KE HE tau kua mole, totou afe e tau matakainaga taane he lalolagi katoa ne kotofa ke eke mo tau motua mo e tau fekafekau lagomatai. Kaeke ko koe taha, nakai noa kua fiafia a koe he fekafekau ki a Iehova mo e ke he tau matakainaga haau he puhala foou nei.

Ka e nakai ko e mena kelea ka logona hifo foki e koe e tupetupe. Ko Jason, ko e motua fuata ne pehē: “He kotofa foou au, ne lahi e tupetupe haaku ha ko e tau matagahua foou haaku.” Logona hifo pihia a Mose mo Ieremia, kua nakai hokotia e lotomatala ha laua he mogo ne moua e tau kotofaaga foou mai ia Iehova. (Esoto 4:10; Ieremia 1:6) Ka logona hifo pihia a koe, ko e heigoa ka taute e koe ke fakamalolō e mauokafua haau mo e fakatumau ke holo ki mua? Maeke a koe ke lahi e mena ka fakaako mai he fakafifitakiaga ha Timoteo.​—Gahua 16:1-3.

Liga kavi ke he 20 e tau he moui a Timoteo he kamata a ia ke fenoga mo e aposetolo ko Paulo. He moua fakamua e Timoteo e uiina nei, liga logona hifo e ia kua nakai hokotia e lotomatala haana ke fakaako mo e fakatonu e falu ha kua tote a ia. (1 Timoteo 4:11, 12; 2 Timoteo 1:1, 2, 7) Ka e fakatumau a ia ke holo ki mua, ti hogofulu e tau he mole ne pehē a Paulo ke he tau tagata Filipi: “Ka e amaamanaki au ke he Iki ko Iesu, ke fakafano vave e au a Timoteo kia mutolu.” Ko e ha ne pihia e logonaaga ha Paulo? Fakamaama e ia: “Ha kua nakai fai tagata au kua loto fakalataha mo au.”​—Filipi 2:19, 20.

Ko e ha ko e fakafifitakiaga mitaki lahi mahaki a Timoteo ma e tau motua? To fakatutala ke he ono e kakano.

1. Leveki mooli e ia e tau tagata. Tala age a Paulo ke he tau matakainaga i Filipi to “manamanatu fakamoli” a Timoteo ki a lautolu. (Filipi 2:20) Manako a Timoteo ke fakatata tumau e tau matakainaga ki a Iehova, ti makai a ia ke fakaaoga e magaaho mo e malolō haana ke lagomatai a lautolu.

Ko William ne motua ke molea 20 e tau ne tala age tumau ke he tau motua ne kotofa foou: “Fakaalofa ke he tau matakainaga. Hagaaki ke he tau manako ha lautolu ka e nakai ke he tau matagahua.” Ua tuga e tagata fakaholo pasi ne matakaki lahi ke he tulā ka hoko ke he tuaga pasi ka e nakai manamanatu ke he tau pasese ke heke he pasi.

2. Tuku fakamua e ia e fekafekauaga ha Iehova. Pehē a Paulo kua kehe a Timoteo mai ia lautolu ne “kumi e lautolu oti e tau mena ha lautolu, nakai ko e tau mena a Keriso Iesu.” (Filipi 2:21) Mailoga e Paulo ko e tau matakainaga ne viko takai ia ia ne hagaaki lahi ke he tau momoui ni ha lautolu. Falu mogo ne tuku fakamua e lautolu e tau mena ha lautolu he moui ke he fekafekauaga ki a Iehova. Ka e nakai pihia a Timoteo! Magaaho ne moua e ia e tuaga ke fekafekau fakalahi ke he Atua, ne tali atu a ia tuga a Isaia, he pehē: “Ko au hanai, kia fakafano atu e koe au.”​—Isaia 6:8.

Maeke fēfē a koe ke lagotatai he leveki e tau manako fakatagata haau mo e tau manako he fakapotopotoaga? Fakamua, muitua e fakatonuaga ha Paulo: “Kia mailoga ai e mutolu e tau mena [“ne mua atu e aoga,” NW].” (Filipi 1:10) Tuku fakamua e fekafekauaga ha Iehova. Uaaki, kalo kehe he tau matagahua ka fofō lahi e magaaho mo e malolō haau. Tala age a Paulo ki a Timoteo: “Kia hola kehe mo e tau manako lahi he tau fuata, ka kia tutuli e tututonu, mo e tua, mo e fakaalofa, katoa mo e mafola.”​—2 Timoteo 2:22.

3. Gahua malolō a ia he fekafekauaga ha Iehova. Pehē a Paulo hagaao ki a Timoteo: “Ne fekafekau a ia fakalataha mo au ha  ko e tala mitaki, tuga ne tama ke he matua tane hana.” (Filipi 2:22) Nakai teva a Timoteo. Ne gahua malolō a ia fakalataha mo Paulo, ti fakamalolō he mena nei e tuaga kapitiga ha laua.

Loga lahi e gahua i loto he fakatokatokaaga ha Iehova ke taute mogonei. Kua fiafia mooli e gahua nei mo e to lagomatai a koe ke fakatata ke he tau matakainaga haau. Ti eketaha ke tumau “kia fakamakai nakai noa ke he gahua he Iki.”​—1 Korinito 15:58.

4. Fakagahua e ia e tau mena ne fakaako e ia. Tohi e Paulo ki a Timoteo: “Ko koe, kua iloa mitaki e koe haku a kupu, ko e haku a mahani, mo e tau mena kua foli ki ai, ko e haku a tua foki, ko e fakamanavalahi, ko e fakaalofa, mo e fakauka.” (2 Timoteo 3:10) Fakagahua e Timoteo e tau mena ne fakaako e ia, ti loga foki e matagahua ne moua e ia.​—1 Korinito 4:17.

He ha he kumi e motua ne lahi e tuaga fakaagaaga ke eke mo fakafifitakiaga haau? Ko Tom ne motua ke he loga e tau tau ne manatu e motua ne lahi e tuaga fakaagaaga kua fiafia fakatagata ki a ia mo e fakamahani a ia ke he puhala mitaki lahi mahaki. Pehē a ia: “Ole tumau au mo e fakagahua e fakatonuaga haana. Atihake mafiti he mena nei e mauokafua haaku.”

5. Fakamahani tumau e ia a ia. Fakatonu e Paulo a Timoteo: “Kia fakamahani ke he mahani Atua.” (1 Timoteo 4:7) Pete he fai tagata fakaako e tagata poitufi, ka kua lata agaia ke fakamahani ne ia a ia. Tomatoma e Paulo a Timoteo: “Kia hagaaki totou tohi a koe, ti tomatoma atu, ti fakaako atu, . . . Kia manamanatu a koe ke he tau mena na, kia fakamahani a koe ki ai; kia kitia ai he tau tagata oti hāu a mafiti.”​—1 Timoteo 4:13-15.

Lata foki a koe ke fakamahani tumau ke fakaholo ki mua e lotomatala haau. Eke mo tagata fakaako fakamakutu he Tohi Tapu, ti moua tumau e tau takitakiaga foou mai he fakatokatokaaga. Ua molea e mauokafua. Hepe ke manamanatu kua iloilo lahi mahaki a koe ti maeke ke fehagai mo e ha tuaga ka e nakai kumikumi fakamitaki. Tuga a Timoteo, “[“kia mataala,” NW] a koe kia koe ni, katoa mo e hau a fakaako atu.”​—1 Timoteo 4:16.

6. Falanaki a ia ke he agaaga ha Iehova. He tutala hagaao ke he fekafekauaga ha Timoteo, fakamanatu e Paulo ki ai: “Ko e mena mitaki ne tuku atu kia koe kia leveki ai e koe ke he lagomatai mai he Agaga Tapu kua nofo i loto ia tautolu.” (2 Timoteo 1:14) Lata a Timoteo ke falanaki ke he agaaga he Atua.

Ko Donald ne motua ke he loga e tau tau, ne pehē: “Ko e tau tagata taane ne kotofa kua lata ke tokiofa e fakafetuiaga ha lautolu mo e Atua. Ko lautolu ne taute pihia to maeke ke ‘malolo tupu mau.’ Ka liogi a lautolu ma e agaaga he Atua mo e feaki e fua he agaaga, to eke a lautolu mo fakamonuina mooli ke he tau matakainaga ha lautolu.”​—Salamo 84:7; 1 Peteru 4:11.

Mafanatia ke kitia e tau fekafekau lagomatai mo e tau motua foou tuga a koe, hane fakatumau e holo ki mua e fekafekauaga ha lautolu ki a Iehova. Ko Jason ne totoku he kamataaga ne pehē: “Tali mai he eke au mo motua, loga e mena ne fakaako e au ti tupu e mauokafua haaku. Fiafia mooli au mogonei ke he kotofaaga haaku mo e onoono ki ai ko e matagahua lilifu lahi!”

To tumau nakai a koe ke holo ki mua? Ka muitua e koe e fakafifitakiaga ha Timoteo, to eke foki a koe mo fakamonuina ke he tau matakainaga haau.