Ko Hai ka Fakamavehe a Tautolu mo e Fakaalofa he Atua?
Ko Hai ka Fakamavehe a Tautolu mo e Fakaalofa he Atua?
“Kua fakaalofa a tautolu, ha ko e mena ne fakamua mai hana fakaalofa kia tautolu.”—1 IOANE 4:19.
1, 2. (a) Ko e aoga he ha ki a tautolu ke iloa kua fakaalofa mai ki a tautolu? (e) Ha hai e fakaalofa ne manako lahi a tautolu ki ai?
LAHI fefe e aoga kia koe ke iloa na fakaalofa ki a koe? Mai he vaha tama ke he vaha motua, na tuanaki lahi e tau tagata ke he fakaalofa. Kua kitia nakai e koe e tama mukemuke ne lukuluku fakahelehele he tau lima he matua fifine hana? Fa mahani, pete ko e heigoa ni ha mena ne viko ia ia, he onoono e mukemuke ke he fofoga mamali he matua fifine hana, kua logona e milino mo e mafola he tau lima he matua fifine ne fakaalofa ki a ia. Po kua manatu nakai e koe a koe he magahala he tau vaha uka ia he tupu hake a koe? (1 Tesalonia 2:7) He falu magaaho, liga nakai iloa e koe e mena ne manako po ke logona hifo e koe, ka kua aoga lahi ni ke iloa na fakaalofa e matua tane mo e matua fifine hau ki a koe! Nakai kia fai lagomatai ke iloa kua maeke ia koe ke fina atu ki a laua mo e ha lekua po ke ha huhu? Moli ni, he moui katoa ha tautolu, ko e taha he tau manako ne mua ha tautolu ke moua e fakaalofa. Ha kua fakamoli mai he fakaalofa ia e uho ha tautolu.
2 Ko e fakauka he fakaalofa he tau matua he taha tagata kua lafi lahi ke he tupu mo e lagotatai mitaki he tama. Ka ko e mauokafua nukua fakaalofa e Matua ha tautolu he lagi, ko Iehova, ki a tautolu kua mahomo atu e aoga ke he malolo fakaagaga mo e loto manamanatu ha tautolu. Falu tagata totou he mekasini nei kua liga nakai fai matua ne leveki moli a lautolu. Ka moli e mena ia ki a koe, kia fakamalolo. Ti pete ni ka to noa e fakaalofa fakamatua po kua kaumahala, to laveaki he fakaalofa fakamoli he Atua a tautolu.
3. Fakamoli fefe e Iehova e fakaalofa hana ke he hana tau tagata?
3 Puhala mai he perofeta ko Isaia, ne tuhi mai a Iehova na maeke he matua fifine ke “nimo” e tama kai huhu hana, ka e nakai to nimo e ia hana tau tagata. (Isaia 49:15) Kua pihia foki e mena ne talahau e Tavita: “Ha kua tiaki au he haku a matua tane mo e haku a matua fifine, ti talia ai e Iehova au.” (Salamo 27:10) Ko e fakamoliaga ha ia! Ko heigoa ni e tuaga hau, kaeke hau a koe ke he fakafetuiaga tukulele mo Iehova ko e Atua, kua lata ia koe ke manatu tumau ko e fakaalofa hana ki a koe kua mua atu mai he fakaalofa he ha tagata!
Fakatumau a Koe he Fakaalofa he Atua
4. Kua fakamoli fefe e tau Kerisiano he senetenari fakamua ke he fakaalofa he Atua?
4 Ne fe ne iloa fakamua e koe e fakaalofa a Iehova? Fakalata ni, kua tatai e iloaaga hau ke he tau Kerisiano he senetenari fakamua. Ne fuluola e fakamaamaaga he veveheaga 5 he tohi ha Paulo ke he tau Roma hagaao ke he tau tagata agahala, ne o kehe mai he Atua he taha magahala, ka e fakamui kua iloa e lautolu e fakaalofa a Iehova. Totou e tautolu he kupu 5: “Kua fakamaligi mai e fakaalofa he Atua ke he tau loto ha tautolu ke he Agaga Tapu kua foaki mai kia tautolu.” Ne talahau foki e Paulo he kupu 8: “Kua fakakite mai he Atua hana fakaalofa kia tautolu he matulei a Keriso ke hukui aki a tautolu, ka ko e tau tagata hala agaia a tautolu.”
5. Moua fefe e koe e loto fakaaue ke he lahi he fakaalofa he Atua?
5 Ke he puhala pihia foki, he magaaho ne foaki ki a koe e kupu moli mai he Kupu he Atua mo e kamata a koe ke fakagahuahua e tua, ne kamata e agaga tapu ha Iehova ke gahuahua he loto hau. He puhala nei ne kamata a koe ke loto fakaaue ke he mena mahaki toili ne taute e Iehova he fakafano mai e Tama fuataha hana ke mate ma hau. Ti kua lagomatai e Iehova a koe ke mataala ke he fakaalofa mahaki hana ma e tau tagata. He magaaho ne mailoga ai e koe, pete kua fanau a koe ko e tagata agahala ti kehe mai ia ia, kua fita he hafagi e Iehova e puhala ma e tau tagata ke moua e tututonu mo e amaamanakiaga he moui nakai fai fakaotiaga, ti nakai kia aamotia e loto hau? Logona hifo nakai e koe e fakaalofa ma Iehova?—Roma 5:10.
6. Ko e ha he falu magaaho ne logona e tautolu e mamao mai ia Iehova?
6 Ha kua futia he fakaalofa he Matua hau he lagi mo e hiki e moui hau ke talia a ia, kua tukulele hau a moui ke he Atua. Ti olioli e koe he mogonei e mafola mo e Atua. Ka e he falu magaaho, logona nakai e koe tuga mamao a koe mai ia Iehova? Maeke e mena nei ke tupu ke he taha ni ia tautolu. Ka e manatu tumau na nakai hiki e Atua. Ko e fakaalofa hana kua tumau mo e mauokafua tuga e la, ne fakafano tumau mai e maama mo e mafana ke he lalolagi. (Malaki 3:6; Iakopo 1:17) Ke he taha fahi, maeke ia tautolu ke hikihiki—pete ni ke he mogo fakaku. He mavilo e lalolagi, ti pouli taha fahi he palaneta. Tuga foki, kaeke mavilo kehe mai a tautolu he Atua, pete ni he tote e mavilo, to logona e tautolu e momokoina he fakafetuiaga ha tautolu mo ia. Ko e heigoa ha tautolu ka taute ke fakahako aki e puhala ia?
7. Maeke fefe e kumikumi hifo ki a tautolu ni ke lagomatai a tautolu ke fakatumau he fakaalofa he Atua?
7 Kaeke logona e tautolu ha vevehe mai he fakaalofa he Atua, lata na tautolu ke huhu hifo ki a tautolu ni: ‘Kua uta fakamama kia e au e fakaalofa he Atua? Kua fuluhi kehe mai kia au he Atua moui mo e fakaalofa, ti fakakite he tau puhala kehekehe e lolelole he tua? Kua manamanatu kia au ke he “tau mena he tino,” nakai ke he “tau mena he Agaga”?’ (Roma 8:5-8; Heperu 3:12) Kaeke kua fakamamao mai a tautolu ia Iehova, lata ia tautolu ke taute e tau lakaaga ke fakahako aki, ke liliu ke he fakafetuiaga tata mo e mafanatia mo ia. Ne fakamafana mai a Iakopo ki a tautolu: “Kia fakatata atu a mutolu ke he Atua, ti fakatata mai ai a ia kia mutolu.” (Iakopo 4:8) Kia omaoma ke he tau kupu a Iuta: “Ko e tau fakahelehele na e, kia ati hake e mutolu a mutolu ke he ha mutolu a tua kua tapu ue atu, ko e Agaga Tapu ke liogi ai a mutolu. Kia fakatumau e mutolu a mutolu ke he fakaalofa he Atua.”—Iuta 20, 21.
Nakai Lauia e Fakaalofa he Atua he Tau Tuaga Hikihiki
8. Ko e heigoa e tau hikihikiaga ka amanaki ti tutupu he tau momoui ha tautolu?
8 Kua hiki tumau ha tautolu a tau momoui he fakatokaaga nei. Ne mailoga he Patuiki ko Solomona ko e “vaha mo e tau mena ke tutupu ai kua hoko ia kia [t]autolu oti.” (Fakamatalaaga 9:11) Ti amanaki ni e tau moui ha tautolu ti hiki. Taha aho malolo a tautolu, aho hake liga gagao lahi a tautolu. Taha aho mau homo e gahuaaga tupe ha tautolu, aho hake kua nakai fai gahua a tautolu. Nakai fai ogo, ne amanaki ni e fakahele ti mate. Liga fai magaaho ne olioli he tau Kerisiano he taha motu e tau tutuaga mafola, ka e, amanaki ni, tupu mai e favale kelea. Liga tukupau fakakelea a tautolu, ti ko e mena nei, matematekelea ai a tautolu ke he falu a nakai fakafiliaga tonu. E, kua nakai mau homo po ke haohao mitaki katoatoa e moui.—Iakopo 4:13-15.
9. Ko e ha kua mitaki ai ke totou taha vala ia Roma veveheaga 8?
9 Ka tupu e fakaatukehe ki a tautolu, liga kamata a tautolu ke logona hifo e tiaki, mo e manatu foki kua galo tuai e fakaalofa he Atua ma tautolu. Ha ko e mena liga tupu e tau mena pihia ki a tautolu oti, kua lata ia tautolu ke manamanatu fakamitaki ke he tau kupu fakamafanatia he aposetolo ko Paulo ne fakamau ia Roma veveheaga 8. Kua hagaao e tau kupu ia ke he tau Kerisiano fakauku he agaga. Ka ko e tau matapatu fakaakoaga kua hagaaki atu foki ke he tau mamoe kehe, nukua talahaua tututonu ko e tau kapitiga he Atua, tuga a Aperahamo he vaha nakaila Kerisiano ia.—Roma 4:20-22; Iakopo 2:21-23.
10, 11. (a) Ko e heigoa falu tukupau ne taute he tau fi he falu magaaho ke he tau tagata he Atua? (e) Ko e ha ne nakai aoga e tau tukupau nei ke he tau Kerisiano?
10 Totou Roma 8:31-34. Ne huhu a Paulo: “Kaeke ke kau e Atua mo tautolu, ko hai kia taha ke paleko mai kia tautolu?” Moli, ko Satani mo e lalolagi kelea hana ne paleko ki a tautolu. Liga tukupau fakakelea he tau fi a tautolu, pihia foki ke he hopo fakafili he motu. Ne tukupau fakakelea falu matua Kerisiano he fakavihia e fanau ha lautolu kakano he nakai fakaata e fanau ke talia e tau fakaholoaga fakaekekafo ne holitu e fakatufono he Atua po ke nakai fakaata a lautolu ke fakalataha ke he tau fakamanatu pouliuli. (Gahua 15:28, 29; 2 Korinito 6:14-16) Falu Kerisiano tua fakamoli kua fakahala fakavai he pehe ko e tau tagata moumou fakatufono kakano he nakai kelipopo e lautolu e tau katofia tagata he felakutaki po ke fakalataha ke he tau mena fakapolitika. (Ioane 17:16) Ne talahau he falu tagata paleko e tau pikopiko muitui he puhala matutaki tala, mo e tukupau fakakelea foki e Tau Fakamoli a Iehova he eke mo vahega lotu fakahagahaga kelea.
11 Ka kia nakai nimo he vaha he tau aposetolo, kua pehe foki: “Ko e mena iloa e mautolu kua talahaua kehe e vahega na ke he tau motu oti kana.” (Gahua 28:22) Ka e moha e tau tukupau fakakelea ia? Ha ko e Atua ne talahaua tututonu e tau Kerisiano moli, he fakave ke he tua ha lautolu ke he poa a Keriso. To fakaoti he ha e Iehova e fakaalofa ma e tau tagata tapuaki hana he mole e foaki age e ia ki a lautolu e mena fakaalofa uho ne mua ue atu—ko e Tama fuataha ni hana? (1 Ioane 4:10) Ha kua fakatu hake a Keriso mai he mate ti tuku he fahi matau he Atua, nukua lalago e ia e tau Kerisiano. Ko hai ka totoko e lalagoaga he Keriso ke he tau tutaki hana po ke kautu e paleko ke he fakafiliaga mitaki he Atua ke he tau tagata tua fakamoli hana? Ai fai tagata!—Isaia 50:8, 9; Heperu 4:15, 16.
12, 13. (a) Ko e heigoa e tau tutuaga kua nakai fakai ke fakamavehe a tautolu mai he fakaalofa he Atua? (e) Ko e heigoa e foliaga he Tiapolo he fakatupu e tau mena uka ma tautolu? (i) Ko e ha ne kautu katoatoa e tau Kerisiano he magaaho fakamui?
12 Totou Roma 8:35-37. Kehe mai ia tautolu, fai tagata po ke fai mena nakai ka fakamavehe a tautolu mai he fakaalofa a Iehova mo e Tama hana, ko Keriso Iesu? To fakaaoga e Satani e tau hukui hana he lalolagi ke fakatupu e tau lekua loga ke he tau Kerisiano. Tali mai he tau senetenari kua mole, kua tokologa e tau matakainaga Kerisiano ha tautolu ne fakafita ke he favale kelea he tau motu loga. He falu matakavi loga he vaha nei, nukua fakafehagai e tau matakainaga ha tautolu mo e fakaagitau he ku e tupe. Falu kua fakafita ke he mamahi he hoge po ke temotemoai e tau mena tui. Ko e heigoa ne lali e Tiapolo ke moua he fakatupu e tau tutuaga uka nei? Ko e taha he tau laliaga hana, ke fakalolelole e tapuaki moli ki a Iehova. Manako a Satani ke talitonu a tautolu kua momoko vaivai e fakaalofa he Atua ki a tautolu. Ka kua pihia ka e mena ne tupu?
13 Tuga a Paulo, ne totoku e Salamo 44:22, kua fakaako e tautolu e Kupu tohi he Atua. Ti maama ai e tautolu, ko e higoa he Atua ati tutupu ai e tau mena nei ki a tautolu, ‘tau mamoe’ hana. Ko e fakatokoluga he higoa he Atua mo e fakapuloaaga he pule katoatoa hana he lagi mo e lalolagi kua putoia ke he mena nei. Ha ko e tau matakupu lalahi pihia ne fakaata ai he Atua e tau kamatamata, nakai ha kua nakai fakaalofa a ia ki a tautolu. Pete ko e heigoa ni e tuaga matematekelea, nukua fakamoli mai ko e fakaalofa he Atua ma e tau tagata hana, pihia foki ki a tautolu takitokotaha, kua nakai hiki. Ko e ha kaumahala ka liga matematekelea a tautolu ki ai to eke ni ke kautu ka fakatumau e mahani fakamoli ha tautolu. Kua fakamalolo mo e lagomatai a tautolu he fakamoliaga he fakaalofa tukulagi he Atua.
14. Ko e ha ne talitonu ai a Paulo ke he fakaalofa he Atua pete ko e tau mena uka ne liga matematekelea e tau Kerisiano ki ai?
14 Totou Roma 8:38, 39. Talitonu he ha a Paulo to nakai fai mena ka fakamavehe e tau Kerisiano mai he fakaalofa he Atua? Nakai fakauaua kua fakamalolo he tau mena ne tutupu he fekafekauaga e talitonu ha Paulo to nakai lauia e fakaalofa he Atua ma tautolu ha ko e tau mena uka. (2 Korinito 11:23-27; Filipi 4:13) Iloa foki e Paulo e finagalo tukulagi a Iehova mo e tau fehagaiaga mo e tau tagata Hana fakamua. Maeke nakai e mate ke kautu ke he fakaalofa he Atua ma lautolu hane fekafekau fakamoli ki a ia? Nakai fakai! Ko lautolu ia ne mamate to hololoa atu e moui he loto manamanatuaga he Atua, ti to fakaliu tu mai e ia lautolu he hana ni a magaaho.—Luka 20:37, 38; 1 Korinito 15:22-26.
15, 16. Talahau falu mena ka nakai fakaoti e fakaalofa he Atua ma e tau fekafekau fakamoli hana.
15 Ko e heigoa ni ha matematekelea ka moua e tautolu he vaha nei—pete ko e pakia fakakulikuli, gagao hololoa, po ke fakaatukehe ke he tupe—nakai fai mena ke moumou e fakaalofa he Atua ma e tau tagata hana. Ko e tau agelu malolo, tuga e agelu liuliu ne eke ko Satani, kua nakai fakai ke taute a Iehova ke fakaoti e fakaalofa ke he tau fekafekau fakamoli hana. (Iopu 2:3) Liga to pa, tuku fale puipui, mo e ekefakakelea he tau fakatufono e tau fekafekau he Atua mo e liga fakamailoga a lautolu ko e “tau tagata fakavihia.” (1 Korinito 4:13) Liga fakaohooho he fakavihia nakai tonu pihia e tau tagata ke totoko ki a tautolu, ka kua nakai fakalutulutu e Pule Katoatoa he lalolagi mo e lagi ke tiaki a tautolu.
16 Ko e tau Kerisiano, kua lata ia tautolu ke nakai matakutaku ko e ha mena ne totoku e Paulo “tau mena he vaha nai” tau mena tutupu, mo e tau tutuaga he fakatokaaga fou nei po ke “tau mena ne tatali mai” he vaha anoiha, to nakai moumou e fakaalofa he Atua ke he tau tagata hana. Pete he tau mai e tau malolo he lalolagi mo e he lagi ki a tautolu, kua ha ha ai e fakaalofa fakamoli he Atua ke lalago a tautolu. Nakai fakalavelave foki he “tokoluga, po ke hokulo” e fakaalofa he Atua, tuga ne fakamaali mai e Paulo. E, nakai fai mena kua maeke ke toho hifo a tautolu, ha mena foki nukua tuga mua e malolo ki a tautolu, ke fakamavehe a tautolu mai he fakaalofa he Atua, mo e nakai maeke foki he ha tufugatia ke fakalavelave e fakafetuiaga he Tufuga mo e tau fekafekau tua fakamoli hana. Nakai fakai e fakaalofa he Atua ke mahala; kua tukulagi ni.—1 Korinito 13:8.
Tokiofa Tukulagi e Fakaalofa-Totonu he Atua
17. (a) Ko e ha ne ‘mua e mitaki [he fakaalofa a Iehova] ke he moui’? (e) Fakakite fefe e tautolu kua tokiofa e tautolu e fakaalofa-totonu he Atua?
17 Aoga fefe e fakaalofa he Atua ki a koe? Manatu nakai a koe tuga a Tavita, ne pehe: “Ha kua mua e mitaki he hāu a fakaalofa ke he moui; to fakaheke atu au kia koe ke he haku a tau laugutu. Ko e mena ia ke fakaaue atu ai au kia koe ka kua moui au; to nikiti hake e au haku a tau lima ke he hāu a higoa.” (Salamo 63:3, 4) Moli, fai mena kia he mouiaga he lalolagi nei ka foaki nukua mua e mitaki mai he olioli e fakaalofa he Atua mo e tau kapitiga fakamoli? Ke fakatai ki ai, kua mua atu kia e mitaki ke tutuli e feua mahuiga mai he moua e manamanatuaga mafola mo e fiafia ne fua mai he fakafetuiaga tata mo e Atua? (Luka 12:15) Nukua fehagaoaki falu Kerisiano mo e fifiliaga ke tiaki a Iehova po ke fehagai mo e mate. Kua tupu e mena ia ke he tokologa he Tau Fakamoli a Iehova he tau kemu fakakikiveka Nasi he magahala he Felakutaki II he Lalolagi. Mo e fiha lahi e fakaataaga, ne fifili e tau matakainaga Kerisiano ha tautolu ke tumau he fakaalofa he Atua, he fakamakai ke fehagai mo e mate kaeke kua ha ha ai. Ko lautolu ne falanaki fakamoli ke he fakaalofa hana kua lata ke mauokafua he moua mai he Atua e vaha tukulagi anoiha, ko e taha mena ne nakai fakai e lalolagi ke foaki mai ma tautolu. (Mareko 8:34-36) Ka kua fai mena ne mua atu ke he moui tukulagi.
18. Ko e ha ne futiaki lahi ai e moui tukulagi?
18 Pete ni he nakai maeke ke moui tukulagi ka nakai fai Iehova, kia lali ke manamanatu ko e loagitu ha ia mogoia he moui ka nakai ha ha ai e Tufuga ha tautolu. To gatigati, nakai fai kakano moli. Kua foaki e Iehova ke he tau tagata hana e gahua makona ke taute he tau aho fakamui nei. Ti maeke ia tautolu ke falanaki he magaaho ne foaki mai e Iehova, ko Ia ne Mua ue Atu, e moui tukulagi, to puke ai he tau mena fulufuluola, tau mena mitaki lahi ma tautolu ke ako mo e ke taute. (Fakamatalaaga 3:11) Pete he lahi ki fe e mena ne iloa e tautolu he meleniamu i mua, to nakai maama katoa e tautolu e “hokulo he tanakiaga he iloilo mo e fioiaaga he Atua.”—Roma 11:33.
Fakaalofa e Matua ki a Mutolu
19. Ko e heigoa e fakamoliaga ne tala age e Iesu Keriso ke he tau tutaki hana ato fano kehe a ia?
19 He Nisana 14, 33 V.N., he magahala he afiafi fakamui hana mo e hana tau aposetolo 11 ne tua fakamoli, ne talahau e Iesu e tau mena loga ke fakamalolo aki a lautolu ke he tau mena ka hohoko mai mua. Ne pipiki mau a lautolu mo Iesu he tau kamatamata hana, mo e logona e lautolu takitokotaha e fakaalofa hana ma lautolu. (Luka 22:28, 30; Ioane 1:16; 13:1) Ti fakamoli age a Iesu ki a lautolu: “Ko e mena fakaalofa mai ni e Matua kia mutolu.” (Ioane 16:27) Ko e lagomatai ha ia he tau kupu nei ke he tau tutaki ke kitia e fakaalofa lahi he ha lautolu a Matua he lagi ma lautolu!
20. Ko e heigoa kua fifili a koe ke taute, mo e heigoa ka mauokafua a koe ki ai?
20 Tokologa mogonei ne momoui nukua fekafekau fakamoli ki a Iehova ke he tau tau loga. Nakai fakauaua, fakamua to hoko mai e fakaotiaga he fakatokaaga kelea nei, to mua atu e fakafehagai ha tautolu mo e tau kamatamata loga. Kia nakai toka e tau kamatamata po ke tau fakaatukehe pihia ke fakauaua aki a koe ke he fakaalofa fakamoli he Atua ma hau. Ti uka lahi mogoia ke nakai peehi e fakamoliaga nei: Kua fakaalofa lahi e Atua ki a koe. (Iakopo 5:11) Kia igatia a tautolu ke fakatumau ke taute ha tautolu a vala, he omaoma fakamoli ke he tau poakiaga he Atua. (Ioane 15:8-10) Kia fakaaoga e tautolu e tau magaaho oti ke fakaheke e higoa hana. Kua lata ia tautolu ke fakamalolo e fifiliaga ha tautolu ke fakatumau ke fakatata atu ki a Iehova he liogi mo e kumikumi hana Kupu. Ko e heigoa ni ka tamai a pogi, kaeke hane fa e gahua fakalahi a tautolu ke fakafiafia a Iehova, to fakatumau a tautolu he mafola, mauokafua katoatoa ke he fakaalofa tukumalagi hana.—2 Peteru 3:14.
To Tali Fefe a Koe?
• Ke fakatumau e lagotatai fakaagaga mo e loto manamanatu ha tautolu, kua lata lahi a tautolu mo e fakaalofa ha hai?
• Ko e heigoa e tau mena ka nakai taute a Iehova ke fakaoti e fakaalofa ke he tau fekafekau hana?
• Ko e ha e iloa e fakaalofa ha Iehova kua ‘mua e mitaki ke he moui’?
[Tau Huhu he Fakaakoaga]
[Tau Fakatino he lau 9]
Kaeke logona e koe kua mavehe mai he fakaalofa he Atua, kua maeke ia tautolu ke fakahako e tau mena vihi
[Fakatino he lau 11]
Maama e Paulo e kakano ne tupu ki a ia e favale