He 1 Korinito 6:1-8, ne fakamaama he aposetolo ko Paulo e tuaga ka hokotaki he taha matakainaga e taha matakainaga ti tutū ki mua he fakafiliaga. Ne fakakite e ia kua nakai mitaki, ha ko e falu Kerisiano i Korinito ne “fakamalolo . . . ke uta ki mua he tau tagata mahani hepehepe ke fakafili ai.” (Kupu 1) Fakamaama fakamalolō mai e Paulo ke he tau Kerisiano ke ua hokotaki e taha matakainaga ke tū ki mua he hopoaga, ka e taute e mafola he puhala ne kua fakaako he fakapotopotoaga. O mai la ke fakatutala ke he falu kakano he fakatonuaga nei, ne omoomoi he agaaga Tapu mo e fakatutala foki ke he falu tuaga ne nakai lauia he fakatonuaga nei.

Kaeke kua taufetoko a tautolu mo e matakainaga ke he pisinisi, to eketaha a tautolu ke kumi e tau puhala ha Iehova ke fehagai ke he tuaga pihia, ka e nakai taute ke he puhala ni ha tautolu. (Tau Fakatai 14:12) Tuga he fakakite mai e Iesu, kua lata ke fakamafola po ke fakafeilo fakaave e tau fekehekeheaki neke hoko ke he taufetoko lahi. (Mataio 5:23-26) Ka e momoko ai, ha kua lahi e taufetoko he falu Kerisiano ti hokotia ke tutū ki mua he fakafiliaga he lalolagi. Ne pehē a Paulo: “Ha ha ia mutolu e hehe ni, ha kua eke e mutolu e taufetoko ko e taha ke he taha.” Ko e ha? Ko e matapatu kakano ha kua fakakelea he puhala nei e higoa mitaki he fakapotopotoaga mo e Atua ne tapuaki a tautolu ki ai. Ti tokaloto e tautolu e hūhū ha Paulo: “Ka e nakai kia fakauka he ha a mutolu ke he mahani kelea?”​—Kupu 7.

Ne fakamaama foki e Paulo kua foaki mai he fakapotopotoaga e tau puhala mitaki lahi ke fakamafola aki e tau taufetoko. Ko e tau motua kua pulotu ha ko e iloilo ha lautolu ke he Tohi Tapu, ti talahau e Paulo ne “kua maeke ia [lautolu] ke fakafili e tau mena he matakainaga” ka hagaao ke he “tau mena he mouiaga nei.” (Kupu 3-5) Talahau e Iesu ko e taufetoko kelea lahi, tuga e pikopiko mo e kaihā, kua lata ke fakamafola he fakaaoga e tolu e lakaaga: fakamua, kia eketaha ke fakamafola e lekua mo e tau tagata ne lauia ai; uaaki, ka nakai talia e lakaaga fakamua, ti lata ke uta e falu tagata ke fakamooli aki; ke toluaki, ka nakai talia e  tau lakaaga ia, ti lata mogoia ke ta atu ke he fakapotopotoaga ne hukui he tau motua.​—Mataio 18:15-17.

Ko e tau motua Kerisiano kua nakai ko e tau loea po ke tau tagata pisinisi a lautolu, ke foaki e tau fakatonuaga ke he tau matafakatufono po ke fakapisinisi. Kua nakai fakatoka e lautolu e tau tutūaga ke fakamafola aki e tau taufetoko he tau matakainaga hagaao ke he tau mena fakapisinisi. Ka e lagomatai e lautolu e tau matakainaga ne putoia ke he taufetoko, ke fakagahua e tau matakupu he Tohi Tapu mo e talia e puhala ke fakamafola aki. He tau tutūaga uka lahi, to liga manako a lautolu ke fakatutala ke he leveki takaiaga po ke la ofisa he Tau Fakamoli a Iehova. Ka kua fai tuaga ne nakai putoia he fakatonuaga ha Paulo. Ko e heigoa e falu mena nei?

He falu tuaga, kua lata ni ke ta atu ke he fakafiliaga ke fakamooli he ikifakafili po ke lata pauaki ha ko e matafakatufono ke moua e fakatokaaga nakai lotokai mo e ke mafola. Ma e fakatai, ko e hopo fakafili ni e puhala ke moua e tohi tau vevehe he hoana mo e taane, ko hai ne kua latatonu ke leveki e tama, fafatiaga he tau tupe lagomatai ka totogi he taha hoa ke he taha hoa ka tau vevehe, tau totogi kua lata ke moua mai he inisua, ha ha e tonuhia ke moua e tau tupe kaeke kua tomo e pisinisi, mo e ke fakamooli e tau maveheaga (will). He falu tuaga, to liga logona he matakainaga kua lata a ia ke countersue ke puipui a ia mai he hokotaki. *

Kaeke kua nakai taufetoko he taute e tau mena nei, to liga nakai moumou e lautolu e fakatonuaga ha Paulo ne omoomoi he agaaga tapu. * Ko e mena ne mua ke he Kerisiano, ko e fakatapu he higoa ha Iehova mo e puipui e mafola mo e kaufakalataha he fakapotopotoaga. Ko e tau tutaki he Keriso kua fakamailoga fakamua ha ko e fakaalofa ha lautolu, ti ko e “fakaalofa, . . . nakai kumi e ia hana tau mena [ni].”​—1 Korinito 13:4, 5; Ioane 13:34, 35.