Kia Takitaki he Kupu he Atua e Tau Lakaaga Haau
Kia Takitaki he Kupu he Atua e Tau Lakaaga Haau
“Ko e hāu a kupu ko e hulu ia ke he haku tau hui, mo e maama ke he haku puhala.”—SALAMO 119:105.
1, 2. Ko e ha ne nakai kautū e laulahi he tau tagata he kumi e mafola mo e fiafia mooli?
KUA manatu nakai e koe e magaaho ne hūhū a koe ke he taha tagata ma e takitakiaga? Liga kua tata tuai a koe ke he matakavi ne fano ki ai ka kua fakauaua he tau makeu he tau la hala. Po kua liga galo fetui a koe ti lata ni ke hiki katoatoa e hala haau. Ke he tau mena ua ia, kua nakai kia pulotu ke muitua ke he takitakiaga he tagata ne iloa e matakavi? Kua maeke he tagata pihia ke lagomatai a koe ke hoko atu ke he matakavi ne fano ki ai.
2 Kua totou afe e tau tau ne lali e tau tagata tokologa ke takitaki ne lautolu ha lautolu a puhala ne noa mo e lagomatai faka-Atua. He toka na lautolu hoko lautolu ni, ko e tau tagata nakai mitaki katoatoa to galo fetui a lautolu. Kua nakai fakaai a lautolu ke moua e hala ke he mafola mo e fiafia mooli. Ko e ha kua nakai maeke a lautolu ke hohoko atu ke he matakavi ia? He molea e 2,500 tau kua mole, ne pehē e perofeta ko Ieremia: “Nakai ha ha he tagata kua fano ke fakatonu e mena ke fano a ia ki ai.” (Ieremia 10:23) Ko e ha tagata ne lali ke takitaki ne ia e fanoaga haana he nakai talia e lagomatai pulotu to fakahiku ni ke hogohogomanava. Mooli, nukua latatonu he tagata ke moua e takitakiaga!
3. Ko e ha kua lata ue atu ia Iehova ko e Atua ke foaki e takitakiaga ma e tau tagata, ti ko e heigoa ne mavehe e ia?
3 Ko Iehova ko e Atua kua pulotu ue atu ke foaki e takitakiaga pihia. Ko e ha? Ha ko ia ne maama mitaki e talagaaga he tau tagata. Ti iloa katoatoa e ia e kakano ne hehē ai e moto tagata ati galo ai. Iloa foki e ia e mena kua lata ke moua e lautolu ke liliu ō he hala hako. Mua atu foki, ha ko e Tufuga, ne iloa tumau e Iehova e tau mena kua mitaki lahi ma tautolu. (Isaia 48:17) Ko e mena ia, kua lata ia tautolu ke falanaki katoatoa ke he maveheaga haana ne tohi he Salamo 32:8: “To fakaako e au a koe, mo e fakakite kia koe e puhala ke fano ai a koe; to fakatonu e au kia koe, mo e kitekite au kia koe.” Ati nakai fakauaua: Na foaki mai e Iehova e takitakiaga mitaki lahi. Ka e takitaki fēfē e ia a tautolu?
4, 5. Maeke fēfē he tau talahauaga he Atua ke takitaki a tautolu?
4 Ne pehē e salamo he liogi ki a Iehova: “Ko e hāu a kupu ko e hulu ia ke he haku tau hui, mo e maama ke he haku puhala.” (Salamo 119:105) Ko e tau talahauaga mo e tau fakamanatuaga he Atua kua moua i loto he Tohi Tapu, ti kua maeke ke lagomatai a tautolu ke kautū ke he tau fakatauhele ka liga fehagai mo tautolu he tau puhala ha tautolu. Mooli, ka totou mo e toka e Tohi Tapu ke takitaki a tautolu, kua iloa fakatagata e tautolu e tau mena ne talahau he Isaia 30:21: “To logona foki he tau teliga ha mutolu e kupu ki tua ha mutolu, . . . kua pehe mai, Ko e puhala hanai ke o ai a mutolu.”
5 Ka e mailoga, ne fakakite he Salamo 119:105 ua e puhala tatai ke fakagahua e Kupu he Atua. Fakamua, kua eke mo hulu ke he tau hui ha tautolu. Ka fehagai a tautolu mo e tau paleko he tau aho takitaha, kua lata he tau matapatu fakaakoaga ne moua i loto he Tohi Tapu ke takitaki e tau lakaaga ha tautolu ke maeke ia tautolu ke taute e tau fifiliaga pulotu ti kalo mai he tau matahele mo e tau hagahagakelea he lalolagi nei. Ke uaaki, kua maama e puhala ha tautolu ha ko e tau fakamanatuaga he Atua, lagomatai a tautolu ke taute e tau fifiliaga ne felauaki mo e amaamanakiaga ha tautolu he moui tukulagi he Parataiso ne mavehe he Atua. Ha kua maama mitaki e hala ha i mua, to maeke ia tautolu ke kitia e tau lauiaaga—mitaki po ke kelea—he tau puhala ka ō ai. (Roma 14:21; 1 Timoteo 6:9; Fakakiteaga 22:12) Kia onoono atu ā tautolu ke he puhala kua maeke he tau talahauaga matafeiga lahi he Atua tuga ne moua i loto he Tohi Tapu ke eke mo hulu ke he tau hui ha tautolu mo e maama ke he puhala ha tautolu.
‘Ko e Hulu ke he Haku Tau Hui’
6. Ko e heigoa e tau tutūaga ka eke e tau talahauaga he Atua ko e hulu ke he tau hui ha tautolu?
6 He tau aho oti, kua taute e tautolu e tau fifiliaga. Ko e falu fifiliaga kua tuga e ikiiki, ka e he falu magaaho kua fehagai a tautolu mo e tau tutūaga ne paleko ke he tau mahani, loto fakamooli, po ke tū uho ha tautolu. Ke kautū ke he tau kamatamata pihia, kua lata ia tautolu “ke mailoga e tau mena mitaki mo e tau mena kelea.” (Heperu 5:14) He moua e iloilo tonu he Kupu he Atua mo e lali ke maama e tau matapatu fakaakoaga i ai, kua fakamahani ai e loto manamanatu ha tautolu ke maeke ke taute e tau fifiliaga ne fiafia a Iehova.—Tau Fakatai 3:21.
7. Fakamaama e tuaga kaeke ke liga manako e Kerisiano ke feoaki mo e tau kapitiga gahua ne nakai talitonu.
7 Manamanatu ke he fakataiaga. Ko koe nakai ko e tagata kua lahi hane lali mooli ke fakafiafia e loto ha Iehova? (Tau Fakatai 27:11) Kaeke ke pihia, kua nava atu ki a koe. Ka e manamanatu la, ne atu he falu kapitiga gahua ki a koe e tiketi ke ō mo lautolu ke he taha feua sipote. Kua fiafia a lautolu he gahua auloa mo koe ti manako ke feoaki mo koe ka tuku e gahua. Liga kua malolō e manatu haau na nakai kelea e tau tagata nei. Ti liga ha ha foki ia lautolu e tau matapatu fakaakoaga mitaki. Ko e heigoa haau ka taute? To fai hagahaga kelea nakai kaeke ka talia e uiina? Maeke fēfē he Kupu he Atua ke lagomatai a koe ke taute e fifiliaga hako hagaao ke he mena nei?
8. Ko e heigoa e tau matapatu fakaakoaga faka-Tohi Tapu ka lagomatai a tautolu ke manamanatu hagaao ke he tau feoakiaga?
8 Mailoga e tau matapatu fakaakoaga gahoa he Tohi Tapu. Ti liga manatu fakamua e 1 Korinito 15:33, ne talahau: “Ko e feoaki mo lautolu kua mahani kelea kua kelea ai e tau mahani mitaki.” He tapiki ke he matapatu fakaakoaga nei kua pehē kia ke fakaheu katoatoa e koe a lautolu ne nakai talitonu? Ko e tali faka-Tohi Tapu ma e hūhū ia ko e nakai. Ha ko e mena na fakakite he aposetolo ko Paulo e manamanatu fakaalofa ma e “tau tagata oti,” putoia a lautolu ne nakai talitonu. (1 Korinito 9:22) Ko e aga pauaki he faka-Kerisiano ke fakakite e tautolu e fiafia ke he falu—putoia a lautolu ne nakai talitonu e tau taofiaga ha tautolu. (Roma 10:13-15) Mooli, kua maeke fēfē ia tautolu ke muitua ke he fakatonuaga ke ‘mahani mitaki ke he tau tagata oti kana’ ka fakamamao a tautolu he tau tagata ne liga manako ke he lagomatai ha tautolu?—Kalatia 6:10.
9. Ko e heigoa e fakatonuaga faka-Tohi Tapu kua lagomatai a tautolu ke fakalagotatai ke he fakafetuiaga ha tautolu mo e tau tagata gahua?
9 Pete ia, kua ha ha ai e kehekehe maaliali he fakakapitiga ke he tagata gahua mo e he eke mo kapitiga tata haana. Mena hanei ne putoia ai foki taha matapatu fakaakoaga faka-Tohi Tapu. Ne hataki he aposetolo ko Paulo e tau Kerisiano: “Aua neke hahamo a mutolu mo e nakai tatai fakalataha mo lautolu kua nakai tua.” (2 Korinito 6:14) Ko e heigoa e kakano he alaga kupu “nakai fakalataha mo lautolu kua nakai tua”? Ne fakamaama he falu fakaliliuaga he Tohi Tapu e tau kupu ia “ke nakai kau fakalataha,” “ke nakai lali ke gahua auloa ke tuga kua fetataiaki,” po ke “nakai ati e tau fakafetuiaga ne nakai tonu.” Ko e magaaho fe ka eke e fakafetuiaga mo e kapitiga gahua ke nakai tonu? He magaaho fe ka molea ai ti nakai tatai e tau hahamo? Ko e Kupu he Atua, ko e Tohi Tapu, kua maeke ke takitaki e lakaaga haau hagaao ke he tuaga nei.
10. (a) Fifili fēfē e Iesu e tau kapitiga? (e) Ko e heigoa e tau hūhū ka lagomatai e tagata ke taute e tau fifiliaga hako hagaao ke he tau feoakiaga?
10 Kia mailoga e fakafifitakiaga ha Iesu, ne fakaalofa ke he tau tagata tali mai he tufugatia ha lautolu. (Tau Fakatai 8:31) He nofo he lalolagi, ne feaki e ia e pipiaga tata mo e tau tutaki haana. (Ioane 13:1) Ne logona foki e ia e “fakaalofa” ma e tagata ne fakahehē fakalotu. (Mareko 10:17-22) Ka e fakatoka foki e Iesu e tau kaupāaga maaliali hagaao ke he fifiliaga haana he tau kapitiga tata. Ne nakai fakafetui tata a ia mo e tau tagata ne nakai fiafia mooli ke taute e finagalo he Matua haana. He taha magaaho ne pehē a Iesu: “Ko e haku a tau kapitiga a mutolu, kaeke ke eke e mutolu e tau mena oti kana kua tala atu ai au kia mutolu.” (Ioane 15:14) Mooli, liga kua kapitiga mitaki a koe mo e taha tagata gahua. Ka e hūhū hifo: ‘Kua makai kia e tagata nei ke taute e tau mena ne poaki e Iesu? Kua manako nakai a ia ke ako hagaao ki a Iehova, ko Ia ne fekau e Iesu a tautolu ke tapuaki ki ai? Kua tatai kia e tau tutūaga haana hagaao ke he mahani ke tuga haaku ko e Kerisiano?’ (Mataio 4:10) He tutala a koe mo e tau kapitiga gahua haau mo e lali ke fakagahuahua e tau tutūaga faka-Tohi Tapu, to kitia maali e tali ke he tau hūhū nei.
11. Talahau e tau tutūaga ne kua lata he tau talahauaga he Atua ke takitaki e tau lakaaga ha tautolu.
11 Kua ha ha ai e falu tutūaga ne eke e tau talahauaga he Atua ke tuga e hulu ke he tau hui ha tautolu. Ke fakatai ki ai, liga kua foaki e gahua ke he Kerisiano ne nakai fai gahua ka kua fia manako ke moua mafiti ai. Ka kua lahi e magaaho ka fakamole ke he gahua nei, ti ka talia e ia, to fakatō e ia e falu feleveiaaga Kerisiano mo e nakai fakalataha ke he falu matagahua ne matutaki ke he tapuaki mooli. (Salamo 37:25) Liga lahi e kamatamata ke he taha Kerisiano foki ke kitekite e fakafiafiaaga ne maaliali kua holia e tau matapatu fakaakoaga he Tohi Tapu. (Efeso 4:17-19) Ka e liga kua hukia vave taha ha ko e tau nakai mitaki katoatoa he tau matakainaga talitonu. (Kolose 3:13) He tau tutūaga oti ia, kia lata ia tautolu ke toka e Kupu he Atua ke eke mo hulu ke he tau hui ha tautolu. Ti ko e muitua mooli ke he tau matapatu fakaakoaga he Tohi Tapu ka kautū a tautolu ke he ha paleko he moui. Ko e Kupu he Atua kua “aoga ni ke fakaako ai, ke fakatonu ai, ke akonaki ai, ke fakailoilo ai foki ke he tututonu.”—2 Timoteo 3:16.
Ko e “Maama ke he Haku a Puhala”
12. Puhala fe ne eke e tau talahauaga he Atua mo maama ke he ha tautolu a puhala?
12 Ne talahau foki he Salamo 119:105 ko e tau talahauaga he Atua ke maama ai e puhala ha tautolu, he fakakikila e puhala ha i mua. Kua nakai pouligia a tautolu hagaao ke he vahā anoiha, ha kua fakamaama mai he Tohi Tapu e kakano he tau tutūaga fakaagitau he lalolagi mo e ke he fakahikuaga ka tupu i mua. E, kua mailoga e tautolu hane nonofo a tautolu he “tau aho fakamui” he fakatokaaga kelea nei. (2 Timoteo 3:1-5) Kua lata mogoia ke fakaohooho fakahokulo he tau mena kua iloa e tautolu e puhala moui ha tautolu mogonei. Ne tohia he aposetolo ko Peteru: “Ko e hanai, to fakaotioti e tau mena oti ia, po ke fefe ha mutolu a mahani ke lata ai ke he tau mahani mitaki mo e tau mahani Atua; kua fakatalitali mo e foli atu kia hoko mai e aho he Atua.”—2 Peteru 3:11, 12.
13. Kua lata fēfē e mafiti lahi he vahā ha tautolu ke lauia e manamanatuaga mo e puhala moui ha tautolu?
13 Ko e manamanatuaga mo e puhala moui ha tautolu kua lata ke fakaata e talitonu mauokafua ha tautolu ‘hane mole atu e lalolagi katoa mo e haana tau manako lahi.’ (1 Ioane 2:17) He fakagahua e tau takitakiaga he Tohi Tapu ka lagomatai a tautolu ke taute e tau fifiliaga pulotu hagaao ke he tau foliaga anoiha. Ke fakatai ki ai, ne pehē a Iesu: “Ka kia kumikumi fakamua a mutolu ke he kautu he Atua mo e hana tututonu, ati lafi atu ai e tau mena oti ia kia mutolu.” (Mataio 6:33) Kua nava lahi ke kitia e tokologa he tau fuata hane fakakite e tua ke he tau kupu a Iesu he tutuli ke gahua mau he fekafekauaga! Ko e falu—putoia e magafaoa katoa—kua foaki noa ke hiki ke he tau motu ne manako lahi ma e tau tagata fakapuloa he Kautu.
14. Fakalahi fēfē he taha magafaoa Kerisiano e fekafekauaga ha lautolu?
14 Mailoga taha magafaoa Kerisiano tokofā ne hiki mai he Tau Faahi Kaufakalataha ke he Repapiliki a Tominika ke fekafekau he fakapotopotoaga he taone ne 50,000 he puke tagata. Ne ha ha he fakapotopotoaga kavi ke 130 e tagata fakailoa he Kautu. Ka e ia Aperila 12, 2006, kavi ke 1,300 ne ō ke he Fakamanatuaga he mate he Keriso! Ko e fonua he taone ia kua ‘hina lahi ma e heleheleaga’ ati he molea laia e lima mahina, ne takitaki he matua taane, matua fifine, tama taane, mo e tama fifine nei 30 e fakaakoaga Tohi Tapu he katoa. (Ioane 4:35) Ne fakamaama he matua taane: “Kua ha ha he fakapotopotoaga 30 e matakainaga ne hiki mai ke lagomatai. Kavi ke 20 ne o mai he Tau Faahi Kaufakalataha, ka ko lautolu ne toe kua o mai he Bahamas, i Kanata, Italia, Niu Silani, mo Sepania. Kua hohoko mai a lautolu mo e mautali ke fakalataha ke he fekafekauaga ti kua lahi e fakaohoohoaga ke he makai he tau matakainaga he matakavi.”
15. Ko e heigoa e tau monuina ne olioli e koe ha kua tuku fakamua ke he moui haau e tau mena he Kautu?
15 Maama ai, tokologa kua nakai maeke ke hiki ke he taha motu ke fekafekau he matakavi ne ha ha ai e manako lahi mahaki. Ka ko lautolu ne maeke—po kua fahia ke hikihiki e tau tutūaga ke atā ai—ka iloa mooli e tau monuina loga he fakalataha ke he vala nei he fekafekauaga. Ti, he ha matakavi ni ne fekafekau ai a koe, kia nakai fakatō e fiafia ka moua e koe he fekafekau ki a Iehova mo e malolō katoa haau. Kaeke ke tuku fakamua e koe he moui haau e tau mena he Kautu, ne mavehe mai a Iehova ke “liligi atu e . . . monuina ma mutolu, ato lahi ue atu ni haia.”—Malaki 3:10.
Aoga Mai he Takitakiaga a Iehova
16. To aoga fēfē a tautolu he toka e tau talahauaga he Atua ke takitaki a tautolu?
16 Tuga he kitia e tautolu, nukua takitaki he tau talahauaga ha Iehova a tautolu ke he ua e puhala tatai. Ne eke ai ko e hulu ke he tau hui ha tautolu, kua lagomatai ki a tautolu ke ō ki mua he puhala hako mo e takitaki a tautolu he magaaho ka taute e tau fifiliaga. Ti maama ai e puhala ha tautolu, maeke ai ia tautolu ke kitia maali e tau mena ha i mua. Kua lagomatai ai a tautolu ke muitua ke he tomatomaaga ha Peteru: “Kia pipi hake e tau tokupu he tau loto ha mutolu, kia nonofo fakalatalata, kia amaamanaki mo e loto katoatoa, ke he fakaalofa noa ke ta mai kia mutolu ka fakakite mai a Iesu Keriso.”—1 Peteru 1:13.
17. To lagomatai fēfē he fakaakoaga Tohi Tapu a tautolu ke muitua ke he takitakiaga he Atua?
17 Nakai fakauaua ai na foaki e Iehova e takitakiaga. Ko e hūhū hanei, To omaoma nakai a koe ki ai? Ke maama e takitakiaga ne foaki e Iehova, kia eke ā mo fifiliaga haau ke totou taha vala he Tohi Tapu he tau aho takitaha. Kia manamanatu fakahokulo ke he mena ne totou e koe, lali ke maama ko e heigoa la e finagalo a Iehova, mo e manamanatu ke he tau puhala kehekehe ka fakagahua e tau manatu ia ke he moui haau. (1 Timoteo 4:15) Ti fakaaoga e ‘mena kua lata ia koe ke eke’ ka taute e koe e tau fifiliaga haau.—Roma 12:1.
18. Ka toka e tautolu e Kupu he Atua ke takitaki a tautolu, ko e heigoa e monuina ka moua e tautolu?
18 Kaeke ke fakaatā ai e tautolu, ko e tau matapatu fakaakoaga ne moua i loto he Kupu he Atua ka lagomatai a tautolu mo e foaki e takitakiaga kua lata ke taute e tautolu e tau fifiliaga hagaao ke he puhala hako ke muitua ki ai. Lata ia tautolu ke mauokafua ko e tau talahauaga ha Iehova ne tohi hifo “kua fakailoilo a lautolu kua goagoa.” (Salamo 19:7) He magaaho ne fakaatā e tautolu e Tohi Tapu ke takitaki a tautolu, ne moua e tautolu e monuina he loto manamanatu meā mo e makona he fakafiafia a Iehova. (1 Timoteo 1:18, 19) Kaeke ke toka e tautolu e tau talahauaga he Atua ke takitaki e tau lakaaga ha tautolu he tau aho takitaha, to palepale e Iehova a tautolu aki e monuina mua ue atu he moui tukulagi.—Ioane 17:3.
Manatu Nakai e Koe?
• Kua aoga he ha ke toka a Iehova ko e Atua ke takitaki e tau lakaaga ha tautolu?
• Puhala fe kua eke e tau talahauaga he Atua mo hulu ke he tau hui ha tautolu?
• Maeke fēfē e tau talahauaga he Atua ke eke mo maama ke he ha tautolu a puhala?
• Lagomatai fēfē he fakaakoaga Tohi Tapu a tautolu ke muitui ke he takitakiaga he Atua?
[Tau Hūhū he Fakaakoaga]
[Fakatino he lau 19]
Magaaho fe ka nakai pulotu ke lafi mo e tau tagata nakai talitonu?
[Fakatino he lau 20]
Ko e tau kapitiga tata ha Iesu ko lautolu ne taute e finagalo a Iehova
[Tau Fakatino he lau 21]
Fakakite kia he puhala moui ha tautolu kua tuku fakamua e tautolu e tau mena he Kautu?