Iimbuzo Evela Ebafundini
Nangabe umKrestu udivosa umlinganakhe womtjhado ngebanga elingekho emTlolweni, ibandla liwuqala njani umtjhadwakhe waphambilini nalo omutjha?
Ebujamweni obunjalo, ibandla lizokuqala umtjhado waphambilini njengowaphelako ngesikhathi indoda le itjhada godu begodu lizokuqala umtjhado omutjha njengosebenzako. Bona sizwisise amabanga walokhu, akhesicabangele lokho uJesu akhuluma ngakho ngedivosi nokutjhada godu.
KuMatewu 19:9, uJesu wahlathulula ukuthi ngiliphi ibanga elivumelana nomTlolo lokuqeda umtjhado. Wathi: “Nanyana ngubani otlhala umkakhe ongakenzi izenzo zomseme ezisisono, bese atjhade nomunye uyafeba.” Emezwini kaJesu, sifunda ukuthi (1) izenzo zomseme ezisisono ngizo kwaphela ezisizathu esisemTlolweni sokuqeda umtjhado ngedivosi nokuthi (2) indoda edivosa umkayo ngaphandle kwesizathweso esisemTlolweni bese itjhada nomunye iyafeba. *
Kghani amezwi kaJesu atjho ukuthi indoda eyenze izenzo zomseme ezisisono begodu yadivosa umkayo itjhaphulukile ngokomtlolo bona ingatjhada godu? Awa akusinjalo. Nangabe indoda ifebile, umfazi okunguye omsulwa angaqunta ukuthi uzoyilibalela indodakhe namkha awa. Nangabe akayilibaleli begodu ayidivose ngokomthetho, bobabili batjhaphulukile bona bangatjhada godu ngemva kokudivosa.
Ngakelinye ihlangothi, umfazi omsulwa kungenzeka akafuni ukuwuqeda umtjhadwabo utjela indodakwakhe bona uzimisele ukuyilibalela. Kuthiwani-ke, nangabe indoda efebileko le, yala ukulitjalelwa mkayo bese iyadivosa bangakavumelani? Ngebanga lokuthi umkayo uzimisele ukuyilibalela begodu barage batjhadile, angekhe itjhaphuluke ngokomTlolo bona ingatjhada godu. Nangabe iqunta ukutjhada nomunye umuntu ngitjho nanyana ingakatjhaphuluki ngokomTlolo bona yenze njalo, izabe iyafeba godu, abadala bebandla kuzokutlhogeka benze ikomidi yokwahlulela godu bona badembe umlandwayo.—1 Kor. 5:1, 2; 6:9, 10.
Nangabe indoda engavunyelwa miTlolo bona itjhade godu, iyatjhada, ibandla liwuqala njani umtjhado waphambilini nalo omutjha? Kghani umtjhado waphambilini lo usamukeleka na? Umlingani omsulwa lo usese nalo na ithuba lokuqunta ukulibalela namkha ukwala obekayindodakwakhe? Kghani umtjhado omutjha lo uzokuqalwa njengowobufebe?
Esikhathini esidlulileko, ibandla beliqala umtjhado omutjha lo njengowobufebe ikani nje umlingani omsulwa nakasaphilako, angakatjhadi namkha angasimlandu wokwenza izenzo zomseme ezisisono. Nanyana kunjalo, uJesu akhenge akhulume ngomlingani omsulwa lokha nakakhuluma ngedivosi nangokutjhada godu. Kunalokho, wahlathulula ukuthi indoda edivosa umkayo ngesisekelo esingasingesomTlolo bese itjhada omunye, iyafeba. Ebujamweni obunjalo, ukudivosa nokutjhada godu, lokho uJesu athi kufana patsi nokufeba, kuqeda umtjhado waphambilini.
“Nanyana ngubani otlhala umkakhe ongakenzi izenzo zomseme ezisisono, bese atjhade nomunye uyafeba.”—Mat. 19:9.
Nangabe indoda idivosa umkayo beyitjhade godu, akusakghoneki ngomlingani omsulwa bona ayilibalele namkha ayale. Nakunjalo, angekhe athweswe umthwalo wokuqunta bona uyayilibalela namkha uyayala indoda ebekatjhade nayo. Ukungezelela kilokho, indlela ibandla eliqala ngayo umtjhado omutjha lo, angekhe iyengokuthi umlingani omsulwa wahlongakala, watjhada godu namkha wenza izenzo zomseme ezisisono. *
Esibonelweni ekukhulunywe ngaso phambilini, indoda efebileko yenze bona badivose. Kuthiwani-ke nangabe indoda ayikafebi kodwana idivosile begodu yatjhada godu? Namkha kuthiwani-ke nangabe indoda akhenge yenze izenzo zomseme ezisisono ngaphambi kobana badivose kodwana izenze ngemva kobana badivosile begodu yatjhada godu nanyana umkayo bekazimisele ukuyilibalela? Kizo zoke iimbonelwezi, idivosi nokutjhada godu, okubufebe kuzowuphelisa umtjhado waphambilini. Umtjhado omutjha lo usibopho esingokomthetho. Kunjengombana kwahlathululwa esiThaleni sakaNovemba 15, 1979, ikhasi 32, “Nje, sekangene emtjhadweni omutjha, angekhe avele awuqede abuyele kumkakhe waphambilini; umtjhado waphambilini uqedwe yidivosi, bufebe nokutjhada godu.”
Ukulungiswa kwendlela esizwisisa ngayo indaba le akutjho ukuthi amaKrestu acabanga bona umtjhado awusese yinto ecwengileko nokuthi ubufebe abusisisono esikhulu kangako. Indoda edivosa umkayo ngaphandle kwesizathu esingokomTlolo bese itjhade nomunye ingakatjhaphuluki ngokomTlolo bona yenze njalo, izokuqalana nekomidi yokwahlulela ngebanga lobufebe. (Nangabe umlingani womtjhado omutjha umKrestu, naye uzokuqalana nekomidi yokwahlulela ngebanga lobufebe.) Nanyana umtjhado omutjha ungekhe uqalwe njengowobufebe, indoda le ngekhe ikufanelekele ukufumana amalungelo akhethekileko wekonzo ebandleni iminyaka eminengi bekube kulapho abantu bangasaphatheka kumbi ngebanga lokuziphatha kwayo namkha ihlazo elibangelwe kuziphatha kwayo okumbi. Ngaphambi kobana inikelwe amalungelo wekonzo, abadala kuzokufuze bacabangele ubujamo bomlingani waphambilini okungenzeka ukhohlisiwe nobujamo babantwana abancani okungenzeka balahlwe mlingani omlandu.—Mal. 2:14-16.
Ngebanga lemiphumela ebuhlungu yedivosi engakhambisani nemiTlolo nokutjhada godu, amaKrestu alwela ukuba nombono kaJehova ngokusekela ukucwengeka kwelungiselelo lomtjhado.—UMtj. 5:4, 5; Heb. 13:4.
^ Bona kube lula, sizokuthi indoda ngiyo efebileko bese omsulwa ngumkayo. Nanyana kunjalo, njengombana kutlolwe kuMarkosi 10:11, 12, uJesu wakwenza kwakhanya ukuthi iseluleko sakhe endabeni le sisebenza ngokulinganako emadodeni nebafazini.
^ Lokhu kulungisa indlela ebesizwisisa ngayo ukuthi umtjhado onjalo uzokuqalwa njengomtjhado wobufebe bekuhlongakale umlingani omsulwa atjhade godu namkha enze izenzo zomseme ezisisono.
