1, 2. Ko e heigoa e finagalo ha Iehova ma e aho ke fitu aki, mo e kamatamata fefe e pulotu faka-Atua he kamataaga he aho nei?

KELEA ha ia! Ko e tagata, ko e foufou lilifu tokoluga ue atu he aho tufuga ke ono aki, kua amanaki ti to hifo he tapunu ki lalo muatua. Ne fakapuloa e Iehova e “tau mena oti ne eke e ia,” fakalataha mo e tau tagata, “kua mitaki lahi ni.” (Kenese 1:31) Ka e kamata he aho ke fitu aki, ne fifili a Atamu mo Eva ke mumui ke he fakafualoto ha Satani. Ne mokulu a laua ke he hala, nakai mitaki katoatoa, mo e mate.

² Ti tuga, ko e finagalo ha Iehova ma e aho ke fitu aki kua hiki kehe tuai. Ko e aho ia, tuga e aho ono fakamua, kua lata ke taha e afetau he loa. Ne fakapuloa ai e Iehova ke tapu, mo e to fakahiku ke eke e lalolagi katoa ke taute mo parataiso ne puke he magafaoa mitaki katoatoa he tagata. (Kenese 1:28; 2:3) Ka e he mole e fakafualoto kelea muikau, to maeke fefe e mena pihia ke fakamoli? Ko e heigoa la he Atua ka taute? Hanei e kamatamata mafiti lahi he pulotu ha Iehova​—liga ko e kamatamata ne mua ue atu.

3, 4. (a) Ko e ha ne eke e tali ha Iehova ke he fakafualoto i Etena mo fakafifitakiaga ofoofogia lahi he hana pulotu? (e) Ko e heigoa e kupu moli ne kua lata he loto fakatokolalo ke omoi a tautolu ke tokaloto he kumikumi e tautolu e pulotu ha Iehova?

³ Ne tali mafiti e Iehova. Ne fakapuloa e ia e fakahala ke he tau tagata totoko i Etena, mo e he magaaho taha ia ni, ne foaki e ia e fakatino he taha mena mitaki lahi: ko e finagalo hana ke fakamaulu aki e tau kafo ne kamata laia e laua. (Kenese 3:15) Ko e finagalo kitia mamao ha Iehova kua fakalaulahi mai i Etena ke he tau afetau oti he fakamauaga tuai he tagata ke hokotia atu ke he vaha anoiha. Kua mukamuka lahi ka kua lahi e hokulo, ti kua fakaaoga he tagata totou Tohi Tapu e moui katoa mitaki ke kumikumi mo e manamanatu ki ai. Mua atu,  ko e finagalo ha Iehova to moli ni ke kautu. To tamai e fakaotiaga ke he tau mahani kelea oti, hala, mo e mate. To tamai e tagata tua fakamoli ke he mitaki katoatoa. Ko e tau mena nei to mailoga ato fakaoti e aho ke fitu aki, ti ko e mena ia, pete ko e tau mena oti ne tutupu, to fakamoli e Iehova e finagalo hana ma e lalolagi mo e tau tagata he magaaho tonu ne kotofa!

⁴ Nakai kia ofoofogia lahi e pulotu pihia? Nukua omoi e aposetolo ko Paulo ke tohia: ‘Oi, oi! ko e hokulo he pulotu he Atua!’ (Roma 11:33) He kumikumi e tautolu e tau puhala kehekehe he mahani faka-Atua nei, kua lata he mahani fakatokolalo ke omoi a tautolu ke tokaloto tumau e aoga he kupu moli​—ke he mena kua fahia ia tautolu, ha kua maeke ni ia tautolu ke hahaku e fugaluga he pulotu mahaki ha Iehova. (Iopu 26:14) Fakamua, kia fakamaama e tautolu e mahani ofoofogia nei.

5, 6. Ko e heigoa e fakafetuiaga he vahaloto he iloilo mo e pulotu, mo e laulahi fefe e iloilo ha Iehova?

⁵ Ko e pulotu kua nakai tatai mo e iloilo. Kua maeke he tau komopiuta ke tatanaki e tau iloilo loga, ka kua uka ke kitia ha tagata ne talahau kua pulotu e tau matini pihia. Pete he pihia, kua fakafetui e iloilo mo e pulotu. (Tau Fakatai 10:14) Ke tuga anei, kaeke manako a koe ke moua e fakatonuaga pulotu ke tului aki e malolo tino hagahaga kelea lahi, to finatu nakai a koe ke he taha tagata ne tote po ke nakai iloilo ke he tau vai lakau? Nakai! Ti ko e iloilo tonu kua aoga lahi ke he pulotu moli.

⁶ Kua ha ha ia Iehova e tanakiaga iloilo. Ko e “Patuiki tukulagi,” ko ia hokoia nukua moui tukulagi. (1 Timoteo 1:17) Mo e he magahala he tau vaha loga oti ia, nukua mataala a ia ke he tau mena oti. Ne talahau he Tohi Tapu: “Nakai fakai foki ha mena taha kua galo ki mua hana, ka kua toka noa mo e maliali e tau mena oti kana ke he na fofoga hana ke talahau ki ai e tautolu e tau mahani ha tautolu.” (Heperu 4:13; Tau Fakatai 15:3) Ko e Tufuga, nukua maama katoatoa e Iehova e tau mena ne taute e ia, ti kua mailoga oti e ia e tau gahua he tagata mai he kamataaga. Ne tivi e ia e tau loto takitaha he tau tagata, ti nakai toe  ha mena. (1 Nofoaga he Tau Patuiki 28:9) He tufuga a tautolu ko e tau tagata ataina ke fifili, nukua fiafia a ia ke kitia hane taute e tautolu e tau fifiliaga pulotu he moui. Ko e ‘Fanogonogo liogi,’ ne fanogonogo a ia ke he tau talahauaga loga ke he ha magaaho ni! (Salamo 65:2) Mo e ke talahau foki, nukua ha ia Iehova e manamanatuaga mitaki katoatoa.

7, 8. Fakakite fefe e Iehova e maamaaga, manamanatuaga, mo e pulotu?

⁷ Kua mua atu e mena ne ha ha ia Iehova ke he iloilo. Ne kitia foki e ia e puhala ne fematutakiaki e tau mena moli mo e mailoga e fakatino katoa ne eke he tau fakamatafeiga loga. Ne fuafua mo e fakafili e ia, mo e kitia e vahaloto he mitaki mo e kelea, aoga mo e nakai. Mua atu, ne ono muatua atu a ia ke he fugaluga mo e fakakia tonu atu ke he loto. (1 Samuela 16:7) Ti kua ha ha ia Iehova e maamaaga mo e manamanatuaga, ko e tau mahani ne mua atu ke he iloilo. Ka ko e pulotu kua mua ue atu agaia e mitaki lahi.

⁸ Ne fakalataha he pulotu e iloilo, manamanatuaga, mo e maamaaga mo e fakagahuahua a lautolu. Ko e moli, ko e falu kupu Tohi Tapu fakamua ne liliu “pulotu” kua kakano moli ko e “gahua lauia mitaki” po ke “pulotu gahuahua mitaki.” Ti ko e pulotu ha Iehova kua nakai ni ko e manatu noa. Nukua gahuahua mitaki, mo e aoga lahi. He futia mai e laulahi he iloilo hana mo e he hokulo he maamaaga hana, ne taute tumau e Iehova e tau fifiliaga mitaki lahi, he taute ai he kakano he puhala gahua mitaki lahi ne manatu ki ai. Ko e pulotu moli a ia! Ne fakatata e Iehova e kupu moli he talahauaga ha Iesu: “Ti talahaua tututonu e pulotu he tau fanau hana.” (Mataio 11:19) Ko e gahua ha Iehova ke he lalolagi mo e lagi katoatoa kua foaki mai e fakamoli malolo lahi ke he pulotu hana.

9, 10. (a) Ko e heigoa e faga pulotu ne fakatata e Iehova, mo e fakakite fefe e ia? (e) Foaki fefe he tega moui e fakamoliaga ke he pulotu ha Iehova?

⁹ Kua nava nakai a koe ke he makutu he tagata tufuga ne taute e tau mena fulufuluola ne gahuahua mitaki? Ko e faga pulotu loto omoomoi lahi a ia. (Esoto 31:​1-3) Ko Iehova ko e punaaga  he pulotu mo e ko e pule ne mua he pulotu pihia. Ne talahau he Patuiki ko Tavita hagaao ki a Iehova: “Kua fakaaue atu au kia koe, ha ko e mena eke au kia matakutakuina mo e ofo ki ai; ko e tau mena ne eke e koe ko e tau mena ke ofomate ki ai haia; kua iloa tonuhia e au e tau mena ia.” (Salamo 139:14) Moli, ka lahi e ako ha tautolu ke he tino tagata, to lahi foki e ofoofogia ha tautolu ke he pulotu ha Iehova.

¹⁰ Ke fakataitai: Ne kamata mai a koe he tega moui taha​—ko e fufua mai he matua fifine hau, ne fakafua he malie mai he matua tane hau. Nakai leva, ne kamata e tega moui ia ke mavehevehe. Ko koe, ko e tagata he mogonei, kua taute mai he kavi ke 100 e tau tuliona he tau tegatega moui. Na ikiiki lalahi a lautolu. Ko e kavi ke 10,000 e tau tegatega ia ka hao he mataulu nilapolo. Pete ia, ko e tau tufugatiaaga uka lahi a lautolu takitaha ke maama. Ko e tega moui kua mua atu e uka ke he ha matini taute he tagata po ke he fale gahua. Ne talahau he tau saienetisi ko e tega moui kua tuga e maga lahi ne pa katoa​—taha ne kua tautaofi e tau hala o ki loto mo e tau hala o ki fafo, mo e fakatokaaga uta fekau, mo e fakatokaaga matutakiaga, fale tanaki hila, tau fale gahua, tau mena uta otaota ti liu tavili, tau kanavaakau puipui, mo e taha faga fakatufono lahi foki he lotouho i ai. Mua atu, maeke he tega moui ke taute e lagakiaga tonu ki a ia ni he tau matahola gahoa!

11, 12. (a) Ko e heigoa ne taute e tau tegatega moui i loto he tama nakai la mau ke kehekehe e tau gahua, mo e fakatatau atu fefe e mena nei ke he Salamo 139:16? (e) Ko e tau puhala fe kua fakakite ko e uhoniu he tagata na “eke . . . kia matakutakuina mo e ofo ki ai” a tautolu?

¹¹ Moli, kua nakai tatai oti e tau tegatega moui. He tumau ke vehevehe fano e tau tegatega moui he tama nakai la mau, ne ha ha ia lautolu e tau gahua kehekehe. To eke falu mo tau hokohoko; falu ma e tau huimotua, tau alaga, toto, po ke tau tegatega moui ma e tau pumata. Ko e tau mena kehekehe ia kua tuku i loto he “poko tanakiaga” he tega moui he tau talagaaga tagata, ko e DNA. Fuluola, ne omoi he agaga a Tavita ke talahau ki a Iehova: “Ne fioia he ha fofoga hāu haku a tino oti ka e nakai la mau; kua tohi oti foki ke he hāu a tohi.”​—Salamo 139:16.

 ¹² Falu vala he tino kua halavihu lahi. Manamanatu, ke fakatai ki ai, e uhoniu he tagata. Ne ui he falu ko e mena halavihu lahi nukua kitia he lalolagi mo e lagi katoatoa. Kua tokai ke kavi 100 e piliona he tau tegatega moui ma e tau hokohoko​—liga loga ke tuga e tau numera he tau fetu he matakau fetu ha tautolu. Igatia e tau tegatega moui ia he afeafe fano ke he afe he tau matutakiaga mo e falu tegatega foki. Ne talahau he tau saienetisi ko e uhoniu he tagata kua tokai e tau talahauaga oti he tau fale tanaki tohi oti he lalolagi ti ko e poko tanaki hana kua ofoofogia lahi. Pete ni he totou hogofulu tau ne kumikumi ke he alaga nei ne “eke . . . kia matakutakuina mo e ofo ki ai,” ne talahau he tau saienetisi to nakai fakai a lautolu ke maama katoatoa e puhala ne gahuahua ai.

13, 14. (a) Fakakite fefe he tau lo mo e falu mena momoui na “mua ue atu ni ha lautolu a pulotu,” mo e heigoa ne fakaako mai he mena ia ki a tautolu ke he ha lalu a Tufuga? (e) Ko e ha kua liga talahau e tautolu ko e tau tufugatiaaga pihia tuga e fata kufani kua taute “mo e pulotu”?

¹³ Ko e tau tagata foki taha fakafifitakiaga he tufuga pulotu ha Iehova. Ne talahau ia Salamo 104:24: “Iehova na e, kua loga ue atu hāu a tau gahua! Ne eke e koe e tau mena oti ia mo e [“pulotu,” NW], kua puke e lalolagi ke he hāu a tau mena.” Nukua kitia maali e pulotu ha Iehova ke he tau tufugatia oti ne takai ia tautolu. Ko e tau lo, ke fakatai ki ai, kua “mua ue atu ni ha lautolu a [“pulotu,” NW].” (Tau Fakatai 30:24) Moli, ko e tau kautau lo kua maopoopo mitaki. Ko e falu kautau lo kua leveki, fakamalu, mo e moua e tau huhua mitaki mai he tau moko ne ui ko e tau aphid ke tuga ko e tau fuifui manu a lautolu. Ko e falu lo ne eke ke tuga e tau tagata faama, he feaki mo e leveki e “tau akau” tuga e tau pakapaka. Kua loga foki falu he tau mena momoui nukua polokalama ke gahuahua pauaki. Ko e tama lago kua lele fakapaagiagi ti nakai fakai e vakalele mitaki lahi he tagata ke fifitaki ki ai. Ko e tau manu lele ne felele matakavi kua o fakatatau ke he tau fetu, he fakaholoaga he tau puhala makeneta he lalolagi, po ke he taha faga mepe halaloto. Kua fakamole he tau saienetisi e tau tau loga ke kumikumi ke he tau mahani fulufuluola ne kua polokalama aki e tau mena momoui nei. Ko e pulotu ha ia he Polokalama faka-Atua!

 ¹⁴ Kua lahi e mena ne iloa he tau saienetisi mai he pulotu tufugatia ha Iehova. Ha ha ai foki e fahi enesinia, ne ui ko e tau biomimetic, ne lali ke fifitaki e tau talagaaga pauaki. Ke tuga anei, liga kua fita he onoono a koe mo e ofogia ke he fulufuluola he fata kufani. Ka kua kitia he tagata enesinia ke eke mo mena homo ue atu he talagaaga. Ko e falu kave ne tuga e molulu kua mua atu e malolo ke he lapatoa, mao atu he tau filo he tapulu puipui matapulu. Ka e malolo fefe? Manatu la ke he fata kufani ne tia ato hoko e lahi ke tuga e kupega ne fakaaoga he poti hi ika. Kua maeke he fata kufani pihia ke kototia e vakalele heke tagata i luga he pulagi! E, kua taute e Iehova e tau mena oti pihia “mo e pulotu.”

15, 16. (a) Ko e heigoa e fakamoliaga ne foaki he lagi muhu fetu ke he pulotu ha Iehova? (e) Fakamoli fefe he tuaga ha Iehova ko e Pule Mua ue Atu ke he tau numera loga he tau agelu e pulotu he Takitaki nei?

¹⁵ Kua kitia moli e pulotu ha Iehova ke he tau gahua hana he lalolagi mo e lagi katoatoa. Ko e lagi muhu fetu, ne fai tutalaaga a tautolu ki ai he Veveheaga 5, kua nakai fakatafola noa i luga he pulagi likoliko. Fakaaue ke he “tau fakatufono he lagi” ha Iehova, ne kua fakatokatoka fakafulufuluola ke he tau talagaaga matakau fetu ne fakaputuputu ke eke mo tau putuputu fetu lalahi. (Iopu 38:33) Ko e kakano haia ne hagaao a Iehova ke he tau mena he lagi ko e “kau”! (Isaia 40:26) Ka e, ha ha ai taha kau foki, ne kua fakatata lahi mai e pulotu ha Iehova.

¹⁶ Tuga ne kitia e tautolu he Veveheaga 4, ne fua he Atua e matahigoa “Iehova Sapaota” ha ko e hana tuaga ko e Pule Mua ue Atu he kau tokologa he tau teau miliona he tau mena momoui fakaagaga. Ko e fakamoliaga anei he malolo ha Iehova. Ka e putoia fefe, mogoia, e pulotu hana? Manamanatu: nakai lagataha a Iehova mo Iesu ke teva. (Ioane 5:17) Ti kua kakano  ai, mogoia, nukua lavelave tumau foki e tau fekafekau fakaagelu he Mua ue Atu. Mo e manatu, kua tokoluga a lautolu ke he tagata, kua mua atu e lotomatala mo e mua atu e malolo. (Heperu 1:7; 2:7) Ka kua fakagahua tumau e Iehova e tau agelu oti ia ke taute fiafia e gahua fakamoli​—“eke hana tau fekau” mo e “eke hana finagalo”​—ke he tau piliona e tau tau. (Salamo 103:​20, 21) Ko e liga ofoofogia ha a ia he pulotu he Takitaki nei!

17, 18. Ko e ha ne talahau he Tohi Tapu ko Iehova ko e ‘pulotu tokotaha,’ mo e ko e ha ne kua lata he pulotu hana ke toka a tautolu ke ofomate?

¹⁷ He kitia e fakamoliaga pihia, kua ofo kia he fakakite he Tohi Tapu e pulotu ha Iehova ke mua ue atu? Ke fakatai ki ai, ne talahau mai ko e ‘pulotu tokotaha’ a Iehova. (Roma 16:27) Ko Iehova hokoia ne tokai e pulotu ke he kakano katoatoa. Ko ia e punaaga he tau iloilo oti. (Tau Fakatai 2:6) Pihia ai a Iesu, pete ko e pulotu ne mua he tau mena momoui ha Iehova, ne nakai falanaki ke he hana ni a pulotu ka e vagahau tuga ni ne fakatonu age he Matua hana.​—Ioane 12:​48-50.

¹⁸ Mailoga la e puhala ne talahau he aposetolo ko Paulo e keheina he pulotu ha Iehova: ‘Oi, oi! ko e hokulo he tanakiaga he pulotu mo e fioiaaga he Atua! Kua nakai maeke ni ia taha ke kumi hana tau fakafiliaga; kua nakai maeke foki ke iloa hana tau haeleaga.’ (Roma 11:33) He hafagi e kupu aki e talahauaga fakaofo “Oi,” ne fakakite e Paulo e logonaaga malolo he loto​—ke he mena nei, ko e ofoofogia hokulo. Ko e kupu Heleni ne fifili e ia ma e “hokulo” kua matutaki lahi atu ke he kupu ma e “pahua.” Ko e mena ia, ne fakatupu ai he tau kupu hana e fakatino maaliali he manamanatuaga. Ka manamanatu atu a tautolu ke he pulotu ha Iehova, kua tuga fakakiakia atu a tautolu ki loto he vavanu he pahua, ko e pu hokulo lahi, kua lahi mahaki ti kua nakai fakai a tautolu ke iloa e lahi hana, po ke fakamaama po ke ta fakamatafeiga e mepe ki ai. (Salamo 92:5) Nakai kia ko e manatu fakatokolalo a ia?

19, 20. (a) Ko e ha ne lata e aeto mo fakataiaga latatonu he pulotu faka-Atua? (e) Puhala fe ne fakatata e Iehova hana malolo ke fakakia atu ke he vaha anoiha?

 ¹⁹ Kua ‘pulotu tokotaha’ a Iehova ke he taha kakano foki: Ko ia hokoia kua maeke ke kitia e vaha anoiha. Manatu, na fakaaoga e Iehova e aeto kitia mamao ke fakatai ke he pulotu faka-Atua. Liga 5 e kilokuleme he mamafa e aeto lanu auro, ka ko e tau mata hana kua lalahi atu he tagata lahi. Ko e kitiaaga he aeto kua maaliali pauaki, ke maeke he manu lele ke kitia e ola mai he teau e tau mita i luga he pulagi, liga he tau kilomita mamao ligo! Ne lagataha e talahau e Iehova hagaao ke he aeto: “Kua kitia mamao atu ni he tau mata hana.” (Iopu 39:29) Ke he kakano pihia ni, kua maeke ia Iehova ke “kitia mamao atu” ke he magaaho​—ke he vaha anoiha!

²⁰ Kua puke e Tohi Tapu he tau fakamoliaga nukua moli e mena nei. Ne tokai e teau he tau perofetaaga, po ke tohia tuai e fakamauaga tala. Ko e lauiaaga he tau felakutaki, ko e tu hake mo e veveli he tau pule malolo he lalolagi, mo e tau fuafuaaga felakutaki he tau pule kautau nukua talahau tuai i loto he Tohi Tapu​—ke he falu mena tutupu foki, kua talahau tuai mai he tau tau teau fakamua.​—Isaia 44:​25–​45:4; Tanielu 8:​2-8, 20-22.

21, 22. (a) Ko e ha ne nakai fai fakaveaga ke fakahiku na kitia tuai e Iehova e tau fifiliaga oti ne taute e koe he moui? Fakamaama. (e) Iloa fefe e tautolu na nakai momoko po ke nakai fai logonaaga e pulotu ha Iehova?

 ²¹ Ko e kakano kia e mena nei kua fita he kitia he Atua e tau fifiliaga ka taute e koe he moui? Ko e falu ne fakamatala e taofiaga ke he talahau tuai nukua fakamakamaka ko e, e, e tali. Ka ko e manatu ia kua fakateaga moli e pulotu ha Iehova, he pehe kua nakai maeke a ia ke taofi e manako hana ke onoono atu ke he vaha anoiha. Ke fakataitai: Kaeke ha ha ia koe e leo lologo fulufuluola lahi, nakai kia ha ha ia koe taha fifiliaga ka ke lologo ni he tau magaaho oti? Ko e manatu goagoa a ia! Ke tuga ni, kua ha ha ia Iehova e malolo ke iloa tuai e vaha anoiha, ka e nakai fakaaoga tumau e ia. Ke taute pihia ka liga lakafia ke he fifiliaga ataina ha tautolu ni, ko e mena fakaalofa uho ka nakai utakehe e Iehova.​—Teutaronome 30:​19, 20.

²² Au atu foki e kelea, ne talahau he maamaaga he talahau tuai ko e pulotu ha Iehova nukua momoko vaivai, nakai fakaalofa, nakai fai logonaaga, po ke nakai fakaalofa hohofi. Ka kua nakai moli e mena nei! Ne fakaako he Tohi Tapu kua “pulotu [ha Iehova a] loto.” (Iopu 9:4) Nakai pehe kua ha ia ia e loto moli, ka e fakaaoga tumau he Tohi Tapu e kupu ia ke hagaao ke he loto hokulo i loto, ne putoia ai e tau omoiaga mo e tau logonaaga, tuga e fakaalofa. Ti ko e pulotu ha Iehova, tuga falu mahani hana, nukua pule he fakaalofa.​—1 Ioane 4:8.

23. Ko e tokoluganea he pulotu ha Iehova kua lata ke omoi a tautolu ke taute e heigoa?

²³ Ka e moli lahi, ko e pulotu ha Iehova kua katoatoa e mitaki he falanakiaga. Kua tokoluganea ke he pulotu ha tautolu ati fakamafana fakaalofa mai e Kupu he Atua ki a tautolu: “Kia tua a koe kia Iehova mo e hāu a loto katoa; ka e aua neke falanaki a koe ke he hāu a pulotu. Kia manatu e koe a ia ke he hāu a tau puhala oti, ti fakahakohako ai e ia hāu a tau puhala.” (Tau Fakatai 3:​5, 6) O mai a tautolu mogonei ke kumikumi ke he pulotu ha Iehova ke maeke ia tautolu ke fakatata fakalahi atu ke he Atua pulotu-katoatoa ha tautolu.