1. Ko e heigoa ati talitonu a tautolu kua nonofo a tautolu he “tau aho fakamui”?

KUA fanau kia a koe he mole e tau 1914? Ka pihia, kua moui a koe he magahala he “tau aho fakamui” he fakatokaaga nei. (2 Timo. 3:1) Kua logona e tautolu oti e tau hokotaki hagaao ke he tau mena tutupu ne talahau tuai e Iesu ma e magaaho nei. Putoia he tau mena nei e tau felakutaki, kū e tau mena kai, tau mafuike, tau gagao, tupu lahi e mahani kelea, mo e favale ke he tau tagata ha Iehova. (Mata. 24:3, 7-9, 12; Luka 21:10-12) Kitia foki e tautolu e tau tagata ne mahani he puhala ne talahau tuai he aposetolo ko Paulo. (Kikite puha “ Puhala he Tau Tagata Mogonei.”) Ha ko e tau tagata tapuaki ha Iehova, talitonu a tautolu kua nonofo a tautolu he magaaho “he tau aho a mui.”​—Mika 4:1.

2. Ko e heigoa e tau hūhū kua lata a tautolu ke moua e tali?

² Ha kua lahi e magaaho kua mole tali mai he 1914, kua nonofo a tautolu mogonei he vala fakahiku he “tau aho fakamui.” He tata lahi mai e moumouaga, lata a tautolu ke iloa e tau tali ke he falu he tau hūhū aoga: Ko e heigoa e tau mena tutupu ka hohoko he fakahikuaga he “tau aho fakamui”? Ti ko e heigoa kua amanaki a Iehova ke taute e tautolu he fakatali ke he tau mena tutupu ia?

3. Hagaao ke he perofetaaga he 1 Tesalonia 5:1-3, ko e heigoa e fakailoaaga ka talahau he tau motu?

³ Totou 1 Tesalonia 5:1-3. Talahau e Paulo e ‘aho a Iehova.’ He fakaaoga he kupu tohi nei, hagaao e mena nei ke he magaaho kua kamata e totokoaga ki a ‘Papelonia Lahi,’ ko e kautu  he tau lotu fakavai he lalolagi, mo e fakaoti ai ki Amaketo. (Fakakite. 16:14, 16; 17:5) Ato kamata e “aho” ia, to fakailoa he tau motu e ‘mafola mo e nakai haofia.’ (Falu fakaliliuaga ne pehē: “Mafola mo e haohao mitaki.”) Fakaaoga he tau takitaki he lalolagi e talahauaga pihia ka tutala a lautolu ke fakaholo ki mua e tau fakafetuiaga he vahāloto he tau motu. * Ka ko e fakailoaaga he ‘mafola mo e nakai haofia’ ne fakamaama he Tohi Tapu to kehe ai. Ko e ha? Ka tupu e mena nei, liga manamanatu e tau tagata kua kautū e tau takitaki he lalolagi he taute e lalolagi ke haohao mitaki lahi. Ka ko e tala mooli, to kamata e ‘matematekelea lahi’ ti ‘hokotia fakalutukia ai e mahaikava.’​—Mata. 24:21.

4. (a) Ko e heigoa kua lata a tautolu ke fakatali ke kitia hagaao ke he fakailoaaga he ‘mafola mo e nakai haofia’? (e) Ko e heigoa kua fitā he iloa e tautolu hagaao ki ai?

⁴ Iloa e tautolu falu mena hagaao ke he fakailoaaga he ‘mafola mo e nakai haofia.’ Ka e nakai iloa e tautolu falu mena. Nakai iloa e tautolu ko e heigoa ka takitaki atu ki ai po ke to taute fēfē e fakailoaaga. Nakai iloa foki e tautolu to putoia ni kia taha e fakailoaaga po ke to loga e fakailoaaga. Ko e heigoa ni ka tupu, iloa e tautolu e mena nei: Nakai lata a tautolu ke fakavaia he manamanatu to maeke mooli e tau takitaki he lalolagi ke tamai e mafola ke he lalolagi. Ka ko e fakailoaaga ia ne kua tala mai ki a tautolu ke mataala ki ai. Ko e fakamailoga a ia ko e kamata hane fai e ‘aho a Iehova’!

5. Lagomatai fēfē he 1 Tesalonia 5:4-6 a tautolu ke mautali ma e ‘aho a Iehova’?

⁵ Totou 1 Tesalonia 5:4-6. Ko e tomatomaaga ha Paulo kua tala mai e puhala ke mautali a tautolu ma e ‘aho a Iehova.’ Ti “aua neke momohe a tautolu tuga ne falu.” Kua lata a tautolu ke fakatumau e “mataala.” Ma e fakatai, lata a tautolu ke mataala ke he hagahaga kelea he fakahui e tuuho ha tautolu he hufia ke he tau matakupu fakapolitika he lalolagi. Ka putoia a tautolu ki ai, to eke a tautolu mo “tau tagata he lalolagi.” (Ioane 15:19) Iloa e tautolu ko e Kautu he Atua ko e amaamanakiaga hokoia ma e mafola he lalolagi.

6. Ko e heigoa kua manako a tautolu ke lagomatai e falu ke taute, ti ko e ha?

⁶ He fakatumau e mataala ha tautolu ni, manako foki a tautolu ke lagomatai e falu ke iloa e mena ne talahau tuai he Tohi Tapu ka tupu he lalolagi. Lata a tautolu ke manatu ka kamata e matematekelea lahi, kua mule lahi tuai ma e tau tagata ke haga atu ki a Iehova. Kakano haia kua mafiti lahi e gahua fakamatala ha tautolu! *

7. Ko e heigoa kua amanaki a Iehova ke taute e tautolu mogonei?

⁷ He magaaho kū ne toe ato kamata e “aho” ha Iehova, amanaki a ia ki a tautolu ke tumau  e gahua malolō ke fakamatala. Lata a tautolu ke iloa tonu kua “fakamakai nakai noa ke he gahua he Iki.” (1 Kori. 15:58) Talahau tuai e Iesu e mena ka taute e tautolu. He tutala a ia hagaao ke he tau mena aoga oti ka tutupu he magahala he tau aho fakamui, lafi e ia: “To fakamatala fakamua foki e vagahau mitaki ke he tau motu oti kana ke lata ai.” (Mare. 13:4, 8, 10; Mata. 24:14) Manatu la: He tau magaaho takitaha ka fano a koe ke gahua fakamatala, kua fai vala a koe he fakamooli e perofetaaga ia he Tohi Tapu!

8. Matutaki fēfē e gahua fakamatala he Kautu ke holo ki mua?

⁸ Ko e heigoa ka talahau e tautolu hagaao ke he holo ki mua he gahua fakamatala he Kautu? He taha tau ke he taha tau, kua tupu lahi e gahua nei. Ma e fakatai, manamanatu ke he holo ki mua he numera he tau tagata fakailoa he Kautu ke he lalolagi katoa he magahala he tau aho fakamui. He 1914, ne 5,155 e tagata fakailoa he 43 e motu. Mogonei, kavi ke he 8.5 e miliona he tau tagata fakailoa ke he 240 e motu! Ka e nakaila oti e gahua ha tautolu. Lata a tautolu ke tumau ke fakailoa e Kautu he Atua ko e tuluiaga hokoia ke he tau lekua he tau tagata oti kana.​—Sala. 145:11-13.

9. Ko e ha kua lata a tautolu ke tumau e fakamatala he fekau he Kautu?

⁹ To nakai oti ha tautolu a gahua fakamatala he Kautu ato talahau e Iehova ke fakaoti. Lahi fēfē e magaaho ne toe ma e tau tagata ke o mai ke iloa a Iehova ko e Atua mo Iesu Keriso? (Ioane 17:3) Nakai iloa e tautolu. Ka e iloa e tautolu ato kamata e matematekelea lahi, ko lautolu kua “kotofa ke he moui tukulagi” to talia agaia e tala mitaki. (Gahua 13:48) Lagomatai fēfē e tautolu e tau tagata nei ato tōmui lahi?

10. Ko e heigoa e lagomatai kua foaki e Iehova ki a tautolu ke fakaako e kupu mooli ke he tau tagata?

¹⁰ Puhala he fakatokatokaaga ha Iehova, foaki mai e ia e tau mena oti kua lata a tautolu ke fakaako e kupu mooli ke he tau tagata. Ma e fakatai, moua e tautolu e fakamahaniaga he tau faahi tapu takitaha ke he feleveiaaga he vahā tapu. Lagomatai he feleveiaaga nei a tautolu ke iloa e mena ke talahau he tau aahi atu fakamua mo e tau liu aahi atu. Ti fakaako ai ki a tautolu e puhala ke taute e tau fakaako Tohi Tapu. Foaki foki he fakatokatokaaga ha Iehova e tau koloa he Puha Koloa Fakaako ha tautolu. Ko e tau koloa nei kua lagomatai a tautolu ke . . .

•   kamata e tau fakatutalaaga,

• fakalagalaga e fiafia,

• omoomoi e tau tagata ke manako ke fakaako atu foki,

• fakaako e kupu mooli he tau fakaako Tohi Tapu, mo e

• uiina a lautolu kua fiafia ke ahiahi ke he faahi kupega hila ha tautolu mo e tau Fale he Kautu.

Mooli, nakai lahi ni ke moua e tau koloa nei. Lata a tautolu ke fakaaoga ai. * Ma e fakatai, ka oti e fakatutala mitaki mo e tagata ne fiafia, toka e koe mo ia e tuleke po ke mekasini, to maeke a ia ke totou atu foki ato liu a koe ke feleveia mo ia. Ko e matagahua ha tautolu ke tumau e gahua malolō he tau mahina takitaha ke fakamatala e Kautu.

11. Ko e ha ne taute e Online Bible Study Lessons?

¹¹ Ko e taha fakataiaga foki kua lagomatai e Iehova e tau tagata ke fakaako e kupu mooli, manamanatu ke he Online Bible Study Lessons he jw.org^®. (Onoono ki lalo he BIBLE TEACHINGS > ONLINE LESSONS.) Ko e ha ne taute e tau fakaakoaga nei? He tau mahina takitaha, totou afe e tau tagata he lalolagi katoa ne kumi e tau fakaakoaga he Tohi Tapu he Initanete. Ko e tau fakaakoaga he faahi kupega hila ha tautolu ka hafagi ke he tau tagata nei e mooli he Kupu he Atua. Falu tagata ne tutala a koe ki ai kua liga fakauaua ke talia e fakaako fakatagata he Tohi Tapu. Ka pihia, fakakite ki a lautolu e tau vala he ha tautolu a faahi kupega hila po ke fakafano ki a lautolu e matutakiaga ke he tau fakaakoaga ia. *

12. Ko e heigoa ka fakaako he tagata mai he Online Bible Study Lessons?

¹² Ko e ha tautolu a Online Bible Study Lessons kua putoia e tau matakupu nei: “The Bible and Its Author,” “The Bible’s Main Characters,” mo e “The Bible’s Message of Hope.” He tau matakupu ia, ne fakaako ai:

• Maeke fēfē he Tohi Tapu ke lagomatai e tagata

• Ko hai a Iehova, Iesu, mo e tau agelu

• Ko e ha ne tufuga he Atua e tau tagata

• Ko e ha ne tupu e matematekelea mo e mahani kelea muitui

Fakatutala foki e tau fakaakoaga ke he puhala ha Iehova ka . . .

• fakaoti e matematekelea mo e mate,

• liuaki mai a lautolu kua mamate ke he moui, mo e

• hukui e tau fakatufono nakai mitaki he tagata aki e Kautu he Atua.

13. Hukui kia he online lessons e fakatokaaga fakaako Tohi Tapu? Fakamaama.

¹³ Ko e online lessons kua nakai hukui aki e fakatokaaga fakaako Tohi Tapu. Foaki mai e Iesu ki a tautolu e lilifu ke taute tutaki. Amanaki a tautolu ki a lautolu ne fiafia ke o atu ke he online lessons, loto fakaaue ke he mena ne iloa e lautolu, ti manako ke iloa atu foki. Ka pihia, liga to talia e lautolu e fakaako Tohi Tapu. He matahiku he tau fakaakoaga takitaha, kua uiina ke he tagata totou ke tuku e ole ma e taha matakainaga ke fakaako e Tohi Tapu mo ia. Puhala he faahi kupega hila ha tautolu, he evalesi ke he lalolagi katoa kua moua e tautolu molea 230 e ole fakaako Tohi Tapu he tau aho takitaha! Ko e fakaakoaga fakatagata pihia kua aoga lahi!

14. Hagaao ke he tau fakaakoaga ha Iesu ne fakamau ia Mataio 28:19, 20, ko e heigoa kua lata a tautolu ke fakamakamaka fakalahi ke taute, ti ko e ha?

¹⁴ Totou Mataio 28:19, 20. He taute e tautolu e tau fakaako Tohi Tapu, lata a tautolu ke fakamakamaka fakalahi ke “eke e tau motu oti  kana mo tutaki, . . . fakaako atu . . . kia lautolu kia omaoma ke he tau mena oti ne tala atu e [Iesu].” Lata a tautolu ke lagomatai e tau tagata ke maama e aoga ke fifili e lautolu e tuaga ha lautolu ma Iehova mo e Kautu Haana. Kakano he mena nei ke lali ke fakalagalaga e tau tagata ke eke e kupu mooli ma ha lautolu ni he fakagahua e tau mena ne fakaako e lautolu, tukulele e tau momoui ha lautolu ki a Iehova, ti papatiso. Ko e magaaho laia ka momoui a lautolu he aho a Iehova.​—1 Pete. 3:21.

15. Ko e heigoa ne nakai fai magaaho a tautolu ke taute, ti ko e ha?

¹⁵ He totoku fakamua, nakai lahi e magaaho mogonei ato hoko ke he moumouaga he fakatokaaga nei. Ha ko e kakano ia, nakai fai magaaho a tautolu ke tumau e fakaako he Tohi Tapu mo e tau tagata ne nakai manako mooli ke eke mo tau tutaki he Keriso. (1 Kori. 9:26) Ko e gahua fakamafiti ha tautolu! Tokologa e tau tagata ne lata agaia ke logona e fekau he Kautu ato tōmui lahi.

16. Hagaao ke he Fakakiteaga 18:2, 4, 5, 8, ko e heigoa ha tautolu oti kua lata ke taute? (Kikite foki e matahui tala.)

¹⁶ Totou Fakakiteaga 18:2, 4, 5, 8. Fakakite he tau kupu tohi nei e taha mena foki ne amanaki a Iehova ke he tau tagata tapuaki haana. Lata e tau Kerisiano mooli oti ke fakatumau e vevehe katoatoa ha lautolu mo Papelonia Lahi. Ato fakaako e kupu mooli, liga ko e tagata fakaako Tohi Tapu ne fai vala he lotu fakavai. Liga fano a ia he tapu mo e fakalataha ke he tau matagahua fakalotu. Po ke liga tuku e ia e tau tupe ke he fakatokatokaaga pihia. Ato talia e tagata fakaako Tohi Tapu ke eke mo tagata fakailoa nakaila papatiso, kua lata a ia ke nakai fai matutakiaga mo e lotu fakavai. Lata a ia ke tuku e tohi ke vevehe katoatoa mai i ai po ke fakaoti e fakalatahaaga haana ke he lotu ia mo e ha fakatokatokaaga ne matutaki mo Papelonia Lahi. *

17. Ko e tau gahua tupe fēfē kua lata e Kerisiano ke kalo kehe mai ai, ti ko e ha?

¹⁷ Ko e Kerisiano mooli kua lata ke iloa tonu ko e gahua tupe haana kua nakai matutaki mo Papelonia Lahi. (2 Kori. 6:14-17) Ke fakatai, to nakai gahua tupe a ia ma e lotu. Lafi ki ai, ko e Kerisiano kua fakagahua he falu pisinisi ne nakai manako ke gahua he tau fale ne fakaholo ki mua e tapuakiaga fakavai. Ti ka fai pisinisi a ia, to nakai manako mooli a ia ke moua e gahua po ke talia e gahua ne fai vala mo Papelonia Lahi. Ko e ha kua lata a tautolu ke tumauokafua ke he tau tuaga pihia? Ha kua  nakai manako a tautolu ke fakalataha ke he tau gahua mo e tau agahala he tau fakatokatokaaga fakalotu ne nakai meā ke he fofoga he Atua.​—Isaia 52:11. *

18. Tumauokafua fēfē e taha matakainaga taane ke he tau matapatu fakaakoaga he Tohi Tapu hagaao ke he gahua tupe haana?

¹⁸ He tau tau kua mole, ko e motua ne fai pisinisi ne ole e taha tagata ne gahua konotuleke ke taute e taha gahua kamuta he fale tapu he taone ne nofo e matakainaga taane. Iloa he tagata konotuleke to nakai talia he matakainaga taane ke gahua he tau fale tapu. Ka ko e mogonei kua manako mafiti e tagata konotuleke ke moua taha ke gahua. Pete ia, kua tumauokafua e matakainaga taane ke he tau matapatu fakaakoaga he Tohi Tapu ti nakai talia e gahua. He faahi tapu hake, fakakite he nusipepa e ata he taha tagata kamuta ne tuku hake e akau fakalava he fale tapu. Ane mai fakahui he matakainaga taane e tuaga haana, liga ko e ata haana ka tū he nusipepa. Manamanatu la kua fakakelea mooli e tuaga mitaki haana ke he tau matakainaga Kerisiano! Manamanatu foki ke he puhala ka logona hifo a Iehova.

19-20. (a) Ko e heigoa kua fakaako e tautolu? (e) Ko e heigoa foki falu mena kua lata a tautolu ke fakaako?

¹⁹ Hagaao ke he perofetaaga he Tohi Tapu, ko e taha matagahua lahi mahaki ka nakai leva ti hoko ke he lalolagi ko e fakailoaaga he tau motu ke he ‘mafola mo e nakai haofia.’ Ha kua fakaako e Iehova, iloa e tautolu to nakai moua he tau motu e mafola mooli mo e tukulagi. Ko e heigoa kua lata ke taute ai ato hoko e mena nei mo e moumouaga fakalutukia ka mui mai? Amanaki a Iehova ke tumau ai e gahua malolō he fakamatala e fekau he Kautu mo e lali ke taute tutaki foki. He magaaho taha, lata a tautolu ke tumau e vevehe kehe mai he tau lotu fakavai oti. Putoia e vevehe kehe mai he fai vala mo e kalo kehe he gahua tupe ne matutaki mo Papelonia Lahi.

²⁰ Ha ha i ai foki e falu mena ka tupu he magaaho fakahiku he “tau aho fakamui.” Ha ha i ai falu mena kua amanaki a Iehova ki a tautolu ke taute. Ko e heigoa e tau mena nei, ti mautauteute fēfē a tautolu ma e tau mena oti hane hoko mai he vahā tata i mua? To kitia e tautolu he vala tala ka mui mai.