“KO E Atua ko e agaga,” ne nakai kitia he tau tagata. (Ioane 4:24) Ka kua talahau he Tohi Tapu kua maeke falu tagata ke kitia e Atua. (Heperu 11:27) Maeke fēfē e mena ia? Maeke mooli nakai a koe ke kitia e “Atua nakai kitia”?​—Kolose 1:15.

Fakatatai e tuaga ha tautolu ke he tagata ne matapouli he fanau mai. Taofi katoatoa kia he matapouli haana a ia mai he iloa e lalolagi ne takatakai ia ia? Nakai. Moua he tagata matapouli e vala tala he tau puhala kehekehe ke iloa e ia e tau tagata, tau mena, mo e tau gahua kua takatakai ia ia. “Ko e kitiaaga kua nakai ko e tau mata,” he ui he taha tagata matapouli. “Haia he loto.”

He puhala pihia, pete kua nakai maeke ia koe ke kitia mata e Atua, maeke ia koe ke fakaaoga e “tau mata he tau loto” ke kitia a ia. (Efeso 1:18) Manamanatu ke he tolu e puhala ka taute pihia e koe.

Ko e tagata matapouli kua fa iloa e tau mena he logona mo e aamo, ti fakaaoga e ia ke iloa e tau mena ne nakai kitia e ia. Pihia foki, maeke ia koe ke fakaaoga e tau logonaaga haau he tino ke kumikumi e lalolagi ne takatakai viko ia koe ke iloa e Atua nakai kitia ne tufuga e tau mena ia. “Ko e hana tau mena kua nakai kitia, tali mai he vaha ne eke e lalolagi, kua kitia ia he manamanatu e tau mena ne eke.”​—Roma 1:20.

Ma e fakatai, manamanatu ke he kaina ha tautolu. Ne ofoofogia e puhala ne tufuga e lalolagi ma tautolu ke nonofo mo e fiafia e moui. Ka logona e tautolu e havilivili hauhau, mafana he laā, kamata e fua lakau huhua, po ke logona e lologo fulufuluola he tau manu lele, kua olioli a tautolu. Nakai kia fakakite mai he tau mena fakaalofa nei e manamanatu, fakaalofa hofihofi, mo e fakamokoi he Tufuga ha tautolu?

Ko e heigoa haau ne iloa hagaao ke he Atua mai he tau mena ne kitia e koe he lagi likoliko? Taha e mena, kua fakakite he lagi e malolō he Atua. Kua fakakite mai he tau fakamooliaga fakasaiene foou nei kua nakai ni lahi fakahaga e lagi likoliko ka e kua mafiti foki! He ono hake a koe ke he pulagi he pō, manamanatu: Ko e heigoa e punaaga he malolō nei ne omoomoi e laulahi mo e mafiti he lagi likoliko? Talahau he Tohi Tapu ki a tautolu kua “malolo lahi” e Tufuga. (Isaia 40:26) Fakakite he tufugatiaaga he Atua ki a tautolu kua ha ha ia Ia e “malolo oti kana”​—ko Ia kua “mua ue atu hana malolo.”​—Iopu 37:23.

Ko e matua fifine ne tokoua e tama ne nakai mitaki lahi e tau mata ne pehē: “Ko e vagahau ko e taha vala aoga lahi he fakaakoaga ha laua. Tala age e tau mena oti kua kitia mo e logona e koe ki a laua, [ti] mautali ke fakamaama tumau ai. Ko koe e tau mata ha laua.” Pihia foki, pete kua “nakai fakai ni taha ne kitia e Atua,” ko e Tama he Atua ko Iesu, “ha he fatafata he Matua, ko ia ne fakailoa mai a ia.” (Ioane 1:18) Ha ko e tufugatia fakamua he Atua mo e ko e Tama fuataha, ne eke a Iesu mo “tau mata” ha tautolu ke kitia ke he lagi. Ko ia e punaaga mua ue atu he tau vala tala hagaao ke he Atua nakai kitia.

He leva lahi e fakalataha ha Iesu mo e haana Matua, mailoga falu mena haana ne fakamaama hagaao ke he Atua:

• Nakai okioki e Atua he gahua. “Kua gahua haku a Matua kua hoko mai ni ke he aho nei.”​—Ioane 5:17.

• Iloa he Atua e tau manako ha tautolu. “Kua fioia ha mutolu a Matua e tau mena kua nonofogati ai a mutolu, ka e nakaila ole atu a mutolu kia ia.”​—Mataio 6:8.

•  Foaki fakamakai e Atua ki a tautolu. “[Ko e] Matua ha mutolu ha he lagi, . . . kua fakahake ne ia hana la kia lautolu kua mahani kelea katoa mo lautolu kua mahani mitaki, kua fakato hifo foki e ia e uha kia lautolu kua tututonu katoa mo lautolu kua nakai tututonu.”​—Mataio 5:45.

• Uho a tautolu takitokotaha ke he Atua. “Nakai kia fakafua ua e manu ikiiki ke he asari? Nakai to foki taha ia laua ke he kelekele ka noa mo e Matua ha mutolu. Ka kua oti kana he totou ha mutolu a tau lauulu. Ko e mena ia, ua matakutaku ai a mutolu; mena mua a mutolu ke he tau manu ikiiki loga.”​—Mataio 10:29-31.

Ko e tau tagata matapouli ne kehe e iloaaga mai he tau tagata ne maama e tau mata. Ko e tagata matapouli kua liga mailoga e ata, nakai ko e matakavi pouli ne nakai fai laā, ka ko e matakavi hauhau ne nakai hoko e mafana he laā ki ai. Tuga ne tagata ne pouli katoatoa e tau mata ti nakai kitia e ata po ke laā, nakai maeke ia tautolu ke iloa a Iehova hoko tautolu ni. Ko e mena ia, ne foaki mai e Iehova e tagata kua fakaata katoatoa e tau mahani mo e tau aga Haana.

Ko e tagata ia ko Iesu. (Filipi 2:7) Ne nakai tutala ni a Iesu hagaao ke he haana Matua ka e fakakite foki ki a tautolu e aga he Atua. Ko e tutaki ha Iesu ko Filipo ne hūhū: “Ko e Iki na e, kia fakakite mai e koe e Matua kia mautolu.” Ne tali e Iesu pehē: “Ko ia kua kitia au, kua kitia foki e ia e Matua.” (Ioane 14:8, 9) Ko e heigoa haau ka “kitia” hagaao ke he Matua puhala he tau mena ne taute e Iesu?

Ko Iesu ne kua mafanatia, fakatokolalo, mo e mukamuka. (Mataio 11:28-30) Ne futia e tau tagata ke he aga fakatotoka haana. Fioia e Iesu e mamahi ne logona he falu, mo e fakalataha a ia ke he fiafia he falu. (Luka 10:17, 21; Ioane 11:32-35) Ka totou po ke logona e koe e tau tala Tohi Tapu hagaao ki a Iesu, takele i ai mo e fakamoui e tuaga he loto haau. Ka manamanatu fakahokulo a koe ke he puhala ne fehagai a Iesu mo e tau tagata, to iloa maaliali e koe e aga homo ue atu he Atua ti fakatata atu ki a Ia.

Hagaao ke he puhala ne fehagai e tagata matapouli ke he lalolagi, taha e tagata tohia ne talahau: “Moua valavala e ia e tau vala tala mai he tau mena kehekehe (aamo, hohogi, logona, mo e falu foki), ti moua e puhala ke tukutuku fakalataha e tau vala tala katoa ia.” Pihia foki, he onoono a koe ke he tau gahua tufugatia he Atua, totou e tau talahauaga ha Iesu hagaao ke he haana Matua, ti kumikumi ke he puhala ne fakaata e Iesu e tau aga he Atua, to hake mai e fakatino fulufuluola ki a Iehova. To moolioli a ia ki a koe.

Ne pihia tonu e logonaaga ha Iopu ne moui he vahā i tuai. He mogo fakamua ne vagahau a ia mo e “nakai manamanatu.” (Iopu 42:3) Ka e he oti e manamanatu ke he tau tufugatia homo ue atu he Atua, ne omoomoi a Iopu ke pehē: “He fanogonogo ai haku tau teliga; ka ko ainei kua kitekite atu haku tau mata kia koe.”​—Iopu 42:5.

Maeke foki a koe ke pihia. “Kaeke ke kumi e koe a [Iehova], ti moua e koe a ia.” (1 Nofoaga he Tau Patuiki 28:9) To fiafia e Tau Fakamoli a Iehova ke lagomatai a koe ke kumi mo e moua e Atua nakai kitia.