I FAFO he vaka, ne nonofo agaia e tau tagata ke he tau puhala momoui ha lautolu tuga fakamua. Nakaila talitonu a lautolu to hoko mai e Fakapuke. Kua mua atu ne fekī ha lautolu. Ka e nakai leva ti oti ni e fekī ha lautolu.

Amanaki ni ti kamata e uha ke to. Ne to mai he lagi tuga ni e vai ka liligi e koe mai he pakete. Kua hako ni a Noa! Ka kua tomui lahi tuai he magaaho nei ke he ha tagata ke hu atu ki loto he vaka. Kua mau nivaniva e gutuhala he pa e Iehova.

Nakai leva ti ufia e kelekele tokolalo. Ko e vai kua tuga e vailele lahi. Ne veveli e tau akau, taveli e tau patuō lalahi, ti lahi e gō. Kua matakutaku e tau tagata. Ne toli hake a lautolu ke he kelekele tokoluga. Oi, ko e manako ha ia ha lautolu ke omaoma ki a Noa mo e o atu ki loto he vaka he magaaho ne hafagi agaia e gutuhala ki a lautolu! Ka ko e magaaho nei kua tomui lahi.

Ne hake fakahaga e tokoluga he vai. Ke he 40 e aho mo e 40 e pō ne tafe hifo e vai mai he lagi. Kua puke hake e tau kaukau mouga mo e nakai leva ti lofia ai foki e tau mouga tokoluga. Tuga ni ne talahau he Atua, ko e tau tagata mo e tau manu oti i fafo he vaka kua mamate. Ka e hao a lautolu oti i loto he vaka.

Ko e mitaki ha ia he puhala ne talaga aki e Noa mo e tau tama taane haana e vaka. Kua lagaki hake ai he vai, ti hili ni i luga he fuga vai. Ti taha aho, ne mao e uha, ti kamata e laā ke kikila. Ko e fakatino fulufuluola ha ia! Ko e moana lahi ni e tau mena oti. Ti ko e mena hokoia ni ne kitia ko e vaka kua hili i luga.

Kua galo tuai e tau tupua mogonei. Kua nakai ha ha i ai a lautolu ke fakamamahi e tau tagata. Kua mamate oti a lautolu, fakalataha mo e tau mamatua fifine mo e tau tagata kelea oti. Ka ko e heigoa ne tupu ke he tau mamatua taane ha lautolu?

Nakai ko e tau tagata mooli tuga a tautolu e tau mamatua taane he tau tupua. Ko e tau agelu a lautolu ne o hifo mai ke nonofo tuga e tau tagata taane he lalolagi. Ti ko e magaaho ne hoko mai ai e Fakapuke, ne nakai mamate a lautolu fakalataha mo e tau tagata. Kua tiaki e lautolu e tau tino tagata ha lautolu, ti liliu atu ke he lagi tuga e tau agelu. Ka kua nakai liu fakaatā a lautolu ke fai vala ke he magafaoa he tau agelu he Atua. Ti eke ai a lautolu mo tau agelu ha Satani. I loto he Tohi Tapu kua fakahigoa a lautolu ko e tau temoni.

Kua fakaagi ai he Atua e matagi, ti kamata e vai he fakapuke ke matuku hifo. Lima e mahina he mole ne tū ai e vaka i luga he mouga. Loga e tau aho he mole, ti maeke a lautolu i loto he vaka ke onoono atu ki fafo mo e kitia e tau tapunu mouga. Ne matukutuku hifo ni fakahaga e vai.

Ti fakafano atu ai e Noa ki fafo he vaka e manu lele uli ne higoa ko e oreva. Ne fai magaaho he lele fano ai ti liu mai, ha kua nakai fai mena mitaki ke tu ai. Ne taute tumau e mena ia ti ko e tau magaaho oti ka liu mai ne tu ni he vaka.

Ne manako a Noa ke kitia kua teitei pakupaku nakai e vai he fuga kelekele, ti fakafano atu e ia e lupe mai he vaka. Ka kua liu mai foki e lupe ha kua nakai moua ha mena ke tu ai. Ne liu a Noa fakafano atu ke lagauaaki, ti liuaki mai e ia e lau olive he gutu haana. Ti iloa agataha e Noa kua mamiti hifo e vai. Ne fakafano atu e ia e lupe ke lagatolu aki, fakahiku kua moua e ia e kelekele mōmō ke tu ai.

Ne vagahau e Atua ki a Noa mogonei. Pehē a ia: ‘Kia huhū atu a ki fafo he vaka. Uta e magafaoa katoa mo e tau manu fakalataha mo koe.’ Kua molea e tau katoa he nonofo a lautolu i loto he vaka. Liga manamanatu noa ni a tautolu ke he fiafia ha lautolu oti ha kua liliu ki fafo mo e kua momoui!