu nakathi: “Kufuze uthande uJehova uZimakho ngehliziywakho yoke nangomphefumulwakho woke nangomkhumbulwakho woke nangamandlakho woke.” (Mar. 12:30) Inga-kghani amezwi la ahlathulula ukuthi umthanda kangangani uZimu?
UJehova Mthombo wayo yoke into ehle ekhewayithabela nosazoyithabela (Funda iingaba 12-13)
12. Kubayini uthanda uJehova? (Qala nesithombe.)
12 Kunamabanga amanengi wokuthanda uJehova. Ngokwesibonelo, ukghonile ukuzwisisa ukuthi “umthombo wokuphila” nokuthi unguMuphi ‘wananyana ngisiphi isipho esihle nesipheleleko.’ (Rhu. 36:9; Jak. 1:17) Zoke izinto ezihle esizithabelako zivela kuZimethu onomusa nosithandako.
13. Khuyini eyenza isihlengo sibe sisipho esikarisako?
13 Isihlengo sisipho esihle uJehova asinikele sona. Kubayini sitjho njalo? Cabanga ngobuhlobo obukhona hlangana kwakaJehova neNdodanakhe. UJesu wathi: ‘UBaba uyangithanda’ begodu “ngiyamthanda uBaba.” (Jwa. 10:17; 14:31) Ubuhlobo babo bakhula khulu eminyakeni emabhiliyoni bandawonye. (IzA. 8:22, 23, 30) Nje akhucabange ukuthi kwamzwisa ubuhlungu kangangani uZimu ukuvumela iNdodanakhe bona izwe ubuhlungu beyihlongakale. UJehova uyabathanda abantu kuhlanganise nawe kangangobana wazimisela ukunikela ngeNdodanakhe ayithandako bona ibe mhlatjelo ukwenzela bona wena nabanye nikghone ukuphila ngokungapheliko. (Jwa. 3:16; Gal. 2:20) Leli libanga elikhulu elenza sithande uZimu.
14. Ngimuphi umnqopho ophuma phambili ekuphileni ongaba nawo?
14 Indlela othanda ngayo uJehova seyikhule khulu njengombana ufunde okungeziweko ngaye. Akunakuzaza ukuthi ufuna ukutjhidela kuye khulu nje nangokungapheliko. Ungakghona ukwenza njalo. Ukukhuthaza bona uthabise ihliziywakhe. (IzA. 23:15, 16) Lokho ungakwenza ingasi ngamezwi kwaphela kodwana nangezenzo. Indlela ophila ngayo izokutjengisa ukuthi umthanda kwamambala uJehova. (1 Jwa. 5:3) Lowo mnqopho ophuma phambili ekuphileni ongaba nawo.
15. Ungatjengisa njani bona uyamthanda uJehova?
15 Ungatjengisa njani bona uyamthanda uJehova? Kokuthoma, wenza umthandazo okhethekileko lapho uzinikela khona kuZimu weqiniso kwaphela. (Rhu. 40:8) Ngemva kwalokho, wenza ukuzinikelokho tjhatjhalazi ngokuthi ubhajadiswe. Njengombana khesacoca esihlokwenesi, ukubhajadiswa kwakho kuba sikhathi esithabisako nesiqakatheke khulu ekuphileni kwakho. Uthoma ukuphila okutjha, ungasaziphileli wena kodwana uphilela uJehova. (Rom. 14:8; 1 Pit. 4:1, 2) Lokhu kungazwakala njengegadango elikhulu okufuze ulithathe begodu kunjalo. Kukuvulela ithuba lokuphila ukuphila okungcono khulu. Njani?
16. NgokweRhubo 41:12, uJehova uzobabusisa njani labo abasebenzisa ukuphila kwabo bona bamlotjhe?
16 UJehova unomusa ukubadlula boke. Nanyana yini omnikela yona, uzokuhlala akubuyisela okudlula lokho. (Mar. 10:29, 30) Uzokunikela ukuphila okukarisako, okuzuzisako nokwanelisako nanje ephasini elimbeli. Lokho kusesesithomo. Ukuphila kwakho okuthoma ngokubhajadiswa akukafuzi kuphele. Ungaragela phambi ulotjha uYihlo omthandako ngokungapheliko. Ithando elihlangana kwakho noYihlo lizokuragela phambili likhula. Uzokuphila ngokungapheliko njengaye.—Funda iRhubo 41:12.
17. Khuyini ongayinikela uJehova anganayo?
17 Nawunikela ukuphila kwakho kuZimu begodu ubhajadiswe, uba nelungelo lokunikela uYihlo okuthileko okuligugu. Ukunikele koke okuhle, soke isikhathi esithabisako ekhewasithabela. Nawe unganikela uMnikazi wezulu nephasi anganakho, ukuzimisela kwakho bona umsebenzele. (Job. 1:8; 41:11; IzA. 27:11) Kwamambala le yindlela ephuma phambili ongayikhetha bona uphile ukuphila kwakho! Akunakuzaza bona ukuthanda kwakho uJehova kuzokwenza ubhajadiswe.
ULINDENI?
18. Ngimiphi imibuzo ongazibuza yona?
18 Ungawuphendula njani umbuzo othi, Kghani uzokubhajadiswa? Nguwe wedwa ongaphendula umbuzo lo. Kodwana kungakusiza ukuzibuza ukuthi, ‘Ngilindeni?’ (IzE. 8:36) Khumbula amabanga amathathu esikhulume ngawo. Kokuthoma, uthanda iqiniso nokulunga. Zibuze, ‘Inga-kghani ngiqale phambili esikhathini lapho woke umuntu azokukhuluma iqiniso begodu enze okulungileko?’ Kwesibili, uyamthanda uJesu Krestu. Zibuze, ‘Inga-kghani ngifuna iNdodana kaZimu ibe yiKosami begodu ngifuna ukulandela isibonelo sayo?’ Kwesithathu, okuqakatheke khulu kukuthi uyamthanda uJehova. Zibuze, ‘Inga-kghani ngifuna ukuthabisa ihliziyo kaJehova ngokumlotjha njengoZimami?’ Nange iimpendulo zakho zemibuzo le zingu iye, alo kubayini ungabhajadiswa? Ulindeni?—IzE. 16:33.
19. Kubayini kungakafuzi uzaze ukubhajadiswa? Fanekisa. (Jwanisi 4:34)
19 Nangabe uyazaza ukubhajadiswa, akhucabange ngomfanekiso uJesu awusebenzisako. (Funda uJwanisi 4:34.) Tjheja ukuthi uJesu wamadanisa ukwenza intando kaYise nokudla. Kubayini? Ukudla kuyasiphilisa. UJesu bekazi ukuthi koke uJehova athi sikwenze kuzosizuzisa. UJehova akafuni senze nanyana yini engasilimaza. Kghani intando kaJehova ngawe ifaka hlangana ukubhajadiswa? Iye. (IzE. 2:38) Nje-ke qiniseka ukuthi ukulalela umyalo wokuthi ubhajadiswe kuzokuzuzisa. Nange ungeze wakuzaza ukuthabela ukudla okumnandi, kubayini uzaza ukubhajadiswa?
20. Khuyini esizokucoca ngayo esihlokweni esilandelako?
20 Kubayini abanye balinda? Abanengi bangaphendula ngokuthi, “Angikakulungeli.” Iqiniso kukuthi isiqunto sokuzinikela kuJehova bewubhajadiswe, siqunto esiqakathekileko ongasenza. Nje-ke utlhoga ukucabangisisa kuhle ngaso begodu kuzokuthatha isikhathi nemizamo bona ufanelekele ukubhajadiswa. Nangabe unesifiso sokuthatha igadangweli, khuyini okufuze uyenze nje bona uzilungiselele? Sizokucoca ngependulo yombuzo lo esihlokweni esilandelako.
INGOMA 28 Ungaba Mngani KaJehova
a Ukubhajadiswa ligadango eliqakatheke khulu kiwo woke umfundi weBhayibheli. Khuyini engenza umfundi athathe igadangweli? Lithando. Ithando lani namkha ngobani? Esihlokwenesi sizokufumana iimpendulo zemibuzo le begodu sizokucoca ngokuthi kuphila okunjani okufuze sikulindele nasele simaKrestu abhajadisiweko.
