KUA omoomoi a tautolu ke fakakite e loto fakaaue ke he mena fakaalofa kua mua e mitaki. Fakamaama e Iesu e fakaakoaga ia he mole e fakamalolō e ia e hogofulu e tagata ne moua he gagao matematekelea lahi ne nakai fai tuluiaga he magahala ia. Tokotaha mai he tokohogofulu ne “liu mai a ia, kua fakaheke atu ke he Atua mo e leo lahi.” Pehē a Iesu: “Ka e nakai kia ko e mena fakamea e tokohogofulu? ti ko e fe kia e tokohiva?” (Luka 17:12-17) Ko e fakaakoaga? Na maeke ke nimo vave e tau gahua mitaki he falu ne taute ma tautolu!

Kua nakai tatai e lukutoto mo e ha mena fakaalofa foki. Ko e mena fakaalofa nei kua mua ue atu ne foaki. Lata mogoia ke tali atu fēfē a koe ke he mena kua taute he Atua ma haau?

• Kia iloa a ia ne Foaki. Ha kua foaki e lukutoto, kua nakai kakano to moua pauaki he tau tagata oti e moui tukulagi. Ka e pehē a Iesu he liogi ke he Atua: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.” (Ioane 17:3) Ka tala atu taha tagata ki a koe na fai tagata ne fakahao  e moui haau he mogo ne tote a koe, nakai kia manako a koe ke iloa hagaao ke he tagata ia mo e kakano ne fakahao e ia a koe? Ko Iehova ko e Atua ne foaki e mena fakaalofa he lukutoto ke moua e moui, kua manako e Atua ke iloa a ia mo e ke moua e fakafetuiaga tata mo ia. “Kia fakatata atu a mutolu ke he Atua,” he talahau he Tohi Tapu “ti fakatata mai ai a ia kia mutolu.”—Iakopo 4:8.

• Fakagahuahua e tua ke he lukutoto. “Ko e tagata ne tua ke he Tama, ha ha ia ia e moui tukulagi.” (Ioane 3:36) Ko e heigoa e kakano ke fakagahuahua e tua? Kakano ai ke gahua; ke fakakite e tua ke he lukutoto kua lata ke fai mena ka taute. (Iakopo 2:17) Ko e heigoa ka taute? To moua laia e koe e mena fakaalofa ka oho atu a koe mo e talia ai. Ti kua latatonu a koe ke oho atu mo e talia e lukutoto. Fēfē? Fakaako ke iloa e puhala kua manako e Atua ke moui ai a koe, ti gahua fakatatau ki ai. * Liogi ke he Atua ma e fakamagaloaga mo e loto meā. O atu ke he Atua mo e mauokafua katoatoa kua fakavē ke he lukutoto ke moua e mafola, haohao mitaki, mo e monuina tukulagi anoiha ka moua e lautolu oti ne fakagahuahua e tua ke he lukutoto!—Heperu 11:1.

• Fakalataha atu ke he Fakamanatuaga he mate ha Iesu. Ne fakatū e Iesu e matagahua nei kua taute lagataha he tau ke fakamanatu ki a tautolu e foakiaga he lukutoto. Hagaao ke he fakamanatuaga nei ne pehē a ia: “Kia eke e mutolu e mena nai mo fakamanatuaga kia au.” (Luka 22:19) To fakamanatu he Tau Fakamoli a Iehova e mate ha Iesu he Aho Ua, Aperila 11, 2017, ka mole e tōaga laā. Ko e fakaholoaga kua teitei taha e tulā, putoia e lauga ke fakamaama e kakano uho he mate ha Iesu mo e puhala ke moua e tau monuina mogonei mo e anoiha. He tau kua mole, kavi 20 e miliona he tau tagata he lalolagi katoa ne o atu ke he Fakamanatuaga. Uiina mafanatia atu e mautolu a koe ke fakalataha mai mo mautolu ha ko e loto fakaaue ke he mena fakaalofa mua ue atu he Atua.