Tau Salamo 69:1-36
69 KO e Atua na e, kia fakamoui e koe au; ha ko au kua tomo tuai au ke he vai.
2 Kua tomo au ke he pelapela hokulo, nakai toka ai ha mena ke tu ai; kua hoko tuai au ke he mena hokulo he vai, kua tafia foki au he tau vai lele.
3 Kua nakai fahia au he haku a tauhea; kua pohi haku a leo; kua poko haku tau mata he tatali au ke he haku a Atua.
4 Kua gahoa haku tau fulu ulu, ka e tokologa a lautolu kua fakavihia teao mai kia au; kua malolo a lautolu kua fia kelipopo au, ko lautolu kua fai fi teao kia au; ko e tau mena kua nakai fofo e au kua liuaki atu ai e au.
5 Ko koe, ma Atua na e, kua fioia mai haku a goagoa; kua nakai galo foki ia koe haku a tau hala.
6 Ko e Iki na e, ko Iehova Sapaota, aua neke fakamā ha ko au a lautolu kua tatali kia koe; ko e Atua a Isaraela na e, aua neke fakamā ha ko au a lautolu kua kumi atu kia koe.
7 Ha kua ekefakakelea au ha ko koe ni; kua ufiufi haku mata he mā.
8 Kua eke au mo tagata paea ke he haku tau matakainaga; mo tagata kehe ke he fanau he haku a matua fifine.
9 Ha kua kai ni au he manako lahi ke he hāu a fale; kua hoko mai foki kia au e fakafiu ha lautolu ne fakafiu kia koe.
10 Ne tagi au mo e fakakanopogi; ti eke ia mo fakafiu mai kia au.
11 Ne tapulu au ke he ie talatala; ti eke ai au mo kupu fakatai ma lautolu.
12 Kua kupu kelea kia au a lautolu kua nonofo ke he puhala, kua eke foki au mo lologo ha lautolu kua inu kava.
13 Ka ko au, kua liogi au kia koe, Iehova na e, ke he vaha ke fakaalofa mai ai; ko e Atua na e, ko e lahi he hāu a fakaalofa kia fanogonogo mai ai a koe kia au ke he fakamoli he fakamouiaga mai ia koe.
14 Kia laveaki mai e koe au mai he pelapela, aua neke tomo ai au; kia laveaki au mai ia lautolu kua fakavihia au, katoa mo e vai hokulo.
15 Aua neke tafia au he vailele, aua foki neke folo hifo au he mena hokulo; aua neke kati e gutu luo ki luga ia au.
16 Iehova na e, kia fanogonogo mai a koe kia au, ha ko e mitaki he hāu a fakaalofa mai; kia hagao mai a koe kia au, ke lata mo e lahi he hāu a fakaalofa hofihofi noa.
17 Aua neke ufiufi hāu a fofoga ke he hāu a fekafekau; ha ko e mena matematekelea au; kia fakaave ke fanogonogo mai kia au.
18 Kia fakatata mai a koe ke he haku agaga ke fakamoui ai; kia laveaki e koe au ha ko lautolu kua fai fi kia au,
19 Ko koe ni, kua fioia e koe e ekefakakelea mai kia au, mo e fakamā kia au, mo e tukimakaefu kia au; ha i mua hāu a lautolu oti kua fai fi kia au.
20 Ko e ekefakakelea kua malipilipi ai hoku loto, kua mamahi ni au; ne tatali au po ke ne fakaalofa mai nakai taha, ka e nakai fakai, mo e falu ke fakamafana mai, ka e nakai moua ni e au.
21 Ne ta mai e lautolu e mena kona kou kai; ne fia inu au, ti ta mai ai e lautolu e vineta ke inu ai au.
22 Ko e ha lautolu a laulau ki mua ha lautolu, kia eke ia mo matahele; ko e ha lautolu a mafola foki kia eke mo hele.
23 Kia pouligia ha lautolu a tau mata, kia nakai kitia e lautolu; kia vivivivi mau ha lautolu a tau tokupu.
24 Kia liligi atu hāu a ita kia lautolu; kia hoko atu kia lautolu hāu a ita lahi ue atu.
25 Kia moumou ni e mena ne fa nonofo ai a lautolu; aua foki neke nofo taha ke he ha lautolu a tau fale ie.
26 Ha kua tutuli ni e lautolu a ia ne ta e koe ni; kua talahau atu e lautolu e mamahi he tau tagata kua keli e koe.
27 Kia lafi age e koe e hala ke he ha lautolu a hala; aua foki neke hohoko a lautolu ke he tututonu mai ia koe.
28 Kia holoholo ke he a lautolu mai he tohi he moui; aua foki neke tohi a lautolu fakalataha mo e tau tagata tututonu.
29 Ko au foki kua matematekelea au, mo e mamahi ni; ko e Atua na e, kia leveki au he fakamouiaga mai ia koe.
30 To fakaheke atu au ke he higoa he Atua ke he lologo; to nava atu foki au kia ia ke he fakaaue.
31 To mua e mitaki ia kia Iehova ke he povi, ko e povi kua fai hoe mo e tau mahina hui.
32 To kitia e lautolu kua matematekelea, ti fiafia ai a lautolu; ko mutolu kua kumi ke he Atua kia fiafia ho mulu tau loto.
33 Ha ko e mena fanogonogo a Iehova ke he tau tagata nonofogati, ti nakai vihia foki e ia hana tau tagata kua lili.
34 Kia fakaheke atu kia ia e lagi katoa mo e lalolagi; ko e tahi mo e tau mena oti kua totolo ai.
35 Ha ko e mena fakamoui he Atua a Siona, to fakatu foki e tau maga a Iuta; to nonofo ai a lautolu, to eke foki ma lautolu.
36 To eke foki ia mo fonua he fanau he hana tau fekafekau; ko lautolu kua fiafia ke he hana higoa to nonofo ai a lautolu.