Amosa 8:1-14
8 KUA pehe he fakakite mai kia au he Iki ko Iehova; kitiala, ko e kato fua akau kua momoho.
2 Ti pehe mai a ia, Amosa na e, ko e heigoa e mena kua kitia e koe? Ti pehe age au, Ko e kato fua akau kua momoho. Ti pehe mai ai a Iehova kia au, Kua hoko mai e fakahikuaga he haku a motu ko Isaraela, nakai fano leva foki au ia lautolu.
3 To eke mo tagi fekapai e tau lologo he fale iki ke he aho ia, kua pihia mai e Iki ko Iehova; to ha i ai ke he tau mena oti e tau tino loga he tau tagata mamate, kua liti ai e lautolu mo e nakai fevagahau aki.
4 Kia fanogonogo mai a mutolu ke he mena nai ko mutolu kua faguhē atu ke he tau tagata nonofogati, kia fakaoti ni e tau tagata nonofogati he motu,
5 Kua pehe mai, To mole atu a fe e mahina pula fou kia fakafua ai e tautolu e tau fua saito? to mole foki a fe e sapati kia vevete ai e tautolu e tau fale saito? kua fakatote foki e lautolu e efa, mo e fakalahi e lautolu e sikeli, kua fakakehe e lautolu e tau fua tautau ke fakavai aki;
6 Kia fakafua ai e tautolu e tau tagata nonofogati ke he tau ario, mo e tagata lolelole ke he na afialoalohui ua, kia fakafua atu foki e tautolu e tau fua saito kelea.
7 Kua omonuo a Iehova ke he lilifu a Iakopo, Nakai ni nimo ia au tukulagi ha lautolu a tau gahua oti.
8 Nakai kia luelue ai e lalolagi ha ko e tau mena na, mo e tagi ai a lautolu oti kua nonofo ai? kua hake taha ni a ia tuga ne vailele, kua loka ni, ti matukutuku hifo ni, tuga e vailele a Aikupito.
9 Kua pehe mai e Iki ko Iehova, Ko e aho ia to fakato ai e au e la ke he magaaho tupoula, to fakapouli ai foki e au e lalolagi ke he aho maama.
10 To liliu e au ha mutolu a tau galue ke he tagi, mo e tau lologo oti ha mutolu ke he tagi fekapai; to fakafelevehi foki e au e tau tokupu oti ke he ia talatala, to hifipuga ai foki e tau ulu oti; to eke e au e mena ia ke tuga e tagi aue ha ko e tama tane ko e tama fua taha, ko e hana fakahikuaga foki, ko e aho kelea ni haia.
11 Kua pehe mai e Iki ko Iehova, Kitiala, to hohoko mai e tau aho ke tuku atu ai e au e hoge ke he motu; nakai ko e hoge he tau mena kai, ti nakai ko e fia inu ke he magavai, ka ko e hoge ke he tau kupu a Iehova ke fanogonogo ki ai.
12 To o fano a lautolu ke kamata mai he taha tahi ke hoko atu ke he taha tahi, ke kamata mai he fahi tokelau ke hoko atu ke he fahi uta to tafepoi feliuaki a lautolu ke kumi ke he kupu a Iehova, ka e nakai moua ai e lautolu.
13 To lolelole he fia inu ke he aho ia e tau tamāfine tino mitaki katoa mo e tau fuata.
14 Ko lautolu kua omonuo ai ke he hala Samaria, mo e pehe age, Tano na e, kua moui e atua hāu; mo e pehe, Kua moui e mahani a Peresepa; to veveli ni a lautolu; ti nakai liliu tutu mai foki a lautolu.