Méliŋé lôg nzsoté
1. Maamaa tʉoosong Mbabilonia lôgô ndaʼté kô?
Nti kô ngouo mé gôôn ngié «maamaa tʉoosong Mbabilonia» lôgô ndaʼté métchʉoosé tépong ntsém mié ée tsèe njʉo? (Ngia jʉʼ 17:5). Pégé giè méchʉo ménta:
-
A gwiée pawa tsèe njʉo ntsém. Maamaa tʉoosong Mbabilonia néŋé na pʉa nti nti, ngouo «pʉa ménouô ménouô, méngoung méngoung». A saʼ «méfouô pié ée ndoumo ssé tsétsaʼ» (Ngia jʉʼ 17:15, 18).
-
A té ndôgô ngouoo pawa ngang politik mboo wé pataŋa métʉa wô. «Méfouô pié ée ndoumo ssé tsétsaʼ ntsém» laa «pataŋa métʉa» gé gʉo ying wo wo fʉʼé mé gé tchʉngté Maamaa Mbabilonia (Ngia jʉʼ 18:9, 15).
-
A lôg méngʉoo méno mé nnéng ntchʉo na Ssé. Biible toŋo yé lé ngang mpfôg manzuiée, nti noué paa méngoumnôôn waa kʉa lé lôg nkoubé two nkab paa tso choum (Ngia jʉʼ 17:1, 2). A fʉté pʉa mésong ntsém ndoum njʉo. A gʉo pʉa mémiléyông kwé (Ngia jʉʼ 18:23, 24).
2. Nzaʼ nkʉo lôôn gé gʉo to fʉʼʉ kô?
Biible la gôôn ngié nzaʼ nkʉo lôôn gé too na nzsoté méngaba laʼ 69 (toŋo Ndaniè 9:25).
-
Méngaba laʼ 69 la ping nzhié fʉʼʉ kô? A laa na 455 T.Z.Y, afʉʼ yié ngoumnôôn Néhémi la too Yérosalém lé ying «nkouaa tʉosong» (Ndaniè 9:25; Néhémi 2:1, 5-8).
-
Méngaba laʼ 69 la ping ntchʉa lékô?. Aa tsèe tso ménkaʼa ŋwaʼné Ssé, taʼ lièʼè laʼ lôgô ngouoo taʼ ngouʼ laʼ (Nômbre 14:34; Ézéchièl 4:6). Taʼ ngaba laʼ lôgô ngouo méngouʼ laʼ sôômbʉa, méngaba laʼ 69 la tsuié méngouʼ laʼ 483 ndôgô ngouo (69 x 7 ).
-
Méngaba laʼ 69 la ping mag fʉʼʉ kô? Mé lôôn foo na 455 T.Z.Y. nzaʼ méngouʼou laʼ 483, mba mé gé gwé na ngouʼ 29 T.M.Y. a Yèe lôgô ngouoo ngouʼ laʼ yié Yèeso la gʉo nouʼou ntsé ntchʉʼʉ Nzaʼ nkʉo! (Loukasé 3:1, 2, 21, 22).
3. Léyousée métsé na méchʉo lôg nzong pʉa
Tso na méchʉo lôg nzoŋo gning, aa léyousé métsé. Métso méchʉo ée moo mié taʼ Kréeté té gwiée lé zuing wô. Fʉʉʼ ngié, taʼ Kréeté té gwiée lé na métsé lé lôg nzoŋo gning wô, nké té zuing ngié mé kuilé métsé mé ndéʼé ndôg nzuiʼté fʉʼ yié mé gé gouaa gning wô (Détéronôm 15:23).
Tso méchʉo lôg yousé métsé ké ngouo wo mié ngouo Kréeté zuing. Paʼ lé kuilé métsé gning ntsaasé, lé lôgô machʉng sôg métsé, ngʉo hemodilution, mboo paʼ lé lôgô machʉng nkuilé métsé sélé nging nnéŋé na yétso jʉʼ tsèe mboum gning, ka nzuing ngié mé na létʉm ndièʼè ka poumon ndièʼè né gning wôô. Wôôwôô Kréeté wôô gwiée lé chan paʼ yié ngouo mé yousé métsé mé na mèe méchʉo fʉʼ yié mé né ngouôgô na yé, po fʉʼ yié mé né ntsaasé yé. Mélôgta ntsém té yousé méchʉo lôg nzoŋo gning taʼa mmo wô. Ndôgô ngôôn ngié taʼ Kréeté lôôn waa zuing ngié mé gouaa yé, ngié mé tsaasé yé, ka nzoŋo yé wôô, mba a gwiée lé tra lé vôg nzsé nti yié mé gé yousé métsé mé. Maawôôwôô gwiée lé pigé môôn méno:
-
Mé lôôn nkuilé tso na métsé môôn ta é té né ngiŋé tsaa nkang nnè wôôn môôn na tso pouô métam, mba ngouaalém yôôn gé tsoté wôôn lé zuing ngié é ké ngouo po métsé môôn ta ngouo mé lé «pfèté ssé» wô kéen? (Détéronôm 12:23, 24).
-
Ôôn ta mé lôôn nkuilé tso na métsé môôn sôg ta nging nnéŋé mboum méng la, mba ngouaalém yôôn yié Biible tségé gé ŋaga wôôn kée?
4. Léfagté ménnè
Biible té kuingté lé fagté lôôn nda wô. A chʉéchʉé ngôôn ngié pʉa pié po fagté mboum yôb té gwiée lé ying nzôʼô gning ndièʼè wô (1 Korénto 7:10, 11). Taʼ, tso méno waa ntsoté tso Mékréeté lé fag mboum yôb né gning wuié po la zôʼ.
-
Lékoung koung ndʉʼʉ lé lié tsiŋé nda: Mambaŋa wuié a lʉʼʉ lé lié tsiŋé nda yé ta po néŋé po té yiing ngwiée tso mmo yié ngouo po lôg nnéŋé (1 Timoté 5:8).
-
Lénéŋée ntchoua wétsoo gning tchouaa: Gning wuié mé tchoua yé né ngiè ngié léwô wé po nténtʉ yé né ngwiée ngégé (Galatia 5:19-21).
-
Léchʉéché ngʉo ngié ntémté yié taʼ Kréeté gwiée lé Jéova pʉè: Ngouo tsuié tsoo gning wuié o zôʼô yé pou ngʉo na nti yié o té ying ngouʼté Jéova wô (Mégang ntoum 5:29).
5. Ngouo o kuié tso méno mié é lié linôôn lékô?
Mékréeté té jʉo mélinôôn mié Jéova pʉa wô. Taʼ, a ping ntoo na tso méchʉo mié é lié linôôn, Kréeté wuié ngouaalém yé ée yé tségé lé méntʉôgô Biible zoo gwiée lé tsôʼ paʼ a gé gʉo. Pégé gia tso méfʉʼ:
-
Ngouo gning gôôn lé wou ngié mbong mbong linôôn. Ngouo o pʉlé gôôn ngié, «méng siée». Ngang lôôn né nkouŋo lé kuiʼi nzsé, mba ngouo o kiaʼté chouŋo yé mmo yié a gʉo ta o té jʉo yèe linôôn wô.
-
Gning wuié o zôʼô yé té Nkuié Ntang Jéova wô, ngouou wou ngié pi gʉa tso linôôn mpfèe mmo. Ngouaalém jou lôôn nzuing ngié o gʉa wo, mba ngouo o kiaʼté mbwo yé ngié mé lôôn ntoo linôôn, ngʉo tso choum sié é lôgô ntoonté ménkoutum paté zsée Ssé, mba o té gé kouou moo wô, mba o gé foo wo gʉa.
-
Gning wuié o wôgô faʼ mbwo yé naa wou taʼ prime afʉʼ yié pʉa jʉo linôôn nzsoté ngouʼ laʼ. Ngouo o lʉʼ kéen? Ndièʼ ôôn, ndièʼ ngaang. O lôôn nzuiŋé kado yié gning wuié o wôgô mbwo yé naa, mba a gé kouang ngié o jʉoo linôôn kée? Ka a naa yèe kado lé lôg ngniè ngié a gôʼté faʼ yié o wôgô?
-
Tsoo gning naa kado mbwo wou fʉʼ linôôn. Gning wuié a naa kado gôôn lé wou ngié: «Méng zsée ngié o té jʉo linôôn wô, taʼ méng né nkouŋo lé naa yôôn kado mbwo wou». Ngouo tso mba ngang né ntsôôn lé gniaa poŋo ntʉm yé mbwo wou. Ngouo kouaʼ wou kouang ngié ngouo tso a né ntsôôn lé kouaʼté wou ndôg ngiè ka o jʉo linôôn wôô? O lôôn nkouaŋa no na môôn ménzaté, kouaʼ wou tsôʼ paʼ o gé gʉo, ka o gé zuiŋé kado wôô, ka o gé lʉʼ wô wô. Pégé lôôn gé pi yèe ndécisiông wôô, pégé zsé ngié mmo yié aa tʉnzuing, aa lé gwiée ngouaaléem wuié a té ŋaga wégé wô, mbing nké nkouè nnè po na Jéova (Mégang ntoum 23:1).
6. Mégouô mié é foo na gning nkouou na wétso
Nkouŋo yié gning gwiée nti wétso tsoté Kréeté lé gʉo paʼ a lôôn ngwiée gouô yié a foo na gning nkouou na wétso, a pôôn na paʼ ngouo yèe gouô kouou na pétso pʉa. A gwiée lé gʉo pouʼou paʼ a lôôn ngwiée yèe gouô ka nkouang po ngié a gwiée yèe gouô wôô. A gʉo pouʼou ndôg ngiŋé na komandémang wuié a gôôn ngié: «Kouŋo fè wou gning mésong paʼ o kouŋo two mboum jou» (Roma 13:8-10).
Ayèe lôgô ngôôn ngié kô? Ngié gning wuié a gwiée gouô yié a foo na gning nkouou na wétso, té gwiée lé gʉo embrassé pétso pʉa wô, ka nnong ntchwo wôb wô, nké té gwiée lé yiaŋa long nti pétso pʉa wô, paʼ po lôôn ngôôn ngié ngouo po lé ying ntoŋo yé mbʉa pôb wô, lé lôg mbôôn pʉa tsiŋé nda yôb. Ngouo yié a gé gʉo nouʼou ntsé, a gôôn yèe no yié a gwiée mbwo Coordinateur mélhié. Ayèe gé gʉo mé tangté choum na nti yié mé gé waa nouʼ pétso pʉa ntsé, po lé kaa yôb yèe gouô wô. Gning lôôn ngouaa ngouaté gning paʼ a gé zôʼô yé, mba a ka zôôn ngwiée yèe nti gouô, mba a gwiée lé vôg nging ngʉa ntsaasé ndôg ngiè ka a yiing ngwiée wôô. A lôôn ngʉo pouʼou, mba a lôgô ngnia ngié a té né nkouaŋa po ndaʼ yé two wô, ngié a yiing né nkouaŋa yé pétso pʉa (Filipo 2:4).
7. Méno nkab po léŋag ntsang
Pégé gwiée lé ŋwéʼé kôôkôô yié a lié no nkab lé lôg nkʉo méntsang, mboo paʼ péga taʼ Kréeté zo lôôn ngwiée yèe no (Yérémi 32:9-12). Yôôn lôgô ngôôn ngié ngouo Kréeté gwiée tso pouô méngégé na no nkab mbaa na tso pouô méno. A gwiée lé kouʼou lé lôg mbʉlé ntangté mèe méno ta mé lé zsé.
Ano lôôn mbat paʼ léchouŋo tépong na lézing gning ka lé gʉaté gning wôô la? (toŋo Matio 18:15-17). Yéeso la gôôn choum séta sié mé gwiée lé gʉo:
-
Pi yé mépʉa tra lé tangté yèe no (lié nkang 15).
-
O lôôn té kouʼ, o toŋo taʼ ka Mékréeté mépʉa wôô pié po tchʉôgtée ngié pô tségé wou na létangtée yôôn no (lié nkang 16).
-
Pi lôôn ké té kouʼou lé tangté yôôn no wô, pi tong mélhié tsèe tchouʼté (lié nkang 17).
A gʉa na méno ta ngiôôn, mba pégé té gʉa mvfo kôt ndʉôʼô fa wégé wô, nti noué yèe néng ntchʉoo na lézing Jéova, mboo na tchouʼté yé (1 Korénto 6:18). A ping ntoo na tso méno paʼ: léfaga lôon nda, léliée pénkʉ, nkab lôg mpfè mmo, ammo yié mé la ŋwéʼé ta nnaa mbwo gning, taʼ faillite mboo taʼ testament la. Ée choum sié ngouo tso a zaté lé lôg ngʉa mvfo ndʉôgô. Kréeté lôôn ngʉa mvfo kôt nti méno paʼ môôn, mba a téen ndôgô ntʉʉ two na ntʉôgô wuié ée tsèe Biible wô.
Kréeté lôôn ndôgô gning wuié a gʉoo mmo yié a zaté ponésé ngʉa kôt, mba a kaa fʉa tso lépʉʉ Ŋwaʼné Ssé wô. Mé gôôn méno paʼ viol, lézuiée gning, léjʉ, agrésiông, abus sexuel, ka gning wuié a kagaa mouô na nti yié é paat tèʼ wôô.
a Mé foo na 455 T.Z.Y. nkouou na ngouʼ 1 T.M.Y. a gʉo méngouʼ 454. Léfoo na ngouʼ 1 T.Z.Y. nkouou ngouʼ 1 T.M.Y. wo taʼ ngouʼ (ngouʼ laʼ zero la té wo wo wô). Lé ping foo na ngouʼ 1 T.M.Y. nkouou 29 T.M.Y. wo méngouʼ 28. Ayèe pou nnaa wégé méngouʼ 483.
