Nakai fakauaua ai, ko e fakamaamaaga nei ke he tau fakaakoaga aoga he Tohi Tapu kua fakamalolō e fakaalofa haau ma Iehova. Kua lata e fakaalofa nei ke feaki tumau. (1 Peteru 2:2) Ko e amaamanakiaga haau ke he moui tukulagi kua fakavē ke he fakatumau haau ke fakatata ke he Atua he fakaako e Kupu haana.​—Totou Ioane 17:3; Iuta 21.

 He tupu haau a iloilo ke he Atua, to malolō lahi foki e tua haau. To lagomatai he tua a koe ke fakafiafia e Atua. (Heperu 11:1, 6) To fakaohooho a koe ke fakatokihala mo e ke taute e tau hikiaga aoga lahi he puhala moui haau.​—Totou Gahua 3:19.

 To manako pauaki a koe ke tala age ke he falu e mena ne fakaako e koe​—ha kua fiafia a tautolu oti ke tala age e tala mitaki. He matutaki a koe ke fakaako e Tohi Tapu, to iloa e koe e puhala ke fakaaoga e Tohi Tapu ke fakamaama e tua haau ki a Iehova mo e tala mitaki.​—Totou Roma 10:13-15.

 Laulahi he tau tagata kua kamata ke tala age e tala mitaki ke he tau kapitiga po ke tau magafaoa. Kia fakailoilo. He nakai tala age kua hepe e lotu ha lautolu, tala age ki a lautolu hagaao ke he tau maveheaga he Atua. Pihia foki, manatu ko e tau tagata kua fa nava lahi ke he tau mahani totonu haau mai he mena ne talahau e koe.​—Totou 2 Timoteo 2:24, 25.

 Ko e fakaako e Kupu he Atua to lagomatai a koe ke tupu fakaagaaga. Fakahiku ai, to fakalataha a koe ke he fakafetuiaga  pauaki mo Iehova. Maeke ia koe ke ha ha he faahi mo ia ko e tagata he magafaoa haana.​—Totou 2 Korinito 6:18.

 Maeke a koe ke tupu ki mua fakaagaaga he fakatumau ke fakaako e Kupu he Atua. (Heperu 5:13, 14) Ole ke he taha he Tau Fakamoli a Iehova ke fakaako e Tohi Tapu mo koe he fakaaoga e tohi Ko e Heigoa ne Fakaako Mooli he Tohi Tapu? Ko e fakaako fakalahi haau ke he Kupu he Atua, to kautū ai e moui haau.​—Totou Salamo 1:1-3; 73:27, 28.

 Ko e tala mitaki kua hau ia Iehova, ko e Atua fiafia. Maeke a koe ke fakatata fakalahi ki a ia he fakatata fakalahi ke he tau tagata haana. (Heperu 10:24, 25) He fakatumau ke he tau laliaga haau ke fakafiafia a Iehova, kua hokotia a koe ke he moui mooli​—ko e moui tukulagi. Ko e fakatata ke he Atua kua mooli ko e mena mitaki lahi mahaki kua maeke a koe ke taute.​—Totou 1 Timoteo 1:11; 6:19.