Ne manako e patuiki ha Suria ke moua mo e tapaki e perofeta he Atua ko Elisaio. Ne logona e ia ko Elisaio i Totana, he maaga pātakai i luga he mouga. He pō, ne fakafano he patuiki e kautau haana ki Totana, fakalataha mo e tau solofanua mo e tau kariota tau. He hakeaga laā, ne pātakai e lautolu e maaga.​—2 Patu. 6:13, 14.

He matike e fekafekau ha Elisaio mo e fano ki fafo, ne kitia e ia e kautau ne fī ti matakutaku a ia. Ne tagi a ia: “Oi te fakaalofa! ko e iki na e, ko e heigoa kia e mena ke eke ai e tautolu?” Pehē a Elisaio: “Ua matakutaku a koe, ha kua mua he tokologa ha ha ia tautolu, kia lautolu ha ha ia lautolu.” Ti liogi e perofeta: “Iehova na e, kia fakaala e koe hana tau mata ke kitia ai e ia.” Matutaki e tala: “Ti fakaala ai e Iehova e tau mata he fuata, ti kitia e ia, kitiala, kua puke e mouga ke he tau solofanua mo e tau kariota afi, kua agaagai a lautolu kia Elisaio.” (2 Patu. 6:15-17) Ko e heigoa ka fakaako e tautolu mai he mena nei?

Pete he agaagai a Elisaio he kautau Suria, ne fakatotoka a ia. Ne talitonu a ia ki a Iehova ti kitia kua puipui e Iehova a ia. Nakai amanaki a tautolu he vahā nei ke he tau mana, ka e maaliali ai ki a tautolu kua puipui e Iehova e tau tagata haana ko e matakau. Tuga na pehē a tautolu kua kitia foki e tautolu e tau solofanua mo e tau kariota afi kua puipui a tautolu. Ka tua a tautolu kua puipui e Iehova e tau tagata haana ti ka falanaki tumau a tautolu ki a Ia, to logona e tautolu e haohao mitaki mo e moua haana fakamonuinaaga. (Sala. 4:8) Kia fakatutala a tautolu ke he puhala ka aoga mai a tautolu he falu mena tutupu he moui ha Elisaio.

Taha aho, hane keli a Elisaio he fonua, ne hau e perofeta ko Elia ki a ia ti tuku e tapulu lahi haana ki luga ia ia. He taute e mena nei, kua uiina e Elia a Elisaio ke eke mo hoa haana, ko e fekafekau haana. Ne uiina e Elisaio e tau kapitiga haana ke he galue lahi, mavehe ke he matua taane mo e matua fifine haana, ti toka e kaina ke mui atu ki a Elia. (1 Patu. 19:16, 19, 21) Ha kua makai a Elisaio ke taute ha mena ne manako e Atua ki a ia ke taute, ne maeke a Iehova ke fakaaoga a ia ke he loga e tau puhala ti kotofa a ia he mogo fakamui mo perofeta ke hukui a Elia.

 Ne fekafekau a Elisaio ki a Elia liga ke he ono e tau. He magaaho ia, ne pehē e Tohi Tapu ko Elisaio ko ia ne “liligi ai e maga vai ke he tau lima a Elia.” (2 Patu. 3:11) Ko e heigoa e kakano he mena ia? He magahala ia, fa mahani e tau tagata ke kai he fakaaoga e tau lima. He mole e kai, ne liligi he fekafekau e maga vai ke he tau lima he iki haana ke holoholo ai. Ti tuga kua nakai aoga po ke fakateaga e falu gahua ha Elisaio. Ka e logona hifo e ia ko e lilifu ke eke mo fekafekau ha Elia.

He puhala taha, tokologa e Kerisiano he vahā nei kua makai ke taute e tau gahua kehekehe he gahua mau. Ko e ha? Ha kua tua a lautolu ki a Iehova mo e manako ke foaki loto katoa ki a Ia. Ma e fakatai, falu ne toka e tau kaina ke gahua he Peteli po ke tau matagahua talaga. Liga taute e lautolu e tau gahua ne onoono e tokologa ki ai kua nakai aoga mo e fakateaga. Ka e lata ke nakai fai ia tautolu ke manamanatu pihia. Uho lahi ki a Iehova e tau gahua oti ne taute he tau fekafekau haana.​—Hepe. 6:10.

Ato uta he Atua a Elia he “ta hake . . . he hiohio ke he lagi,” ne fakafano e ia e perofeta he fenoga. Ne tala age a Elia ki a Elisaio kua nakai lata a ia ke fano mo ia, ka e tali a Elisaio: “Nakai toka e au a koe.” He fenoga, ne tala age a Elia ki a ia ke lagauaaki foki ke nofo hifo, ka e nakai mahalo a Elisaio. (2 Patu. 2:1-6) Ne pipiki fakamooli a Elisaio ki a Elia, tuga a Ruta ne pipiki ki a Naumi. (Ruta 1:8, 16, 17) Ne logona e Elisaio ko e lilifu ke fekafekau ki a Elia ha ko e gahua a ia ne tuku age he Atua ki a Elisaio ke taute.

Ne fakatoka e Elisaio e fakafifitakiaga mitaki ma tautolu. To lahi mahaki e tokiofa e tautolu ha gahua kua tuku mai ki a tautolu ke taute he fakatokatokaaga he Atua ka manatu tumau e tautolu kua fekafekau a tautolu ki a Iehova. Nakai fai lilifu lahi foki ke he mena ia.​—Sala. 65:4; 84:10.

He fenoga e tau tagata taane tokoua, ne tala age a Elia ki a Elisaio: “Tala mai la e koe po ke heigoa e mena ke eke e au māu ka kua nakaila uta kehe ai au ia koe.” Ne tali a Elisaio: “Kia ta mai kia au ua e veveheaga he agaga ha ha ia koe.” He taute e Solomona he tau tau fakamua, ne hūhū a Elisaio ke he taha mena ke lagomatai a ia ke fekafekau fakamitaki ki a Iehova. (1 Patu. 3:5, 9; 2 Patu. 2:9) Ko e heigoa ne ole a Elisaio ke moua? I Isaraela, ne ua e vala he tufaaga ka fano ke he tama taane uluaki, ko e hakega mua he tagata taane. (Teu. 21:15-17) Ti ole a Elisaio ke eke mo hakega ha Elia, po ke hukui e tuaga ha Elia ko e perofeta. Ne ole foki a ia ke moua e agaga ha Elia, ha kua manako a ia ke moua e fakamalolō mo e fakamakutu pihia ma e tapuakiaga mooli ne ha ha ia Elia.​—1 Patu. 19:13, 14.

Tali atu fēfē a Elia ke he ole he fekafekau haana? Pehē e perofeta: “Ko e mena uka kua tala mai ai e koe; kaeke ke kitia e koe au ka uta kehe ai au ia koe, ti eke ai pihia kia koe; ka ko e mena ka nakai kitia e koe au, ti nakai eke pihia.” (2 Patu. 2:10) Ua e kakano he tali ha Elia. Fakamua, ko e Atua ni ka fifili ke moua e Elisaio e mena ne ole a ia ki ai. Uaaki, ka manako a Elisaio ke moua ai, lata a ia ke nofo mo Elia, pete ne mena ka tupu.

Age kia he Atua e mena ne ole ki ai a Elisaio? Pehē e Tohi Tapu: “Kua o atu ai a laua, mo e vagahau ai fakahaga; kitiala, ko e kariota afi mo e tau solofanua afi, kua vevehe kehekehe ai a laua tokoua ti ta hake ai he hiohio a Elia ke he lagi. Kua kitia foki e Elisaio.” a Ko e tali ha Iehova a ia ke he ole ha Elisaio. Ne kitia e Elisaio a Elia ne uta mai ia ia, moua ua e vala he aga ha Elia, ti eke mo perofeta he Atua he hukui a ia.​—2 Patu. 2:11-14.

Ne lagaki e Elisaio e tapulu lahi ne tō hifo ia Elia mo e tuku ai ia ia. He kitia he tau tagata a Elisaio ne tui e tapulu ia, ne iloa e lautolu ko e perofeta he Atua a ia mogonei. Fakamui, ne fakakite foki e ia ko e perofeta he Atua a ia he vevehe kehe e tau vai he Vailele ko Ioritana.

Liga nakai nimo e Elisaio e mena ne kitia e ia he magaaho ne ta hake he hiohio a Elia. To ofoofogia ha tagata ke kitia e kariota afi mo e tau solofanua afi! Ko e tau mena nei ne fakamooli ki a Elisaio na age e Iehova ki a ia e mena ne ole e ia. Ka tali he Atua e tau liogi ha tautolu, ne nakai fai fakakiteaga a tautolu he tau solofanua mo e kariota afi. Ka e fai fakamooliaga maaliali agaia a tautolu kua fakaaoga he Atua e malolō lahi haana ke lagomatai a tautolu mo e mailoga mooli kua taute e finagalo haana. Ti ka kitia e tautolu  kua fakamonuina e Iehova e vala he lalolagi he fakatokatokaaga haana, kua tuga na kitia e tautolu e kariota tapu haana hane holo ki mua.​—Eseki. 10:9-13.

Ne loga e mena tutupu ha Elisaio ne talitonu a ia ke he malolō lahi ha Iehova. Ti ko e agaaga tapu he Atua ne maeke he perofeta ke taute 16 e mana. Ne fakalahi ua ai ke he loga he mana ne taute e Elia. b Ko e mogo ke lagaua aki ne kitia e Elisaio e tau solofanua mo e tau kariota afi i Totana, he agaagai a ia he kautau Suria.

Pete ne agaagai a ia he tau fī i Totana, ne tumau e fakatotoka ha Elisaio. Ko e ha? Ha kua malolō e tua haana ki a Iehova. Kua lata foki a tautolu ke malolō e tua. Kia liogi a tautolu ma e agaaga tapu he Atua ke maeke ia tautolu ke fakakite e tua mo e falu mahani ko e tau vala he fua he agaaga.​—Luka 11:13; Kala. 5:22, 23.

Ko e mena ne tupu i Totana ne liga foaki foki ki a Elisaio e kakano lahi ke falanaki ki a Iehova mo e haana tau kau he tau agelu. Ne fakafano he Atua haana tau agelu ke takai viko he maaga mo e puipui a Elisaio mai he fī. Ti fakamoui he Atua a Elisaio mo e fekafekau haana he fakapouli e tau mata he fī. (2 Patu. 6:17-23) He magaaho hagahaga kelea ia, ti pihia ke he falu tuaga foki, ne fakakite e Elisaio e tua mo e falanaki katoatoa ki a Iehova.

Tuga a Elisaio, kia falanaki a tautolu ki a Iehova ko e Atua. (Fakatai 3:5, 6) Ka taute pihia e tautolu, “Kia fakaalofa mai e Atua kia [t]autolu, mo e fakamonuina a [t]autolu.” (Sala. 67:1) Kua nakai agaagai a tautolu he tau kariota mooli mo e tau solofanua afi, ka e ha ha he tau tagata ha Iehova e puipuiaga haana he vahā nei. He vahā i mua, to puipui e Iehova e tau tagata haana puhala he “matematekelea lahi.” (Mata. 24:21; Fakakite. 7:9, 14) Ato hoko e magaaho ia, kia manatu tumau e tautolu “ko e ha tautolu a taue ko e Atua ia.”​—Sala. 62:8.