Ko e Tufaaga ka Falanaki a Koe ki Ai

“KAEKE ke moua e koe e fakailoaaga he tohi mai he taha tagata kua talahau ko e fai tufaaga moua noa ne leo atu ki a koe, kia mataala. Liga to eke a koe mo matahele he tagata eke lagatau fakavaia.”

Pihia e hatakiaga ne tohi he United States Postal Inspection Service he fahi Web. Ko e ha? Ha kua totou afe e tau tagata ne moua e fakailoaaga he puha tohi he pehe, ‘Ne toka hifo he magafaoa hau ne mate ki a koe e tufaaga.’ Ti ko e fua, tokologa ne fakahu atu e totogi he $30 po ke molea atu ma e ‘hokotaki he tufaaga’ ne tuga ke fakamaama aki e moua maiaga he tufaaga ne toka ai mo e puhala ke fakamau aki. Ne hogohogomanava lahi a lautolu. Ne moua e lautolu oti ne talitonu e hokotaki pihia foki​—ti ko e amanakiaga he ha tagata ke moua taha mena kua teao ai.

Ko e tau lagatau pihia kua fakataki e manako moli he tau tagata ke moua e tufaaga. Ka e, kua vagahau fiafia e Tohi Tapu hagaao ki a lautolu ne foaki e tufaaga he pehe ai: “Kua tufatufa he tagata mahani mitaki hana tau mena ke he fanau he hana fanau.” (Tau Fakatai 13:22) Ko e mena moli hanei, ko Iesu Keriso ni hokoia ne fakailoa mo e tokiofa e talahauaga ke he hana Lauga he Mouga: “Fiafia a lautolu kua loto molu, ha ko e mena to moua e lautolu e tufaaga ke he lalolagi.”​—Mataio 5:5, NW.

Ne fakamanatu mai he tau kupu ha Iesu e mena ne omoomoi he agaga ke tohi he Patuiki ko Tavita he tau senetenari fakamua atu: “To eke e lalolagi mo tufaaga ha lautolu ne mahani molu; ti fiafia ai a lautolu ke he lahi he mafola.”​—Salamo 37:11 KJ.

“Eke e lalolagi mo tufaaga”​—ko e amaamanakiaga fulufuluola ha ia! Ka e moli kia a tautolu ko e mena nei nakai ni ko e taha puhala fakavaia ne talaga ke fofo e tau tagata he taha mena? E, maeke ia tautolu. Ha ko e lalolagi ko e vala he tufugatia mua ue atu ha Iehova, ko ia ko e Taute mo e Pule kua moua e tonuhia matafakatufono ke age ai ke he ha tagata kua fifili e ia. He puhala he Patuiki ko Tavita, ne taute e Iehova e maveheaga fakaperofeta nei ke he Hana Tama fakahele, ko Iesu Keriso: “Kia ole mai a koe kia au, ti ta atu ai e au e tau motu kehe mo [tufaaga] hāu; mo e tau kala he lalolagi ke eke māu.” (Salamo 2:8) Ma e kakano nei, ne fakamaama he aposetolo ko Paulo hagaao ki a Iesu ko ia “ne kotofa [he Atua] mo mataohi he tau mena oti kana.” (Heperu 1:2) Maeke ia tautolu, mogoia, ke mauokafua katoatoa he magaaho ne vagahau a Iesu to “eke e lalolagi mo tufaaga” ha lautolu ne mahani molu, ne talahau e ia mo e fakamoli, ti ha ha ia ia e pule tonu ke fakakatoatoa hana maveheaga.​—Mataio 28:18.

Ko e huhu aoga mogoia, ko e, To fakamoli fefe e maveheaga ia? He tau mena oti ne ono a tautolu ki ai he vaha nei, kua tuga ko lautolu ne favale mo e manamanatu fakatokoluga hane moua e kautuaga ti hane uta e lautolu e tau mena ne manako a lautolu ki ai. Tufaaga fe  ne toe ma lautolu ne mahani molu? Lafi ki ai, kua malaia e lalolagi he tau lekua hagahagakelea he kiva, ti ko e tau koloa i ai kua malona ha ko e tau tagata lotokai mo e fakateaga. To ha ha ai nakai e lalolagi kua aoga ke eke mo tufaaga? Kua uiina e mautolu a koe ke totou e vala tala ne mui mai ke moua e tali ke he tau huhu aoga nei mo e falu foki.

[Fakatino he lau 3]

To moua nakai e koe e tufaaga moli?