Tuga e kese kona ia, kua nakai kitia a Satani mo e uka lahi e tau tagata ke mailoga ai ti kua hagahaga kelea lahi mahaki a ia. Ka e lagomatai he Atua a tautolu. Nakai lata a koe ke matakutaku ki a Satani ka fakaaoga e koe e tau mena fakaalofa nei mai he Atua.

Ko e lotomatala ke fifili. Tala mai e Iakopo 4:7: “Kia totoko atu a mutolu ke he tiapolo, ti hola kehe ai a ia ia mutolu.” Pete he malolō lahi a Satani, nakai maeke a ia ke fakaohooho a koe ke taute e tau mena kua nakai manako a koe ki ai. Taute e koe e fifiliaga. Ko e 1 Peteru 5:9 ne pehē: “Kia totoko atu a mutolu kia ia [ko e Tiapolo], mo e mauokafua a mutolu ke he tua.” Manatu, ne toka e Satani a Iesu he mogo ne totoko fakamalolō e Iesu tolu e kamatamata. (Mataio 4:11) Maeke foki a koe ke fifili ke totoko e tau lagatau ha Satani.

Kapitiga mo e Atua. Fakamalolō mai he Iakopo 4:8 ke “fakatata atu a mutolu ke he Atua.” Kua uiina e Iehova a koe ke feaki e fakafetuiaga kapitiga tata mo ia. Taute fēfē e koe e mena ia? Mitaki lahi ke kamata he fakaako fakalahi hagaao ki a Iehova mai he Tohi Tapu. (Ioane 17:3) Ko e tau mena haau ka iloa hagaao ki a Iehova to omoi a koe ke fakaalofa ki a ia, ti ko e fakaalofa ia ka fakalagalaga a koe ke taute e finagalo haana. (1 Ioane 5:3) Ka fakatata lahi a koe ke he haau a Matua he lagi, to fēfē e tali haana? Matutaki e Iakopo, to “fakatata mai ai a ia [Atua] kia mutolu.”

Ko e maveheaga ke puipui. Pehē e Tau Fakatai 18:10: “Ko e higoa a Iehova, ko e kolo uka haia; kua hola atu ki ai e tagata tututonu, ti hao ai a ia.” Ko e higoa he Atua, nakai ko e koloa fakamana ke moua e monuina. Ka e kakano ko lautolu kua fakaheke mooli e higoa he Atua kua maeke ke ui ki a ia ma e puipuiaga he ha magaaho.

Ko e fakafifitakiaga aoga. Tala mai he Gahua 19:19 e taha fakamaamaaga hagaao ke he tau Kerisiano ne liliuina foou i Efeso. “Na tokologa foki a lautolu ne eke e tau lagatau he tau taulaatua, kua fakapotopoto e lautolu e tau tohi ha lautolu, mo e huhunu ai ki mua he tau tagata oti; ti totou ai e lautolu e taui ke fakalata ki ai, ti limagofulu e afe he tau tupe ario ke moua  ai.” * Moumou he tau Kerisiano ia e tau koloa ne matutaki mo e tau gahua fakataulatua, pete he lahi e tupe ne putoia ai. Maeke e fakafifitakiaga ia ke aoga lahi ki a tautolu he vahā nei. Ko e lalolagi nei kua hufia lahi he tau lagatau taulatua. Pihia foki e tau koloa mo e tau gahua fakataulatua ne tuga na mitaki, liga futiaki mai e tau temoni. Aoga lahi ke fakamakamaka mo e fakamamao e tau mena nei he moui haau.​—Teutaronome 18:10-12.

Ko Rogelio, ne totoku he vala tala fakamua he fufuta nei, ne nakai talitonu a ia ke he Tiapolo he 50 e tau tau fakamua he moui haana. Ka kua liu a ia manamanatu ke he tau onoonoaga haana. Ko e ha? “Ko e moua laia e au e Tohi Tapu tali mai he moui haaku,” he ui e Rogelio. “Ko e iloilo mai he Tohi Tapu ati talia e au na fai Tiapolo. Ko e iloilo ia foki kua puipui au mogonei he fakatupa ke he fakaohoohoaga kelea he Tiapolo.”

Manako nakai a koe ke kitia e magaaho ka nakai fai Satani? To maeke ia koe. Talahau tuai he Tohi Tapu to hoko mai e magaaho ma e Tiapolo ne fakahehē e tokologa, to “liti a ia ke he loloto he afi mo e taio.” (Fakakiteaga 20:10) Ka e nakai maeke e afi mo e taio ke fakamamahi e mena moui fakaagaaga ne nakai kitia. Ko e mena ia, kua hagaao e loloto he afi ke he moumouaga tukulagi. To galo tukulagi a Satani. Ko e magaaho fiafia mooli a ia ma lautolu kua fakaalofa ke he Atua!

He mogonei, fakatumau ke fakaako fakalahi hagaao ki a Iehova mo e haana tau puhala. * Manamanatu la he magaaho ka moui ai mo e maeke ke talahau mooli, “Kua nakai fai Satani!”