ILOA nakai e koe ko hai e tama mukemuke nei? E, ko Iesu. Ko e fanau laia a ia, i loto he fale povi. Ko e fale povi ko e tokaaga he tau manu. Ko Maria hane fakatakoto a Iesu i loto he fale ne toka ai e tau kai he tau manu tuga e tau asini mo e falu manu foki. Ka ko e ha a Maria mo Iosefa ne haia hinei mo e tau manu? Nakai ko e mena anei ke fanau ai e tama mukemuke, mooli nakai?

Mooli. Ka ko e kakano haia ati ha ha ai a laua he mena nei: Ne taute he pule ha Roma ko Kaisara Aokuso e fakatufono kua lata ni e tau tagata oti ke liliu ke he tau maaga ne fanau ai a lautolu ke fakamau hifo e tau higoa he tohi. Ne fanau a Iosefa hinei i Petelehema. Ka ko e magaaho ne hohoko atu a ia mo Maria, kua nakai fai poko atā ma laua i ai. Ti o mai a laua ke he mena nei, mo e tau manu. Ti ko e aho nei ne fanau e Maria a Iesu! Ka e tuga he kitia e koe, kua malolō mitaki a ia.

Kitia nakai e koe e tau leveki mamoe ne o mai ke kitia a Iesu? Ha ha he fonua a lautolu he pō ke leveki e tau mamoe ha lautolu, ti kikila takai ia lautolu e maama lahi. Ko e agelu a ia! Ne matakutaku lahi e tau leveki mamoe. Ka kua pehē e agelu: ‘Ua matakutaku! Fai tala mitaki au ma mutolu. He aho nei, i Petelehema, kua fanau mai e Keriso ko e Iki. To fakahao e ia e tau tagata! To moua e mutolu a ia kua kaputi he tau ie mo e takoto he fale ne toka e tau kai manu.’ Ne amanaki ni ti tokologa e tau agelu ne o mai mo e kamata ke fakaheke ke he Atua. He mogoia ni ne ō fakamafiti e tau leveki mamoe nei ke kumi a Iesu, ti kua moua e lautolu a ia mogonei.

Iloa nakai e koe e kakano ne uho pauaki a Iesu? Iloa nakai e koe ko hai mooli a ia? Manatu, he tala fakamua i loto he tohi nei ne tala atu e mautolu hagaao ke he Tama uluaki he Atua. Ne gahua e Tama nei mo Iehova ke tufuga e lagi mo e lalolagi mo e tau mena oti kana. Haia, ko Iesu mooli anei!

E, ne tamai e Iehova e moui he Tama haana he lagi ti tuku ai i loto ia Maria. Ne kamata agataha e tama mukemuke ke tupu i loto ia ia tuga ni e tau tama mukemuke ne tupu i loto he tau matua fifine ha lautolu. Ka ko e tama mukemuke nei ko e Tama he Atua. Fakahiku ai ne fanau a Iesu hinei, he fale povi i Petelehema. Kitia nakai e koe mogonei e kakano kua fiafia lahi e tau agelu he maeke ke tala age ke he tau tagata kua fanau mai a Iesu?