HŪHŪ HE TAU FUATA
Puipui Fēfē e Au ke Nakai Mategūgū Lahi?
Kua eke kia a koe mo taha ne mategūgū lahi? Ka pihia, to lagomatai he vala tala nei a koe!
Ko e ha ne tupu ai
Mamafa Lahi e Tupetupe. Pehē e fifine fuata ko Julie, “He tau tuaga moui oti, kua talahau ke fakamalolō mo e holo ki mua, mo e taute e tau foliaga tokoluga ke loga e tau monuina ke moua. Mamafa lahi mo e uka e tau peehiaga nei!”
Tau Matini Hila. Ko e tau smartphones, tepelete mo e falu matini hila, ne fakaaoga tumau e tautolu he tau magaaho oti, ti fakatupetupe mo e mategūgū lahi a tautolu.
Nakai mohe mitaki. “He fano he aoga, gahua mo e fakafiafiaaga, tokologa e tau fuata ne aala tuai mo e momohe mule, kua putoia he puhala nei,” ne talahau he fifine fuata ko Miranda. Ko e puhala pihia ka lauia he mategūgū lahi.
Ko e ha kua lata
Fakamafana he Tohi Tapu ke gahua malolō. (Tau Fakatai 6:6-8; Roma 12:11) Ka e nakai kakano ke gahua lahi mo e matematekelea e moui—putoia e malolō tino haau.
“He taha magaaho, nimo ia au ke kai he aho katoa he loga e gahua ne taute. Fakaako e au ke ua mafiti mo e talia e tau gahua oti, neke lauia e malolō tino haaku.”—Ashley.
Kua fai kakano mitaki ne talahau he Tohi Tapu: “Mua he mitaki e kuli kua moui ke he leona ne mate.” (Fakamatalaaga 9:4) Ka gahua tumau a koe mo e manamanatu kua malolō a koe tuga e leona—to pihia he magaaho kū. Ka mategūgū lahi a koe, to fai mena kelea ka tupu ke he malolō tino haau.
Ko e heigoa haau ka taute
Fakaako ke pehē nakai. Pehē e Tohi Tapu: “Ha ha i ai e iloilo kia lautolu kua fakatokolalo.” (Tau Fakatai 11:2) Ko e tau tagata fakatokolalo ne nakai talia e tau gahua foki ne nakai fahia a lautolu ke taute.
“Ko e tagata ne nakai maeke ke pehē nakai, to mategūgū lahi he talia e tau gahua oti ne age ki a ia. Nakai ko e mahani fakatokolalo a ia. Mo e nakai leva ti hoko e mategūgū lahi.”—Jordan.
Moua e mohe mitaki. Talahau he Tohi Tapu: “Kua mua he mitaki taha e puke aloalolima mo e nofo fakatekiteki, ke he na puke aloalolima ua mo e mamahi he gahua, mo e kai e matagi.” (Fakamatalaaga 4:6) Ko e mohe ka fakaokioki e uhoniu, ka e tokologa e tau fuata mui ne nakai moua e valu ke he hogofulu e tulā ke momohe.
“He lavelave lahi e setulu haaku, ti uka ia au ke mohe. Ka e ka mohe mitaki au ti holo ki mua e gahua mo e fiafia he aho hake.”—Brooklyn.
Fakatokatoka mitaki. Pehē e Tohi Tapu: “Ko e tau manatu he tagata ne malolo ke gahua kua hiku ia ke he muhu mena.” (Tau Fakatai 21:5) Fakaako ke fakaaoga fakamitaki e magaaho mo e gahua ke lalago mitaki e moui haau.
“Fakaaoga e setulu ke nakai tupetupe a koe. Ka fakatoka e setulu ki mua haau, ti mukamuka ke kitia e tau hikihikiaga ke lagomatai a koe ke nakai mategūgū lahi.”—Vanessa.
