LÉZI’I 13
Nkʉ mboŋo nti métchʉôôsé ée wèe?
1. Métchʉôôsé ntsém ée pé’é ngouô mbong?
Mé gia pʉa pié é kouŋo no nénʉ po no mboŋo tsèe métchʉôôsé ntsém. Nkʉ mboŋo wô ngié Ssé né ngia wôb mbing né ndié wôb. Ta’, légia pa’ ta nda’ foo pʉa tsèe métchʉôôsé gʉo méno tépong naa lémʉôgté. (2 Korénto 4:3, 4; 11:13-15) A gʉa na mépité méjournal, tso métchʉôôsé gwiée yôb pwo tsèe légouô’ô la’, lépiag ngwuiè la’, ntchou ngʉo létchʉngté goubé. Yèe koua’ ngʉo pʉa pié é kouŋo no nénʉ po no mboŋo mʉôgté tè’.—Toŋo Matio 24:3-5, 11, 12.
Tchʉôôsé nénʉ gou’té Ssé; ngʉa na tchʉôôsé fʉté mba a pou mbʉaga yé. Tchʉôôsé fʉté zi’i ménkouaŋa mié é té tsèe Biible wô laa mélôôn na Ssé pô na légwé. Ta’, Jéova né nkouŋo ngié pʉa zsé no nénʉ na yé.—Toŋo Ézéchièl 18:4; 1 Timoté 2:3-5.
2. Nkʉ mboŋo nti métchʉôôsé ée wèe?
A pong pa’, métchʉôôsé mié é gôôn ngié po ée Mékrété mbing né nkouŋo njʉo Satan yôôn té kou’ou lé fʉté Ssé wô. (Jag 4:4) Ŋwa’né Ssé tong métchʉôôsé fʉté ntsém ngié «maamaa Mbabilonia.» Mbabilonia laa nzuiŋé tʉosong yié métchʉôôsé tépong la ziété wo fʉ’é Déluuge la tôg na tam Noa. Ngʉa mbʉa, Ssé gé pou piag métchʉôôsé mié é fʉté mbiŋé nuiè’è pʉa.—Toŋo Nguia jʉ’ 17:1, 2, 5, 16, 17; 18:8.
Tso ménkʉ mboŋo ta ngiôôn ying ngouo ssé. Jéova kaa légé pʉa pié é kouŋo no nénʉ po no mboŋo pié ée tsèe métchʉôôsé fʉté mié ée ngoung ntsém wô. A né ntémté pèe pʉa ntchʉaté na pa’ a né nzi’i wab no nénʉ.—Toŋo Miché 4:2, 5.
3. Pʉa pié é kouŋo no nénʉ gwiée lé gʉo kô?
Tchʉôôsé nénʉ né ntémté pʉa fʉ’ôôn
Jéova lié pʉa pié pô kouŋo no nénʉ po no mboŋo. A né ngôôn né pôb ngié po fo tsèe métchʉôôsé fʉté nkuiè. Pʉa pié pô koung Ssé gʉo ménkoubté, ndôg ngʉo létʉm sé kag.—Toŋo Nguia jʉ’ 18:4.
A laa na mvôg mvfo ngou’ nkʉo, fʉ’é pʉa pié é la kouŋo no nénʉ la jou’ nkʉ mboŋo ntchwo mégaŋa kwo Yéeso, pé zuing né lékag. Jéova la zi’i wôb nti lénéŋé wé suié yié é gwiée ntong, nnaa koua’ lékag mbing nkuiété wôb lé zui’té njʉo mboŋo yié é né ntoo. Pô ée ta’ maamaa fʉ’ mbwo pégé, nti noué po la zuiŋé no nénʉ mbing néŋé Jéova two mvfo tsèe wôb lénéŋé.—Toŋo 1 Tésalonika 1:8, 9; 2:13.
Jéova né nkuié tsèe tchou’té pagou’té yé pʉa pié po goua’ tchʉôôsé fʉté. O lôôn zuing invitasiôn Jéova, mba o gé wô chou wé, nkouou tsèe nouô pagou’té jéova pié pô gwiée nkouŋé tsétsèe pôb, ping la’ gwiée léwô témi.—Toŋo Malékousé 10:29, 30; 2 Korénto 6:17, 18.
4. Ssé gé néŋé lékag ndoumo ssé tsétsa’ ntsém lékô?
Atsô’té ntsang tchʉôôsé fʉté yié a né ntoo ée nkʉ mboŋo. A gé gʉo pʉa pié ée ndoumo ssé tsétsa’ néŋé tsèe lékag. Tchʉôôsé fʉté lé la’a lièe’ yiŋé fʉté pʉa mbing fégé wôb wô. Pʉa métsém gé gʉo témté gou’té nda’ Ssé wé nénʉ.—Toŋo Nguia jʉ’ 18:20, 21; 21:3, 4.
