Kufuze sibe nokukholwa nasizakuthabisa uZimu. Nanyana kunjalo, iBhayibheli lithi “ukukholwa akusiyinto yabo boke abantu.” (2 Thes. 3:2) Umpostoli uPowula wakhuluma ngalabo abamhlunguphazako, abantu “abalimazako nabambi,” ebekatlhoga ukuvikelwa kibo. Kodwana amezwakhe amalungana nokukholwa angahlathulwa nangezinye iindlela. Abanye abantu bakhetha ukungabunaki ubufakazi bokuthi ukhona uMdali uZimu. (Rom. 1:20) Abanye bangathi banakho ukukholwa ngombana bathi bezwa amandla angakajayeleki. Kodwana ikolelo leyo iyodwa akusikholwa okutlhogekako nasizakuthabisa uJehova.

Kufuze siqiniseke ukuthi uJehova ukhona nokobana umvuzi walabo abanokukholwa okuqinileko. (Heb. 11:6) Ukukholwa kuyingcenye yeenthelo zomoya. Ukuthandaza kuJehova kungasiza umuntu afumane umoya ocwengileko. (Luk. 11:​9, 10, 13) Indlela ephuma phambili yokufumana umoya lowo kufunda iliZwi lakaZimu eliphefumelelweko. Bese ngemva kwalokho, singacabangisisa ngalokho esikufundileko besikusebenzise. Umoya kaJehova unganqophisa ukuphila kwethu, usisize sibe nokukholwa okuthabisa uJehova.