Pan Biblia mo-asi se̱ tajto̱l yej ye̱kti, te̱ijliá iga nochipa tiawij tionotij nigaj pan Ta̱jli (Salmo 37:29). Biblia kipiá 66 librojtsitsin, kijkuilojkej 40 tajta̱gamej yej Dios kitapejpen. Kipiá tres mil kinientos xiwiʼ iga tsi̱ntiʼ iga moijkuiloj, wan iga tamiʼ moijkuiloj kipiá mil novecientos xiwiʼ. Nochi yej ijkuilijtoʼ pan Biblia wi̱ts de itajla̱mikilis Dios, pan Biblia kijtowa: «Nochi yej Moijkuiloj wi̱ts de Dios» (2 Timoteo 3:16). Wan iga iyespírituj santo, Dios kijlij te̱ makijkuilo̱kan ini̱nmej tajta̱gamej (2 Samuel 23:2). Wan iní̱n tajta̱gamej ayá̱ kijkuilojkej itajla̱mikilis de yejeme̱n, sinoke kijkuilojkej itajla̱mikilis de Dios. Inó̱n iga, yej kichij iga mamoijkuilo Biblia yajki Jehová. Pan 2 Pedro 1:21 kijtowa: «Tajta̱gamej kijtojkej tajto̱l yej wi̱ts de Dios wan moojkuiltijkej de iyespírituj santo».

Iga yej kijtowa Biblia wi̱ts de Dios. Wan tikmatij inó̱n, iga kua̱ Biblia kijtowa tejté̱ yej yawigoʼ (o yawi-oʼ) pano̱ti, ijkó̱n mochi̱wa. Nise̱ ta̱gaʼ welij kichi̱wa iní̱n (Josué 23:14). Dios kimati kén yawi pano̱ti tejté̱ yej áya panowa, iní̱n yejsan welij kichi̱wa. Pan Isaías 46:10 Jehová kijtowa: «Achto iga matsi̱nti tejté̱ nikijtowa kén yawi tamiti, desde ikia nikijtowa kén yawi pano̱ti tejté̱, yej áya panowa».

Ateyi seuʼ libro ken Biblia iga iní̱n wi̱ts de Dios. Momoya̱wa (o moxixi̱niá) ma̱j de dos mil millones de Biblias pan ma̱j de 450 tajto̱lmej. Aunke ikiapaya, kijtoj tejté̱ yej a̱man tikmatij de iní̱n ta̱jli. Iní̱n libro kipiá se̱san tajla̱mikilis, aunke kijkuilojkej 40 tajta̱gamej. * Wan Biblia te̱nextiliá iga Dios te̱neki, wan welij kichi̱wa iga tajta̱gamej wan siwa̱tkej makipatakan inemilis. Inó̱n iga, komatimej kimatij iga Biblia, «itajto̱l Dios» (1 Tesalonicenses 2:13).

Biblia tajtowa de tejté̱ yej ye̱kti yej Dios yawi kichi̱wati iga tejeme̱n. Kijtowa iga yej achto ta̱gaʼ, kipoloj iga maonoʼ pan se̱ ta̱jli yej monsajtiʼ, wan kijtowa kén yawi mochi̱wati seuʼ biáj iní̱n Ta̱jli monsajtiʼ. Pan Biblia kijtowa iga Dios «yawi kipojpowili̱ti nochi iyi̱xa̱mej wan niágaj ayá̱ mikiskej, ayá̱ cho̱kaskej, niágaj ayá̱ tenatos niga kipiaskej kualo̱lis. Nochi tejté̱ yej onoya, pánojya» (Revelación o Apocalipsis 21:4).

Itajto̱l Dios te̱ijliá te̱ matikchi̱wakan, te̱nono̱tsa (o te̱nawatiá) wan te̱ijliá tajto̱lmej yej te̱ojkuiltiá. Wan no̱ te̱ijliá te̱ kichi̱wilij Jehová sekin tajta̱gamej, iní̱n te̱nextiliá te̱ kimachi̱liá wan te̱ kichi̱wa Dios. Inó̱n iga, Biblia te̱pale̱wiá matiki̱xmatikan Dios. Wan no̱ te̱nextiliá kén welij timochi̱waj «amigoj de Jehová» (Santiago 2:23). Tajto̱lti Salmo 19:7, 11 wan Santiago 4:8.

Kua̱ Jesús tamachtia̱ya, achto kitajto̱ltia̱ya se̱ texto wan de ompa «kijtowa̱ya te̱ kijtosnekiá [...] iga makojasikan itajto̱l Dios» (Lucas 24:27, 45). Iní̱n a̱matajkuilo̱l ijko̱nsan no̱ te̱machtiá iga welij matikojasikan (o mati-ikpaasigan) yej kijtowa Itajto̱l Dios.

Kua̱ xiktsi̱nti iga ximomachti Biblia, tikmatisnekis ma̱j de tejté̱ yej ye̱kti yej Dios te̱ijliá. Pero sekin akinekij mamomachti̱kan, wan seuʼmej kuejkuesiwij kua̱ tikijliáj te̱ kijtowa Biblia. Pero amo xikajte̱wa iga ximomachti Biblia. Itajto̱l Dios kijtowa iga yej momachtiáj de Dios nike̱man yawij mikitij. Pan Juan 17:3 kijtowa: «Kipiaskej isatolis iga nochipa yej mamits-i̱xmatitokan téj, yej melaʼ Dios, wan yej tikti̱tan [o tigojmaʼ] Jesucristo».