1. Pete ko Iehova ko Ia ne Mua Ue Atu, ko e heigoa ne uiina e ia e falu ke taute?

KO IEHOVA ko Ia ne Mua Ue Atu. Ne tufugatia e ia e tau mena oti kana, ti nakai fai fakakaupāaga e pulotu mo e malolō haana. He lagomatai e ia a Iopu ke maama e mena nei, ne pehē a Iopu ki a Ia: “Kua iloa e au kua maeke kia koe e tau mena oti kana, ti nakai maeke foki ke lekua ai ha mena kua finagalo ki ai a koe.” (Iopu 42:2) Maeke a Iehova ke taute e tau mena ne fifili e ia ke taute ka e nakai fai lagomatai mai he ha tagata. Ka e fakakite e ia e fakaalofa he uiina e falu ke gahua fakalataha mo ia ke fakamooli e finagalo haana.

2. Ko e heigoa e gahua aoga lahi ne uiina e Iehova a Iesu ke taute?

² Ne tufuga he Atua e haana Tama ko Iesu, ato tufuga e ia e tau tagata oti mo e tau mena oti kana foki. Ti fakaatā e Iehova e Tama haana ke lagomatai a ia ke tufuga e tau mena oti kana ne toe.  (Ioane 1:1-3, 18) Ne tohi he aposetolo ko Paulo hagaao ki a Iesu: “Ko e mena ne eke e ia e tau mena oti kana, ko e tau mena ha he lagi, mo e tau mena ha he lalolagi, ko e tau mena kua kitia mo e tau mena nakai kitia, po ke tau nofoaiki, po ke tau iki, po ke tau patuiki, po ke tau pule; ko ia ne eke e tau mena oti kana, ne eke foki māna.” (Kolose 1:15-17) Ti nakai ni foaki e Iehova ke he Tama haana e gahua aoga lahi ka kua tala age foki ke he falu. Ko e lilifu mooli!

3. Ko e heigoa ne uiina e Iehova a Atamu ke taute, ti ko e ha?

³ Ne uiina foki e Iehova e tau tagata ke gahua fakalataha mo ia. Ma e fakatai, ne fakaatā e ia a Atamu ke fakahigoa e tau manu. (Kenese 2:19, 20) Manamanatu la ke he fiafia ne logona hifo e Atamu he taute e gahua nei! Ne fakaako fakamatafeiga e ia e puhala ne onoono mo e gahuahua e tau manu, ti fifili mogoia e ia e higoa ma e tau manu takitaha. Tufugatia e Iehova e tau manu oti, ti maeke a ia ke fakahigoa a lautolu. Ka e fakakite e ia ki a Atamu e fakaalofa lahi mahaki Haana ki a ia he fakaatā a ia ke fakahigoa e tau manu. Ne foaki foki he Atua ki a Atamu e kotofaaga ke eke e lalolagi katoa mo parataiso. (Kenese 1:27, 28) Ka e fakahiku ne fifili a Atamu ke oti e gahua mo e Atua, ti ko e fua ne mamahi lahi ma haana mo e haana tau hologa oti.—Kenese 3:17-19, 23.

4. Gahua fēfē e falu fakalataha mo e Atua ke fakakatoatoa e finagalo haana?

⁴ Fakamui ne uiina he Atua e falu tagata ke gahua mo ia. Tā e Noa e vaka ne fakamomoui a ia mo e magafaoa haana he Fakapukeaga. Fakatokanoa e Mose e motu ha Isaraela mai i Aikupito. Takitaki e Iosua e tau Isaraela ke he Motu he Maveheaga. Tā e Solomona e faituga i Ierusalema. Eke a Maria mo matua fifine ki a Iesu. Ko lautolu oti nei ne mahani fakamooli mo e tokologa atu foki ne gahua fakalataha mo Iehova ke fakakatoatoa e finagalo haana.

5. Ko e gahua fe ne maeke a tautolu ke taute, ti kua lata kia a Iehova ke putoia a tautolu he gahua nei? (Kikite fakatino he kamataaga.)

⁵ He vahā nei, ne uiina e Iehova a tautolu ke taute e tau mena oti ke lalago e Kautu haana. Loga e puhala ka fekafekau a tautolu ke he Atua. Ti pete he nakai maeke a tautolu oti ke fekafekau ki a Ia he puhala taha, maeke ia tautolu oti ke fakamatala e tala mitaki he Kautu. Maeke a Iehova ke taute ne ia e gahua nei. Maeke a ia ke vagahau fakahako mai he lagi ke he tau tagata he lalolagi. Pehē a Iesu na maeke a Iehova ke tala age ke he tau maka ke fakailoa ke he falu hagaao ke he Patuiki he Kautu Haana. (Luka 19:37-40) Ka e fakaatā e Iehova a tautolu ke eke mo “tau ekegahua” haana. (1 Korinito 3:9) Tohi he aposetolo ko Paulo: “Hanai foki, ko mautolu ko e tau ekegahua fakalataha mo ia, kua ole atu a mautolu kia mutolu aua neke talia teao e mutolu e fakaalofa noa he Atua.” (2 Korinito 6:1) Ko e lilifu lahi ke uiina ke gahua fakalataha mo e Atua. Kia kitekite la tautolu ke he falu kakano ne tamai he mena nei ki a tautolu e fiafia lahi.

6. Fakamaama fēfē he Tama uluaki he Atua e logonaaga haana he gahua he tapa he Matua haana?

⁶ Ko e gahua mo e Atua ne fakafiafia tumau e tau fekafekau ha Iehova. Ato hau ke he lalolagi, ne pehē e Tama uluaki he Atua: “Ne eke e Iehova au, ko e kamataaga, he hana tau puhala, . . . ha ha i ai au mo ia, ko au ko e tufuga; ne eke foki au mo fiafia hana ke he taha aho mo e taha aho; ne olioli mau au ki mua hana ke he tau aho oti ni.” (Tau Fakatai 8:22, 30) He gahua a Iesu mo e Matua haana, ne fiafia  a ia ha kua fakakatoatoa e ia e tau mena loga ti iloa e ia na fakaalofa a Iehova ki a ia. Ka e kua a tautolu?

7. Ko e ha ne moua e tautolu e fiafia he gahua fakamatala?

⁷ Ne pehē a Iesu kua fiafia a tautolu he foaki atu mo e ka talia mai e tautolu. (Gahua 20:35) Fiafia a tautolu ka moua e tautolu e kupu mooli, ka ko e ha kua fiafia foki a tautolu ke foaki atu e kupu mooli ke he falu? Ha kua kitia e tautolu e fiafia mooli ha lautolu ka maama e lautolu e fakaakoaga he Tohi Tapu ti kamata ke moua e fakafetuiaga mo e Atua. Kua fiafia a tautolu ke kitia a lautolu ne hiki e tau manamanatuaga mo e puhala moui ha lautolu. Ko e gahua fakamatala kua mua atu e aoga mo e fiafia lahi ne maeke ia tautolu ke taute. Kua maeke ai ma lautolu ne eke mo tau kapitiga he Atua ke moua e moui tukulagi.—2 Korinito 5:20.

8. Ko e heigoa ne talahau he falu hagaao ke he fiafia he gahua fakalataha mo Iehova?

⁸ Ka lagomatai e tautolu e falu ke fakaako hagaao ke he Atua, iloa e tautolu kua fakafiafia e tautolu a Iehova ti tokiofa e ia e tau laliaga ha tautolu ke fekafekau ki a ia. Moua foki e tautolu e fiafia he mena nei. (Totou 1 Korinito 15:58.) Ko Marco ne nofo i Italia ne pehē: “Ha ha ia au e fiafia lahi mahaki he iloa kua foaki mo e loto katoa au ki a Iehova ka e nakai ke he ha tagata ka nakai leva ti nimo e mena ne taute e au.” Pihia foki a Franco ne fekafekau i Italia ne pehē: “Puhala he Kupu haana mo e tau foakiaga fakaagaaga haana, ne fakamanatu e Iehova ki a tautolu he tau aho takitaha kua fakaalofa a ia ki a tautolu mo e tau mena oti ne taute e tautolu ma haana kua aoga lahi, pete ni he tuga kua nakai aoga e tau laliaga ha tautolu ki a tautolu. Ko e kakano hanei he gahua fakalataha mo e Atua kua fakafiafia au mo e foaki e fai kakano ke he moui haaku.”

9. Ko e heigoa e fakafetuiaga he vahāloto ha Iehova mo Iesu, ti ko e ha?

⁹ Ka gahua auloa a tautolu mo lautolu ne  fakaalofa a tautolu ki ai, kua tata a tautolu ki a lautolu. Maeke a tautolu ke iloa lahi e aga fakatagata mo e tau mahani ha lautolu. Iloa e tautolu e tau foliaga ha lautolu mo e puhala ne lali a lautolu ke hokotia ki ai. Gahua a Iesu mo Iehova liga ke piliona e tau tau. Ko e fakaalofa mo e fakaalofa hofihofi ha laua ki a laua ni ne malolō lahi ti nakai fai mena ke moumou e fakafetuiaga ha laua. Fakamaama e Iesu e tata lahi he fakafetuiaga ha laua he pehē a ia: “Ko au nai mo e Matua, kua taha ni a maua.” (Ioane 10:30) Ne kaufakalataha mooli a laua, ti fakalataha katoatoa ai a laua he mogo ne gahua.

10. Ko e ha e fakamatala kua fakatata lahi atu a tautolu ke he Atua mo e falu?

¹⁰ Ne ole a Iesu ki a Iehova ke puipui e tau tutaki haana. Ko e ha? Liogi a ia: “Kia taha a lautolu tuga na taua.” (Ioane 17:11) Ka momoui a tautolu ke he tau tutūaga he Atua mo e fai vala he gahua fakamatala, kua mitaki ke maama e tau mahani homo ue atu Haana. Fakaako e tautolu e kakano ne pulotu ke falanaki ki a ia mo e ke muitua ke he takitakiaga haana. Ti ka fakatata atu a tautolu ke he Atua, kua fakatata mai a ia ki a tautolu. (Totou Iakopo 4:8.) Maeke foki a tautolu ke fakatata ke he tau matakainaga ha tautolu ha kua fehagai a tautolu mo e tau lekua mo e tau fiafia pihia ti tatai e tau foliaga ha tautolu. Gahua auloa, fiafia auloa, mo e fakauka auloa a tautolu. Ko Octavia ne nofo i Peritania ne pehē: “Ko e gahua mo Iehova kua fakatata lahi atu au ke he falu.” Fakamaama e ia ha ko e tau tuaga kapitiga haana kua fakavē mogonei ke he “foliaga mo e takitakiaga aga mau.” Maeke foki a tautolu ke logona hifo pihia. Ka kitia e tautolu e tau laliaga he tau matakainaga ha tautolu kua fakafiafia e Iehova, kua fakatata lahi atu ai a tautolu ki a lautolu.

11. Ko e ha kua fakatata fakalahi a tautolu ki a Iehova mo e ke he ha tautolu a tau matakainaga he lalolagi foou?

¹¹ Ko e fakaalofa ha tautolu ma e Atua mo e tau matakainaga ha tautolu kua malolō mogonei, ka e to malolō lahi atu he lalolagi foou. Manamanatu ke he loga e gahua atihake ka taute e tautolu he vahā anoiha! To fakafeleveia e tautolu a lautolu kua fakaliu tu mai mo e fakaako a lautolu hagaao ki a Iehova. To gahua foki a tautolu ke eke e lalolagi mo parataiso. To eke ai mo mena ke fiafia lahi ke gahua auloa mo e fakahiku ke he mitaki katoatoa i lalo he pule he Keriso. To fakatata lahi foki e tau tagata oti ke he taha mo e taha mo e ki a Iehova, ka “fakamakona e manako he tau mena momoui oti.”—Salamo 145:16.

12. Eke fēfē e gahua fakamatala mo puipuiaga?

¹² Kua lata ia tautolu ke puipui e fakafetuiaga ha tautolu mo Iehova. Kua nonofo a tautolu he lalolagi a Satani ti kua nakai mitaki katoatoa a tautolu, ati mukamuka ma tautolu ke kamata ke manamanatu mo e mahani tuga e lalolagi. Kua tuga e kakau he tahi ne loka lahi ti toho a tautolu ke he faahi ne nakai manako a tautolu ke kakau ki ai. Lata mogoia a tautolu ke fakaaoga e malolō katoa ha tautolu ke kakau ke he taha faahi. Pihia foki,  kua lata a tautolu ke eketaha ke kalo kehe he fakaohoohoaga he lalolagi ha Satani. Puipui fēfē mogoia he fakamatala a tautolu? Ka tutala a tautolu hagaao ki a Iehova mo e Tohi Tapu, hagaaki a tautolu ke he tau mena ne aoga mo e mitaki, nakai ke he tau mena ka fakalolelole e tua ha tautolu. (Filipi 4:8) Fakamalolō he fakamatala e tua ha tautolu ha kua fakamanatu ai ki a tautolu e tau maveheaga mo e tau tutūaga totonu he Atua. Lagomatai foki a tautolu ke fakatumau e tau mahani kua lata ia tautolu ke maeke ke puipui a tautolu mai ia Satani mo e lalolagi haana.—Totou Efeso 6:14-17.

13. Fēfē e logonaaga he taha Fakamoli i Ausetalia hagaao ke he fakamatala?

¹³ Ka tumau a tautolu ke fagahuatia he fakamatala, fakaako, mo e taute e tau mena ma e falu he fakapotopotoaga, kua puipui a tautolu ha kua nakai fai magaaho a tautolu ke tupetupe lahi mahaki ke he tau lekua ni ha tautolu. Ko Joel ne nofo i Ausetalia ne pehē: “Lagomatai he gahua fakamatala au ke nakai mamutu kehe mai he tau mena kua mooli. Fakamanatu ai ki a au e tau paleko ne fehagai ai he tau tagata mo e tau aoga ne moua e au he fakagahua e tau matapatu fakaakoaga he Tohi Tapu ke he moui haaku. Lagomatai he gahua fakamatala au ke lali ke tumau e mahani fakatokolalo; kua foaki ki a au e magaaho ke falanaki ki a Iehova mo e ke he tau matakainaga haaku.”

14. Ko e ha e fakamanavalahi ha tautolu ke he fakamatala ne fakakite kua ha ha e agaaga he Atua mo tautolu?

¹⁴ Foaki foki he gahua fakamatala ki a tautolu e mauokafua lahi kua ha ha i ai e agaaga he Atua mo tautolu. Ke fakatai: Manamanatu la ko e gahua haau ke tufa e falaoa ke he tau tagata he maaga haau. Nakai totogi a koe ke taute e mena nei, ti totogi ni e koe e tau fakamoleaga haau. Laulahi foki he tau tagata ne nakai manako ke he falaoa, ti vihiatia foki he falu a koe he tamai ai ki a lautolu. Fiha e leva ka matutaki a koe ke he gahua nei? Nakai leva to logona hifo e koe e loto lolelole, ti liga tiaki e koe. Ka e tokologa ia tautolu ne matutaki ke he gahua fakamatala he taha tau ke he taha tau, pete kua lahi e magaaho mo e tupe ne fakaaoga e tautolu, mo e kua vaiga po ke ita e tau tagata ki a tautolu. Fakamooli he mena nei kua lagomatai he agaaga he Atua a tautolu.

15. Matutaki fēfē e fakamatala he tala mitaki mo e finagalo he Atua ma e tau tagata?

¹⁵ Matutaki fēfē e gahua fakamatala mo e finagalo ha Iehova ma e tau tagata? Ko e finagalo he Atua ke momoui tukulagi e tau tagata, ti ko e finagalo haana ne nakai hiki he agahala a Atamu. (Isaia 55:11) Taute he Atua e fakatokaaga ma tautolu ke tokanoa mai he agahala mo e mate. Fēfē? Hau a Iesu ke he lalolagi mo e poa e moui haana. Ka e, ke aoga mai he poa haana, kua lata e tau tagata ke omaoma ke he Atua. Ti fakaako e Iesu ke he tau tagata e tau mena ne manako e Atua ki a lautolu, ti poaki a ia ke he tau tutaki haana ke taute e mena taha ia. Ka fakamatala mo e lagomatai e tautolu e falu ke eke mo tau  kapitiga he Atua he vahā nei, kua gahua fakatatau a tautolu mo e Atua he fakatokaaga fakaalofa haana ke fakahao e tau tagata mai he agahala mo e mate.

16. Matutaki fēfē e fakamatala ha tautolu ke he tau poakiaga ne mua ue atu he Atua?

¹⁶ Ka lagomatai e tautolu e falu ke moua e puhala ke he moui tukulagi, kua fakakite e tautolu e fakaalofa ki a lautolu mo e fakaalofa a tautolu ki a Iehova. Ko e haana “finagalo ke fakamomoui e tau tagata oti kana, mo e hokotia a lautolu he maama ke he kupu moli.” (1 Timoteo 2:4) He hūhū e Farasaio ki a Iesu ke he poakiaga ne mua ue atu he Atua, ne pehē a Iesu: “Kia fakaalofa a koe ke he Iki hau a Atua mo e hau a loto katoa, mo e hau a agaga katoa, mo e hau a manatu katoa. Ko e poaki fakamua hanā mo e lahi. Kua pihia foki mo ia ne ua aki, Kia fakaalofa atu a koe kia ia ne katofia a mua, kia tuga foki na koe kia koe.” (Mataio 22:37-39) He fakamatala e tala mitaki, kua omaoma e tautolu e tau poakiaga nei.—Totou Gahua 10:42.

17. Fēfē e logonaaga haau hagaao ke he lilifu ke fakamatala e tala mitaki?

¹⁷ Monuina mooli a tautolu! Kua foaki e Iehova ki a tautolu e gahua ne moua e tautolu e fiafia, fakatata lahi a tautolu ki a ia mo e ke he tau matakainaga ha tautolu, mo e puipui e fakafetuiaga ha tautolu mo ia. Foaki foki ki a tautolu e magaaho ke fakakite e tautolu e fakaalofa ha tautolu ke he Atua mo e ke he falu. Totou miliona e tau fekafekau ha Iehova he lalolagi katoa, ti igatia a lautolu mo e kehekehe lahi e tau tutūaga. Ka e he fuata po ke motua, maukoloa po ke nofogati, malolō po ke lolelole a tautolu, taute e tautolu e tau mena oti kua maeke ke talahau e tua ha tautolu ke he falu. Logona hifo a tautolu tuga a Chantel mai i Falani ne pehē: “Ko Ia ne mua atu e malolō he lagi mo e lalolagi katoatoa, ko e Tufuga he tau mena oti kana, ko e Atua fiafia kua pehē ki a au: ‘Ō a! Vagahau! Vagahau ma haaku, vagahau mai he tau loto ha mutolu. Foaki atu e au ki a mutolu haaku a malolō, haaku a Kupu ko e Tohi Tapu, lalagoaga he lagi, tau kapitiga he lalolagi, fakaakoaga ne holo ki mua, mo e tau fakatonuaga tonutika he magaaho kua latatonu.’ Ko e lilifu mua ue atu ke taute e mena ne ole e Iehova ki a tautolu mo e ke gahua auloa mo e ha tautolu a Atua!”