«A gʉoo taa méngouʼ 19 paʼ méng né nzuiʼté!». Aa kô yié fè wégé la né nzuiʼté? A la né nzuiʼté Traduction du monde nouveau ajʉʼ yé kʉa suié na kouaʼ chouŋé laʼ yé, achouŋo Bengali. Pʉa ta ngiôôn naʼa ngôôn méchouŋo po paʼ mèe fʉʼ yié mé kuilé Traduction du monde nouveau na chouŋo laʼ yôb. Ta oo péʼé mba o laa zaté paʼ mé gʉo ta ndaʼ nkiagté mbing nkuilé Mébiible ŋwè?

 Mé wo zhiété, ntangté taʼa kwo pakiagté ntoumo wôb mbwo Komité wuié a ŋwéʼé méŋwaʼné tsèe létsiŋé tchouʼté. Ngouo taʼa kwo pakiagté lôg wèe nzuing tam ta ndôg ndaʼ nkiagté Biible? Nicholas Ahladis wuié a faʼa lé pʉa pié é lié no na lékiagté a Warwick, New york gôôn ngié: «Mé gwiée lé lié méchʉo ta ngiôôn; ntchouŋo tchouŋo paʼ nzuing pʉa pié ée wo lé lôg nkiagté, nzuing wuié chouŋo laʼ lôg ntʉ pouʼou, nzuing wuié patoŋo yèe chouŋé lôg njouʼ choum sié é lié tam wé Biible pouʼou, ka po ngié mé chouŋo yèe chouŋé tso jʉʼ mbing ngouaa gʉa ta kouou jʉʼʉ ndièʼè a naʼa nkoubé wôô. Ngouo taʼa kwo pakiagté lôgô taʼ ngouʼ ta mboo ngouʼ ta lé lôg nkiagté po ndaʼ jʉʼ Biible yié aa na chouŋé Gélékia; lé ping ndaʼ nkiagté Biible ntsém, a zaté mmo ngouʼ lékoua, ta ngʉa tso fʉʼ nzôôn nzab. Achouŋé méntsaʼ mbououʼ ying ndôg nzuing tam ta ngiôôn ntôg tso méchouŋo.»

 A té zaté po ndaʼ kwo pakiagté lé lôg nkiagté Biible wô. Atso nouô pʉa pié é foo méchʉo ta ngiôôn, gʉa tso fʉʼ foo mépaga ngoung ndièʼè. Po tong choum sié mé kiagtée mbing nna môb ménkouaŋa; mé ké té péen wôb wô. Choum sié po gôôn kuiété pakiagté lé lôg nkuilé taʼ Biible wuié a kouaʼ mbʉlé lé jouʼ. Yié a pou ngouo tʉnzuing aa paʼ wôôn tsitsa pakiagté Biible Afrique du Sud gôôn pouʼou; a yé: «Pakiagté kouangté Jéova mbing nkouangté patoŋo Chouŋé yé, njouʼ yèe faʼ wo kouaʼ maamaa piʼ yié a zèe lékui pôb.»

 Mé kiagté ta ntchʉé jʉʼ péʼé, a zèté lé kuilé mé Biible na pipa, ndéen ké ntchouʼté mépipa nkouè ndôg nkuilé mémbouʼou ŋwaʼné. Pouʼou, pakuilé Biible yousé «two choum» légʉém: pipa, ancre, choum lôg ngnièté ngoub, choum lôg ndaté, choum lôg ntémté na ngoub ndôg ngʉo é tchouŋo ntʉté, mépag pipa mié mé lôg nkab ngnièté, méruban, mébando, choum lôg ngʉo mékuii nkaʼ ŋwaʼné tʉté, mbing ngʉo choum sié mé yousé ta ndôg nkouèe Biible ta a wo gʉo lépouʼou. A laa na ngouʼ 2019 , mé gniousé nkab ta ngouo mmo 20 million de dollars po lé lôg njou choum faʼ sié mé gé lôg kuilé Biible. Méfè pégé pié po faʼa jʉʼ yié mé kuilé Mébiible wo la gʉa na yèe ngouʼ ndôg méhawa 300 000 faʼa na lé kuilé Mébiible mbing ntoum.

 Mé tchʉngté wôôn nzuing tam po wôôn nzuing nkab na môôn méfaʼ nti kô? Joel Blue wuié aa na kwo pʉa pié é kuilé méŋwaʼné tsaa ngoung ntsém gôôn ngié: «Biible aa ŋwaʼné yié a pou ngouo tʉnzuing yié pég kuilé». «Pég ping né nkouŋo ngié nti yié a lôg ngouo naa gouʼté mbwo Ssé wuié pég gouʼté, mbing ngʉo mékouʼ na nkʉ wuié pég saʼa.»

 Pég té kuilé Kiagté Ngoung Suié po ndaʼ na méchouŋé mié pʉa ta ngiôôn zsé lé tong wô, pég yiing nkuilé na méchouŋé pʉa pié yôb nti létoŋo mmo tsuié tsuié. Taʼ fʉʼ ée ngié pég léen nkuilé Kiagté Ngoung Suié na méchouŋé méfʉʉ ménʉôg, éméchouŋé légém. A zaté méhawa léfôôn lé lôg mbou ntchouʼté taʼ Biilble na chouŋé méfʉʉ ménʉôg nkouè. Paʼ mémbouʼou mèe yiôôn yiôôn la, mé tchʉʼʉ lé tangté tsèe kapod, a zèté mémita mépʉa ta nzab lé lôg ntangté. Pég yiing nkuilé taʼ Biible ntchouŋo tchouŋo mbwo pʉa pié ée nda tsaang nti noué aa jouʼou, ménti mépipa ntsém té kou.

 Pʉa toŋo Traduction du monde nouveau (kiagté ngoung suié), a kouaʼ nkoubé léwo wôb. Pégé pi fʉʼ na tchouʼté na chouŋé Kiluba na jʉʼ yié mé tong lé Tombe tsèe République Démocratique du Congo. Mé foo capital République Démocratique du Congo yié aa Kinshassa, ngiŋé na mékilométa 1700 ta ndaʼ nkouou Tombe. Pakuié Ntang Jéova jouʼou la gwiée po ndaʼ taʼ Biible wémôʼô, a ping ngouo na chouŋo Kiluba yié a léen nzuing. Taʼ fè lôôn mbii Biible ŋwè ndôgô ntchoungté méchouʼté mé, mégé ta naa mbwo wétso. Taʼ ta fo na Sang léfôôn na ngouʼ 2018, pʉa métsém tsèe tchouʼté yié aa na chouŋo kiluba gwiée Biible Traduction du monde nouveau; a ping ngouo na chouŋé yié pʉa pé fʉʼôôn jouʼ.

 Tsoo fè wé manzuiée wuié a gwiée Traduction du monde nouveau yé fʉʼôôn na chouŋo laʼ yôb, achouŋé Nzamôôn (Allemand) gôôn ngié: «Méng té ying gôôn po ngié méng gwiée lé toŋo Biible wô. Méng tchʉʼ nzaté two mboum yôôn po ngié “ngouo méng gʉo lékô ta nging nkuiʼi ntong?”». Taʼ ngaŋa tsaang la ŋwéʼé ngié: «Mé la naa Traduction du monde nouveau lé méng, a ping nkouaʼ né nkoubé wôôn lénéŋé. Méng laa zôôn ntoŋo Chouŋo Ssé njouʼ paʼ méng lôgô kiagté yôôn mè ntong njouʼ wo. Méng né nkouŋo lé kuiʼi nzsé Pakuié Ntang Jéova, mbing nzsé paʼ ngouo méng gʉo yôôn ta ntchʉʼʉ taʼ na pôb.»

 Pʉa métsém pié po toŋo Traduction du monde nouveau kouaʼ sié choum poŋo ntʉm sié mé na lé lôg ntoonté yôôn faʼ. Mé tchʉʼʉ lé na choum poŋo ntʉm lôg ntoonté yôôn faʼ tsèe ngoung ntsém, ntchʉaté na méchʉo mié ée tsaa donate.jw.org. Pég sié paʼ pi naa lé lékag.