TAU VALA TALA I MUA: KO E MENA NE FAKAAKO E TAUTOLU MAI IA MOSE
Ko Hai a Mose?
Ko e heigoa ne manatu e koe ka logona e higoa ha Mose? Manatu kia a koe . . .
-
ko e tama mukemuke a ia ne fufū he matua fifine he kato kome he Vailele Naila?
-
ko e tama taane ne feaki he kaina monuina i Aikupito he tama fifine ha Farao—ka e nakai nimo ko ia ko e Isaraela?
-
ko e tagata ne gahua leveki mamoe i Mitiana ke 40 e tau?
-
ko e tagata ne tutala mo Iehova a i mua he akau puhopuho?
-
ko e tagata ne tū ki mua he patuiki a Aikupito, ne ole fakamalolō ke fakatokanoa e tau Isaraela mai he tupaaga?
-
ko e tagata, puhala he takitakiaga he Atua, ne fakailoa e Tau Malaia Hogofulu ki a Aikupito he mogo ne totoko he patuiki e Atua mooli?
-
ko e tagata ne takitaki a Isaraela he o kehe lahi mai i Aikupito?
-
ko e tagata ne fakaaoga ke veveheua e Tahi Kula?
-
ko e tagata ne age ke he tau Isaraela e Tau Fakatufono Hogofulu mai he Atua?
TAUTE oti e Mose e tau mena ia. Ko e mena ia ati fakalilifu lahi he tau Kerisiano, tau Iutaia, pihia mo e tau Musilimi e tagata nei!
Nakai fakauaua ai, ko Mose e perofeta ne fakakite e “matakutaku lahi.” (Teutaronome 34:10-12) Ne fakaatā e ia e Atua ke fakaaoga a ia ke he puhala lahi mahaki. Ka ko e tagata agaia ni a Mose. Tuga ni e perofeta ko Elia, ne tū he faahi a Mose he fakakiteaga he fekafekau a Iesu he lalolagi, ko Mose ko e tagata “tuga na tautolu.” (Iakopo 5:17; Mataio 17:1-9) Ne fehagai a Mose mo e loga he tau lekua ne fehagai foki mo tautolu, ti kautū a ia ki ai.
Manako nakai a koe ke iloa e puhala ne taute pihia e ia? Manamanatu ke he tolu e mahani mitaki ne fakagahua e Mose mo e tau mena ka fakaako e tautolu mai he fakafifitakiaga haana.
a Ko Iehova e higoa he Atua ne fakakite i loto he Tohi Tapu.
