1-3. Ko e ha ne mauokafua a Paulo na maeke a ia ke falanaki ki a Iehova? (Kikite fakatino he kamataaga.)

KAEKE ko e Kerisiano a koe i Roma he senetenari fakamua, to moui a koe he magaaho hagahaga kelea. Ne favale fakakelea he tau Roma e tau Kerisiano. Ne tukupau he tau Roma e tau Kerisiano he kamata e afi lahi i Roma mo e tukumale a lautolu he vihiatia e tau tagata. Tokologa e matakainaga Kerisiano haau ne tapaki. Falu kua hēhē fakavalavala he tau manu. Falu ne pao ke he tau pou ti tugi moui ke fakamaama e lagi he pō. He tau aho takitaha ne iloa e koe to liga tupu e tau mena nei ki a koe.

² He magaaho uka lahi nei, ne tuku e aposetolo ko Paulo he fale puipui. Liga manamanatu a ia po ke to lagomatai he tau matakainaga Kerisiano a ia, he manatu e ia e tuaga fakamua na nakai fai tagata ne lagomatai a ia. Ka e moua e Paulo e lagomatai mai ia Iehova puhala he Iki ko Iesu. Tohi e ia: “Ha ha ia au e Iki, mo e fakamalolo mai kia au.” Tuku age e Iesu ki a Paulo e malolō ne lata mo ia. Ne tohi foki e Paulo ko ia “kua laveaki foki . . . mai he gutu he leona.”​—2 Timoteo 4:16, 17. * (Kikite matahui tala.)

 ³ Ne manatu e Paulo e puhala ne lagomatai e Iehova a ia he magahala fakamua. Ti mauokafua a ia to foaki e Iehova ki a ia e malolō kua lata mo ia ke fakauka ke he tuaga haana mogonei ti pihia mo e ha kamatamata he tau mogo i mua. Iloa tonu e ia e mena nei ati tohi e ia: “To laveaki foki he Iki au mai he tau mena kelea oti.” (2 Timoteo 4:18) Ne iloa e Paulo ko e tau tuaga foki ne nakai maeke e tau matakainaga haana ke lagomatai a ia, maeke a ia ke falanaki tumau ki a Iehova mo Iesu ma e lagomatai. Nakai fakauaua ai a ia.

4, 5. (a) Ko hai ka foaki atu tumau ki a koe e lagomatai kua lata? (e) Taute fēfē e koe e fakafetuiaga haau mo Iehova ke malolō lahi?

⁴ Kua feleveia nakai a koe mo e lekua vihi mo e logona e matimati, ti nakai fai tagata ke lagomatai a koe? Liga galo e gahua haau po ke tau peehiaga he aoga. Liga gagao lahi a koe po ke fai kamatamata uka foki. Liga ole lagomatai a koe ke he falu tagata ka kua hogohogo manava ha kua nakai foaki atu e lautolu e lagomatai ki a koe ne kua lata. Mooli, falu lekua ne nakai maeke he tau tagata ke fakamafola. Ko e heigoa haau ka taute mogoia? Pehē mai e Tohi Tapu ke “tua a koe kia Iehova.” (Tau Fakatai 3:5, 6) Ka e mauokafua nakai a koe to lagomatai e ia a koe? Ē! Maeke a tautolu ke totou e tau fakafifitakiaga loga he Tohi Tapu nukua talitonu a tautolu na lagomatai mooli e Iehova e tau tagata haana.

⁵ Ua loto kona ka nakai foaki he tau tagata ki a koe e lagomatai kua lata mo koe. Ka e tuga a Paulo, manamanatu ke he kamatamata ko e magaaho ke falanaki katoatoa ki a Iehova. Ko e magaaho foki a ia ke kitia e puhala ne leveki e ia a koe ke he moui ni haau. Ko e falanaki haau ki a Iehova mo e fakafetuiaga haau mo ia ka malolō lahi foki.

6. Ko e ha kua liga nakai mukamuka ke falanaki ki a Iehova ka lauia a tautolu he lekua vihi?

⁶ Liga fakaita he lekua vihi a koe. Kua taute e koe e tau mena oti ke lata mo e tuaga, ti kua liogi a koe ki a Iehova ma e lagomatai. Logona nakai e koe mogonei e totokaaga ha kua falanaki a koe to lagomatai e ia a koe? Ē, logona! (Totou Salamo 62:8; 1 Peteru 5:7.) Ka manako a koe ke mitaki e fakafetuiaga mo Iehova, kua aoga ma haau ke fakaako ke falanaki ki a ia. Ka ko e taute pihia kua nakai mukamuka tumau. Ko e ha? Taha e kakano kua liga nakai tali mafiti e Iehova e liogi haau.​—Salamo 13:1, 2; 74:10; 89:46; 90:13; Hapakuka 1:2.

7. Ko e ha ne nakai tali mafiti tumau e Iehova e tau liogi ha tautolu?

⁷ Ko e ha ne nakai tali mafiti tumau e Iehova e tau liogi ha tautolu? Pehē e Tohi Tapu ko Iehova e Matua ha tautolu ti ko tautolu ko e tau fanau haana. (Salamo 103:13) Nakai age he matua taane ke he tama e tau mena oti ne ole e ia po ke age ki a ia he mogoia ni. Iloa he matua taane  liga fai mena e tama ne manako mafiti ki ai ti amanaki mogoia kua nakai liu manako ai. Iloa foki he matua taane e mena ne mua he mitaki ma e tama haana, ti iloa e ia e puhala ka lauia ai e falu. Iloa e ia e mena kua lata mo e tama mo e magaaho kua lata ke moua ai e ia. Ka foaki mafiti he matua taane e tau mena oti ne ole he tama, to eke e matua taane mo fekafekau he tama. Ko e ha tautolu a Matua he lagi ko Iehova kua fakaalofa ki a tautolu. Ha ko e ha tautolu a Tufuga pulotu, ne iloa e ia e mena kua lata mo tautolu ti fifili e ia e magaaho mitaki lahi mahaki ke foaki mai e tau mena kua ole ki ai a tautolu. Kua mitaki ma tautolu ke fakatali mo e kitia e puhala ka tali e Iehova e tau liogi ha tautolu.​—Fakatatai Isaia 29:16; 45:9.

8. Ko e heigoa ne mavehe e Iehova ke he mena kua maeke a tautolu ke fakauka?

⁸ Manatu foki, kua iloa e Iehova e mena ka maeke mo e nakai maeke he tau tagata takitaha ke fakauka. (Salamo 103:14) Ti foaki e ia ki a tautolu e malolō kua lata mo tautolu. Mooli he falu mogo kua liga logona hifo e tautolu kua nakai maeke a tautolu ke matutaki. Ka e mavehe e Iehova kaeke ke lahi mahaki e kamatamata ke fakauka e tautolu, to taute e ia e “mena ke hao ai.” (Totou 1 Korinito 10:13.) Kua mafanatia ke iloa na maeke a tautolu ke falanaki kua iloa e Iehova e lahi he mena kua maeke a tautolu ke fakauka ki ai.

9. Ko e heigoa kua lata ia tautolu ke taute kaeke ke liogi a tautolu ma e lagomatai mai ia Iehova ka e nakai tali mafiti mai a ia ki a tautolu?

⁹ Ka liogi a tautolu ma e lagomatai mai ia Iehova ka e nakai tali mafiti e ia a tautolu, kia fakauka. Manatu kua makai a Iehova ke lagomatai a tautolu, ka e fakatali fakatekiteki a ia ke he magaaho mitaki lahi mahaki ke foaki ki a tautolu e mena kua lata mo tautolu. Pehē e Tohi Tapu ki a tautolu: “To tatali a Iehova ke fakaalofa noa mai kia mutolu; ko e mena ia to matike a ia ke fakaalofa mai kia mutolu; ha ko Iehova, ko e Atua kua fakafili mena a ia; uhoaki a lautolu oti kua tatali atu kia ia.”​—Isaia 30:18.

10-12. (a) Ko e heigoa ka maeke ke uka ke leveki e tagata gagao he magafaoa? (e) Ka falanaki a koe ki a Iehova he tau magaaho uka, to lauia fēfē e fakafetuiaga haau mo ia? Talahau e fakataiaga.

¹⁰ Liga vihi lahi e tuaga haau ti logona hifo a koe tuga a Paulo mo e manako ke laveaki mai he “gutu he leona.” (2 Timoteo 4:17) He tau magaaho pehēnei, kua aoga lahi mahaki ke falanaki a koe ki a Iehova. Ma e fakatai, liga leveki a koe he tagata he magafaoa ne gagao. Ne liogi a koe ki a Iehova ke lagomatai a koe ke taute e tau fifiliaga mitaki mo e ke fakamalolō. * (Kikite matahui tala.) Maeke a koe mogonei ke logona hifo e mafola ka manatu e koe kua kitia mo e maama e Iehova a koe mo e tuaga haau. To lagomatai e ia a koe ke fakauka mo e fakamooli ki a ia.​—Salamo 32:8.

¹¹ He falu magaaho ne tuga kua nakai  lagomatai e Iehova a koe. Liga nakai talia he tau ekekafo e mena kua lata ke taute. Po ke amanaki a koe to fakamafana he tau magafaoa haau a koe, ka e tuga kua fakaau atu e lautolu e kelea. Falanaki tumau ki a Iehova ke foaki atu e malolō ki a koe. Fakatata atu tumau ki a ia. (Totou 1 Samuela 30:3, 6.) Fakamui, ka mailoga e koe e puhala ne lagomatai e Iehova a koe, to malolō lahi e fakafetuiaga haau mo ia.

¹² Pihia e logonaaga ha Linda. * (Kikite matahui tala.) Ne kua leva e leveki e ia e tau matua haana ne gagao ato mamate a laua. Pehē a ia: “He haia he tuaga, ko e haaku taane, tugaane, mo au ne fa uka ke iloa e mena ke taute. Nakai fahia e tau logonaaga ha mautolu he falu mogo. Ka e liu ono ki tua, ne kitia maali lahi e mautolu e fakalataha ha Iehova mo mautolu. Ne fakamalolō e ia a mautolu ti foaki e mena kua lata ni mo mautolu, pete ne tuga kua nakai fai puhala foki a mautolu.”

13. Lagomatai fēfē he falanaki ki a Iehova a Rhonda ke fakauka e tau matematekelea tupufetui?

¹³ Ko e falanaki katoatoa ha tautolu ki a Iehova to lagomatai foki a tautolu ke fakauka ke he tau matematekelea. Mena nei ne tupu ki a Rhonda. Ko e taane haana ne nakai ko e taha he Tau Fakamoli a Iehova ne tau vevehe mo ia. He magaaho taha nei, ne moua he tugaane haana e gagao hagahaga kelea lahi ne fakahigoa ko e lupus. Fai mahina he mole, ne mate e hoana he tugaane haana. Ne kamata a Rhonda ke maulu mai he ofomate he tau mena nei ne tutupu, ti kamata a ia ke paionia tumau. Mate foki e matua fifine haana mogoia. Fakauka fēfē a Rhonda ke he tau matematekelea nei? Pehē a ia: “Matutaki au mo Iehova he tau aho takitaha, pete ni foki ko e tau fifiliaga ikiiki. Ko e taute pihia kua mooli a Iehova ki a au. Fakaako ai ki a au ke falanaki ki a ia ka e nakai ki a au ni po ke falu tagata foki. Ti mooli e lagomatai ne foaki e ia ki a au, he leveki e ia e tau manako oti haaku. Ti ko e fua, ne logona e au e gahua tokoua mo Iehova.”

14. Maeke fēfē a Iehova ke lagomatai a koe ka tuku ki tua e taha tagata he magafaoa?

¹⁴ Manamanatu ke he taha tuaga vihi foki. Liga taha e tagata he magafaoa haau kua tuku ki tua. Iloa e koe e mena ne talahau he Tohi Tapu ke he puhala ke fehagai mo lautolu ne tuku ki tua. (1 Korinito 5:11; 2 Ioane 10) Ha ko e fakaalofa haau ke he tagata ia, liga logona hifo e koe kua uka lahi po ke nakai maeke ke omaoma ke he poakiaga he Tohi Tapu. To falanaki nakai a koe ke he haau a Matua he lagi ke foaki ki a koe e malolō ke omaoma fakamooli ki a Ia? To manamanatu nakai a koe ke he tuaga nei ko e magaaho ke fakatata lahi atu ki a Iehova?

15. Ko e ha ne liuliu a Atamu ki a Iehova?

¹⁵ Fakatatai fēfē e mena nei ke he tuaga he tagata fakamua ko Atamu? Talitonu kia a ia kua maeke a ia ke liuliu ki a Iehova mo e tumau ke moui? “Nakai fakavai” ki a Atamu. (1 Timoteo 2:14) Ti ko e ha ne liuliu a ia ki a Iehova? Ne kai e Atamu e fua  he akau ne age he hoana haana ki a ia ha kua mua atu e fakaalofa haana ke he hoana haana ke he fakaalofa ki a Iehova. Ati fanogonogo a ia ke he hoana haana ka e nakai fanogonogo ke he poakiaga ha Iehova.​—Kenese 3:6, 17.

16. Malolō lahi mahaki e fakaalofa ha tautolu ki a hai, ti ko e ha?

¹⁶ Fakaako he fifiliaga ha Atamu ki a tautolu kua lata ia tautolu ke mua atu ha tautolu a fakaalofa ki a Iehova he fakaalofa ke he taha tagata. (Totou Mataio 22:37, 38.) Ti ka malolō lahi e fakaalofa ha tautolu ki a Iehova, maeke ia tautolu ke lagomatai e tau magafaoa ha tautolu ke he puhala mitaki lahi, he fekafekau a lautolu po ke nakai fekafekau a lautolu ki a Iehova. Ti fakamalolō tumau e fakaalofa mo e falanaki haau ki a Iehova. Ka tupetupe a koe ke he taha tagata he magafaoa ne tuku ki tua, liogi ki a Iehova ti tala age ki a ia e tau mena oti kana ne logona hifo e koe. * (Kikite matahui tala.) (Roma 12:12; Filipi 4:6, 7) Pete kua matematekelea lahi mahaki a koe, manamanatu ke he tuaga nei ko e magaaho ke fakamalolō fakalahi e fakafetuiaga haau mo Iehova. Ti maeke ia koe ke falanaki ki a ia mo e iloa ko e omaoma ki a ia to tamai e fua mitaki lahi mahaki.

17. Ka tumau a tautolu ke matutaki katoatoa ke he gahua fakamatala, ko e heigoa ka falanaki a tautolu to taute e Iehova?

¹⁷ Ko e ha ne laveaki e Iehova a Paulo  mai he “gutu he leona”? Pehē a Paulo: “Kia fakakatoatoa ha ko au e fakamatalaaga.” (2 Timoteo 4:17) Ne foaki foki e Iehova ki a tautolu e gahua fakamatala he “vagahau mitaki,” ti fakahigoa e ia a tautolu ko e haana a “tau ekegahua.” (1 Tesalonia 2:4; 1 Korinito 3:9) Ka tumau a tautolu ke matutaki katoatoa ke he gahua nei, maeke ia tautolu ke falanaki to foaki e Iehova ki a tautolu e tau mena oti kua lata mo tautolu. (Mataio 6:33) To mukamuka lahi ai ma tautolu ke fakatali ki a Iehova ke tali e tau liogi ha tautolu.

18. Maeke fēfē a koe ke atihake e falanaki ki a Iehova mo e taute e fakafetuiaga haau mo ia ke malolō lahi?

¹⁸ Fakaaoga e tau aho takitaha ke taute e fakafetuiaga haau mo Iehova ke malolō lahi. Ka hoko mai e kamatamata ti tupetupe a koe, fakaaoga e magaaho nei ke fakatata lahi atu ki a Iehova. Totou, fakaako, mo e manamanatu fakahokulo ke he Tohi Tapu, ko e Kupu he Atua. Tumau ke liogi ki a Iehova ti tumau ke matutaki katoatoa ke fekafekau ki a ia. Ka taute e koe e tau mena nei, maeke a koe ke falanaki to lagomatai e Iehova a koe ke fakauka ke he tau kamatamata oti haau mogonei mo e ha kamatamata he tau mogo i mua.