Pan nochi xiwiʼ, yej tajto̱lmoya̱waj de Jehová nikchi̱waj wan nikmoya̱waj millones de Biblias wan seuʼmej a̱matajkuilo̱lmej yej aniknamakaj; nikchi̱waj Kajli kan nimonechkowaj wan sucursales o Betel wan nikye̱ʼtaliáj kua̱ sosoliwi ini̱nmej kajlimej. Wan no̱ momaka achi tomin iga manikpale̱wikan miles de betelitas wan misioneros, wan nikojmakiliáj tokni̱wan takual wan seu’ tejté̱ kan tasosolowa ejeka o a̱ʼ. ¿De ka̱n ki̱sa tomin iga wel mamochi̱wa nochi iní̱n?

Niágaj akimaka diezmo niga niktajtanij tomin. Nikmatij iga kiwi̱ga komati tomin iga wel mamoijto itajto̱l Dios, pero niágaj aniktajtaniliáj tomin. Ikia pan a̱maʼ La Atalaya kijtoj iga nochi iní̱n welsan mochi̱wa iga Jehová te̱pale̱wiá. Wan no̱ kijtoj iní̱n: «[To-organización] nike̱man kitajtantinemis tomin niga kitajtanilis tajta̱gamej iga makipale̱wikan». Wan ijkó̱n mochi̱wa (Mateo 10:8).

Miakej kiyokamakaj tomin. Miakej kiye̱’itaj iga nitamachtiáj pan Biblia wan ne̱pale̱wiáj kua̱ kiyokamakaj tomin. Yej Tajto̱lmoya̱waj de Jehová nikmakaj tiempoj, tajpal wan tomin iga wel mamochi̱wa pan nochi Ta̱jli yej kineki Dios (1 Crónicas 29:9). Pan Kajli kan nimonechkowaj wan kan nikpiáj Weyi tanechko̱lis onoʼ sekin cajas kan wel tikakiáj totomin siga tiknekij matitapalewikan. Iní̱n no̱ wel mochi̱wa pan Internet pan jw.org. Komati de iní̱n tomin kimakaj yej akipiáj pux tomin, ijkó̱n kichi̱waj ken viuda yej akipiaya tomin, de yej Jesús ye̱’tajtoj iga kakij o̱me tomintsitsin pan cajas yej onoya pan temploj (Lucas 21:1-4). Nochimej wel ke̱naj (o ge̱waj) achi tomin iga makiyokamakakan ijkó̱n «ken kimachi̱liáj pan iyo̱loj» (1 Corintios 16:2; 2 Corintios 9:7).

Tikmatij iga Jehová kichijtos iga nochi yej kiweyichi̱wasnekij wan tomin wel makichijtokansan iga matitajto̱lmoya̱wakan de Irreinoj Dios, wan ijkó̱n makichi̱wa yej yéj kineki (Proverbios 3:9).

• ¿Té íga iní̱n organización ayéj ijko̱nsan ken seuʼmej religiones?

• ¿Te̱ mochi̱wa wan tomin yej tikyokamakaj?