FAKAAKOAGA 12
Ko e Heigoa ka Lagomatai a Koe ke Tumau e Fakaako he Tohi Tapu?
Kua aoga lahi ke fakaako e Tohi Tapu ka e nakai mukamuka tumau ai. Falu magaaho to manamanatu a koe ka maeke a koe ke tumau e fakaako he Tohi Tapu. Ko e ha kua uho lahi ke lali ke matutaki ai? Ko e heigoa ka lagomatai a koe ke fakatumau ki ai pete e tau tuaga uka?
1. Ko e ha kua uho lahi e fakaako Tohi Tapu?
“Ko e kupu he Atua kua moui ia, mo e gahua malolo.” (Heperu 4:12) Uho lahi e Tohi Tapu ha kua fakakite e tau manatu mo e tau logonaaga he Atua hagaao ki a koe. Lagomatai ai ki a koe ke moua e iloilo mo e pulotu mooli mo e amaamanakiaga foki. Mua atu e aoga, lagomatai he Tohi Tapu a koe ke eke mo kapitiga ha Iehova. Ka fakaako e koe e Tohi Tapu, kua fakaatā e koe e malolō i ai ke fakaholo ki mua e moui haau.
2. Ko e ha kua aoga ke mailoga e uho lahi he kupu mooli he Tohi Tapu?
Ko e kupu mooli he Tohi Tapu kua tuga e tau koloa uho. Kakano haia kua fakamalolō he Tohi Tapu a tautolu ke “fakafua mai . . . e mena moli, aua neke fakafua atu.” (Tau Fakatai 23:23) Ka tokaloto e tautolu e uho lahi he kupu mooli he Tohi Tapu, to eketaha a tautolu ke tumau e fakaako pete he fehagai mo e tau tuaga uka.—Totou Tau Fakatai 2:4, 5.
3. Lagomatai fēfē e Iehova a koe ke tumau e fakaako?
Ha ko Iehova ko e haau a Tufuga malolō ue atu mo e Kapitiga, manako a ia ke lagomatai a koe ke fakaako hagaao ki a ia. To foaki atu e ia ki a koe e “loto . . . kia gahua foki.” (Totou Filipi 2:13.) Ti kaeke kua lata a koe ke omoomoi ke fakaako po ke fakagahua e mena ne iloa e koe, to lagomatai e ia. Kaeke kua lata a koe ke moua e malolō ke kautū ke he tau tuaga vihi po ke totokoaga, to maeke a ia ke foaki ai. Ole tumau ki a Iehova he liogi ke lagomatai a koe ke matutaki e fakaako he Tohi Tapu.—1 Tesalonia 5:17.
KUMIKUMI FAKAHOKULO
Fakaako e puhala ka tumau e fakaako e koe e Tohi Tapu pete he lavelave po ke totoko mai e falu. Ti manamanatu ke he puhala ka lagomatai e Iehova a koe ke fakatumau ki ai.
4. Tuku fakamua e fakaako Tohi Tapu he moui haau
Falu mogo kua lavelave lahi e moui ti tuga kua nakai lahi e magaaho ha tautolu ke fakaako e Tohi Tapu. Ko e heigoa ka lagomatai? Totou Filipi 1:10, ti tutala ke he tau hūhū nei:
-
Fēfē e logonaaga haau ke he falu he “tau mena kehekehe” po ke, aoga lahi he moui?
-
Tuku fakamua fēfē e koe e fakaako Tohi Tapu he moui haau?
-
A. Ka fakapuke e koe e pakete aki e oneone ti lali ke fafao e tau maka, to nakai hao e tau maka
-
E. Ka fafao fakamua e koe e tau maka, to lahi e oneone ka hao ai. Pihia foki, ka tuku fakamua e koe e tau mena ne mua e aoga he moui haau, to maeke a koe ke taute ai mo e fai magaaho agaia ma e falu mena
Ko e fakaako he Tohi Tapu kua fakamakona e tau manako fakaagaaga ha tautolu—ko e manako ha tautolu ke iloa mo e tapuaki e Atua. Totou Mataio 5:6, ti tutala ke he hūhū nei:
-
Aoga lahi fēfē ki a tautolu ka tuku fakamua e fakaako he Tohi Tapu?
5. Fakauka ke he tuaga favale
Falu mogo, liga lali e falu ke fakalolelole a koe he fakaako e Tohi Tapu. Mailoga e tala ki a Francesco. Tā e VITIŌ, ti tutala ke he tau hūhū nā.
-
He vitiō, tali atu fēfē e tau kapitiga mo e magafaoa ha Francesco he tala age e ia ki a lautolu e tau mena ne fakaako e ia?
-
Ko e heigoa e palepale haana he fakauka?
Totou 2 Timoteo 2:24, 25, ti tutala ke he tau hūhū nei:
-
Fēfē e logonaaga he magafaoa mo e tau kapitiga haau ke he tau mena kua fakaako e koe?
-
Hagaao ke he tau kupu tohi nei, lata ke tali atu fēfē a koe ka nakai fiafia e taha tagata he fakaako e koe e Tohi Tapu? Ko e ha?
6. Falanaki ki a Iehova ke lagomatai a koe
He fakatata atu a tautolu ki a Iehova, to tupu ki mua e manako ha tautolu ke fakafiafia a ia. Maeke agaia a tautolu ke uka ke taute e tau hikiaga he tau momoui ke lagotatai mo e tau tuaga Haana. Ka pihia e logonaaga haau, ua fakalolelole. To lagomatai e Iehova a koe. Tā e VITIŌ, ti tutala ke he tau hūhū nā.
-
He vitiō, ko e heigoa e tau hikiaga ne taute e Jim ke fakafiafia a Iehova?
-
Ko e heigoa ne nava a koe ke he fakafifitakiaga haana?
Totou Heperu 11:6, ti tutala ke he tau hūhū nei:
-
Ko e heigoa ka taute e Iehova ma lautolu “kua kumi fakamakutu kia ia,” ko lautolu haia kua eketaha ke iloa mo e fakafiafia a Ia?
-
Ko e heigoa kua talahau he mena nei ki a koe hagaao ke he logonaaga ha Iehova ka kitia e ia e tau laliaga haau ke fakaako e Tohi Tapu?
KA HŪHŪ TAHA TAGATA: “Ko e ha kua fakaako e koe e Tohi Tapu?”
-
To fēfē e tali haau?
MANATU KATOA
Pete kua nakai mukamuka tumau, ko e fakaako e Tohi Tapu ka lagomatai a koe ke moua e moui tukulagi. Matutaki ke falanaki ki a Iehova mo e to palepale e ia a koe.
Liu Fakamanatu
-
Ko e ha kua uho lahi e tau kupu mooli he Tohi Tapu ki a koe?
-
Maeke fēfē a koe ke mailoga e tau mena kua mua e aoga?
-
Ko e ha kua lata a koe ke ole ki a Iehova ke lagomatai a koe ke tumau e fakaako he Tohi Tapu?
KUMI FOKI
Manamanatu ke he fā e puhala kua lagomatai e tokologa ke fakaaoga fakamitaki e magaaho.
“Puhala ke Fakaaoga Fakamitaki e Magaaho Haau” (Ala!, Fepuari 2014)
Mailoga e puhala ne lagomatai e Iehova e taha fifine ne nakai maama he taane e tau laliaga haana ke fakafiafia e Atua.
Fakamalolō e Iehova a Tautolu ke Hahamo e Kavega ha Tautolu (5:05)
Kitia e puhala ne aoga lahi e taha tagata mai he fakauka he hoana haana.
Tukupau e Tau Fakamoli a Iehova falu mogo he moumou e tau magafaoa. Ka e mooli nakai e mena ia?
Liga Manako Foki a Koe
TAU HŪHŪ MAHANI MAU
Ko e Heigoa e Fakaakoaga Tohi Tapu ne Foaki he Tau Fakamoli a Iehova?
He fakaholoaga fetutalaaki ne foaki he Tau Fakamoli a Iehova kua nakai totogi, maeke a koe ke fakaaoga ha Tohi Tapu. Atāina ke uiina e magafaoa katoa po ke tau kapitiga ke fakalataha mo koe.
