1, 2. Ko e ha kua lata a tautolu ke fakatutala ke he puhala ke fakamafana a lautolu kua maanu? (Kikite fakatino he kamataaga.)

“TEITEI taha e tau he mole e mate he tama taane ha maua, ne lahi mahaki e mamahi he tau logonaaga ha maua,” he ui e Susi. Mole e mate fakaofo he hoana he taha matakainaga, ne pehē a ia kua lauia a ia he “mamahi he tino ne nakai fai mena ne fakatatai ki ai.” Momoko ai, tokologa e tagata ne fehagai mo e mamahi lahi nei. He fakapotopotoaga Kerisiano mogonei, tokologa e matakainaga ne nakai amanaki to mamate e tau fakahele ha lautolu to hoko mai a Amaketo. Liga fai tagata ne ofania e koe kua mate, po ke liga iloa e koe taha kua maanu. Kaeke kua pihia to liga manamanatu a koe, ‘Moua i fe he tagata maanu e mafanatia?’

² Pehē falu tagata na fai magaaho to fakamaulu e tau kafokia oti. Ka e pihia tumau nakai e mena nei? Taha e takape ne pehē, “Iloa e au na hako mooli ke talahau ko e mena ne taute he taha aki e magaaho haana kua lagomatai a ia ke maulu e  logonaaga.” Lata ke fai magaaho mo e levekiaga fakaalofa ke he kafokia fakatino ke maeke ke maulu ai. He puhala pihia, to fai magaaho mo e levekiaga fakaalofa ke fakamaulu e mamahi he logonaaga. Ko e heigoa pauaki ka lagomatai a lautolu ne maanu ke fakatote hifo e logonaaga momoko ha lautolu?

3, 4. Ko e ha kua mauokafua a tautolu na maama e Iehova e loto malipilipi ha tautolu?

³ Ko e ha tautolu a Matua ko Iehova ne fakaalofa hofihofi noa, ko ia ko e punaaga ne moua mai e mafanatia kua lata mo tautolu. (Totou 2 Korinito 1:3, 4.) Ko e fakafifitakiaga mua ue atu a ia he logonaaga hofihofi ti mavehe a ia ke he tau tagata haana: “Ko au, ko au ni kua fakamafana a mutolu.”​—Isaia 51:12; Salamo 119:50, 52, 76.

⁴ Ko e ha tautolu a Matua fakaalofa ne lauia foki he mamate e tau fakahelehele, tuga e tau fekafekau haana ko Aperahamo, Isaako, Iakopo, Mose, mo e Patuiki ko Tavita. (Numera 12:6-8; Mataio 22:31, 32; Gahua 13:22) Fakakite he Tohi Tapu ki a tautolu kua amaamanaki mooli a Iehova ke he aho ka fakaliu tu mai e Ia e tau tagata mahani fakamooli nei. (Iopu 14:14, 15) He magaaho ia, to fiafia mo e moua e lautolu e tino malolō mitaki katoatoa. Lauia foki a Iehova he mate e Tama uluaki haana. Pehē e Tohi Tapu ne “fiafia” e Atua ki a Iesu. (Tau Fakatai 8:22, 30) Nakai maeke a tautolu ke manamanatu ke he momoko ha Iehova ke kitia e Tama haana ne mate mamahi.​—Ioane 5:20; 10:17.

5, 6. Fakamafana fēfē e Iehova a tautolu?

⁵ Maeke a tautolu ke iloa tonuhia to lagomatai e Iehova a tautolu. Ti lata a tautolu ke moua tumau e logonaaga atāina ke liogi ki a Ia mo e tala age e tau mamahi mo e tau maanu lalahi mamahaki. Mafanatia mooli ke iloa kua maama e Iehova e tau logonaaga ha tautolu ti foaki mai e ia e mafanatia kua lata mo tautolu! Ka e taute pihia fēfē e ia?

⁶ Taha he tau puhala loga ne fakamafana e Iehova a tautolu ko e agaaga tapu haana. (Gahua 9:31) Mavehe e Iesu to foaki he Matua ha tautolu e agaaga tapu malolō lahi haana ki a lautolu oti kua ole ki a ia. (Luka 11:13) Ko Susi ne totoku he kamataaga ne pehē: “Lagaloga ne fakatokotui a maua mo e liogi ki a Iehova ke fakamafana a maua. He tau magaaho takitaha, ko e mafola he Atua ne leveki mooli e tau loto mo e tau manamanatuaga ha maua.”​—Totou Filipi 4:6, 7.

7, 8. Ko e ha kua mauokafua a tautolu to fakamafana e Iesu a tautolu?

⁷ Magaaho ne nofo a Iesu he lalolagi, ne fifitaki katoatoa e ia e tau mahani mitaki he Matua haana ke he tau mena oti ne vagahau mo e taute e ia. (Ioane 5:19) Fakafano mai e Iehova a Iesu ke he lalolagi ke fakamafana a lautolu ne ‘loto malipilipi’ mo “lautolu oti  kua tagi.” (Isaia 61:1, 2; Luka 4:17-21) Iloa he tau tagata na maama e Iesu e tau matematekelea ha lautolu ti manako mooli ke lagomatai a lautolu.​—Heperu 2:17.

⁸ Ko e magaaho ne tote a Iesu, liga fai kapitiga tata a ia mo e tau tagata he magafaoa ne kua mamate. Ma e fakatai, liga ko e matua hiki haana ko Iosefa ne mate he tote agaia a Iesu. * (Kikite matahui tala.) Manamanatu la ke he uka he liga fakauka e tama fuata fakaalofa nei ke he tau maanu ni haana, pihia mo e momoko he haana matua fifine mo e tau lafu haana.

9. Fakakite fēfē e Iesu e logonaaga hofihofi he magaaho ne mate a Lasalo?

⁹ Magaaho ne taute e Iesu e fekafekauaga haana, fakakite e ia kua maama mooli e ia e tau tagata mo e hofihofi e logonaaga haana ki a lautolu. Ma e fakatai, he magaaho ne mate e kapitiga tata haana ko Lasalo, ne logona e Iesu e mamahi lahi mahaki ne logona e Maria mo Mareta. Ko e logonaaga hofihofi haana ma laua kua malolō lahi ti tagi agataha a ia, pete he iloa e ia to fakaliu tu mai e ia a Lasalo.​—Ioane 11:33-36.

10. Maeke fēfē a tautolu ke mauokafua kua maama e Iesu e tau logonaaga ha tautolu mogonei?

¹⁰ Lagomatai fēfē he tau kupu fakamafana ha Iesu mai i tuai a tautolu mogonei? Talahau fakamaali he Tohi Tapu kua nakai hiki a Iesu. Pehē ai: “Ko Iesu Keriso, nakai kehe a ia, neafi, mo e aho nai, to hoko foki ke he tukulagi.” (Heperu 13:8) Kua ui a ia ko e “Iki he moui” ha kua fakatoka e ia ke maeke a tautolu ke moui tukulagi. Maama foki e Iesu e tau maanu ha tautolu ti kua “maeke ai ia ia ke lagomatai mai kia lautolu kua kamatamata.” (Gahua 3:15; Heperu 2:10, 18) Maeke a tautolu ke mauokafua kua lauia agaia a Iesu ka mamahi e falu. Maama e ia e maanu ha lautolu, ti maeke a ia ke foaki ki a lautolu e mafanatia “ke he aho kua lata ai.”​—Totou Heperu 4:15, 16.

11. Ko e heigoa e tau kupu Tohi Tapu kua fakamafana pauaki ki a koe?

¹¹ Ko e tala hagaao ke he maanu lahi mahaki ha Iesu he mogo ne mate a Lasalo ko e taha naia he tau kupu Tohi Tapu fakamafana loga i loto he Kupu he Atua. Nakai ko e mena ke ofo ai a tautolu ha ko e “tau mena oti ne tohi mai i tuai, ne tohi ia, ke fakaako ai a tautolu; kia moua ai e tautolu e amaamanaki ha ko e fakauka mo e fakamafanatia mai he tau Tohi.” (Roma 15:4) Ka maanu a koe, maeke foki a koe ke moua e mafanatia lahi mai he tau kupu Tohi Tapu tuga i lalo:

• “Kua tata mai a Iehova kia lautolu kua loto malipilipi; kua fakamoui foki e ia a lautolu kua loto pehia.”​—Salamo 34:18, 19.

• “Ko e tau manamanatu loga he haku a loto kua fiafia ai au ha ko e fakamafanaaga mai ia koe [Iehova].”​—Salamo 94:19.

• “Ko e Iki ni ha tautolu ko Iesu Keriso, katoa mo e Atua ko e Matua ha tautolu, ko ia kua fakaalofa mai kia tautolu, mo e foaki mai e fakamafanaaga tukulagi, mo e  amaamanaki mitaki ke he Fakaalofa noa, Kia fakamafana e ia ha mutolu a tau loto, mo e fakatumau a mutolu.”​—2 Tesalonia 2:16, 17. *​—Kikite matahui tala.

12. Fakamafana fēfē e tautolu e falu?

¹² Ko lautolu ne maanu ka moua foki e fakamafana he fakapotopotoaga Kerisiano. (Totou 1 Tesalonia 5:11.) Maeke fēfē a koe ke fakamalolō mo e fakamafana a lautolu ne “loto malipilipi”? (Tau Fakatai 17:22) Manatu “ko e vaha ke fakanono ai, mo e vaha ke vagahau ai.” (Fakamatalaaga 3:7) Ko e takape ne higoa ko Dalene ne fakamaama ko lautolu ne maanu kua lata ke talahau e tau manatu mo e tau logonaaga ha lautolu. Mena kua mua atu e aoga ka taute e koe, ko e fanogonogo ka e nakai fakatauhele. Ko Junia ne taupega e tugaane ne pehē, “Pete he liga nakai maeke a koe ke maama katoatoa e maanu ha lautolu, ko e mena ne mua e aoga kua manako a koe ke maama e logonaaga ha lautolu.”

13. Ko e heigoa kua lata a tautolu ke manatu hagaao ke he maanu?

¹³ Lata ke manatu e tautolu nakai maeke a tautolu oti ke fakakite e logonaaga po ke maanu ha tautolu he puhala tatai. Falu magaaho kua nakai maeke ke fakamaama fakatonu e mamahi lahi he logonaaga ha lautolu. Pehē e Kupu he Atua: “Kua iloa he loto e mamahi hana ni; ti nakai pule foki ha tagata kehe ke he hana fiafia.” (Tau Fakatai 14:10) Pete foki ka fakakite he taha tagata e logonaaga haana, nakai mukamuka tumau he falu ke maama e mena ne lali a ia ke talahau.

14. Ko e heigoa ka talahau e tautolu ke fakamafana a lautolu kua maanu?

¹⁴ Maeke ke uka ke iloa e mena ke talahau ke he taha tagata kua maanu. Ka e pehē e Tohi Tapu “ko e alelo he tagata iloilo ke malolo ai.” (Tau Fakatai 12:18) Tokologa ne moua e tau kupu fakamafana ke talahau mai he porosua Ka Mate a Ia ne Ofania e Koe. * (Kikite matahui tala.) Ka e fa mahani, ko e mena lagomatai lahi ka taute e koe ke ‘tagi foki fakalataha mo lautolu kua tagi.’ (Roma 12:15) Ko Gaby ne mate e taane, ne talahau ko e puhala ni falu mogo ke maeke a ia ke fakakite e logonaaga haana ko e tagi. Lafi e ia: “Kakano haia ne logona e au e mafanatia ka tagi e tau kapitiga mo au. He mogoia, nakai logona e au e matimati he maanu haaku.”

15. Maeke fēfē a tautolu ke fakamafana e falu ka uka ia tautolu ke taute pihia? (Kikite foki e puha “ Tau Kupu Mafanatia.”)

¹⁵ Ka uka ia koe ke talahau taha mena fakamafana ke he tagata, liga mukamuka lahi ke fakafano e lautohi, meli hila, po ke tohi.  Maeke a koe ke fatiaki e kupu Tohi Tapu mafanatia, talahau e mahani pauaki ne manatu e koe hagaao ke he tagata ne mate, po ke talahau e manatu fiafia ne tokiofa e koe. “Ko e moua e tohi fakamafana kū po ke uiina ke fai magaaho mo e matakainaga Kerisiano ka lagomatai lahi mai ke he mena ka talahau e au,” ui e Junia. “Ko e tau talahauaga ia kua logona e au e momokoina mo e levekiaga.”

16. Ko e heigoa e puhala mitaki lahi ke fakamafana e falu?

¹⁶ Maeke he tau liogi ha tautolu ke lagomatai e tau matakainaga maanu ha tautolu. Maeke a tautolu ke liogi ma lautolu po ke liogi mo lautolu. Pete kua liga uka ke taute pihia ha kua logona hifo e koe to liga tagi a koe, ko e liogi mai he loto haau e fakamafanaaga malolō lahi. “Falu mogo ka o mai e tau matakainaga fifine ke fakamafana ki a au,” manatu e Dalene, “ne ole au ki a lautolu kaeke ke makai a lautolu ke liogi. Kamata a lautolu ke liogi ti fa taufetului ke vagahau he kamataaga, ka e matutaki a lautolu ke vagahau ti holo ki mua e malolō he leo ha lautolu mo e talahau e liogi mafanatia mai he loto. Ko e malolō he ha lautolu a tua, fakaalofa, mo e manamanatuaga, kua lahi e atihake he tua haaku.”

17-19. Ko e ha kua lata a tautolu ke foaki tumau e fakamafanaaga?

¹⁷ Nakai maeke ke iloa tonu ko e fiha e leva he tau tagata takitokotaha ke maanu. Ka mate e fakahele, he kamataaga to tokologa e tau kapitiga mo e magafaoa i ai ka foaki e fakamafanaaga. Ka e mole he liliu a lautolu ke he tau puhala momoui aga mau ha lautolu, kua lata agaia a lautolu ne maanu  ke moua e fakamafanaaga. Kia mautali ke lagomatai. “Kua fakaalofa e kapitiga ke he tau aho oti kana; kua fanau foki e matakainaga ke lata ai mo e aho matematekelea.” (Tau Fakatai 17:17) Lata a tautolu ke fakamafana a lautolu ne maanu pete ne leva e manako a lautolu ke he lagomatai ha tautolu.​—Totou 1 Tesalonia 3:7.

¹⁸ Manatu na liga amanaki e tagata ti fakaatukehe lahi ha ko e maanu he ha magaaho. Liga tupu e mena nei ha ko e tau fakamanatuaga tuga e aho ne mau, leo kofe pauaki, tau ata, tau matagahua, po ke namu, leo, po ke vahā he tau. Ka taute tokotaha he takape fifine po ke takape taane kua maanu e taha mena he magaaho fakamua he mole e mate he hoa, tuga e fina atu ke he toloaga po ke Fakamanatuaga, kua maeke ai ke momoko lahi mahaki. “Amanaki au to momoko lahi mahaki e fakamanatuaga he mau haaku ti nakai mukamuka ai,” he talahau he taha matakainaga taane. “Ka e fai matakainaga ne fakatoka e fakalatahaaga tote he tau kapitiga tata lahi haaku ti nakai ko au ni tokotaha.”

¹⁹ Manatu ko lautolu kua maanu kua lata ke fakamafana, he nakai ni ke he tau magaaho pauaki. “Fa mahani ko e lagomatai mo e faihoani ne foaki he ha magaaho noa ka uho lahi,” he ui e Junia. “Ko e foaki tumau he tau magaaho pihia kua aoga lahi, ti moua e mafanatia foki.” Mooli, nakai maeke a tautolu ke utakehe katoatoa e maanu po ke matimati, ka e maeke a tautolu ke fakamafana a lautolu kua maanu he taute e tau mena ma lautolu. (1 Ioane 3:18) Pehē a Gaby: “Fakaaue lahi au ki a Iehova ma e tau motua fakaalofa ne fakalataha mo au he tau magaaho uka lahi nei. Kua taute mooli e lautolu au ke logona e tau lima fakaalofa ha Iehova ne kaputi mai au.”

20. Ko e ha e tau maveheaga ha Iehova ko e punaaga he fakamafanaaga lahi?

²⁰ Kua mafanatia ke iloa ko Iehova ko e Atua he fakamafanaaga ka utakehe katoatoa e tau maanu oti he magaaho he liu tu mai. (Ioane 5:28, 29) Mavehe he Atua, “to fakaoti tukulagi e ia e mate; to holoholo kehe foki he Iki ko Iehova e tau hihina mata mai he tau mata oti.” (Isaia 25:8) Ti nakai “tagi foki a mutolu fakalataha mo lautolu kua tagi,” ko e tau tagata oti he lalolagi to “fiafia a mutolu fakalataha mo lautolu kua fiafia.”​—Roma 12:15.