Kua Lata ke Uhouho e Mataala ha Tautolu
Kua Lata ke Uhouho e Mataala ha Tautolu
“Hanai, kia mataala [“tumau,” NW] a mutolu; ha kua nakai iloa e mutolu po ke magaaho fe ke hau ai e Iki ha mutolu.”—MATAIO 24:42.
1, 2. Kua fakakite he heigoa hane nonofo a tautolu mogonei he fakaotiaga he fakatokaaga nei?
“KE HE tau mena oti, ko e senetenari ke uafulu aki kua fakaohooho he felakutaki,” he talahau he tagata tohia tohi ko Bill Emmott. He talahau kua logona ke he tau magahala oti he fakamauaga tuai he tagata e kavega mamafa he tau felakutaki mo e mahani favale, ne matutaki atu a ia: “Ko e senetenari ke uafulu aki kua nakai kehe, ka kua kehe ke he laulahiaga. Ko e senetenari fakamua la ia ke fakahoko e latauaga moli ke he lalolagi katoa . . . Ti, tuga ke peehi e manatu ia, kua fakahoko ai nakai taha ni e latauaga pihia ke he lalolagi katoa, ka e ua.”
2 Ko e tau felakutaki ne putoia e ‘taha motu ke he taha motu mo e taha kautu ke he taha kautu’ kua talahau tuai e Iesu Keriso. Pete he pihia, ko e taha vala ni a ia he ‘fakamailoga he ha ha hinei he Keriso mo e he fakaotiaga he fakatokaaga nei.’ I loto he perofetaaga mahuiga nei, ne totoku foki e Iesu e tau hoge, tau tatalu, mo e tau mafuike. (Mataio 24:3, NW; 7, 8; Luka 21:6, 7, 10, 11) Ke he tau puhala loga, kua malikiti hake e tau matematekelea pihia ke he laulahiaga mo e ke kelea muitui. Ko e mahani kelea he tagata kua tupu tolomaki, tuga ne kitia ke he hana aga ke he Atua mo e ke he hana tuutakaina. Ko e malolo hifo he tau mahani mitaki mo e malikiti hake he holifono mo e he mahani favale kua kitia maaliali. Kua eke e tau tagata ke manako lahi ke he tau tupe ka e nakai ke he Atua, he manako lahi ke he fiafia. Kua fakakite he tau mena oti nei kua nonofo a tautolu ke he “tau aho uka.”—2 Timoteo 3:1-5.
3. Kua lata ke lauia fefe a tautolu he “tau fakamailoga he tau vaha”?
3 Fefe e onoonoaga hau ke he tau puhala ne fakaauatu aki e kelea ke he tau tutuaga he tagata? Nukua fakateaga e tokologa, mo e fakakikiha foki, ke he tau matematekelea ne tutupu he aho. Ko e tau tagata tane pule malolo mo e pulotu he lalolagi kua nakai mailoga e kakano he “tau fakamailoga he tau vaha”; nakai foaki foki he tau takitaki lotu e takitakiaga kua lata ma e mena nei. (Mataio 16:1-3) Ka e tomatoma age a Iesu ke he tau tutaki hana: “Hanai, kia mataala tumau a mutolu, ha kua nakai iloa e mutolu po ke aho fe ke hau ai e Iki ha mutolu.” (Mataio 24:42) Kua nakai ni fakamalolo mai a Iesu he mena nei ki a tautolu ke mataala ka e “kia mataala tumau.” Ke mataala tumau, kua lata ia tautolu ke fakakaukau mo e mautali mau. Kua lata ai ke mua atu e mena ka taute he fakapuloa noa kua nonofo a tautolu he tau aho fakamui, mo e nakai ni mailoga hane nonofo a tautolu he tau aho uka. Kua lata ia tautolu ke mau nivaniva e mauokafua nukua “tata mai tuai e fakatulakiaga he tau mena oti.” (1 Peteru 4:7) Ko e magaaho ia kua uhouho e mataala ha tautolu. Ti, hanei e huhu ne kua lata ia tautolu ke manamanatu ki ai: ‘Ko e heigoa ka lagomatai a tautolu ke fakamalolo e mauokafua ha tautolu kua tata mai tuai e fakatulakiaga?’
4, 5. (a) Ko e heigoa ka fakamalolo e mauokafua ha tautolu kua tata lahi mai tuai e fakatulakiaga he fakatokaaga kelea he vaha nei, mo e ko e ha? (e) Ko e heigoa taha tataiaga ke he vaha ha Noa mo e ha ha hinei he Tama he tagata?
4 Mailoga la e tau tutuaga ne holofa he magahala he vaha fakamua ato tupu e taha mena kehe lahi he fakamauaga tuai he tagata—ko e Fakapuke mahaki he vaha ha Noa. Ne kelea lahi mahaki e tau tagata ti kua ‘mamahi e finagalo a Iehova.’ Ne fakapuloa e ia: “To tafi kehe e au mai he fuga kelekele e tau tagata ne eke e au.” (Kenese 6:6, 7) Ti ko e mena ia ni ne taute e ia. He fakakite e tataiaga ke he magaaho ia mo e mogonei, ne pehe a Iesu: “Ke tuga ni e tau aho a Noa, ti pihia ka ha ha hinei e Tama he tagata.”—Mataio 24:37, NW.
5 Kua kakano lahi ai ke talitonu kua tatai e logonaaga a Iehova hagaao ke he lalolagi he vaha nei ke tuga e logonaaga hana hagaao ke he lalolagi ato Fakapuke. Ha kua tamai e ia e fakatulakiaga ke he lalolagi nakai mahani Atua he vaha ha Noa, to fakamahaikava moli e ia e lalolagi mahani kelea he vaha nei. He maama mitaki e tataiaga ke he vaha ia mo e he vaha ha tautolu nukua lata ke fakamalolo aki e mauokafua ha tautolu kua tata mai e fakatulakiaga he lalolagi ke he vaha nei. Ko e heigoa, mogoia, e tau tataiaga? Kua ha ha ai lima. Ke fakamuaaki, ko e hatakiaga ke he fakamahaikava hane hau kua talahau fakahakotika.
Hataki ke he “Tau Mena Nakai La Kitia”
6. Ko e heigoa ne fifili e Iehova ke taute he vaha ha Noa?
6 He vaha ha Noa, ne fakapuloa e Iehova: “Nakai taufetoko tukulagi haku [a]gaga mo e tau tagata, ha ko lautolu foki ko e tau tagata ni; ka ko e tau aho ha lautolu ko e taha teau he tau tau ia, ti uafulu ni e tau.” (Kenese 6:3) Ko e matakupu he poakiaga faka-Atua nei he 2490 F.V.N. ne kua fakamailoga aki e kamataaga he fakatulakiaga ma e lalolagi nakai mahani Atua ia. Kia manamanatu a ke he kakano he tau mena ia ki a lautolu ne nonofo he magaaho ia! To 120 ni e tau tau ato fakahoko mai e Iehova “e fakapuke ki luga he kelekele, to fakaoti ai e tau mena oti kana ha i ai e fafagu he moui i lalo ni he lagi.”—Kenese 6:17.
7. (a) Ko e heigoa e tali ha Noa ke he hatakiaga hagaao ke he Fakapuke? (e) Kua lata ke fefe e tali ha tautolu ke he tau hatakiaga hagaao ke he fakatulakiaga he fakatokaaga nei?
7 Kua leva tuai he moua e Noa e hatakiaga ke he matematekelea hane hau, mo e fakaaoga fakapulotu e ia e magaaho ia ke tauteute ma e fakamouiaga. “Ha kua fakailoa he Atua kia ia e tau mena nakaila kitia ke he vaha ia,” he talahau he aposetolo ko Paulo, “ne taute ai e Noa e vaka mo e matakutaku, kia momoui ai hana faoa.” (Heperu 11:7) Ka e kua a tautolu? Nukua kavi tuai ke 90 e tau tau he mole tali mai he kamata e vaha fakahiku he fakatokaaga nei he 1914. Kua haia moli a tautolu he “vaha ke fakahiku ai.” (Tanielu 12:4) Kua lata ke fefe e tali ha tautolu ke he tau hatakiaga ne foaki mai ki a tautolu? “Ko e tagata kua eke e finagalo he Atua to tumau a ia tukulagi,” he talahau he Tohi Tapu. (1 Ioane 2:17) Ko e magaaho hanei ke taute mo e manamanatuaga fakamafiti lahi e finagalo ha Iehova.
8, 9. Ko e heigoa e tau hatakiaga kua foaki e Iehova ke he tau vaha fou nei, mo e kua fakapuloa fefe ai?
8 He tau vaha fou nei, ko e tau tagata fakaako fakamoli ke he Tohi Tapu kua ako mai he tau Tohiaga Tapu omoi agaga ko e fakatokaaga nei kua fakafili tuai ke fakamahaikava. Talitonu nakai a tautolu ke he mena nei? Kia mailoga e mena ne talahau fakamahino e Iesu Keriso: “[To] lahi ai e matematekelea, nakai pihia taha mena tali mai he kamataaga he lalolagi, kua hoko ni ke he vaha nai; ti nakai tuai pihia foki.” (Mataio 24:21) Ne talahau foki e Iesu to hau a ia ko e Fakafili ne kotofa he Atua mo e vevehe e tau tagata tuga ne vevehe he leveki mamoe e tau mamoe mai he tau koti. Ko lautolu kua kitia ke nakai aoga to “o atu ai a lautolu ke he fakahala tukulagi; ka ko e tau tagata tututonu ke he moui tukulagi.”—Mataio 25:31-33, 46.
9 Kua tuku e Iehova e tau hatakiaga nei ki mua he tau tagata kakano he tau fakamanatuaga he magaaho tonu puhala he tau mena kai fakaagaga ne foaki mai he “fekafekau fakamoli mo e loto matala.” (Mataio 24:45-47) Mua atu, ko e tau motu oti, tau magafaoa, tau vagahau, mo e tau tagata kua ui ki ai ke “kia matakutaku a mutolu ke he Atua; mo e ta age kia ia e fakahekeaga, ha kua hoko mai e magaaho he hana fakafiliaga.” (Fakakiteaga 14:6, 7) Ko e vala alito he fekau he Kautu ne fakamatala he Tau Fakamoli a Iehova ke he lalolagi katoa, ko e hatakiaga to nakai leva ti utakehe he Kautu he Atua e pule fakatagata. (Tanielu 2:44) Ko e hatakiaga nei kua nakai lata ke uta fakamama. Nukua fakatumau e Atua Mua Ue Atu ke he tau kupu hana. (Isaia 55:10, 11) Ne taute pihia e ia he vaha ha Noa, mo e to taute pihia e ia he vaha ha tautolu.—2 Peteru 3:3-7.
Kua Holofa e Mahani Teteki he Fakatane mo e Fifine
10. Ko e heigoa ka talahau hagaao ke he mahani teteki he fakatane mo e fifine he vaha ha Noa?
10 Kua fakatatai atu e vaha ha tautolu ke he vaha ha Noa ke he taha puhala. Ne poaki e Iehova e tagata tane mo e fifine fakamua ke “kia fakapuke foki e lalolagi” aki e tau tagata, he fakaaoga fakalilifu e tau malolo he mahani fakatane mo e fifine ne foaki age he Atua ki loto he fakaholoaga he fakamauaga. (Kenese 1:28) He vaha ha Noa, ne takiva he tau agelu liuliu e tau tagata aki e mahani fakatane mo e fifine nakai lilifu. Ne o hifo mai a lautolu ke he lalolagi, fakafaliu e tau tino, mo e matutaki atu mo e tau fifine fulufuluola, ti fakatupu mai e fanau ne hafa tagata, hafa temoni—tau Nefalimi. (Kenese 6:2, 4) Ko e agahala he tau agelu mahani feuaki nei kua fakatatai ke he tau mahani fakateteki ha Sotoma mo Komora. (Iuta 6, 7) Ko e fakahiku, ne holofa lahi e mahani fakateteki he fakatane mo e fifine he vaha ia.
11. Ko e heigoa e tuaga ke he tau mahani he vaha ha tautolu ne kua tatai atu ke he vaha ha Noa?
11 Ka e kua e tuaga he tau mahani he vaha nei? He tau aho fakahiku nei, kua viko takai ni e tau momoui he tokologa ke he mahani fakatane mo e fifine. Ne fakamaama fakamahino mai e Paulo a lautolu ia “kua nakai tuai logona e lautolu ha mena”; ti tokologa ne tuku e lautolu a lautolu “ke he matahavala ke eke e tau mena kelea oti kana, mo e manako lahi ki ai.” (Efeso 4:19) Ko e tau fakatino telefua, mahani fakatane mo e fifine ka e nakai mau, ekefakakelea e fanau ke he mahani fakatane mo e fifine, mo e tau mahani fakasotoma kua mahani mau. Kua fita e falu he “moua foki e lautolu e taui ke he tau tino ha lautolu” ke tuga e tau gagao pikitia he mahani fakatane mo e fifine, malolo hifo he moui magafaoa, mo e falu a matematekelea foki.—Roma 1:26, 27.
12. Ko e ha kua lata ia tautolu ke feaki e vihiatia lahi ma e tau mena kelea?
12 He vaha ha Noa, ne fakahoko e Iehova e Fakapuke lahi mo e tamai ai e fakatulakiaga ke he lalolagi velagia ia ke he mahani fakatane mo e fifine. Kia aua neke galo ia tautolu ko e tau aho nei kua tatai moli tuga ni e vaha ha Noa. Ko e ‘matematekelea lahi’ hane hau to fakamea e lalolagi mai he ‘tau tagata feuaki, tau tagata faivao, tau tagata kua fakakelea e lautolu a lautolu, mo e tau tagata kua eke e mahani Sotoma.’ (Mataio 24:21; 1 Korinito 6:9, 10; Fakakiteaga 21:8) Kua uhouho ai ke feaki e tautolu e vihiatia lahi ma e tau mena kua kelea mo e fakamamao mai he tau tutuaga ka fakataki atu ke he mahani feuaki!—Salamo 97:10; 1 Korinito 6:18.
Ne Puke e “Lalolagi ke he Favale”
13. Ke he vaha ha Noa, ko e ha e lalolagi ne ‘puke ai ke he favale’?
13 He tuhi atu ke he taha kitiaaga foki he vaha ha Noa, ne talamai e Tohi Tapu: “Ne kelea ni e lalolagi ki mua he Atua; ti puke ni e lalolagi ke he favale.” (Kenese 6:11) Kua nakai fou e mahani favale. Ko e tama tane ha Atamu ko Kaino ne kelipopo e tehina mahani tututonu hana. (Kenese 4:8) He fakakite e agaga favale he vaha hana, ne fati e Lameko e poeme ne fakahakehake hagaao ke he puhala ne kelipopo e ia e fuata tane, liga ke papale aki ni a ia. (Kenese 4:23, 24) Ko e tau mena fou he vaha ha Noa ko e laulahiaga he mahani favale. He mau he tau agelu liuliu he Atua e tau fifine he lalolagi mo e fanafanau e tau tama—ko e tau Nefalimi—ne malikiti hake e mahani favale ke he tuaga ne nakai la iloa ke he vaha fakamua. Ne fakakite he NWT ko e kupu Heperu fakamua ne hagaao ke he tau tagata makimaki mahani favale nei ne kakano ko e “tau Fakaveveli”—“ko lautolu ne fakatupu falu ke veveli hifo.” (Kenese 6:4, matahuitala) Ti ko e fua, ne “puke ni e lalolagi ke he favale.” (Kenese 6:13) Manamanatu la ke he tau paleko ne liga fakafeao mo Noa he feaki hake e magafaoa hana ke he takatakaiaga pihia! Pete ia, ne eke a Noa ke ‘tututonu ki mua a Iehova ke he hau nai.’—Kenese 7:1.
14. Kua eke fefe e lalolagi he vaha nei ke ‘puke ke he favale’?
14 Nukua leva mai tigahau e ha ha ai e mahani favale mo e tau tagata. Ka e tuga kua moli ke he vaha ha Noa, kua kitia moli foki e mahani favale ke he vaha ha tautolu ke he fuafuaaga lahi. Kua logona tumau e tautolu hagaao ke he favale ke he tau loto kaina, tau gahua fakamatakutakuina, tau matagahua kelipopo fakamatakau, mo e tokologa ne kelipopo he tau tagata taufana ka e nakai fai kakano moli. Ti lafi ke he tau mena oti nei ko e fakamaligi toto ne fakatupu he tau felakutaki. Kua liu foki e lalolagi puke ke he favale. Ko e ha? Ko e heigoa ne lafi ke he malikiti hake ia? Kua fakakite mai he tali e taha mena tatai ke he vaha ha Noa.
15. (a) Ko e heigoa ne lafi ke he malikiti hake he mahani favale he tau aho fakahiku? (e) Ko e heigoa e fakahikuaga ne kua maeke ia tautolu ke mauokafua ki ai?
15 He magaaho ne fakatu ai e Kautu faka-Mesia he Atua ki luga he lagi he 1914, ko e Patuiki fakafoufou ko Iesu Keriso, ne taute e ia taha mena uho lahi. Ne liti hifo a Satani ko e Tiapolo mo e tau temoni hana mai he lagi ke he takeleaga he lalolagi. (Fakakiteaga 12:9-12) Fakamua to hoko e Fakapuke, ne tiaki pulenoa he tau agelu liuliu e tuaga ha lautolu i luga he lagi; ka e he vaha nei ne vega pauaki a lautolu. Mua atu, kua nakai maeke ia lautolu ke fakafaliu ke he tau tino tagata he lalolagi ke olioli e tau fakafiafiaaga hehe ke he tino. Ti he hogohogomanava, ita, mo e matakutaku ke he fakafiliaga ne tatali ki ai, ne fakaohooho e lautolu e tau tagata mo e tau fakatokatokaaga ke putoia ke he tau gahua kelea muikau he holifono mo e favale ne kua mua atu mai he tau mena he vaha ha Noa. Ne fakamahaikava e Iehova e lalolagi ato hoko e Fakapuke he mole e takiva he tau agelu liuliu mo e fanau ha lautolu aki e mahani kelea. Kia iloa moli ai, to taute pihia foki e ia ke he vaha ha tautolu! (Salamo 37:10) Pete he pihia, kua iloa e lautolu ne mataala tumau he vaha nei kua teitei tata mai e fakahaoaga ha lautolu.
Kua Fakamatala e Fekau
16, 17. Ko e heigoa e tataiaga ke fa aki he vaha ha Noa mo e vaha ha tautolu?
16 Ko e manatu ke fa aki ne tatai he vaha fou nei mo e lalolagi ato Fakapuke kua kitia ke he gahua ne kotofa ki a Noa ke taute. Ne ta e Noa e vaka makimaki. Ti “ko e ogo” foki a ia. (2 Peteru 2:5) Ko e heigoa e fekau ne fakatuogo e ia? Kua fakatuogo moli e Noa e lata ke fakatokihala mo e hatakiaga ke he fakamahaikava hane hau. Ne talahau e Iesu ko e tau tagata he vaha ha Noa ne “nakai iloa e lautolu ato hoko mai e fakapuke, mo e uta kehe a lautolu oti.”—Mataio 24:38, 39.
17 Tatai foki, he fakamakutu e Tau Fakamoli a Iehova ke fakamoli e kotofaaga ha lautolu ke fakamatala, kua fakapuloa ai e fekau he Kautu he Atua ke he lalolagi katoa. Teitei ni ke he tau vala oti he lalolagi, kua maeke he tau tagata ke logona mo e totou e fekau he Kautu ke he tau vagahau ni ha lautolu. Ko e mekasini Kolo Toko ne fakapuloa e Kautu ha Iehova Atua, kua tufatufa ai ke molea e 25,000,000 ti kua lomi ke molea e 140 e tau vagahau. Moli ni, hane fakamatala e tala mitaki he Kautu he Atua “ke he lalolagi oti, ke eke mo talahau ke he tau atu motu oti.” He magaaho ka fakakatoatoa e gahua ia ke he mena ne manako ki ai e Atua, ti hoko moli mai e fakaotiaga.—Mataio 24:14.
18. Puhala fe ne tatai ai e tali he tokologa ke he gahua fakamatala ha tautolu mo e tali he laulahi he tau tagata he vaha ha Noa?
18 He mailoga e kaumahala ke he tau mena fakaagaga mo e ke he tau mahani he vaha fakamua ato Fakapuke, kua nakai uka ke manamanatu ke he puhala kua eke e magafaoa ha Noa ko e tau mena fefeua he tau katofia nakai talitonu mo e tau mena ke ekefakakelea mo e va ki ai. Ati hoko mai moli e fakatulakiaga. Tatai foki, “ko e tau tagata va” kua holofa he tau aho fakahiku. “Ka to hau e aho [ha Iehova] tuga ne kaiha ke he po,” he talahau he Tohi Tapu. (2 Peteru 3:3, 4, 10) To hoko mai moli ni he magaaho kotofa. To nakai mule mai. (Hapakuka 2:3) Ti kua pulotu lahi ai a tautolu ke mataala tumau!
Tokogaogao Hokoia ne Hao
19, 20. Ko e heigoa e tatai kua maeke ia tautolu ke kitia ke he Fakapuke mo e ke he fakamahaikava he fakatokaaga nei?
19 Ko e tatai ke he vaha ha Noa mo e vaha ha tautolu kua nakai fakakaupa ke he mahani kelea he tau tagata mo e ha lautolu a fakamahaikava. Ke tuga he fai tagata ne hao mai he Fakapuke, to ha ha i ai a lautolu ka hao mai he fakaotiaga he fakatokaaga nei. Ko e tau tagata ne hao mai he Fakapuke ko lautolu ne mahani totonu ne nakai nonofo tuga e tau tagata tokologa. Ne omaoma a lautolu ke he hataki faka-Atua mo e fakatumau ke vevehe kehe mai he lalolagi mahani kelea he vaha ia. “Ko Noa kua ofania a ia e Iehova,” he talahau he Tohi Tapu. “Ko Noa ko e tagata tututonu ia mo e mahani hakohako ke he hana hau.” (Kenese 6:8, 9) Mai he tau tagata oti kana, taha ni e magafaoa, ko e ‘tau tagata tokogaogao, ko e tokovalu ni, ne hao ai ke he vai.’ (1 Peteru 3:20) Ti ki a lautolu ne foaki e Iehova ko e Atua e poakiaga, he talahau: “Kia fanau a mutolu, ti fakatokologa, ti fakapuke e mutolu e lalolagi.”—Kenese 9:1.
20 Kua fakamoli mai e Kupu he Atua ki a tautolu “ko e moto tagata tokologa” to “o mai he matematekelea lahi.” (Fakakiteaga 7:9, 14) Tokofiha mogoia ka ha ha i ai he moto tagata tokologa? Ne talahau ni e Iesu: “Ko e mena pukilu e gutuhala, ti lautote foki e hala ke pu atu ke he moui, kua tokogaogao foki a lautolu ke moua.” (Mataio 7:13, 14) He fakatai ke he totou piliona hane nonofo he lalolagi he mogonei, ko lautolu ka hao mai he matematekelea lahi hane hau to tokogaogao ni. Ka e to moua e lautolu e monuina ne tatai ke he monuina ne foaki ke he tau tagata ne hao mai he Fakapuke. Liga to fai magaaho a lautolu ne hao mai ke fanafanau ko e vala he kaufakalatahaaga he lalolagi fou.—Isaia 65:23.
“Kia Mataala Tumau a Mutolu”
21, 22. (a) Kua moua fefe e koe e aoga he kikite atu ke he fakamauaga he Fakapuke? (e) Ko e heigoa e lauga he tau ma e 2004, mo e kua lata he ha a tautolu ke omaoma ke he tomatomaaga ne mai i ai?
21 Pete kua tuga e mamao he Fakapuke ke he vaha ha tautolu, nukua fakakite fakamaaliali mai e hatakiaga ne kua nakai lata ia tautolu ke fakaheu. (Roma 15:4) Ko e tau tataiaga ke he vaha ha Noa mo e vaha ha tautolu kua lata ke taute a tautolu ke mataala fakalahi atu ke he alito he tau mena tutupu mo e ke fakakaukau a tautolu ke he hauaga ha Iesu ne tuga e tagata kaiha ke fakahoko e fakafiliaga ke he tau tagata mahani kelea.
22 He vaha nei, hane takitaki e Iesu Keriso e gahua atihake fakaagaga mahaki. Ma e haofia mitaki mo e fakahaoaga he tau tagata tapuaki moli, kua ha ha ai e parataiso fakaagaga ne tuga e vaka. (2 Korinito 12:3, 4) Ti ke hao mai he magahala he matematekelea lahi, kua lata ia tautolu ke nonofo mau he parataiso ia. Kua viko takai ke he takatakaiaga he parataiso ko e lalolagi ha Satani, ne kua mautali ke faiola ke he ha tagata ka fia mohe fakaagaga. Kua uho lahi mogoia ki a tautolu ke “mataala tumau” mo e nonofo tauteute a tautolu ma e aho a Iehova.—Mataio 24:42, 44.
Manatu Nakai e Koe?
• Ko e heigoa e tomatomaaga ne foaki e Iesu hagaao ke he hauaga hana?
• Ko e heigoa ne fakatai e Iesu mo e vaha he ha ha hinei hana?
• Ke he tau puhala fe ne kua tatai ai e vaha ha tautolu ke he vaha ha Noa?
• Kua lata ke lauia fefe e manamanatu fakamafiti ha tautolu he manamanatu atu ke he tau mena tatai he vaha ha Noa mo e vaha ha tautolu?
[Tau Huhu he Fakaakoaga]
[Blurb he lau 12]
Ko e lauga he tau ma e 2004 ko e: “Kia mataala a mutolu . . .Kia nonofo tauteute ai a mutolu.”—Mataio 24:42, 44.
[Fakatino he lau 9]
Ne omaoma a Noa ke he hatakiaga faka-Atua. Kua tali pihia nakai a tautolu?
[Tau Fakatino he lau 10, 11]
“Ke tuga ni e vaha ha Noa, to pihia foki ka ha ha hinei e Tama he tagata”