1, 2. Fakamokoi fēfē a Iehova ki a tautolu?

KO Iehova ko e Atua fakamokoi. Ko e tau mena oti kana ne moua e tautolu kua mai ia ia. Pule a ia ke he tau mena mitaki oti kana he lalolagi ti fakaaoga e ia ke lalago aki e moui. (Salamo 104:13-15; Hakai 2:8) Mai he Tohi Tapu, fakaako e tautolu e puhala ne fakaaoga e Iehova e tau mena mitaki nei he falu mogo ke he puhala ofoofogia ke leveki aki haana tau tagata.

² Ma e fakatai, foaki e Iehova e manai mo e vai ma e motu ha Isaraela he mogo ne nonofo a lautolu he tutakale ke 40 e tau. (Esoto 16:35) Ko e fua, ha ha ia lautolu e tau mena oti kana ke leveki aki a lautolu. (Nehemia 9:20, 21) Fakamui, ne foaki e Iehova ke he perofeta ko Elisaio e malolō ke fakalahi e puke lolo tote he takape tua fakamooli. Ko e mena fakaalofa nei mai he Atua kua lagomatai e takape ke totogi e tau kaitalofa haana ti lahi agaia e tupe ne toe ke leveki aki a ia mo e fanau haana ke momoui. (2 Tau Patuiki 4:1-7) Ha ko e lalago ha Iehova, ne foaki fakamana e Iesu  e tau mena kai mo e tau tupe he magaaho kua lata.​—Mataio 15:35-38; 17:27.

3. Ko e heigoa ka fakatutala a tautolu he vala tala nei?

³ Maeke a Iehova ke fakaaoga e tau mena ne fifili e ia ke lalago aki e tufugatia haana. Uiina agaia e ia e tau fekafekau haana ke foaki e tau mena kua maeke ia lautolu ke lalago aki e gahua he fakatokatokaaga haana. (Esoto 36:3-7; totou Tau Fakatai 3:9.) Ko e ha kua amanaki a Iehova ke fakaaoga e tautolu e tau mena mitaki ha tautolu ke liu foaki age ki a ia? Lalago fēfē he tau fekafekau ha Iehova he vahā Tohi Tapu e gahua haana? Fakaaoga fēfē he fakatokatokaaga e tau tupe ne foaki fakaalofa mogonei? To tali he vala tala nei e tau hūhū ia.

4. Ko e heigoa kua fakakite e tautolu ki a Iehova he lalago e tautolu e gahua haana?

⁴ Foaki e tautolu ki a Iehova ha kua fakaalofa mo e loto fakaaue a tautolu ki a ia. Ka manamanatu a tautolu ke he tau mena oti ne taute e Iehova ma tautolu, kua aamotia lahi mahaki e tau loto ha tautolu. Pihia foki e logonaaga he Patuiki ko Tavita he fakamaama e ia e mena kua lata ke talaga aki e faituga. Talahau e Tavita ko e tau mena oti kana ne moua e tautolu kua mai ia Iehova mo e ha mena ne liu foaki age e tautolu ki a Iehova ko e tau mena ne fitā e foaki mai e ia ki a tautolu.​—Totou 1 Nofoaga he Tau Patuiki 29:11-14.

5. Fakaako fēfē he Tohi Tapu ki a tautolu ko e foaki nakai lotokai e vala aoga he tapuakiaga mooli?

⁵ Foaki foki e tautolu ki a Iehova ha ko e puhala anei ke tapuaki ki a ia. He fakakiteaga, ne logona he aposetolo ko Ioane e tau fekafekau ha Iehova he lagi ne pehē: “Ko e Iki [Iehova ko e Atua] na e, kua lata ni a koe ke tuku atu ki ai e fakahekeaga, mo e lilifu, mo e malolo; ha kua eke e koe e tau mena oti, ha ko e hau a finagalo foki ne ha ha i ai a lautolu; mo e eke ai a lautolu.” (Fakakiteaga 4:11) Kua lata mooli a Iehova ke moua katoatoa e fakahekeaga mo e lilifu ti kua lata a tautolu ke foaki e tau mena mitaki oti kana ki a ia. Puhala e Iehova ia Mose ke poaki ke he motu ha Isaraela ke lagatolu e taute e galue he tau. Ko e vala he tapuakiaga ha lautolu he tau galue nei kua putoia e foaki ki a Iehova. Ne tala age ke he tau tagata ke “aua neke kitia ai taha ki mua a Iehova kua nakai fai mena.” (Teutaronome 16:16) He vahā nei foki, ko e vala aoga he tapuakiaga ha tautolu ko e foaki nakai lotokai. Fakakite he puhala nei kua uho mo e lalago e tautolu e gahua he fakatokatokaaga ha Iehova.

6. Ko e ha kua mitaki ma tautolu ke foaki? (Kikite fakatino he kamataaga.)

⁶ Kua mitaki ma tautolu ke foaki fakamokoi ka e nakai ni ke moua. (Totou Gahua 20:35.) Manamanatu ke he tama tote ne moua e tupe tote mai he tau matua haana ti fakaaoga e taha vala ke fakatau aki e mena fakaalofa ma e tau matua haana. Fēfē e logonaaga he tau matua ke he mena fakaalofa haana? Po ke manamanatu ke he paionia fuata ne nofo mo e tau matua haana ti age taha tupe ki a laua ke lagomatai ke totogi aki e mena ne nofo ai po ke fakatau e mena kai ma e magafaoa. Nakai amanaki e tau matua haana ke taute pihia e ia, ka e talia e laua e  mena fakaalofa haana. Ko e ha? Ha ko e puhala haana a ia ke fakakite e loto fakaaue ma e tau mena oti ne taute e laua ma haana. He puhala pihia foki, iloa e Iehova kua mitaki ma tautolu ke foaki mai he tau mena uho lahi ha tautolu.

7, 8. Fakatoka fēfē he tau tagata ha Iehova i loto he Tohi Tapu e fakafifitakiaga he foaki e lautolu e tau mena fakaalofa (a) ma e tau matagahua pauaki? (e) ke lalago aki e gahua haana?

⁷ Kua fakaako e tautolu he Tohi Tapu na foaki he tau tagata ha Iehova e tau mena fakaalofa ke lalago aki e gahua haana. Falu mogo ne foaki e lautolu ke lata mo e tau matagahua pauaki. Ma e fakatai, fakamafana e Mose e tau Isaraela ke tuku e tau mena fakaalofa ke lata mo e talaga he faituga. Fakamui, ne taute pihia foki he Patuiki ko Tavita ke lata mo e talaga he faituga. (Esoto 35:5; 1 Nofoaga he Tau Patuiki 29:5-9) He pule e Patuiki ko Ioasa, ne fakafoou he tau ekepoa e faituga he fakaaoga e tupe ne foaki he tau tagata. (2 Tau Patuiki 12:4, 5) He senetenari fakamua, ne iloa he tau Kerisiano kua tō e hoge ki Iutaia ti lata e tau matakainaga ke moua e lagomatai. Igatia e Kerisiano mo e fifili e mena kua fahia a ia ke ta atu ke he tau matakainaga i Iutaia.​—Gahua 11:27-30.

⁸ Ko e tau tagata foki ha Iehova ne foaki e lalagoaga fakatupe ki a lautolu ne leveki e gahua Haana. Ma e fakatai, he Fakatufono ha Mose kua nakai moua he tau tagata Levi e tufaaga tuga e falu magafaoa. Ti ko e tau Isaraela ne toe ne foaki e mena ke hogofuluaki ha lautolu ke he tau tagata Levi. Fakaatā he mena nei e tau tagata Levi ke hagaaki ke he gahua ha lautolu he faituga. (Numera 18:21) He puhala pihia, ko e tau fifine fakamokoi ne foaki e tau koloa ha lautolu ke lalago aki a Iesu mo e tau aposetolo haana.​—Luka 8:1-3.

9. Moua mai i fe e tau mena fakaalofa i tuai?

⁹ Ko e tau foakiaga mena fakaalofa ia ne moua mai he tau punaaga kehekehe. Ko e tau Isaraela ne foaki mena fakaalofa ke lata mo e talaga he faituga ne liga mai he tau koloa uho ha lautolu ne tamai i Aikupito. (Esoto 3:21, 22; 35:22-24) He senetenari fakamua, ne fakafua he falu Kerisiano e tau mena ha lautolu, tuga e tau fonua po ke tau fale, ti tamai e tupe ke he tau aposetolo. Fakaaoga he tau aposetolo e tupe ia ke lagomatai aki e tau matakainaga ne nonofogati. (Gahua 4:34, 35) Tuku kehe tumau he falu Kerisiano e tau tupe ke maeke a lautolu ke foaki ke lalago aki e gahua. (1 Korinito 16:2) Mai ia lautolu ne maukoloa ke hoko ki a lautolu ne nonofogati, maeke he tau tagata oti ke foaki taha mena.​—Luka 21:1-4.

10, 11. (a) Fifitaki fēfē e tautolu e tau fekafekau fakamokoi ha Iehova ne momoui he tau vahā Tohi Tapu? (e) Fēfē e logonaaga ha mutolu ke he lalagoaga he gahua he Kautu?

¹⁰ Kua liga ole ki a tautolu foki he vahā nei ke tuku e mena fakaalofa ma e tau matagahua pauaki. Liga amanaki e fakapotopotoaga ha mutolu ke fakafoou e Fale he Kautu po ke talaga e Fale he Kautu. Po ke liga lata  e la ofisa ha mutolu ke fakafoou. Maeke foki a tautolu ke lagomatai ke totogi e tau mena fakamole he fonoaga. Po ke liga matematekelea e tau matakainaga ha tautolu he falu matakavi ha kua lauia he matematekelea pauaki ti lata ke moua e lagomatai ha tautolu. Ko e tau mena fakaalofa foki ha tautolu kua lagomatai e tau misionare, tau paionia pauaki, tau leveki takaiaga, mo lautolu ne gahua he matapatu mo e tau la ofisa he lalolagi katoa. Liga fakafano atu tumau he fakapotopotoaga ha mutolu e tau mena fakaalofa ke lagomatai ke talaga e tau Fale he Toloaga mo e tau Fale he Kautu ma e tau matakainaga ha tautolu he falu matakavi he lalolagi.

¹¹ Igatia a tautolu mo e maeke ke foaki taha mena ke lalago e gahua hane taute he fakatokatokaaga ha Iehova he tau aho fakamui nei. Laulahi he tau mena fakaalofa kua nakai iloa. Ka tuku e tautolu e tupe i loto he tau puha mena fakaalofa he Fale he Kautu po ke foaki he initanete puhala he jw.org, kua nakai tala age e tautolu ke he falu e lahi he mena ne foaki e tautolu. Ka e kua ka logona hifo e mutolu kua tote e mena ne foaki fakaalofa e mutolu? Ko e tala mooli kua laulahi he tau mena fakaalofa ne moua he fakatokatokaaga kua moua mai he tau mena fakaalofa ikiiki loga ka e nakai mai he tau mena fakaalofa lalahi ne gahoa. Fifitaki foki e tau matakainaga ha tautolu ne nakai lahi mahaki e tupe ke he tau Kerisiano fakamua i Maketonia. Kua “nonofogati lahi” a lautolu, ka e ole fakamakamaka a lautolu ke foaki, ati foaki fakamokoi ai.​—2 Korinito 8:1-4.

12. Eketaha fēfē e fakatokatokaaga ke fakaaoga e tau mena foaki fakaalofa he puhala kua mua e mitaki?

¹² Ko e Kau Fakatufono kua fakamooli mo e lotomatala he puhala ne fakaaoga e tau mena fakaalofa. (Mataio 24:45) Ne liogi a lautolu ke taute e tau fifiliaga mitaki, ti fakatokatoka fakamakai e puhala ke fakaaoga aki e tupe. (Luka 14:28) He vahā Tohi Tapu, ko e tau tagata taane tua fakamooli ne leveki e tau mena fakaalofa ne eketaha ke fakaaoga ni ke lata mo e tapuakiaga a Iehova. Ma e fakatai, ne liu atu a Esera ki Ierusalema mo e tau mena fakaalofa uho ne age he patuiki ha Peresia, putoia e auro, ario, mo e tau koloa ne molea e $100 miliona (U.S.) he vahā nei. Onoono a Esera ke he tau mena foaki nei ko e tau mena fakaalofa ki a Iehova. Ti tala age e ia e tau fakatonuaga pauaki ke puipui aki he ta atu ai he tau motu hagahaga kelea. (Esera 8:24-34) Loga e tau he mole, ne oko he aposetolo ko Paulo e tau tupe ke lagomatai aki e tau matakainaga nonofogati i Iutaia. Ne eketaha a ia ma lautolu ne ta atu e tupe ke “tauteute e [l]autolu e tau mena gali nakai ki mua he Iki [Iehova] hokoia, ka e katoa foki mo mua he tau tagata.” (Totou 2 Korinito 8:18-21.) He vahā nei, ko e fakatokatokaaga ha tautolu kua fifitaki a Esera mo Paulo he fakaaoga fakamitaki e tau mena foaki fakaalofa.

13. Ko e ha kua nakaila leva e taute he fakatokatokaaga e falu hikihikiaga?

¹³ Maeke he magafaoa ke taute e tau hikihikiaga he puhala ne fakaaoga aki e lautolu e tupe ke nakai fakamole lahi ke he mena kua moua e lautolu. Po ke maeke a lautolu ke kumi puhala ke fakamukamuka aki e moui ke maeke ke lahi e mena ke taute ma Iehova. Pihia foki e fakatokatokaaga ha Iehova. Nakaila leva ia, loga e tau matagahua talaga foou ti falu magaaho ne lahi e tupe ne fakaaoga ke he tupe ne moua. Ko e fakatokatokaaga, tuga e magafaoa kua kumi puhala ke leveki e tupe mo e fakamukamuka e gahua ti maeke ke fakaaoga fakamitaki e tau mena foaki fakaalofa fakamokoi ha mutolu.

14-16. (a) Ko e heigoa kua fakaaoga ki ai e tau mena foaki fakaalofa ha mutolu? (e) Lagomatai fēfē he tau matagahua nei a mutolu takitokotaha?

¹⁴ Tokologa ne kua leva e nonofo he kupu mooli ne pehē kua mua atu e loga he tau mena fakaalofa ne moua mai e tautolu mogonei he fakatokatokaaga ne nakai pihia fakamua. Ha ha i ai mogonei e jw.org mo e JW Broadcasting. Ko e New World Translation of the Holy Scriptures kua moua ke he loga e vagahau. He 2014/2015, ko e Fonoaga he Lalolagi ne tolu e aho “Keep Seeking First God’s Kingdom!” ne fakahoko ke he tau malē lalahi he 14 e taone he lalolagi katoa. Fiafia mooli a lautolu oti ne hohoko atu ki ai!

¹⁵ Tokologa ne fakakite e loto fakaaue ha lautolu ma e tau mena fakaalofa nei mai he fakatokatokaaga ha Iehova. Ma e fakatai, ko e hoa ne fekafekau i Asia ne tohi: “Ko e kotofaaga ha maua he taone tote. Ti fa logona hifo e maua e mamao he falu mogo, mo e mukamuka ke nimo e laulahi he gahua ha Iehova. Ka ko e mogo ne kitekite a maua ke he tau polokalama he JW Broadcasting, ne manatu ai ko maua ko e vala he tau matakainaga he lalolagi katoa. Fiafia lahi e tau matakainaga fakahele ha maua hinei ke he JW Broadcasting. Fa logona e maua a lautolu ne pehē ka oti e kitekite ke he tau fakaholoaga he mahina, ne tata e logonaaga ha lautolu ke he tau matakainaga he Kau Fakatufono. Kua matalahi a lautolu mogonei ke eke mo vala he fakatokatokaaga he Atua.”

¹⁶ He lalolagi katoa, teitei 2,500 e Fale he Kautu hane talaga foou po ke fakafoou. Ko e tau matakainaga he taha fakapotopotoaga i Honduras ne pehē fa miti a lautolu ke fai Fale he Kautu, ka kua fakamooli e miti ia mogonei. Tohi e lautolu: “Logona hifo e mautolu e fiafia mooli he eke mo vala he magafaoa ha Iehova ke he lagi mo e lalolagi katoa mo e olioli ha mautolu a tau matakainaga fakahele he lalolagi katoa.” Tokologa ne fakakite e tau logonaaga pihia he moua e lautolu e Tohi Tapu  mo e falu tohi ke he tau vagahau ni ha lautolu, ka lagomatai he tau matakainaga a lautolu he mole e matematekelea pauaki, po ke kitia e lautolu e tau fua mitaki he fakamatala ke he tau tagata he tau taone mo e toloaga tagata he matakavi ha lautolu.

17. Iloa fēfē e tautolu ko Iehova ne lalago e fakatokatokaaga haana he vahā nei?

¹⁷ Tokologa ne nakai ko e Tau Fakamoli a Iehova ne nakai maama e puhala ne taute e tautolu e tau mena oti nei he fakaaoga ni he tau mena fakaalofa foaki noa. Ko e takitaki he taha kamupanī lahi ne fina atu ke kitia e taha he tau matini lomi ha tautolu. Ofogia a ia he kitia ko e tau gahua oti kua taute he tau tagata gahua foaki noa, tau mena fakaalofa foaki noa, mo e nakai fai fakaholoaga ne fakatoka ke tutuli tupe. Pehē a ia ko e mena kua taute e tautolu kua nakai maeke. Talia foki e tautolu! Iloa e tautolu na maeke hokoia ni ha ko Iehova ne lalago e gahua.​—Iopu 42:2.

18. (a) Ko e heigoa e tau monuina kua moua e tautolu ka foaki e tautolu ke lalago e Kautu? (e) Fakaako fēfē e tau fanau ha tautolu mo lautolu ne foou ke taute pihia?

¹⁸ Foaki mai e Iehova ki a tautolu e lilifu mo e magaaho ke lalago e gahua homo ue atu he Kautu. Ne talahau e ia ka taute pihia e tautolu to fakamonuina e ia a tautolu. (Malaki 3:10) Mavehe mai e Iehova ka foaki fakamokoi a tautolu to mitaki ai ma tautolu. (Totou Tau Fakatai 11:24, 25.) Tala mai foki e ia ki a tautolu to fiafia a tautolu ka foaki ha kua “mua e monuina hana ke foaki atu, ke he monuina hana ke talia mai.” (Gahua 20:35) Ko e tau mena ne talahau mo e taute e tautolu, to fakaako ke he tau fanau ha tautolu mo lautolu ne foou ke he puhala ka foaki e lautolu ke he gahua nei mo e moua e tau monuina loga.

19. Lagomatai fēfē he vala tala nei a koe?

¹⁹ Ko e tau mena oti kua moua e tautolu mai ia Iehova. Ka liuaki age e tautolu ki a ia, fakakite ai kua fakaalofa a tautolu ki a ia mo e uho e tau mena oti ne taute e ia ma tautolu. (1 Nofoaga he Tau Patuiki 29:17) He foaki mena fakaalofa e tau Isaraela ke lata mo e talaga he faituga, ne “fiafia ai e motu, ha kua foaki atu e lautolu mo e loto makai, ha kua foaki atu e lautolu mo e loto katoa mo e fakamakai kia Iehova.” (1 Nofoaga he Tau Patuiki 29:9) Kia fakatumau foki a tautolu ke moua e fiafia mo e loto fakaaue he liuaki atu ki a Iehova mai he tau mena ne foaki e ia ki a tautolu.